11th Jan2022

ເມືອງຊຽງຄໍ້ ແຂວງຫົວພັນ ຈັດກອງປະຊຸມ ຈັດຕັ້ງປະຕິບັດ ວາລະແຫ່ງແຫ່ງຊາດ ການແກ້ໄຂບັນຫາຢາເສບຕິດ.

by Peaung Thanonkeo

ເພື່ອເປັນການຈັດຕັ້ງປະຕິບັດ ວາລະແຫ່ງຊາດ ການແກ້ໄຂບັນຫາຢາເສບຕິດ ດັ່ງນັ້ນ ມາໃນວັນທີ່ 07 ມັງກອນ 2022 ເມືອງຊຽງຄໍ້ ແຂວງຫົວພັັນ ຈຶ່ງໄດ້ຈັດກອງປະຊຸມຂຶ້້ນຢູ່ທີ່ ສະໂມສອນຂອງເມືອງ ໂດຍເປັນປະທານ ຂອງ ວົງໄຊ ຍະສິງທອນ ກຳມະການພັກແຂວງ ເລຂາພັກເມືອງ ເຈົ້າເມືອງໆຊຽງຄໍ້, ເປັນກຽດເຂົ້າຮ່ວມຂອງ ພັອ ເພັດສອນ ອິນສຸພັນ ຮອງເລຂາພັກ ຮອງກອງບັນຊາການ ປກສ ແຂວງຫົວພັນ, ມີບັນດາທ່ານການນຳເມືອງ, ພະນັກງານ – ລັດຖະກອນ ຫ້ອງການອ້ອມຂ້າງ, ຫົວໜ້າ-ຄະນະ ປ້ອງກັນຊາດ-ປ້ອງກັນຄວາມສະຫງົບເມືອງ ແລະ ອົງການປົກຄອງບ້ານ 59 ບ້ານ ເຂົ້າຮ່ວມ.

ໃນວາລະກອງປະຊຸມ ທ່ານ ພູທອງ ພັນທະວົງ ຫົວໜ້າຫ້ອງວ່າການເມືອງຊຽງຄໍ້, ໄດ້ຜ່ານມະຕິກອງປະຊຸມສະໄໝວິສາມັນ ເທື່ອທີ່ 1 ຂອງສະພາແຫ່ງຊາດ ຊຸດທີ 9 , ຄຳສັ່ງຂອງນາຍົກລັດຖະມົນຕີກ່ຽວກັບການຈັດຕັ້ງ ວາລະແຫ່ງຊາດວ່າດ້ວຍ ການແກ້ໄຂບັນຫາຢາເສບຕິດ, ຂໍ່້ຕົກລົງ ແຕ່ງຕັ້ງຄະນະຮັບຜິດຊອບຊີ້ນຳລວມຂັ້ນເມືອງ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ການແກ້ໄຂຢາເສບຕິດ.

