31st May2021

ຄະນະສະເພາະກິດ ແຂວງໄຊສົມບູນ ລົງຊຸກຍູ້ວຽກງານສະກັດກັ້ນພະຍາດໂຄວິດ 19 ຢູ່ເມືອງລ້ອງຊານ

by somchan

ຄະນະສະເພາະກິດ ແຂວງໄຊສົມບູນ ໄດ້ລົງເຄື່ອນໄຫວຕິດຕາມ ແລະ ຊຸກຍູ້ ວຽກງານສະກັດກັ້ນການລະບາດ ຂອງພະຍາດໂຄວິດ-19 ຢູ່ເມືອງລ້ອງຊານ ໃນວັນທີ 29 ພຶດສະພາ 2021 ນີ້ ໂດຍການນຳພາຂອງ  ພັທ ບຸນທັນ ອິນທະວົງ, ຫົວໜ້າຫ້ອງການກອງບັນຊາການປ້ອງກັນຄວາມສະຫງົບ ແຂວງໄຊສົມບູນ, ກອງເລຂາຄະນະສະເພາະກິດ ຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.

ໃນໂອກາດລົງເຄື່ອນໄຫວຊຸກຍູ້ ວຽກງານສະກັດກັ້ນພະຍາດໂຄວິດ 19 ຢູ່ເມືອງລ້ອງຊ້ານ ໃນຄັ້ງນີ້ ຄະນະສະເພາະກິດ ຂັ້ນແຂວງ ໄດ້ຮັບຟັງການລາຍງານ ກ່ຽວກັບມາດຕະການສະກັດກັ້ນພະຍາດໂຄວິດ 19 ຈາກ ທ່ານ ສົມຄິດ ເພຍວົງ ຮອງເຈົ້າເມືອງ ລ້ອງຊານ, ຫົວໜ້າຄະນະສະເພາະກິດ ຂັ້ນເມືອງ, ເຊິ່ງຕະຫລອດໄລຍະຜ່ານມາ ຄະນະສະເພາະກິດ ເມືອງລ້ອງຊານ ໄດ້ລົງໂຄສະນາເຜີຍແຜ່-ແນະນຳໃຫ້ປະຊາຊົນໃນທົ່ວເມືອງ ໄດ້ຮັບຮູ້ກ່ຽວກັບການປ້ອງກັນພະຍາດໂຄວິດ 19 ໂດຍການສຶກສາອົບຮົມໃຫ້ເຂົາເຈົ້າຮັກສາຕົວ ຢູ່ເຮືອນຂອງໃຜລາວ, ພ້ອມທັງລົງຕິດຕາມການຄ້າຂາຍ, ລາຄາສິນຄ້າ, ກວດກາຄວາມເປັນລະບຽບຮຽບຮ້ອຍຂອງສັງຄົມ ແລະ ຕິດຕາມຄົນເຂົ້າ-ອອກ ພາຍໃນເມືອງ ຢ່າງເຂັ້ມງວດ. ໃນນີ້, ໄດ້ຕິດຕາມ ແລະ ເຝົ້າລະວັງກຸ່ມຄົນ-ບຸກຄົນ ທີ່ມີຄວາມສ່ຽງເພື່ອນຳເຂົ້າສູນຈຳກັດບໍ ລິເວນຂອງເມືອງ ຫລື ຈຳກັດຢູ່ເຮືອນ, ຢູ່ທີ່ພັກພາອາໄສ ແລະ ສວນ ມີທັງໝົດ 22 ຄົນ. ໃນນີ້ມີຜູ້ເຂົ້າສູນຈຳກັດບໍລິເວນຂອງເມືອງ ຈຳນວນ 9 ຄົນ, ຈຳກັດຢູ່ເຮືອນ, ຫ້ອງແຖວ ແລະ ຢູ່ສວນ 13 ຄົນ, ໄດ້ເກັບຕົວຢ່າງໄປວິເຄາະກວດ ຈຳນວນ 12 ກໍລະນີ, ຜົນອອກມາ 9 ກໍລະນີ ເປັນລົບ ແລະ ອີກ 3 ກໍລະນີ ຍັງລໍຖ້າຜົນກວດ.

ໂອກາດດັ່ງກ່າວ,  ພັທ ບຸນທັນ ອິນທະວົງ ໄດ້ເນັ້ນໜັກໃຫ້ຄະນະສະເພາະກິດ ເມືອງລ້ອງຊານ ຈົ່ງສືບຕໍ່ວາງມາດຕະການສະກັດກັ້ນ ແລະ ປ້ອງກັນພະຍາດໂຄວິດ-19 ດ້ວຍຄວາມຮັບຜິດຊອບສູງ ໂດຍເອົາໃຈໃສ່ກວດກາຄົນເຂົ້າ – ອອກເມືອງ ຢ່າງເຂັ້ມງວດ ທັງນີ້ກໍເພື່ອເຮັດໃຫ້ເມືອງລ້ອງຊານກໍຄື ແຂວງໄຊສົມບູນ ຮັບປະກັນໄດ້ດ້ານຄວາມປອດໄພ ຢ່າງໜັກແໜ້ນ ແລະ ກ້າວເຂົ້າສູ້ສະພາບປົກກະຕິໂດຍໄວ. ຈາກນັ້ນ ກໍໄດ້ມອບເງິນ 15 ລ້ານກີບ ໃຫ້ຄະນະສະເພາະກິດ ເມືອງລ້ອງຊານ ເພື່ອຊຸກຍູ້ ແລະ ໝູນໃຊ້ ເຂົ້າໃນການເຄື່ອນໄຫວວຽກງານສະກັດກັ້ນພະຍາດໂຄວິດ-19 ໃຫ້ມີຄວາມສະດວກສະບາຍ ແລະ ມີປະສິດທິຜົນ ໃນການຈັດຕັ້ງປະຕິບັດຕົວຈິງ.

ຈາກນັ້ນ, ຄະນະສະເພາະກິດ ຂັ້ນແຂວງ ໄດ້ລົງຕິດຕາມບັນດາຈຸດຕັ້ງດ່ານກວດຄົນເຂົ້າ-ອອກ ພາຍໃນເມືອງລ້ອງຊານ ພ້ອມທັງນຳເອົາເຈວລ້າງມື ແລະ ຜ້າອັດປາກ-ດັງ ຈຳນວນໜຶ່ງ ມາມອບໃຫ້ແຕ່ລະຈຸດຕື່ມອີກ.

 

Off

Comments are closed.