10th Jan2022

ຮອງລັດຖະມົນຕີກະຊວງປ້ອງກັນຄວາມສະຫງົບລາວ ເຄື່ອນໄຫວຢ້ຽມຢາມ ແລະ ໂອ້ລົມນັກຮຽນຢູ່ໂຮງຮຽນວັດທະນະທຳເລກ 1, ສ.ສ ຫວຽດນາມ

by Peaung Thanonkeo

ໃນໂອກາດທີ່ການນໍາກະຊວງປ້ອງກັນຄວາມສະຫງົບ ສປປ ລາວ ເຄື່ອນໄຫວສັນທະວະໄມຕີ ສ.ສ ຫວຽດນາມ ຢ່າງເປັນທາງການ; ໃນວັນທີ 8 ມັງກອນ 2022 ພົຕ ວັນທອງ ກອງມະນີ ຮອງລັດຖະມົນຕີ ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ແລະ ຫົວໜ້າກົມໃຫຍ່ສັນຕິິບານ ພ້ອມດ້ວຍ ຄະນະນໍາກົມໃຫຍ່ການເມືອງ ປກສ ໄດ້ເຄື່ອນໄຫວຢ້ຽມຢາມ ແລະ ໂອ້ລົມນັກຮຽນ ຢູ່ໂຮງຮຽນວັດທະນະທຳເລກ 1 ແຂວງ ຖາຍຫງວຽນ ໃຫ້ກຽດຕ້ອນຮັບໂດຍ ພັທ ນ. ໂດ້ ທິ ຫ່ຽນ ລານ ອຳນວຍການໂຮງຮຽນວັດທະນະທໍາ ກະຊວງປ້ອງກັນຄວາມສະຫງົບ ຫວຽດນາມ ພ້ອມດ້ວຍຄະນະອໍານວຍການ, ອາຈານ ແລະ ນັກຮຽນ ໃຫ້ການຕ້ອນຮັບຢ່າງອົບອຸ່ນ.

ພັທ ນ. ໂດ້ ທິ ຫ່ຽນ ລານ  ໄດ້ລາຍງານໃຫ້ຮູ້ວ່າ: ໂຮງຮຽນວັດທະນະທຳ, ກະຊວງ ປກສ ຫວຽດນາມ ໄດ້ສ້າງຕັ້ງຂຶ້ນໃນວັນທີ 30 ກໍລະກົດ 1976, ໂຮງຮຽນ​​ວັດທະນະທຳ​ເລກ 1 ແມ່ນໂຮງຮຽນສຳລັບ​ນັກຮຽນ​ບັນດາ​ເຜົ່າ​ໃນ​ທົ່ວ​ປະ​ເທດ, ນັກ​ສຶກສາ​ລາວ ​ແລະ ບຳລຸງ​ສ້າງ​ພາສາ​ຫວຽດນາມ ​ໃຫ້​ແກ່​ນັກ​ສຶກສາ ກຳປູ​ເຈຍ ຕາມສັນຍາ ​ແລະ ​ແຜນການ​ຮ່ວມ​ມື ຂອງລັດ ແລະ ກະຊວງປ້ອງກັນຄວາມສະຫງົບ.           ນັບແຕ່ປີ 2008 ເປັນຕົ້ນມາ, ໂຮງຮຽນໄດ້ຮັບມອບໝາຍໜ້າທີ່ໃນການສິດສອນນັກຮຽນຈາກກະຊວງປ້ອງກັນຄວາມສະຫງົບ ສປປ ລາວ ຫຼັກສູດ 4 ປີ, ໃນນັ້ນ ຮຽນພາສາຫວຽດນາມ 1 ປີ ແລະ ເສີມຄວາມຮູ້ດ້ານວັດທະນະທຳຂອງໂຮງຮຽນມັດທະຍົມສຶກສາຕອນຕົ້ນ ແລະ ຮຽນວັດທະນະທຳຕອນປາຍ 3 ປີ.

