29th Jun2017

ຈັບຜູ້ ຄ້າຂາຍ ຢາເສບຕິດ ໄດ້ 2 ຄົນ ຂອງກາງ ຢາບ້າ 10 ພັນ ກວ່າເມັດ

by somchan

​ໃນ​ວັນ​ທີ 31 ພຶດສະພາ 2017 ນີ້ ​ເຈົ້າ​ໜ້າ​ທີ່​ຕຳຫຼວດ ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ປກສ ​ແຂວງ​ອັດ​ຕະປື ​ໄດ້​ຈັບ​ຕົວ ​ຜູ້​ຄ້າຂາຍ​ ຢາ​ເສບ​ຕິດ ​ໄດ້ 1 ຄົນ ພ້ອມຂອງ​ກາ ງ​ຢາ​ເສບ​ຕິດ ​ປະ​ເພດ​ ຢາ​ບ້າ 8,600 ​ເມັດ ຜູ້​ຕ້ອງ​ຫາ ​ຊື່ ນາງ ດຳ ອາຍຸ 20 ປີ ບ້ານ​ຫາດ​ຊາຍ​ຂາວ ​ເມືອງ​ໄຊ​ເສດ​ຖາ ​ແຂວງ​ອັດ​ຕະປື ຜ່ານ​ການ​ສືບສວນ-​ສອບ​ສວ​ນຂອງ​ເຈົ້າ​ໜ້າ​ທີ່ ຜູ້ກ່ຽວ ​ໄດ້​ໃຫ້ການ​ຕໍ່​ເຈົ້າ​ໜ້າ​ທີ່​ວ່າ ​ໄດ້​ຄ້າຂາຍ​ຢາ​ເສບ​ຕິດ​ຮ່ວມ​ກັບ ນາງ ໜຸ້ຍ ອາຍຸ 40 ປີ ຢູ່​ບ້ານ​ອຸດົມ​ສຸກ ​ເມືອງ​ສະໜາມ​ໄຊ ​ແຂວງ​ອັດ​ຕະປື ດັ່ງ​ນັ້ນ ​ເຈົ້າ​ໜ້າ​ທີ່​ຈຶ່ງ​ຂະຫຍາຍ​ຜົນ ​ແລ້ວ​ທຳ​ການ​ຈັບ​ກຸ​ມຜູ້​ຕ້ອງ​ຫາ ທີ່​ຮ່ວມ​ຂະ​ບວນການ ​ໃນ​ວັນ​ທີ 9 ມິຖຸນາ 2017 ພ້ອມຂອງ​ກາງ​ 2,340 ​ເມັດ.

ພວກ​ກ່ຽວ​ທັງ​ສອງ ​ໄດ້​ຮັບ​ສາລະພາບ​ວ່າ ຂອງ​ກາງ​ຢາ​ບ້າ​ຈຳນວນ 10,940 ​ເມັ​ດ ​ແມ່ນ​ຂອງ​ຕົນ​ແທ້ ​ເຊິ່ງ​ໄດ້​ຮ່ວມ​ກັນ​ຄ້າຂາຍ, ​ຈຳໜ່າຍ ​ໃຫ້​ໄວ​ລຸ້ນ ພາຍ​ໃນ​ບ້ານ ​ແລະ ບ້ານ​ໃກ້​ຄຽງ ​ເຊິ່ງ​ໄດ້​ເລິ່ມຄ້າຂາຍ ​ຮ່ວມ​ກັນ ​ໃນ​ຕົ້ນ​ປີ 2017 ສຸດ​ທ້າຍ​ ຖືກ​ເຈົ້າ​ໜ້າ​ທີ່​ ຕຳຫຼວດ ປກສ ​ແຂວງ​ອັດ​ຕະປື ຈັບ​ໄດ້ ຄະດີ​ດັ່ງກ່າວ​ ເຈົ້າໜ້າ​ທີ່ພວມ​ເລັ່ງ ປະກອບ​ສຳນວນ ຄະດີ​ສົ່ງ​ ໄອ​ຍະ​ການ​ສັ່ງ​ຟ້ອງ​ ສານ​ຕັດສິນ ຕາມ​ລະບຽບ​ກົດໝາຍ ​ບ້ານ​ເມືອງ​ຕໍ່​ໄປ.

Off
28th Jun2017

ແຂວງ ບໍ່ແກ້ວ ຈູດທຳລາຍ ຢາບ້າ 400,000 ກວ່າເມັດ

by somchan

​     ໃນ​ວັນ​ທີ 26 ມິຖຸນາ 2017 ກອງ​ບັນຊາ​ການ​ ​ປກສ ແຂວງ​ບໍ່​ແກ້ວ ​ໄດ້​ຈັດ​ພິທີ​ ຈູດ​ທຳລາຍ ຢາ​ເສບ​ຕິດ ​ເນື່ອງ​ໃນ​ໂອກາດ ວັນ​ຕ້ານ​ຢາ​ເສບ​ຕິດ ​ສາກົນ 26 ມິຖຸນາ ​ໂດຍ​ມີ​ການ​ນຳ ​ຂອງ​ແຂວງ ພ້ອມ​ດ້ວຍ​ຄະນະ​ພັກ – ​ຄະນະ​ບັນຊາ ກຳລັງ ປກຊ-ປກສ ​ແລະ ພະນັກງານ​ທີ່​ກ່ຽວຂ້ອງ ​ອ້ອມ​ຂ້າງ​ແຂວງ ​ເຂົ້າ​ຮ່ວມ.

