06th Aug2015

ກັກຕົວສອງອ້າຍນ້ອງພ້ອມຢາບ້າ 20.000 ເມັດ

by somchan

ເມື່ອທ້າຍເດືອນກໍລະກົດທີ່ຜ່ານມາ, ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງນ້ຳທາ ໄດ້ກັກຕົວຜູ້ກະທຳຜິດລັກລອບຄ້າຂາຍຢາເສບຕິດ ໄດ້2 ຄົນພ້ອມຂອງກາງຢາເສບຕິດປະເພດຢາບ້າ 10 ມັດ ເທົ່າກັບ 20.000ເມັດ. ຜູ້ກະທຳຜິດທັງສອງຄື: ທ້າວຈາລາ ອາຍຸ 22 ປີ ແລະ ທ້າວນາອາຍຸ 31 ປີ ທັງສອງເປັນອ້າຍນ້ອງກັນ ຢູ່ບ້ານຫ້ອຍທາດ ເມືອງເມິງ ແຂວງບໍ່ແກ້ວ. ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງນ້ຳທາໃຫ້ຮູ້ວ່າ: ໄດ້ມີພົນລະເມືອງດີແຈ້ງວ່າ: ຈະມີການເຄື່ອນໄຫວຄ້າ-ຂາຍຢາເສບຕິດຢູ່ເຂດບ້ານຊຽງກົກເກົ່າເມືອງລອງແຂວງຫຼວງນ້ຳທາຈຶ່ງໄດ້ນຳເອົາກຳລັງລົງສົມທົບກັບ ປກສ ກຸ່ມ ບ້ານເພື່ອຕິດຕາມເປົ້າໝາຍ; ຮອດເວລາປະມານ 15 ໂມງຂອງວັນທີ 30ກໍລະກົດ, ເປົ້າໝາຍຄ້າຂາຍຢາເສບຕິດໄດ້ມີການຂົນສົ່ງຢາເສບຕິດຢູ່ເຂດບ້ານ ຊຽງດາວ ເມືອງເມິງແຂວງບໍ່ແກ້ວຫາເຂດບ້ານຊຽງກົກເກົ່າເຈົ້າໜ້າທີ່ຈຶ່ງໄດ້ທຳການກວດຄົ້ນເປົ້າໝາຍພົບຢາບ້າຈຳນວນ 10 ມັດ ເທົ່າກັບ 20.000ເມັດ ທີ່ຊຸກເຊື່ອງໄວ້ໃນຖົງເປ້. ຜູ້ຕ້ອງຫາທັງສອງໄດ້ຮັບສາລະພາບວ່າ: ຢາບ້າຈຳນວນດັ່ງກ່າວແມ່ນໄດ້ໂທສັ່ງຊື້ ຢູ່ບ້ານຊຽງລາບ ປະເທດມຽນມາ ເພື່ອຈະເອົາມາຂາຍໃຫ້ລູກຄ້າທີ່ສັ່ງຊື້ຢູ່ເຂດບ້ານຊຽງກົກເມືອງລອງແຂວງຫຼວງນ້ຳທາ; ທ້າວນາ ຮັບສາລະພາບຕື່ມອີກວ່າ: ຜ່ານມາແມ່ນໄດ້ເຄື່ອນໄຫວຄ້າຂາຍຢາເສບຕິດມາຫຼາຍຄັ້ງ.

ປະຈຸບັນ, ເຈົ້າໜ້າທີ່ພວມເລັ່ງສຶບສວນ-ສອບສວນຂະຫຍາຍຜົນຕິດຕາມຜູ້ຮ່ວມຂະບວນການມາດຳເນີນຄະດີຕາມກົດໝາຍ.

 

----------20,000

Off

Comments are closed.