31st Dec2021

ເອົາໃຈໃສ່ຈັດຕັ້ງປະຕິບັດມາດຕະການປ້ອງກັນການແຜ່ລະບາດພະຍາດໂຄວິດ-19 ຢ່າງເຂັ້ມງວດ ເພື່ອຮັບປະກັນເຮັດໃຫ້ການສົ່ງທ້າຍປີເກົ່າ ແລະ ຕ້ອນຮັບປີໃໝ່ສາກົນນີ້ ມີຄວາມປອດໄພ.

by somchan

ອີງຕາມຂໍ້ມູນການລາຍງານຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ກໍຄື ກົມຄວບຄຸມພະຍາດຕິດຕໍ່ ກະຊວງ ສາທາລະນະສຸກ ໄດ້ໃຫ້ຮູ້ວ່າ: ປັດຈຸບັນ, ຫຼາຍປະເທດໃນທົ່ວໂລກກຳລັງພະເຊີນໜ້າກັບການລະບາດຢ່າງໜັກຂອງສາຍພັນໂອໄມຄຣອນ ເຫັນໄດ້ຈາກ ການລາຍງານກວດພົບຜູ້ຕິດເຊື້ອໃໝ່ຫຼາຍແສນຄົນໃນແຕ່ລະວັນຢູ່ບາງປະເທດ. ຍ້ອນແນວນັ້ນ ລັດຖະບານຫຼາຍປະເທດຈຶ່ງໄດ້ວາງມາດຕະການໃຫ້ເຂັ້ມງວດຂຶ້ນກວ່າເກົ່າ ເພື່ອຄວບຄຸມການລະບາດ ເປັນຕົ້ນແມ່ນການເຮັດວຽກຢູ່ເຮືອນ, ຫ້າມຈັດງານກິດຈະກຳທີ່ມີຄົນເຂົ້າຮ່ວມຈຳນວນຫຼາຍ ຫຼື ຄົນທີ່ໄປໃຊ້ບໍລິການໃນສະຖານທີ່ຕ່າງໆຕ້ອງສະແດງບັດສັກວັກແຊັງຄົບທຸກເຂັມທີ່ແນະນຳ.

ອົງການອະນາໄມໂລກໄດ້ອອກມາເຕືອນວ່າ ໂອໄມຄຣອນ ຍັງຄົງເປັນຄວາມສ່ຽງລະດັບສູງຂອງໂລກ ເຊິ່ງປັດໄຈທີ່ສຳຄັນກໍຄື ຄວາມສາມາດໃນການແຜ່ກະຈາຍເຊື້ອໄວກວ່າສາຍພັນອື່ນໆ. ເຖິງແມ່ນວ່າເມື່ອຕິດເຊື້ອອາການຈະບໍ່ຮຸນແຮງເທົ່າສາຍພັນເດວຕ້າກໍຕາມ ແຕ່ຈຳນວນຜູ້ຕິດເຊື້ອໂອໄມຄຣອນ ທີ່ເພິ່ມຂຶ້ນແບບກ້າວກະໂດດ ໄດ້ສົ່ງຜົນໃຫ້ມີຄົນເຈັບເຂົ້າຮັບການປິ່ນປົວຢູ່ໂຮງໝໍຫຼາຍຂຶ້ນໃນຫຼາຍປະເທດ. ພ້ອມກັນນີ້ ນັກວິທະຍາສາດ ຫຼາຍຄົນຍັງໄດ້ກ່າວວ່າ ຫຼັງປີໃໝ່ສາກົນນີ້ ຈະເປັນໄລຍະທີ່ພວກເຮົາຈະໄດ້ເຫັນພາບຂອງການລະບາດຂອງສາຍພັນໂອໄມຄຣອນ ໄດ້ຊັດເຈນຂຶ້ນກ່ວາເກົ່າ;  ເຊິ່ງມີແນວໂນ້ມວ່າຈະເປັນຄືກັນເກືອບທຸກປະເທດ ກໍຄືຈະມີລາຍງານຕົວເລກຜູ້ຕິດເຊື້ອເພິ່ມຂຶ້ນແບບກ້າວກະໂດດ ເນື່ອງຈາກວ່າຈະມີຄົນເດີນທາງໄປຫາໝູ່ເພື່ອນ ແລະ ຄອບຄົວ ເປັນຈຳນວນຫຼາຍເຮັດໃຫ້ມີການສຳຜັດໃກ້ຊິດ ໃນການສະຫຼອງປີໃໝ່ສາກົນຮ່ວມກັນ.

