01st Jun2021

ເມືອງຄູນຄຳ ສືບຕໍ່ເຂັ້ມງວດວຽກງານປ້ອງກັນແລະ ສະກັດກັ້ນການລະບາດຂອງພະຍາດ ໂຄວິດ-19

by somchan

ຕາມການລາຍງານຈາກ ທ່ານ ແກ້ວວິໄລ ໄຊຍະບຸດ ເຈົ້າເມືອງຄູນຄຳ ແຂວງຄຳມ່ວນ ກ່ຽວກັບສະພາບການຄວບຄຸມ, ປ້ອງກັນ ແລະ ສະກັດກັ້ນການລະບາດຂອງພະຍາດ ໂຄວິດ-19 ເມື່ອບໍ່ດົນນີ້ວ່າ: ພາຍຫລັງທີ່ໄດ້ຮັບຄຳສັ່ງກ່ຽວກັບການເພີ່ມທະວີຄວາມເຂັ້ມງວດບັນດາມາດຕະການຕ່າງໆຈາກຂັ້ນເທິງ ກໍໄດ້ຜັນຂະຫຍາຍມາເປັນຂອງເມືອງເພື່ອໃຫ້ສອດຄ່ອງກັບສະພາບຕົວຈິງຂອງທ້ອງຖິ່ນ ໂດຍໄດ້ປັບປຸງຄືນຂໍ້ຕົກລົງວ່າດ້ວຍການແຕ່ງຕັ້ງຄະນະສະເພາະກິດປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19 ຂັ້ນເມືອງ ແລະ ໄດ້ອອກແຈ້ງການພ້ອມທັງໄດ້ມອບໝາຍໃຫ້ຄະນະນຳຂັ້ນເມືອງ ລົງໂຄສະນາເຜີຍແຜ່ເຊື່ອມຊຶມໃຫ້ຄະນະພັກ-ອຳນາດການປົກຄອງບ້ານ ແລະ ປະຊາຊົນມີຄວາມຮັບຮູ້, ເຂົ້າໃຈ ແລະ ເຫັນໄດ້ໄພອັນຕະລາຍຂອງພະຍາດດັ່ງກ່າວ.

ປັດຈຸບັນ, ເມືອງຄູນຄຳ ແຂວງຄຳມ່ວນ ມີສູນກັກກັນ 1 ແຫ່ງ, ເລີ່ມແຕ່ວັນທີ 02 ມັງກອນຫາ 26 ພຶດສະພາ 2021 ມີແຮງງານທີ່ເຂົ້າສູນກັກກັນທັງໝົດ 86 ຄົນ. ໃນນັ້ນ, ຄົບຕາມກຳນົດ 14 ວັນ ແລະ ກັບເມືອຫາຄອບຄົວແລ້ວ 78 ຄົນ, ພ້ອມນັ້ນ ກໍ່ໄດ້ສອບສວນປະຫວັດການເດີນທາງ ແລະ ແນະນຳສຸຂະສຶກສາ-ວິທີຮັກສາສຸຂະພາບ, ວິທີປ້ອງກັນຕົນເອງເພື່ອຫລີກລ້ຽງການຕິດເຊື້ອພະຍາດໂຄວິດ-19; ໄດ້ຕັ້ງຈຸດກວດກາຄົນເຂົ້າ-ອອກເມືອງຢູ່ຈຸດ 03 ແຍກຄູນຄຳ-ກອງລໍ ເພື່ອກວດກາກຸ່ມຄົນທີ່ເດີນທາງມາຈາກເຂດທີ່ມີຄວາມສ່ຽງ, ໄດ້ອອກໜັງສືເດີນທາງໃຫ້ປະຊາຊົນທີ່ມີຄວາມຈຳເປັນ ໃນການເດີນທາງໄປຕ່າງເມືອງ, ຕ່າງແຂວງໄດ້ທັງໝົດ 284 ສະບັບ ແລະ ໄດ້ສັກວັກແຊງປ້ອງກັນພະຍາດໂຄວິດ-19 ໃຫ້ແກ່ພະນັກງານ, ທະຫານ, ຕຳຫລວດ ແລະ ປະຊາຊົນກຸ່ມທີ່ມີຄວາມສ່ຽງໄດ້ແລ້ວ 1.093 ຄົນ.

ທ່ານເຈົ້າເມືອງຄູນຄຳ ກ່າວຕື່ມວ່າ: ສຳລັບທິດທາງແຜນການປ້ອງກັນພະຍາດໂຄວິດ-19 ໃນຕໍ່ໜ້າແມ່ນຈະສືບຕໍ່ສຶກສາອົບຮົມການເມືອງ-ແນວຄິດໃຫ້ແກ່ຄະນະພັກ, ອຳນາດການປົກຄອງ ແລະ ປະ ຊາຊົນບັນດາເຜົ່າໃຫ້ມີຄວາມຮັບຮູ້, ເຂົ້າໃຈເຫັນໄດ້ຄວາມອັນຕະລາຍຂອງພະຍາດດັ່ງກ່າວ, ເປັນເຈົ້າການໃນການຈັດຕັ້ງປະຕິບັດຄຳສັ່ງ, ຄຳແນະນຳຂອງຂັ້ນເທິງກໍ່ຄືຂອງເມືອງວາງອອກຢ່າງເຂັ້ມງວດ, ສືບ ຕໍ່ປິດສະຖານທີ່ທ່ອງທ່ຽວ, ຮ້ານບັນເທີງ, ຮ້ານຂາຍເຫລົ້າ-ເບຍ, ຮ້ານຄາຣາໂອເກະ ແລະ ຫ້າມຈັດງານດອງ, ງານບຸນປະເພນີຕ່າງໆ, ປຸກລະດົມພະນັກງານ, ທະຫານ, ຕຳຫລວດ ແລະ ປະຊາຊົນບັນດາເຜົ່າໄປສັກວັກແຊງໃຫ້ບັນລຸຕາມແຜນການ, ສືບຕໍ່ລົງກວດກາ, ຄຸ້ມຄອງລາຄາສິນຄ້າທຸກປະເພດບໍ່ໃຫ້ມີການກັກຕຸນ ແລະ ສວຍໂອກາດຂຶ້ນລາຄາສິນຄ້າ, ເອົາໃຈໃສ່ຕິດຕາມ,ກວດກາ, ແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ເປັນຕົ້ນ ບັນຫາຢາເສບຕິດ, ຄ້າຂາຍເຖື່ອນພ້ອມທັງເຄື່ອນໄຫວປ້ອງກັນເວນຍາມຕາມຂອບເຂດຊາຍແດນເຊື່ອມຕໍ່ ແລະ ຈຸດສຳຄັນຕ່າງໆພາຍໃນເມືອງ.

 

Off

Comments are closed.