ໃນໄລຍະ 13 ປີຜ່ານມາ, ໂຮງຮຽນວັດທະນະທໍາໄດ້ຮັບ ນັກສຶກສາລາວ 889 ຄົນ.  ມາຮອດເດືອນຕຸລາ 2021 ໂຮງຮຽນໄດ້ສໍາເລັດການສິດສອນນັກສຶກສາລາວທັງໝົດ 10 ຮຸ້ນ, ຈົບຊັ້ນມັດທະຍົມຕອນປາຍແລ້ວ 473 ຄົນ (ໃນນີ້ 452 ຄົນ ໄດ້ຖືກບັນຈຸເຂົ້າຮຽນຢູ່ບັນດາສະຖາບັນ ແລະ ມະຫາວິທະຍາໄລຕຳຫຼວດ, ມີ 21 ຄົນໄດ້ຖືກບັນຈຸເຂົ້າຮຽນໃນມະຫາວິທະຍາໄລຂະແໜງການນອກ).  ໃນສົກຮຽນ 2021–2022, ໂຮງຮຽນໄດ້ກໍ່ສ້າງນັກຮຽນລາວ 414 ຄົນ, ຍິງ 162 ຄົນ, ຈັດເປັນ 12 ຫ້ອງຮຽນ.

ໃນໂອກາດດັ່ງກ່າວນີ້, ພົຕ ວັນທອງ ກອງມະນີ ຮອງລັດຖະມົນຕີ ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ກໍ່ໄດ້ສະແດງຄວາມຮູ້ບຸນຄຸນ ແລະ ຂອບໃຈ ຕໍ່ພັກ-ລັດຖະບານ ສ.ສ ຫວຽດນາມ ກໍ່ຄື ຄູ-ອາຈານໂຮງຮຽນວັດທະນະທໍາເລກ 1 ທີ່ໄດ້ໃຫ້ການຊ່ວຍເຫຼືອ ແລະ ເອົາໃຈໃສ່ສິດສອນບົດຮຽນ, ຖ່າຍທອດຄວາມຮູ້ທີ່ລໍ້າຄ່າ ເພື່ອກໍ່ສ້າງນັກຮຽນ ປກສ ລາວໃຫ້ມີຄວາມຮູ້-ຄວາມສາມາດ ເພື່ອນໍາມາພັດທະນາກົມກອງ ໃນກະຊວງປ້ອງກັນຄວາມສະຫງົບລາວໃຫ້ມີຄວາມເຕີບໃຫຍ່ເຂັ້ມແຂງຂຶ້ນເລື້ອຍໆ ເຊິ່ງສະແດງໃຫ້ເຫັນເຖິງການຮ່ວມມື ຊ່ວຍເຫຼືອເຊິ່ງກັນ ແລະ ກັນ ຂອງສອງພັກ-ສອງລັດ ເວົ້ົາລວມ ເພາະສະເພາະກໍ່ຄືສອງກະຊວງ ປກສ ລາວ-ຫວຽດນາມ ທີ່ມີມູນເຊື້ອມາເເຕ່ດົນນານ ທັງເປັນການຢັ້ງຢືນໃຫ້ເຫັນເຖິິງຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ນັບມື້ໄດ້ຮັບການເສີມຂະຫຍາຍໃຫ້ກວ້າງຂວາງ, ເລິກເຊິ່ງ, ສະໜິດແໜ້ນ ແລະ ບໍ່ມີວັນຈືດຈາງ.