ສະເພາະ ສປປ ລາວ ຈຳນວນການຕິດເຊື້ອພະຍາດໂຄວິດ-19 ຍັງຄົງໜ້າເປັນຫ່ວງໂດຍສະເພາະໃນໄລຍະສົ່ງທ້າຍປີເກົ່າ ແລະ ຕ້ອນຮັບປີໃໝ່ທີ່ຈະມາເຖິງນີ້ ຄາດຄະເນວ່າຈະມີຜູ້ເດີນທາງກັບໄປຫາຄອບຄົວ ຫຼື ເດີນທາງໄປພັກຜ່ອນຢູ່ຫຼາຍແຂວງ ຫຼື ເຂດທ່ອງທ່ຽວ ເປັນຈຳນວນຫຼວງຫຼາຍ. ສະນັ້ນ, ເພື່ອຄວາມປອດໄພຂອງຕົວທ່ານເອງ ຕ້ອງໄດ້ມີສະຕິລະວັັງຕົວ ເອົາໃຈໃສ່ປ້ອງກັນຕົນເອງຢ່າງເຂັ້ມງວດເພື່ອປ້ອງກັນບໍ່ໃຫ້ເອົາເຊື້ອໄປແຜ່ສູ່ສະມາຊິກໃນຄອບຄົວ ແລະ ຄົນອ້ອມຂ້າງຂອງທ່ານ. ຂໍໃຫ້ບັນດາທ່ານຈົ່ງປະຕິບັດຕາມແຈ້ງການຢ່າງເຂັ້ມງວດ ໂດຍສະເພາະຫ້າມຈັດງານສະເຫຼີມສະຫຼອງ ແລະ ຊຸມແຊວທຸກຮູບແບບຢູ່ຕາມສຳນັກງານອົງການ ຫຼື ນິຕິບຸກຄົນ. ເຊິ່ງບົດຮຽນການຝ່າຝືນກົດຫມາຍ, ຄໍາສັ່ງ ແລະ ລະບຽບການ ກ່ຽວກັບການປ້ອງກັນພະຍາດໂຄວິດ-19 ໄດ້ເຮັດສັງຄົມເຮົາເຈັບແສບມາແລ້ວ ຍ້ອນຄົນຈໍານວນໜຶ່ງເຫັນແກ່ຫລິ້ນແກ່ກິນ, ເຫັນແກ່ແຕ່ມ່ວນຊື່ນ ແລະ ຄວາມຖືເບົາຂອງຄົນບາງຄົນ ຈົນເຮັດໃຫ້ມີການແຜ່ລະບາດຂອງພະຍາດໂຄວິດ-19 ແຜ່ລາມອອກເປັນບໍລິເວນກ້ວາງຂວາງ. ປັດຈຸບັນ, ພັກ ແລະ ລັດຖະບານ ສຸດທີ່ເປັນຫ່ວງ, ເປັນໄຍ ຕໍ່ຊີວິດ ແລະ ສຸຂະພາບ ຂອງປະຊາຊົນບັນດາເຜົ່າຫຼາຍທີ່ສຸດ ແລະ ກໍເປັນຫ່ວງ, ເປັນໄຍ ເຖິງຊີວິດການເປັນຢູ່ຂອງຫມົດທຸກຄົນເຊັ່ນດຽວກັນ. ດັ່ງນັ້ນ ພັກ ແລະ ລັດຖະບານ ຈິ່ງໄດ້ສຸມໃສ່ທຸກວິທີທາງໃນການຄວບຄຸມ ແລະ ສະກັດກັ້ນການລະບາດ ເພື່ອຮັບປະກັນໃຫ້ປະຊາຊົນທຸກຖ້ວນໜ້າ ຕິດເຊື້ອໜ້ອຍທີ່ສຸດ ຫຼື ຖ້າມີກໍລະນີເສຍຊີວິດກໍ່ໃຫ້ມີໜ້ອຍທີ່ສຸດເຊັ່ນກັນ. ນອກຈາກນັ້ນຍັງສຸມໃສ່ເຮັດໃຫ້ກຸ່ມເປົ້າໝາຍໄດ້ຮັບການສັກວັກແຊັງຢ່າງທົ່ວເຖິງ.