ພັອ ລຳ​ໄພ ຍົດ​ປະ​ໄພ ຫົວໜ້າ​ກອງ​ບັນຊາ​ການ ປກສ ​ແຂວງ​ບໍ່​ແກ້ວ ​ໃຫ້​ຮູ້​ວ່າ: ຢາ​ເສບ​ຕິດ​ທີ່​ນຳ​ມາ​ຈູດ​ທຳລາຍ​ໃນ​ຄັ້ງ​ນີ້ ມີ​ຫຼາຍ​ລາຍການ ​ໃນ​ນີ້​ມີ​ຢາ​ບ້າ ຈຳນວນ 428,000 ​ເມັດ ນ້ຳໜັກ 42 ກິ​ໂລກຼາມ, ​ເຮ​ໂລ​ອິນ 20 ​ແທ່ງ ນ້ຳໜັກ 7,719 ກິ​ໂລກຼາມ, ຢາ​ໄອສ 2 ຖົງ ນ້ຳໜັກ 9.5 ກຼາມ, ຝຸ່ນ​ແປ້ງ 20 ​ເປົາ ນ້ຳໜັກ 500 ກິ​ໂລກຼາມ ຢາ​ເສບ​ຕິດ ຈຳນວນ​ດັ່ງກ່າວ ​ແມ່ນ​ໃນ​ໄລຍະ​ຄະດີ​ທີ່​ແກ້​ໄຂ​ໄດ້ ​ທັງ​ໝົດ ມີ 83 ​ເລື່ອງ, ມີ​ຜູ້​ຖືກ​ຫາ​ຕັດສິນ​ລົງ​ໂທດ 95 ຄົນ, ຍິງ 7 ຄົນ, ​ໃນ​ນັ້ນ​ມີ​ຄົນ​ຕ່າງປະ​ເທດ 8 ຄົນ ​ເຊິ່ງ​ເຈົ້າ​ໜ້າ​ທີ່​ຕຳ​ຫຼວດ​ໄດ້​ເກັບ​ກູ້ ​ແລະ ຍຶດ​ໄດ້​ຈາກ​ການ​ປະຕິບັດ​ໜ້າ​ທີ່ ​ໃນ 1 ປີຜ່ານມາ ຢາ​ເສບ​ຕິດ ​ທີ່ນຳ​ມາ​ຈູດ​ທຳລາຍ​ໃນ​ຄັ້ງ​ນີ້ ນອກຈາກ​ຈະ​ເປັນ​ສິ່ງ​ທີ່ຜິດ​ກົດໝາຍ​ແລ້ວ ຍັງ​ເປັນ​ສິ່ງ​ທີ່​ເປັນ​ໄພ​ອັນຕະລາຍ ​ແລະ ກໍ່​ໃຫ້​ເກີດ​ປະກົດ​ການ​ຫຍໍ້​ທໍ້​ຕ່າງໆ ທີ່​ສົ່ງ​ຜົນ​ກະທົບຕໍ່​ຄວາມ​ສະຫງົບ​ສຸກ ​ແລະ ຄວາມ​ເປັນ​ລະບຽບ​ຮຽບຮ້ອຍ​ໃນ​ສັງຄົມ.

Off
27th Jun2017

ຕາງໜ້າ ຄະນະປະສານງານ ເງີນກູ້ ປະເທດ ຮົງກາລີ ເຂົ້າຢ້ຽມ ຂ່ຳນັບ ຮອງ ລັດຖະມົນຕີ ປກສ

by somchan

ໃນ​ທ້າຍ​ອາທິດ​ຜ່ານ​ມາ, ທີ່​ກະຊວງ ປກສ ທ່ານ ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ ​ກະຊວງ ປ້ອງ​ກັນ​ຄວາມ​ສະຫງົບ ສ​ປປ ລາວ ​ໄດ້​ຕ້ອນຮັບ​ ການ​ເຂົ້າ​ຢ້ຽມ​ຂ່ຳນັບ ​ຂອງ ທ່ານ ​ໂກ​ວາສ ລາສ​ໂລ ຜູ້​ຕ່າງ​ໜ້າ ​ຄະນະ​ປະສານ​ງານ ​ເງີ​ນກູ້​ຂອງ​ປະ​ເທດ ​ຮົງ​ກາລີ ພ້ອມ​ຄະນະ ​ເພື່ອ​ລາຍ​ງານ ​ກ່ຽວກັບ ​ການ​ພົວພັນ ຮ່ວມມື ​ລະຫວ່າງ ຄະ​ນະ ​ປະສານ​ງານ​ ເງີ​ນກູ້ ກັບ ກະຊວງ​ປ້ອງ​ກັນ​ຄວາມ​ສະຫງົບ.

