01st Jun2021

ກອງບັນຊາການ ປກສ ນະຄອນຫຼວງວຽງຈັນ ສຳເລັດການຕິດຕັ້ງລະບົບກອງປະຊຸມທາງໄກ ( Video Conference ) ໃຫ້ ປກສ ກຸ່ມໜອງທາ

by somchan

ໃນວັນທີ 29 ພຶດສະພາ 2021 ຄະນະຮັບຜິດຊອບວຽກງານກອງປະຊຸມທາງໄກ ( Video Conference ) ກອງບັນຊາການ ປກສ ນະຄອນຫຼວງວຽງຈັນ ສຳເລັດການຕິດຕັ້ງລະບົບກອງປະຊຸມທາງໄກໃຫ້ ປກສ ກຸ່ມໜອງທາ ເມືອງຈັນທະບູລີ ນະຄອນຫຼວງວຽງຈັນ.

ພັທ ບຸນລັບ ໄຊຍະວົງ ຮອງຫົວໜ້າຫ້ອງການ ກອງບັນຊາການ ປກສ ນະຄອນຫຼວງວຽງຈັນ ກ່າວວ່າ:  ການລົງຕິດຕັ້ງລະບົບກອງປະຊຸມທາງໄກ ໃຫ້ ປກສ ກຸ່ມໜອງທາ ແມ່ນສຳເລັດ ແລະ ພ້ອມເລີ່ມນໍາໃຊ້ໄດ້ໃນວັນ 2 ມີຖຸນາ 2021 ເປັນຕົ້ນໄປ ເຊິງເປັນກຸ່ມທຳອິດໃນຈຳນວນ 59 ກຸ່ມ ທົ່ວນະຄອນຫຼວງວຽງຈັນ ແລະ ຍັງຈະສືບຕໍ່ຕິດຕັ້ງໃຫ້ຈຳນວນ 58 ກຸ່ມບ້ານ ແລະ 20 ສະຖານີ ຄາດວ່າຈະໃຫ້ສຳເລັດພາຍໃນເດືອນ ກໍລະກົດ 2021 ນີ້.

ພັທ ບຸນລັບ ໄຊຍະວົງ ໃຫ້ຮູ້ອີກວ່າ: ການຕິດຕັ້ງ ແລະ ນຳໃຊ້ລະບົບກອງປະຊຸມທາງໄກ ( Video Conference ) ແນໃສ່ເຮັດໃຫ້ບັນດາສະຖານີ, ປກສ ເມືອງ ແລະ ກຸ່ມບ້ານ ໄດ້ຮັບການຊີ້ນຳຈາກຄະນະພັກ-ຄະນະບັນຊາໂດຍກົງ ແລະ ມີຄວາມສະດວກ, ຄ່ອງແຄ້ວ, ວ່ອງໄວຫຼາຍຂຶ້ນກວ່າເກົ່າ ໃນການປະຊຸມ, ສ່ອງແສງ, ລາຍງານສະພາບເຫດການຕ່າງໆຮ່ວມກັນ ເພື່ອຄວາມວ່ອງໄວໃນການແກ້ໄຂສະພາບການທີ່ເກີດຂຶ້ນໄດ້ທັນເວລາ ພ້ອມທັງເປັນການປະຢັດເວລາ ແລະ ຄ່າໃຊ້ຈ່າຍຕ່າງໆໄດ້ເປັນຢ່າງດີ. ສຳລັບທຶນຮອນ ແລະ ອຸປະກອນໃນການຕິດຕັ້ງໃນຄັ້ງນີ້ ແມ່ນໄດ້ມາຈາກການປະກອບສ່ວນຂອງສັງຄົມ ແລະ ການຈັດຕັ້ງ ຕ່າງໆ, ໃນການຕິດຕັ້ງລະບົບດັ່ງກ່າວແມ່ນມີຄວາມສະດວກວ່ອງໄວ ຍ້ອນໄດ້ຮັບການໃກ້ທິດຕິດແທດຈາກຄະນະພັກ-ຄະນະບັນຊາ ກອງບັນຊາການ ປກສ ນະຄອນຫຼວງວຽງຈັນ ບວກກັບຄວາມຊຳນິ-ຊຳນານ ຄ່ອງແຄ້ວ ຂອງວິຊາການ ແລະ ພະນັກງານ-ນັກຮົບຢູ່ໃນກຸ່ມ ແມ່ນເຫັນໄດ້ເຖິງຄວາມສຳຄັນຂອງວຽກງານດັ່ງກ່າວ.

 

Off

Comments are closed.