14th Jul2015

ກວດຄົ້ນລົດກະບະພົບເຫັນເຮໂລອິນ 200 ແທ່ງ

by somchan

ໃນວັນທີ ກໍລະກົດ 2015 ເຈົ້າໜ້າທີຕຳຫຼວດ ສະກັດກົ້ນແລະ ຕ້ານຢາເສບຕິດ ປກສ ແຂວງອຸດົມໄຊ ໄດ້ຈັບຕົວຜູ້ລັກລອບຄ້າຂາຍຢາເສບຕິດໄດ້ 2 ຄົນພ້ອມຂອງກາງ ຢາເສບຕິດປະເພດເຮໂລອິນ 200 ແທ່ງ ໜັກ 77,6 ກິໂລກຣາມ ຢູ່ເສັ້ນທາງເລກທີ 13 ເໜືອເຂດບ້ານກໍນ້ອຍເມືອງໄຊແຂວງອຸດົມໄຊ ຜູ້ຕ້ອງຫາທັງສອງຄື: ທ້າວຈຽງເນັ່ງ ແຊ່ມ້າ ອາຍຸ 41 ປີ ປະຊາຊົນຢູ່ບ້ານສິລິລາດ ເມືອງມົນພະ ແຂວງຕາກປະເທດໄທ ແລະ ທ້າວເສັງວ່າງ ອາຍຸ 27 ປີ ປະຊາຊົນຢູ່ບ້ານຝາຍເມືອງຫ້ວຍຊາຍ ແຂວງບໍ່ແກ້ວ.

ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດປກສ ແຂວງ ອຸດົມໄຊ ໃຫ້ຮູ້ວ່້າ: ພາຍຫຼັງໄດຮັບຂໍ້ມູນຈາກຂ່າວວ່າ: ມີກຸ່ມຄົນບໍ່ດີຈຳນວນໜຶ່ງມີການເຄື່ອນໄຫວຂົນສົ່ງຢາເສບຕິດປະເພດເຮໂລອິນລາຍໃຫຍ່ອອກຈາກແຂວງບໍ່ແກ້ວຜ່ານແຂວງອຸດົມໄຊຈະໄປແຂວງຊຽງຂວາງ. ຜ່ານການສຶບສວນຂອງເຈົ້າໜ້າທີ່ເຫັນວ່າມີຂໍ້ມູນຄວາມຈິງແທ້ ຈຶ່ງຕັ້ງຈຸດກວດກາຢູ່ເຂດບ້ານກໍນ້ອຍເມືອງໄຊ,ຮອດເວລາ 14 ໂມງຂອງວັນທີ 8 ກໍລະກົດ ຈຶ່ງພົບເຫັນລົດເປົ້າໝາຍເຊິ່ງເປັນລົດກະບະ NISSAN ສີປອນເງິນ ໝາຍເລກທະບຽນ ບຊ 1395 ແຂວງຕາກປະເທດໄທ ແລ່ນມາດ້ວຍຄວາມໄວ; ພໍມາຮອດດ່ານກວດກາ ເຈົ້າໜ້າທີ່ຈຶ່ງຂໍກວດຄົ້ນລົດ ແລ້ວພົບເຫັນຂອງກາງຢາເສບຕິດປະເພດເຮໂລອິນ ຈຳນວນ 200 ແທ່ງໜັກ 77,6 ກິໂລກຣາມທີ່ຊຸກເຊື່ອງໄວ້ຝາກະບະ ແລະ ຕີນສະກົວຂອງລົດພ້ອມເງິນຈຳນວນ 57,000ບາດ, ກະເປົ່າ 4 ໜ່ວຍ ໂທລະສັບ 3 ໜ່ວຍໂມງໃສ່ແຂນ 1 ໜ່ວຍແລະ ເຄື່ອງອື່ນໆອີກຈຳນວນໜຶ່ງ.

ປະຈຸບັນລາຍຄະດີດັ່ງກ່າວກຳລັງຢູ່ໃນຂັ້ນຕອນການດຳເນີນການສືບສວນ-ສອບສວນຂອງເຈົ້າໜ້າທີ່ເພື່ອຂະຫຍາຍຜົນຫາຜູ້ຮ່ວມກະທຳຜິດ ແລະ ທີ່ມາຂອງຢາເສບຕິດຈຳນວນດັ່ງກ່າວ.

Off

Comments are closed.