31st May2021

ກອງບັນຊາການ ປກສ ເມືອງສີໂຄດຕະບອງ ສຶກສາອົບຮົມ, ເຮັດບົດບັນທຶກກັບບັນດາຮ້ານ ທີ່ບໍ່ປະຕິບັດຕາມຄຳສັ່ງເລກທີ 15/ນຍ

by somchan

ໃນວັນທີ 29 ພຶດສະພາ ທີ່ຜ່ານມາ, ເຈົ້າໜ້າທີ່ກອງບັນຊາການ ປກສ ເມືອງສີໂຄດຕະບອງ ນະຄອນຫຼວງວຽງຈັນ , ໄດ້ສົມທົບກັບ ພະນັກງານກໍ່ສ້າງຮາກຖານ ແລະ ອຳນາດການປົກຄອງບ້ານພາຍໃນເມືອງໄດ້ອອກກວດກາລາດຕະເວນ ບັນດາຫ້າງຮ້ານ ທີ່ຍັງເປີດໃຫ້ບໍລິການເຊີ່ງເປັນການລະເມີດຄຳສັ່ງ ເລກທີ 15/ນຍ ໃນໄລຍະຄວບຄຸມ ປ້ອງກັນການແຜ່ລະບາດຂອງພະຍາດ ໂຄວິດ 19.

ພັທ ຄໍາຫຼ້າ ພົົມມະສານ ຫົວໜ້າ ກອງບັນຊາການ ປກສ ເມືອງສີໂຄດຕະບອງ ໃຫ້ຮູ້ວ່າ: ຜ່ານການອອກກວດກາລາດຕະເວນ ຂອງເຈົ້າໜ້າທີ່ໄດ້ພົບເຫັນ 7 ຮ້ານທີ່ລະເມີດ ຄໍາສັ່ງ ເລກທີ 15/ນຍ, ປະກອບມີຮ້ານ 7 ຮ້ານຄື: ຮ້ານອາຫານຕົ້ນຄໍ້, ຮ້ານເຝີ ໄຟແດງສີໄຄ, ຮ້ານໝີ່ກ້ຽວຕີມຊຳ ສາຂາ 9, ຮ້ານ ຈ້າວໝີ່ເປັດ, ແລະ ຮ້ານຂາຍເຄື່ອງ ນ.ລີ ວິມາດ, ຮ້ານ ຕັດຜົມ ແລະ ເດີ່ນຕີບູ່ນ, ທີ່ເປີດບໍລິການເກີນໂມງທີ່ກໍານົດໄວ້, ພ້ອມທັງບໍ່ປະຕິບັດຕາມມາດຕະການໃນການຮັກສາໄລຍະຫ່າງ. ດັ່ງນັ້ນ ກອງບັນຊາການປກສ ເມືອງສີໂຄດຕະບອງ ນະຄອນຫຼວງວຽງຈັນ ຈື່ງໄດ້ສຶກສາອົບຮົມກ່າວເຕືອນ ພ້ອມທັງເຮັດບົດບັນທຶກ ກັບເຈົ້າຂອງຮ້ານທັງ 7 ຮ້ານ.

ພ້ອມນີ້ຫົວໜ້າກອງບັນຊາການ ປກສ ເມືອງສີໂຄດຕະບອງ ຍັງຮຽກຮ້ອງມາຍັງປະຊາຊົນຊາວ ນະຄອນຫຼວງວຽງຈັນ ກໍຄືຜູ້ປະກອບການ, ບັນດາຫົວໜ່ວຍທຸລະກິດ ພາຍໃນເມືອງສີໂຄດຕະບອງ ໃຫ້ປະຕິບັດຕາມຄໍາສັ່ງເລກທີ 15/ນຍ ແລະ ແຈ້ງການເລກທີ 02/ຈນວ ວາງອອກຢ່າງເຂັ້ມງວດ.

 

Off

Comments are closed.