02nd Jun2021

ຖະແຫຼງຂ່າວພະຍາດ COVID-19 ປະຈຳວັນພຸດ ວັນທີ 2 ມິຖຸນາ ປີ 2021 ມີຜູ້ຕິດເຊື້ອໃຫມ່ 5 ຄົນ

by somchan

ດຣ. ສີສະຫວາດ ສຸດທານິລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງ ສາທາລະນະສຸກ ໄດ້ຕາງໜ້າກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19, ຖະແຫຼງຂ່າວສະພາບການການລະບາດຂອງພະຍາດ  COVID-19  ຢູ່ ສປປ ລາວ ປະຈຳວັນພຸດ ວັນທີ 2 ມິຖຸນາ 2021 ວ່າ:  ຜ່ານການກວດວິເຄາະຫາເຊື້ອພະຍາດໂຄວິດ-19 ຈາກການເກັບຕົວຢ່າງກຸ່ມສ່ຽງໃນຂອບເຂດທົ່ວປະເທດ  ໃນວັນທີ 1 ມິຖຸນາ 2021 ທັງຫມົດ 1.932 ຕົວຢ່າງ; ພົບວ່າມີຜູ້ຕິດເຊື້ອໃຫມ່ເພີ່ມອີກ 5  ຄົນ.

ດຣ. ສີສະຫວາດ ສຸດທານິລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງ ສາທາລະນະສຸກ ຕາງໜ້າກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19, ຍັງໃຫ້ຮູ້ອີກວ່າ: ກ່ຽວກັບກໍລະນີຜູ້ຕິດເຊື້ອໃຫມ່ ຈາກນະຄອນຫຼວງວຽງຈັນ ທັງ 4 ຄົນ, ກ່ອນຈະມີການຢັ້ງຢືນວ່າຕິດເຊື້ອພະຍາດໂຄວິດ-19 ນັ້ນ, ພວກກ່ຽວໄດ້ມີການເຄື່ອນໄຫວໄປມາຕາມສະຖານທີ່ຕ່າງໆ ຫຼາຍພໍສົມຄວນ; ດັ່ງນັ້ນ ບຸກຄົນໃດຫາກຄິດວ່າຕົນເອງມີຄວາມສ່ຽງ ຫຼື ໄດ້ໄປສະຖານທີ່ ທີ່ຜູ້ຕິດເຊື້ອໄດ້ໄປໃນມື້ດຽວກັນ ແລະ ຜູ້ທີ່ສຳຜັດໃກ້ຊິດທຸກຄົນ ຕ້ອງໄດ້ກັກບໍລິເວນຕົນເອງ ຫຼື ເຂົ້າໄປພົບແພດຫມໍ ເພື່ອກວດຫາເຊື້ອ ແລະ ເພື່ອປ້ອງກັນບໍ່ໃຫ້ມີການນໍາເຊື້ອໂຄວິດ-19 ໄປແຜ່ໃນຊຸມຊົນ ແລະ ໃນຄອບຄົວ.

ທ່ານ ຍັງໃຫ້ຮູ້ອີກວ່າ ປັດຈຸບັນ ສປປ ລາວ ຍັງສືບຕໍ່ເຝົ້າລະວັງຢ່າງເຂັ້ມງວດ ຢູ່ຕາມຊາຍແດນ ແລະ ດ່ານກວດກາການເຂົ້າ-ອອກເມືອງ ໃນຂອບເຂດທົ່ວປະເທດ ເພື່ອປ້ອງກັນບໍ່ໃຫ້ມີການນໍາເຊື້ອພະຍາດໂຄວິດ-19 ເຂົ້າມາແຜ່ລະບາດຢູ່ພາຍໃນປະເທດ; ສໍາລັບບຸກຄົນທີ່ໄດ້ຮັບອະນຸຍາດເດີນທາງເຂົ້າມາ ສປປ ລາວ ແລະ ແຮງງານລາວ ທີ່ເດີນທາງກັບຄືນປະເທດ ທຸກຄົນແມ່ນຈະໄດ້ມີການກວດ ວັດແທກອຸນຫະພຸມ; ພ້ອມທັງ ໄດ້ນໍາສົ່ງເຂົ້າສູນກັກກັນຕາມກໍານົດ 14 ວັນ ແລະ ໄດ້ຮັບການເກັບຕົວຢ່າງ ເພື່ອກວດຫາເຊື້ອຫມົດທຸກຄົນ.

Off

Comments are closed.