29th Dec2021

ສານປະຊາຊົນ ແຂວງຫົວພັນ ຕັດສິນປ່ອຍຕົວນັກໂທດກ່ອນກຳນົດ 18 ຄົນ.

by Peaung Thanonkeo

ແຂວງຫົວພັນປະກາດການປະຕິບັດຕາມ ຄຳຕັດສິນຂອງສານອາຍາ ສານປະຊາຊົນ ຂັ້ນຕົ້ນ ແຂວງຫົວພັນ ວ່າດ້ວຍ ການປ່ອຍຕົວນັກໂທດກ່ອນກຳນົດ ໂດຍມີເງື່ອນໄຂ ຈຳນວນ 18 ຄົນ, ຍິງ 01 ຄົນ, ມາໃນທ້າຍອາທິດທີ່ຜ່ານມານີ້ ປະຊຸມສານ ຂຶ້ນຢູ່ທີ່ ຄ້າຍຄຸມຂັງ-ດັດສ້າງ ສູນວັງລົມ ປກສ ແຂວງຫົວພັນ .

ໃນນັ້ນ, ມີນັກໂທດຄະດີ ຄ້າ-ຂາຍ ແລະ ມີຢາເສບຕິດໄວ້ໃນຄອບຄອງ 12 ຄົນ, ຄະດີສໍ້ລາດບັງຫຼວງ 01 ຄົນ, ຄະດີສໍ້ໂກງຊັບຂອງລັດ, ປອມແປງເອກະສານ ແລະ ນຳໃຊ້ເອກະສານປອມ 01 ຄົນ, ສໍ້ໂກ້ງຊັບ 01 ຄົນ, ຄະດີຄາດຕະກຳ 01 ຄົນ, ຄະດີ ຊຸກເຊືອງຊັບຢ່າງຜິດກົດໝາຍ ແລະ ຄ້າ-ຂາຍ 01 ຄົນ, ຄະດີທຳລາຍ ເຮັດໃຫ້ເປ່ເພໂດຍເຈດຕະນາ 01 ຄົນ. ເຊິ່ງພວກກ່ຽວ ໄດ້ຜ່ານການປະຕິບັດໂທດຕາມກົດໝາຍມາແລ້ວ 2 ສ່ວນ 3 ເຫັນວ່າພວກກ່ຽວ ເປັນຜູ້ທີ່ມີຄວາມກ້າວໜ້າ ໃນການຝຶກຝົນຫຼໍ່ຫຼອມຕົນເອງ, ມີການປ່ຽນແປງທາງດ້ານທັດສະນະແນວຄິດ, ການກະທຳ, ມີສະຕິຕື່ນຕົວເຄົາລົບປະຕິບັດກົດໝາຍ, ລະບຽບການຂອງຄ້າຍຂຸມຂັງ-ດັດສ້າງຢ່າງເຂັ້ມງວດ, ຍອມຮັບເອົາການປະຕິບັດຄຳຕັດສິນຂອງສານທຸກຢ່າງ, ມີຄວາມຄິດກິນແໜງແຄງໃຈ ຕໍ່ການກະທຳທີ່ບໍ່ຖືກຕ້ອງຂອງຕົນເອງ ໃນໄລຍະຜ່ານມາ, ມີຄວາມສາມັກຄີ, ເປັນແບບຢ່າງທີ່ດີໃຫ້ແກ່ນັກໂທດດ້ວຍກັນ, ເປັນຄົນດຸໝັນຂະຫຍັນໝັ່ນພຽນ ໃນການອອກແຮງງານ, ຈຶ່ງໄດ້ຮັບການປ່ອຍຕົວຕາມແນວທາງນະໂຍບາຍຂອງພັກ-ລະບຽບກົດໝາຍຂອງລັດ.

ໃນໂອກາດດັ່ງກ່າວ ຄະນະສານປະຊາຊົນຂັ້ນຕົ້ນ ແຂວງຫົວພັນ ຍັງໄດ້ແນະນຳຕໍ່ບັນດານັກໂທດທີ່ໄດ້ຮັບການປ່ອຍຕົວໃນຄັ້ງນີ້ວ່າ: ເມື່ອພົ້ນໂທດອອກໄປຢູ່ນໍາຄອບຄົວ ແລະ ສັງຄົມແລ້ວ ຈົ່ງພ້ອມກັນເອົົາໃຈໃສ່ເຄົາລົບ ແລະ ປະຕິບັດລະບຽບຂອງບ້ານ, ກົດໝາຍຂອງລັດຢ່າງເຂັ້ມງວດ, ປະກອບອາຊີບທຳມາຫາກິນ ຢ່າງຊື່ສັດສຸດຈະລິດ, ຖືກຕ້ອງສອດຄ່ອງກັບ ແນວທາງນະໂຍບາຍຂອງພັກ – ລະບຽບກົດໝາຍຂອງລັດ ເພື່ອສ້າງສາພັດທະນາຕົນເອງ ແລະ ຄອບຄົວ.

 

Off

Comments are closed.