ພັທ ຈັນເພັດ ຫຼ້າອິນສານ ຫົວໜ້າ ກອງບັນຊາການ ປກສ ເມືອງຊຽງຄໍ້ ໄດ້ຂຶ້ນຜ່ານ ແຜນການເຄື່ອນໄຫວ ຈັດຕັ້ງປະຕິບັດ ວາລະແຫ່ງຊາດ ການແກ້ໄຂບັນຫາຢາເສບຕິດ ເຊິ່ງວາລະໄດ້ກຳນົດເອົາ 6 ວຽກງານຈຸດສຸ່ມຄື ສ້າງຄວາມຮັບຮູ້ໃນທົ່ວສັງຄົມ ດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບກົດຫມາຍ ແລະ ຜົນຮ້າຍຂອງຢາເສບຕິດ ສ້າງ ແລະ ປັບປຸງກົດຫມາຍ ແລະ ນິຕິກໍາໃຕ້ ກົດຫມາຍທີ່ກ່ຽວຂ້ອງ ກັບບັນຫາຢາເສບຕິດ, ປັບປຸງກົງຈັກ ການຈັດຕັ້ງ ແລະ ຍົກລະດັບຄວາມສາມາດໃນການເຄື່ອນໄຫວ ເຮັດຫນ້າທີ່ການເມືອງຂອງອົງການສືບສວນ-ສອບສວນ, ອົງການ ສານປະຊາຊົນ, ອົງການໄອຍາການປະຊາຊົນ, ອົງການປະຕິບັດຄໍາ ຕັດສິນຂອງສານ ແລະ ພາກສ່ວນທີ່ກ່ຽວຂ້ອງຕໍ່ການແກ້ໄຂ ບັນຫາຢາເສບຕິດ, ຍົກສູງປະສິດທິພາບດ້ານການຄຸ້ມຄອງ, ຊີ້ນໍາໃນການຈັດຕັ້ງ ປະຕິບັດຮອບດ້ານໃນວຽກງານແກ້ໄຂບັນຫາຢາເສບຕິດ, ປັບປຸງຂີດຄວາມສາມາດການເຄື່ອນໄຫວເຮັດຫນ້າທີ່ຂອງລະບົບ ການເມືອງແຕ່ລະຂັ້ນ ເພື່ອຊີ້ນໍາ-ນໍາພາການແກ້ໄຂບັນຫາຢາ ເສບຕິດທີ່ເກີດຂຶ້ນຢູ່ໃນຂອບເຂດຄວາມຮັບຜິດຊອບຂອງຕົນ, ເພີ່ມທະວີວຽກງານການຮ່ວມມືກັບສາກົນ ເພື່ອແກ້ໄຂ ບັນຫາຢາເສບຕິດ.

ໃນຕອນທ້າຍກອງຊຸມ ຍັງໄດ້ຮັບຟັງການໂອ້ລົມຂອງ ທ່ານ ວົງໄຊ ຍະສິງທອນ ກຳມະການພັກແຂວງ ເລຂາພັກເມືອງ ເຈົ້າເມືອງໆຊຽງຄໍ້, ທ່ານໄດ້ເນັ້ນໃຫ້ ທຸກພາກສ່ວນ ຕ້ອງມີສ່ວນຮ່ວມພ້ອມກັນປະຕິບັດຢ່າງເຂັ້ມງວດ, ພະນັກງານ-ນັກຮົບ ຕ້ອງເອົາໃຈໃສ່ເຮັດວຽກງານການເມືອງແນວຄິດຕາມພະລະບົດບາດຂອງຕົນ, ຕ້ອງຫັນລົງສູ່ຮາກຖານ ເຄື່ອນໄຫວວິຊາສະເພາະຢ່າງແຂງແຮງ ເພື່ອສາມາດເກັບກໍາໄດ້ບັນຫາຂໍ້ມູນກ່ຽວກັບຢາເສບຕິດ,  ຕ້ອງແກ້ໄຂໃຫ້ໄດ້ບັນຫາປະກົດການຫຍໍ້ທໍ້ ໃນຖັນແຖວ, ພະນັກງານຕ້ອງ ເດັດຂາດ, ເຂັ້ມງວດ, ໂປ່ງໃສ, ໃນການດຳເນີນບັນຫາຢາເສບຕິດ, ເອົາໃຈໃສ່ລົງໂຄສະນາຜົນຮ້າຍ ແລະ  ຜົນກະທົບຈາກຢາເສບຕິດ ໃຫ້ປວງຊົນຮັບຮູ້ ສ້າງຄວາມເຂັ້ມແຂງທາງດ້ານຄອບຄົວ, ສ້າງບ້ານປອດຢາເສບຕິດ ຕິດພັນກັບ ການສ້າງບ້ານປ້ອງກັນຄວາມສະຫງົບດີ ພ້ອມກັນແກ້ໄຂບັນຫາຢາເສບຕິດໃຫ້ໝົດໄປເທື່ອລະກ້າວ.

Off

Comments are closed.