08th Jan2022

ພິທີທໍາລາຍອາວຸດລ່າເນື້ອ ແລະ ອຸປະກອນທີ່ຜິດກົດຫນາຍປະຈໍາປີ 2021 ຂອງກອງບັນຊາການ ປກສ ແຂວງໄຊສົມບຸນ.

by somda phoneor

ໂດຍປະຕິບັດຕາມຄໍາສັ່ງເພີ່ມເຕີມຂອງຄະນະກໍາມະການ ປກຊ-ປກສ ແຂວງໄຊສົມບູນ ກ່ຽວ ກັບການເລີກຮື້, ເກັບກູ້ອາວຸດລ່າເນື້ອ, ປືນແກັບ, ປິ່ນປໍ, ຫມໍຊ່ອດປາ, ທາດແຕກ, ທາດລະເບີດ ແລະ ອື່ນໆທີ່ພົວພັນເຖິງຄວາມບໍ່ສະຫງົບພາຍໃນແຂວງ ເພື່ອນໍາມາທໍາລາຍ. ດັ່ງນັ້ນ,ໃນວັນທີ 6 ມັງກອນ 2022 ກອງບັນຊາການ ປກສ ແຂວງໄຊສົມບູນ ໄດ້ຈັດພິທີ ທໍາລາຍອາວຸດລ່າເນື້ອ ແລະ ອຸປະກອນທີ່ຜິດກົດຫມາຍ ປະຈໍາປີ 2021 ໃຫ້ກຽດເຂົ້າຮ່ວມໃນພິທີ ໂດຍ ພົຕ ຄໍາລຽງ ອຸທະໄກສອນ, ເຈົ້າແຂວງ, ປະທານປ້ອງກັນຊາດປ້ອງກັນຄວາມສະຫງົບແຂວງໄຊສົມບູນ, ມີຜູ້ຕາງຫນ້າຈາກພະແນກການ, ອົງການ, ກົມກອງທີ່ ກ່ຽວຂ້ອງອ້ອມຂ້າງແຂວງ ອົງການຈັດຕັ້ງເຂົ້າຮ່ວມ.

ໃນພິທີ  ພັທ ອິນປັນ ຍາດຕິວົງ ຄະນະພັກ, ຮອງກອງບັນຊາການ ປກສ ແຂວງ ໄຊສົມບູນ ໄດ້ຜ່ານ ບົດລາຍງານການຈັດຕັ້ງປະຕິບັດ ວຽກງານເກັບກູ້ອາວຸດເສິກ, ອາວຸດລ່າເນື້ອ ແລະ ເຄື່ອງທີ່ຜິດກົດຫມາຍອື່ນໆໃນທົ່ວແຂວງ ເຊິ່ງໃນໄລຍະ 1 ປີທີ່ຜ່ານມາ ກອງບັນຊາການ ປກສ ແຂວງ ໄຊສົມບູນ ໄດ້ເປັນເຈົ້າ ການຈັດຕັ້ງຜັນຂະຫຍາຍມະຕິຄໍາສັ່ງຂອງຂັ້ນເທິງຢ່າງຕັ້ງຫນ້າ ເຄື່ອນໄຫວປະຕິບັດຫນ້າທີ່ຕາມຫຼັກການ ວິຊາສະເພາະ ແລະ ພົວພັນປະສານສົມທົບກັບພາກສ່ວນຕ່າງໆທີ່ກ່ຽວຂ້ອງ ນໍາເອົາບັນດາເອກະສານ, ນິຕິກໍາຕ່າງໆລົງໄປເຜີຍແຜ່ໃຫ້ພະນັກງານ-ນັກຮົບ, ທະຫານ, ຕໍາຫຼວດ ຕະຫຼອດຮອດປະຊາຊົນ ຮັບຮູ້ ແລະ ເຂົ້າໃຈ ຕໍ່ລະບຽບກົດຫມາຍ ເພື່ອສືສາອົບຮົມເຮັດໃຫ້ຜູ້ທີ່ມີອາວຸດເສິກ, ອາວຸດລ່າເນື້ອທີ່ຜິດກົດຫມາຍໄວ້ໃນຄອບຄອງ ມີຄວາມຕື່ນຕົວ, ຈິງໃຈນໍາເອົາອຸປະກອນຈໍານວນດັ່ງກ່າວມາມອບຕໍ່ເຈົ້າ ຫນ້າທີ່, ນອກນັ້ນ, ຍັງໄດ້ລົງເຄື່ອນໄຫວຕັ້ງດ່ານກວດກາຢູ່ຕາມເສັ້ນທາງຕ່າງໆໃນຂອບເຂດຄວາມຮັບຜິດຊອບ ເພື່ອນໍາໃຊ້ມາດຕະການສະກັດກັ້ນ-ປາບປາມ ບຸກຄົນທີ່ນໍາໃຊ້ອາວຸດທີ່ບໍ່ຖືກຕ້ອງເຂົ້າ-ອອກແຕ່ລະເມືອງ, ຜ່ານການເຄື່ອນໄຫວຕົວຈິງສາມາດ ເກັບກູ້ໄດ້: ອາວຸດເສີກ 4 ກະບອກ ພ້ອມດ້ວຍລູກປືນ 29 ລູກ, ອາວຸດລ່າເນື້ອ 341 ກະບອກ,ລະເບີດ 1 ຫນ່ວຍ, ຈັກສະຕີນ 2 ເຄື່ອງ, ຫມໍ້ຊ໋ອດ 14 ເຄື່ອງ, ຫມໍ້ໄຟ 3 ຫນ່ວຍ, ແລະ ເຄື່ອງຂອງທີ່ຜິດກົດຫມາຍອື່ນໆຈໍານວນຫນຶ່ງ.

ໃນໂອກາດນີ້ ພົຕ ຄໍາລຽງ ອຸທະໄກສອນ ປະທານປ້ອງກັນຊາດ-ປ້ອງກັນ ຄວາມສະຫງົບແຂວງ ຍັງໄດ້ສະແດງຄວາມຍ້ອງຍໍຊົມເຊີຍຕໍ່ກອງບັນຊາການ ປກສ ແຂວງ ໄຊສົມບູນ ກໍຄືເຈົ້າຫນ້າທີ່ວິຊາສະເພາະທີ່ໄດ້ເອົາໃຈໃສ່ເຄື່ອນໄຫວ ປະຕິບັດໜ້າທີ່ວຽກງານວິຊາສະເພາະ ດ້ວຍຄວາມຮັບຜິດຊອບສູງ ເຮັດໃຫ້ມີຜົນສຳເລັດຫຼາຍດ້ານ ແລະ ສັງຄົມມີຄວາມສະຫງົບປອດໄພໂດຍພື້ນຖານ ພ້ອມທັງເໜັ້ນໜັກໃຫ້ຄະນະພັກ-ຄະນະບັນຊາແຕ່ລະຂັ້ນ ພ້ອມດ້ວຍພະນັກງານ-ນັກຮົບຈົ່ງສືບຕໍ່ ແລະ ເພີ່ມທະວີໃນການປະຕິບັດວຽກງານວິຊາສະເພາະທີ່ຂັ້ນເທີງມອບໝາຍໃຫ້ມີຜົນສຳເລັດຕາມຄາດໝາຍ.

Off

Comments are closed.