ສະນັ້ນ ເພື່ອເຮັດໃຫ້ຕົວເລກການຕິດເຊື້ອຫຼຸດລົງໂດຍໄວ, ໝົດທຸກຄົນຕ້ອງຮຽນຮູ້ຢູ່ກັບການແຜ່ລະບາດຂອງພະຍາດໂຄວິດ-19ໃຫ້ໄດ້ຢ່າງປອດໄພ ເປັນເຈົ້າການປະຕິບັດມາດຕະການປ້ອງກັນການຕິດເຊື້ອ ແລະ ພ້ອມໃຈກັນ ຫັນໄປສູ່ວິຖີການດຳລົງຊີວິດປົກກະຕິແບບໃໝ່ເຊັ່ນ: ໃສ່ຜ້າປິດ-ດັງ ເມື່ອອອກຈາກບ້ານ, ໝັ່ນລ້າງມື, ຮັກສາມາລະຍາດໃນການໄອ-ຈາມ, ບໍ່ເອົາມືສຳຜັດໃບໜ້າ, ຕາ, ດັງ, ປາກ, ຮັກສາໄລຍະຫ່າງ, ອະນາໄມຂ້າເຊື້ອຈຸດທີ່ສຳຜັດເລື້ອຍໆ,  ສັກວັກແຊັງໃຫ້ຄົບທຸກເຂັມທີ່ແນະນຳ,  ໝັ່ນສັງເກດ ແລະ ຕິດຕາມສຸຂະພາບຂອງຕົນ ແລະ ຄົນໃນຄອບຄົວ, ຖ້າຮູ້ສຶກບໍ່ສະບາຍ ໃຫ້ໄປພົບແພດເພື່ອກວດຫາເຊື້ອ ຫຼີກລ່ຽງການໄປສະຖານທີ່ແອອັດ ຫຼື ເຂົ້າຮ່ວມກິດຈະກຳທີ່ມີຄົນຈຳນວນຫຼາຍ, ຫຼີກລ້ຽງການສຳຜັດໃກ້ຊິດຜູ້ທີ່ບໍ່ສະບາຍ ຢູ່ບ່ອນທີ່ມີອາກາດຖ່າຍເທ, ມີການໝູນວຽນຂອງອາກາດ ການປະຕິບັດທັງໝົດນີ້ຈະຊ່ວຍໃຫ້ພວກເຮົາສາມາດຜ່ານຜ່າວິກິດນີ້ໄປນຳກັນໄດ້ຢ່າງແນ່ນອນ.

ນອກນີ້ ທຸກພາກສ່ວນໃນສັງຄົມ ກໍຕ້ອງໄດ້ມີສະຕິ ແລະ ຄວາມເປັນເຈົ້າການ ຕໍ່ວຽກງານປ້ອງກັນຄວາມສະຫງົບ ແລະ ຮັກສາຄວາມເປັນລະບຽບຮຽບຮ້ອຍ ໃນສັງຄົມຮ່ວມກັນ, ເນື່ອງຈາກ ສະພາບສາກົນ ແລະ ພາກພື້ນ ຍັງສືບຕໍ່ຜັນແປໄປຢ່າງສັບສົນ, ອິດທິກຳລັງປໍລະປັກຍັງຜັກດັນເປົ້າໝາຍອາຍາ, ກໍ່ການເຄື່ອນໄຫວກະທຳຜິດຫຼາຍຮູບ-ຫຼາຍວິທີການ, ຫຼາຍເລລຽ່ມທີ່ເລິກແລບເປັນອັນຕະລາຍຕໍ່ສັງຄົມ, ສວຍໃຊ້ບັນຫາສິດທິມະນຸດ, ບັນຫາຊົນເຜົ່າ, ສາສະໜາ, ສ້າງຄວາມບໍ່ສະຫງົບທາງພາຍໃນ; ກໍ່ໃຫ້ເກີດມີສະພາບຄວາມຫຍຸ້ງຍາກທີ່ເປັນບັນຫາທ້າທາຍທົດສອບຫຼາຍດ້ານ ເປັນຕົ້ນແມ່ນ: ໄພຢາເສບຕິດ ເຊັ່ນ ການຄ້າຂາຍ-ເສບຢາເສບຕິດ, ການລັກລອບຂົນສົ່ງຂ້າມຊາຍແດນ; ສະພາບເກີດອັກຄີໄພ ແລະ ໄພຫຍໍ້ທໍ້ອື່ນໆ ເຊັ່ນ: ການປຸ້ນຈີ້, ຊິງຊັບ, ລັກຊັບພົນລະເມືອງ, ການສ້າງກຸ້ມແກງອາລະວາດກວນເມືອງ, ສະຖານບັນເທີງປິດກາຍໂມງ-ເວລາ ແລະ ອື່ນໆ.

Off

Comments are closed.