08th Jan2022

ກອງປະຊຸມສ້າງແຜນກຳນົດພະນັກງານນຳພາ-ບັນຊາ ຂັ້ນກະຊວງຄຸ້ມຄອງຂອງກອງບັນຊາການ ປກສ ແຂວງ ສະຫວັນນະເຂດ

by somda phoneor

ກອງປະຊຸມສ້າງແຜນກຳນົດພະນັກງານນຳພາ-ບັນຊາ ຂັ້ນກະຊວງຄຸ້ມຄອງ ຂອງກອງບັນຊາການ ປກສ ແຂວງສະຫວັນນະເຂດ ໄດ້ຈັດຂື້ນໃນວັນທີ 6 ມັງກອນ 2022 ນີ້ ໂດຍການເປັນປະທານ ຂອງ ພັອ ສົມໝາຍ ພົມມະຈັນ ຄະນະປະຈຳພັກແຂວງ, ຫົວໜ້າກອງບັນຊາການ ປກສ ແຂວງ ສະຫວັນນະເຂດ, ມີ ທ່ານ ສຸດໃຈ ໄຍຍະວົງ ຮອງຫົວໜ້າຈັດຕັ້ງແຂວງ, ມີຄະນະພັກ-ຄະນະບັນຊາ ກອງບັນຊາການ ປກສ ແຂວງ,​ ບັນດາຫ້ອງອ້ອມຂ້າງ, ມີ ປກສ ນະຄອນ, ປກສ ເມືອງ 14 ເມືອງ, ພະນັກງານຫຼັກແຫຼ່ງ ແລະ  ພະແນກການທີ່ກ່ຽວຂ້ອງເຂົ້າຮ່ວມ.

ພັອ ສັງທອງ ສີປະເສີດ ຮອງຫົວໜ້າກອງບັນຊາການ ປກສ ແຂວງ ສະຫວັນນະເຂດ ໄດ້ຜ່ານມະຕິຂອງຄະນະບໍລິຫານງານພັກ ກະຊວງປ້ອງກັນຄວາມສະຫງົບ ວ່າດ້ວຍການຂື້ນແຜນກຳນົດພະນັກງານນຳພາ-ບັນຊາ ໃນກຳລັງປ້ອງກັນຄວາມສະຫງົບ ເພື່ອເປັນເຈົ້າການໃນການກຳນົດເປົ້າໝາຍພະນັກງານ ທີ່ຈະບຳລຸງ, ກໍ່ສ້າງ, ບັນຈຸຈັດວາງເຂົ້າໃນຕຳແໜ່ງງານຕ່າງໆ ເປັນຕົ້ນແມ່ນຕຳແໜ່ງນຳພາ-ບັນຊາ ແຕ່ລະຂັ້ນ ຢູ່ບັນດາເຫຼົ່າວິຊາສະເພາະ ມີລັກສະນະສືບທອດ-ຕໍ່ເນື່ອງ, ທັງຮັບປະກັນໃຫ້ມີຄວາມໜັກແໜ້ນທາງດ້ານຄຸນທາດການເມືອງ, ມີຄວາມຮູ້ຄວາມສາມາດໃນລະດັບອັນແນ່ນອນ, ເປັນການກະກຽມເປົ້າໝາຍບຸກຄະລາກອນທີ່ມີລັກສະນະເປີດກວ້າງ ເພື່ອເປັນບ່ອນອິີງພື້ນຖານທີ່ສຳຄັນໃຫ້ແກ່ການ ວາງແຜນລະອຽດ ໃນການບຳລຸງ, ກໍ່ສ້າງຖັນແຖວພະນັກງານ ທີ່ຈະເຂົ້າສືບທອດປ່ຽນແທນ ໃນຕຳແໜ່ງນຳພາ-ບັນຊາ ຢູ່ແຕ່ລະຂັ້ນໃນຕໍ່ໜ້າ.

ໃນກອງປະຊຸມໄດ້ຜ່ານເນື້ອໃນແຜນການກຳນົດພະນັກງານສືບທອດປ່ຽນແທນ ຢູ່ໃນກຳລັງປ້ອງກັນຄວາມສະຫງົບ, ຜ່ານມາດຕະຖານລວມຂອງພະນັກງານນຳພາບັນຊາ ຕ້ອງມີທັດສະນະຫຼັກໝັ້ນການເມືອງໜັກແໜ້ນ, ຊີວະປະຫວັດຈະແຈ້ງ, ຕັ້ງຕໍ່ບໍລິສຸດຕໍ່ພັກ, ຕໍ່ປະເທດຊາດ ແລະ ອຸດົມການປະຕິວັດ, ຮູ້ຈັກຈຳແນກມິດ-ສັດຕູຢ່າງຈະແຈ້ງ, ສາມາດຜ່ານຜ່າອຸປະສັກ ແລະ ບໍ່ຫວັ່ນໄຫວຄອນຄຽນຕໍ່ສະພາບທີ່ຜັນແປຢູ່ພາຍໃນ ແລະ ສາກົນ, ມີຄຸນສົມບັດ ສິນທຳປະຕິວັດ, ແບບແຜນດຳລົງຊີວິດ, ມີມາດຕະຖານຄວາມຮູ້ຄວາມສາມາດທີ່ແນ່ນອນ, ມີແບບແຜນວິທີເຮັດວຽກຢ່າງລະອຽດ, ມີສຸຂະພາບແຂງແຮງດີ, ບໍ່ມີພະຍາດຕິດແປດຊ້ຳເຮື້ອ ສາມາດແບກຫາບໜ້າທີ່ວຽກງານທີ່ໄດ້ຮັບມອບໝາຍ.

ພ້ອມດຽວກັນນີ້ໃນພິທີໄດ້ມີການບ່ອບບັດທາບທາມເປົ້າໝາຍພະນັກງານສືບທອດປ່ຽນແທນ ເພື່ອເລືອກເຟັ້ນເອົາຜູ້ທີ່ມີມາດຖານເງື່ອນໄຂຄົບຖ້ວນທີ່ຈະ ບຳລຸງ-ກໍ່ສ້າງ ເປັນພະນັກງານນຳພາ-ບັນຊາ ໃນຕໍ່ໄປ ກອງປະຊຸມດັ່ງກ່າວນີ້ແມ່ນໄດ້ດຳເນີນເປັນເວລາ 02 ວັນ.

Off

Comments are closed.