11th Jan2022

ກົມໃຫຍ່ການເມືອງ ກະຊວງ ປກສ ຈັດພິທີປະກາດກົງຈັກການຈັດຕັ້ງ ແລະ ເລື່ອນຊັ້ນໃຫ້ນາຍ ແລະ ຕຳຫຼວດ.

by Peaung Thanonkeo

ໃນວັນທີ 10 ມັງກອນ 2022 ນີ້, ກົມໃຫຍ່ການເມືອງ ກະຊວງ ປກສ ຈັດພິທີປະກາດປັບປຸງກົງຈັກການຈັດຕັ້ງ ແລະ ເລື່ອນຊັ້ນໃຫ້ນາຍ ແລະ ພົນຕຳຫຼວດ ໂດຍການເຂົ້າຮ່ວມຂອງ ພົຈວ ຄຳສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ປກສ, ມີບັນດາ ຄະນະພັກກົມໃຫຍ່, ຫົວໜ້າກົມ, ຮອງກົມ ແລະ ພະນັກງານຫຼັກແຫຼ່ງ ພ້ອມດ້ວຍນາຍ ແລະ ພົນຕຳຫຼວດ ຜູ້ທີ່ໄດ້ຮັບການເລື່ອນຍຊັ້ນ ເຂົ້າຮ່ວມ.

ພັອ ບຸນສີ ທຳມະລັງສີ ຮອງຫົວໜ້າຫ້ອງການເມືອງ ປກສ ໄດ້ຜ່ານຂໍ້ຕົກລົງ ຂອງກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງນາຍຕຳຫຼວດທີ່ຂຶ້ນກັບກົມໃຫຍ່ການເມືອງ ປກສ, ໃນນີ້ແຕ່ງຕັ້ງ  ພັທ ແກ້ວອຸດອນ ວິໄລທອງ ເປັນຮອງຫົວໜ້າຫ້ອງການກົມໃຫຍ່ການເມືອງ ແລະ  ພັທ ບຸນຕອມ ພັນທະວົງ ເປັນຮອງຫົວໜ້າໂຮງຮຽນວັນທະນະທຳ ຫຼັກ 67, ຜ່ານມະຕິຕົກລົງ ຄະນະພັກກົມໃຫຍ່ການເມືອງ ປກສ ວ່າດ້ວຍການບົ່ງຕົວແຕ່ງຕັ້ງຮອງເລຂາໜ່ວຍພັກຮາກຖານ, ໃນນີ້ບົ່ງຕົວແຕ່ງຕັ້ງ  ພັທ ປອ ວຽງໄຊ ທຳມະສິດ ເປັນຮອງເລຂາໜ່ວຍພັກຮາກຖານຫ້ອງການ ແລະ ຜ່ານຂໍ້ຕົກລົງ ວ່າດ້ວຍການຍົກຍ້າຍນາຍຕຳຫຼວດ ທີ່ຂຶ້ນກັບກົມໃຫຍ່ການເມືອງ ປກສ, ໃນນີ້ຍົກຍ້າຍ  ພັທ ປອ ຕູ້ ດວງມະນີ ຈາກກົມສື່ມວນຊົນ ໄປຮັບໜ້າທີ່ໃໝ່ຢູ່ ໂຮງຮຽນທິດສະດີການເມືອງ ປກສ. ພ້ອມທັງຜ່ານຂໍ້ຕົກລົງ ວ່າດ້ວຍການເລື່ອນຊັ້ນໃຫ້ນາຍ ແລະ ພົນຕຳຫຼວດ ກົມໃຫຍ່ການເມືອງປ້ອງກັນຄວາມສະຫງົບ ຈຳນວນ 46 ສະຫາຍ ຍິງ 19 ສະຫາຍ. ໃນນີ້, ເລື່ອນຊັ້ນ ຂັ້ນນາຍຮ້ອຍ 12 ສະຫາຍ ແລະ ນາຍສິບ 34 ສະຫາຍ ແລະ ຜ່ານຂໍ້ຕົກລົງ ວ່າດ້ວຍການເລື່ອນຊັ້ນ, ດັດແປງຊັ້ນ ໃຫ້ນາຍ ແລະ ພົນຕຳຫຼວດ, ໃນນີ້ດັດແປງຊັ້ນ ນາຍຮ້ອຍ 32 ສະຫາຍ ນາຍສິບ 18 ສະຫາຍ

ໂອກາດນີ້,  ພົຈວ ຄຳສາຍ ຈັນທະວົງ ມີຄຳເຫັນໄດ້ໂອ້ລົ້ມ ແລະ ເນັ້ນໜັກໃຫ້ຜູ້ທີ່ໄດ້ຮັບຕຳແໜ່ງໃໝ່ ຈົ່ງເພີ່ມທະວີຄວາມເປັນແບບຢ່າງນຳໜ້າໃນການປະຕິບັດໜ້າທີ່ວິຊາສະເພາະ, ເຂັ້ມງວດໃນການປະຕິບັດລະບຽບວິໄນທີ່ວາງອອກ ແນໃສ່ໃຫ້ບັນດາພະນັກງານ-ນັກຮົບ ຮຽນຮູ້ເອົາເປັນແບບຢ່າງ, ເອົາໃຈໃສ່ສູ້ຊົນສ້າງຕົນເອງໃຫ້ມີຄວາມກ້າວໜ້າຂຶ້ນສູພະນັກງານຂັ້ນນຳພາ-ບັນຊາ ທີ່ມີຄວາມຮູ້-ຄວາມສາມາດພຽບພ້ອມໃນທຸກໆດ້ານ, ມີຄວາມຈົ່ງຮັກພັກດີຕໍ່ພັກ-ລັດ, ເປັນເອກະພາບກັບແນວທາງຂອງພັກ, ຕັ້ງໜ້າປະຕິບັດທັດສະນະຂອງພັກກ່ຽວກັບການປັບປຸງກໍ່ສ້າງກຳລັງ ປກສ ໃຫ້ເຕີບໃຫຍ່ເຂັ້ມແຂງຂຶ້ນເລື້ອຍໆ.

ພ້ອມກັນນີ້  ໄດ້ເນັ້ນໜັກໃຫ້ນາຍຕຳຫຼວດຜູ້ທີ່ໄດ້ຮັບການເລື່ອນຊັ້ນ ຈົ່ງພ້ອມກັນຮັກສາມູນເຊື້ອອັນດີງາມຂອງຕົນເອງ ພ້ອມທັງຍົກສູງຄວາມຮັບຜິດຊອບຕໍ່ໜ້າທີ່ວຽກງານວິຊາສະເພາະຂອງຕົນໃຫ້ຫຼາຍຂຶ້ນກວ່າເກົ່າ ເພື່ອພ້ອມກັນເຮັດສຳເລັດໜ້າທີ່ຕາມທີ່ ພັກ-ລັດ ການຈັດຕັ້ງ ແລະ ປະຊາຊົນມອບໜາຍໃຫ້ ມີບາດກ້າວພັດທະນາດີຂຶ້ນເລື້ອຍໆ.

 

Comments are closed.