01st Jun2021

ຄະນະຜູ້ແທນຂັ້ນສູງສະພາແຫ່ງຊາດ ສຳເລັດການເຂົ້າຮ່ວມກອງປະຊຸມສະມັດຊາ ສະຫະພັນລັດຖະສະພາສາກົນ ແບບທາງໄກ

by somchan

ຄະນະຜູ້ແທນຂັ້ນສູງຂອງສະພາແຫ່ງຊາດລາວ ນໍາໂດຍ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແລະ ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສະມັດຊາລັດຖະສະພາສາກົນ ຄັ້ງທີ 142 (The 142th Assembly of the Inter-Parliamentary Union Assembly) ຊຶ່ງໄດ້ຈັດຂຶ້ນໃນລະຫວ່າງວັນທີ 24-28 ພຶດສະພາ 2021 ຜ່ານມາ, ໃນຮູບແບບກອງປະຊຸມທາງໄກ.

ກອງປະຊຸມຄັ້ງນີ້, ໄດ້ດຳເນີນໄປພາຍໃຕ້ຫົວຂໍ້: “ການເອົາຊະນະການແຜ່ລະບາດຂອງເຊື້ອພະຍາດໃນປັດຈຸບັນ ແລະ ສ້າງສິ່ງທີ່ດີກວ່າເກົ່າໃນອານາຄົດ: ບົດບາດຂອງລັດຖະສະພາ” (Over coming the pandemic today and building a better tomorrow: the role of parliaments)’’. ໂດຍມີສະມາຊິກສະພາແຫ່ງຊາດທົ່ວໂລກຫລາຍກວ່າ 700 ທ່ານ ທີ່ມາຈາກ 130 ປະເທດເຂົ້າຮ່ວມ. ນອກນີ້, ຍັງມີຄະນະຜູ້ແທນຈາກອົງການສະຫະປະຊາຊາດ ແລະ ຕົວແທນຈາກອົງການລັດຖະສະພາຈາກພາກພື້ນຕ່າງໆຂອງໂລກ ເຂົ້າຮ່ວມຢ່າງຫລວງຫລາຍ.

ໃນກອງປະຊຸມ ທ່ານ ນາງ ສູນທອນ ໄຊຍະຈັກ ໄດ້ຍົກໃຫ້ເຫັນເຖິງຄວາມເອົາໃຈໃສ່ ຂອງລັດຖະບານ ກໍຄື ສະພາແຫ່ງຊາດລາວ ໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ໃນ ສປປ ລາວ ໂດຍການດໍາເນີນມາດຕະການຕ່າງໆ ເຊັ່ນ: ການສັ່ງປິດຊົ່ວຄາວສະຖານບັນເທິງ, ສະຖານບໍລິການ, ສະຖາບັນການສຶກສາ ແລະ ອື່ນໆ ເພື່ອການຮັກສາໄລຍະຫ່າງທາງດ້ານສັງຄົມ, ລວມໄປເຖິງການສ້າງແຫລ່ງຂໍ້ມູນຂ່າວສານທີ່ຖືກຕ້ອງ ແລະ ຈັດຕັ້ງປະຕິບັດການສັກວັກແຊັງ ເພື່ອປ້ອງກັນພະຍາດ ໂຄວິດ-19 ໃຫ້ແກ່ປະຊາຊົນລາວ. ພ້ອມດຽວກັນນີ້, ທ່ານຍັງໄດ້ຕີລາຄາສູງ ຕໍ່ການຊ່ວຍເຫຼືອຂອງປະເທດຕ່າງໆ ຕໍ່ກັບ ສປປ ລາວ ແລະ ຮຽກຮ້ອງໃຫ້ສະມາຊິກ IPU ຮ່ວມມືກັນຕ້ານການແຜ່ລະບາດຂອງພະຍາດໂຄວິດ-19 ແລະ ພ້ອມກັນຜ່ານຜ່າວິກິດໃນຄັ້ງນີ້.

ກອງປະຊຸມໃນຄັ້ງນີ້, ຍັງໄດ້ມີການເລືອກຕັ້ງເອົາຄະນະກໍາມະການ ວ່າດ້ວຍສິດທິມະນຸດຂອງສະມາຊິກລັດຖະສະພາ IPU ຄົນໃໝ່ ຈຳນວນ 6 ທ່ານ, ຄະນະກຳມະການວ່າດ້ວຍການຊັກຖາມວຽກງານຕາເວັນອອກກາງ ຈຳນວນ 2 ທ່ານ ແລະ ການເລືອກຕັ້ງເອົາໂຕແທນຈາກກຸ່ມລັດຖະສະພາອາຊີ-ປາຊີຟິກ ເພື່ອດຳລົງຕຳແໜ່ງງານ ໃນຄະນະກຳມະການປະຈຳຕ່າງໆ ຂອງ IPU ອີກຫລາຍຕຳແໜ່ງ, ເຊິ່ງຄະນະຜູ້ແທນຂອງສະພາແຫ່ງຊາດລາວ ກໍ່ໄດ້ໃຊ້ສິດຢ່າງເຕັມສ່ວນ ໃນການລົງຄະແນນສຽງເລືອກຕັ້ງໃນຄັ້ງນີ້ ຕາມຄະແນນສຽງ IPU ກຳນົດຄື ປະເທດລະບໍ່ເກີນ 3 ສຽງ, ກອງປະຊຸມໄດ້ດໍາເນີນໄປໃນບັນຍາກາດ ທີ່ທຸກຝ່າຍເຫັນດີເປັນເອກະພາບ, ສືບຕໍ່ຮ່ວມມືໃນພາກພື້ນ ແລະ ສາກົນ.

 

Off

Comments are closed.