ຈາກນັ້ນ, ຮອງລັດຖະມົນຕີ ກະຊວງປ້ອງກັນຄວາມສະຫງົບ ກໍ່ໄດ້ພົບປະ ໂອ້ລົມກັບນັກຮຽນ ເພື່ອນໍາເອົາຄວາມຍື້ຢາມ-ຖາມຂ່າວ, ຄວາມເປັນຫ່ວງເປັນໄຍ ແລະ ຄວາມຄິດຮອດ-ຄິດເຖິງ ຈາກຄະນະພັກ-ຄະນະນຳກະຊວງ ມາເຖິງນັກຮຽນ-ນັກສຶກສາ ທີ່ກຳລັງສຶກສາ ຄົ້ນຄວ້າຢູ່ ສ.ສ ຫວຽດນາມ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຄວາມເອົາໃຈໃສ່, ຄວາມອົດທົນບຸກບືນຮໍ່າຮຽນຂອງນັກຮຽນເຊິ່ງສາມາດຍາດໄດ້ຜົນງານ ແລະ ຜົນສໍາເລັດຫຼາຍດ້ານໃນໄລຍະທີ່ຜ່ານມາ; ດັ່ງນັ້ນ, ເພື່ອເປັນການສືບຕໍ່ຍາດແຍ່ງເອົາຄວາມຮູ້ ແລະ ຜົນສຳເລັດໃນການຮຽນ ສະຫາຍ ຮອງລັດຖະມົນຕີ ກໍ່ໄດ້ເນັ້ນໜັກໃຫ້ນັກຮຽນທຸກຄົນຈົ່ງມີຄວາມອຸ່ນອ່ຽນທຸ່ນທ່ຽງ, ມີຄວາມສາມັກຄີ-ຊ່ວຍເຫຼືອເຊິ່ງກັນ ແລະ ກັນ, ມີຄຸນສົມບັດ, ປະຕິບັດລະບຽບວິໄນຂອງໂຮງຮຽນຢ່າງເຂັ້ມງວດ, ບໍ່ເຄື່ອນໄຫວກະທໍາຜິດຕໍ່ລະບຽບກົດໝາຍຢ່າງເດັດຂາດ, ປ້ອງກັນ-ສະກັດກັ້ນພະຍາດໂຄວິດ 19 ຮັບປະກັນໃຫ້ມີຄວາມປອດໄພ, ສິ່ງສຳຄັນຕ້ອງມີຄວາມອົດທົນ, ບຸກບືນ, ຫ້າວຫັນເອົາໃຈໃສ່ສຶກສາຄົ້ນຄວ້າເອົາຄວາມຮູ້ນໍາຄູ-ອາຈານ ແລະ ໝູ່ເພື່ອນ ຕັ້ງໜ້າຝຶກຝົນ ຫຼໍ່ຫຼອມຕົນເອງໃຫ້ເປັນຄົນມີຄວາມຮູ້-ຄວາມສາມາດ ແລະ ມີຜົນສໍາເລັດ ສົມກັບຄວາມໄວ້ເນື້ອເຊື່ອໃຈຂອງພັກ-ລັດ ທີ່ໄດ້ມອບໝາຍໃຫ້ມາສຶກສາຄົ້ນຄວ້າ ເພື່ອກັບໄປພັດທະນາກົມກອງ ກໍ່ຄືກໍາລັງປ້ອງກັນຄວາມສະຫງົບລາວ ໃຫ້ມີຄວາມເຕີບໃຫຍ່ເຂັ້ມແຂງຂຶ້ນໄປເລື້ອຍໆ.

ການຢ້ຽມຢາມນັກຮຽນຢູ່ໂຮງຮຽນວັດທະນະທຳເລກ 1 ຂອງຮອງລັດຖະມົນຕີ, ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໃນຄັ້ງນີ້ ແມ່ນໂອກາດທີ່ມີຄວາມ  ໝາຍຄວາມສຳຄັນຢ່າງຍິ່ງ ເຊິ່ງສະແດງໃຫ້ເຫັນເຖິງຄວາມເອົາໃຈໃສ່ ຄວາມເປັນຫ່ວງເປັນໄຍ ຂອງຄະນະພັກ-ຄະນະນໍາກະຊວງປ້ອງກັນຄວາມສະຫງົບ ຕໍ່ພະນັກງານ-ນັກຮົບ ກໍ່ຄືນັກຮຽນ-ນັກສຶກສາ ທີ່ກຳລັງສຶກສາ-ຄົ້ນຄວ້າ ແລະ ດຳລົງຊີວິດຢູ່ ສ.ສຫວຽດນາມ, ໃຫ້ມີກຳລັງໃຈໃນການສຶກສາ-ຄົ້ນຄວ້າ ມີຜົນສໍາເລັດໜ້າທີ່ຕາມການມອບໝາຍ.

 

 

Comments are closed.