​ໃນ​ໂອກາດ​ດັ່ງກ່າວ ທ່ານ ​ໂກ​ວາສ ລາສ​ໂລ ກໍ່​ໄດ້​ສະ​ແດງ​ ຄວາມ​ຂອບ​ໃຈ​ຕໍ່ ​ທ່ານ ຮອງ​ລັດຖະມົນຕີ ກະຊວງ ປກສ ພ້ອມ​ຄະນະ ທີ່​ໄດ້​ໃຫ້ການ​ຕ້ອນຮັບຢ່າງ​ອົບ​ອຸ່ນ ​ແລະ ​ໃຫ້​ຄວາມ​ສະດວກ​ ໃນ​ທຸກ​ດ້ານ ​ແລະ ​ໄດ້​ລາຍ​ງານ​ກ່ຽວ​ກັບ ການ​ເຄື່ອນ​ໄຫວ​​ເຮັດ​ວຽກ​ຢູ່ ສປປ ລາວ ​ໂດຍ​ສະ​ເພາະ​ແມ່ນ​ເນື້ອ​ໃນທີ່​ກະກຽມ​ໃນ​ການ​ເຊັນ​ສັນຍາ​ເງີ​ນກູ້​ທີ່​ບໍ່​ມີດ​ອກ​ເບ້ຍ ຈາກ​ປະ​ເທດ​ຮົງ​ກາລີ ​ໂດຍ​ຫບໍ້ ​ແລະ ທັງ​ສອງ​ຝ່າຍ ກໍ່​ໄດ້​ແລກປ່ຽນ​ບົດຮຽນ​ນຳ​ກັນ ​ເພື່ອ​ສືບ​ຕໍ່​ເພີ່ມ​ທະວີ​ການ​ພົວພັນ​ຮ່ວມ​ມື, ການສະໜັບສະໜູນຊ່ວຍ​ເຫຼື​​ອ​ເຊິ່ງກັນ ​ແລະ ກັນ​ ໃນ​ຕໍ່ໜ້າ.

​ໂອກາດ​ນີ້, ພົຕ ກົງ​ທອງ ພົງ​ວິຈິດ ​ໄດ້​ສະ​ແດງ​ຄວາມ​ຕ້ອນຮັບ​ອັນ​ອົບ​ອຸ່ນ ​ແລະ ຕີ​ລາຄາ​ສູງ ຕໍ່​ ທ່ານ ​ໂກ​ວາສ ລາສ​ໂລ ພ້ອມ​ຄະນະ ທີ່​ໄດ້​ເດີນທາງ​ມາ​ເຮັດ​ວຽກ​ຮ່ວມ​ກັບ ກະຊວງ ປກສ ສ​ປປ ລາວ ​ເຊິ່ງ​ເປັນ​ການ​ເສີມ​ຂະຫຍາຍ ສາຍ​ພົວພັນ​ຮ່ວມ​ມື​ລະຫວ່າງ ປະ​ເທດ​ລາວ-​ຮົງ​ກາລີ ທີ່​ມີ​ການ​ຮ່ວມ​ມື​ຊ່ວຍ​ເຫຼືອ​ເຊິ່ງກັນ ​ແລະ ກັນ.

Off
23rd Jun2017

ສານປະຊາຊົນ ຂັ້ນຕົ້ນ ແຂວງອຸດົມໄຊ ຕັດສິນ ປະຫານຊີວິດ 2 ຜູ້ກະທຳຜິດ ໃນສະຖານ ຄ້າຂາຍ ຢາເສບຕິດ

by somchan

ໃນ​ວັນ​ທີ 19 ມິຖຸນາ 2017 ນີ້ ສານ​ປະຊາຊົນ ​ຂັ້ນ​ຕົ້ນ ​ແຂວງ​ອຸດົມ​ໄຊ ​ໄດ້​ຕັດສິນ​ລົງ​ໂທດ ປະຫານ​ຊີວິດ 2 ຜູ້​ກະທຳ​ຜິດ ​ໃນ​ສະຖານ​ຄ້າຂາຍ, ຂົນ​ສົ່ງ ​ແລະ ມີ​ຢາ​ເສບ​ຕິດ ປະ​ເພດ​ ຢາ​ບ້າ 873 ມັດ ນ້ຳໜັກ 194 ກິ​ໂລກຣາມ ​ແລະ ​ເຮ​ໂລ​ອິນ 99 ​ແທ່ງ ນ້ຳໜັກ 37 ກິ​ໂລກຣາມ ​ໄວ້​ໃນ​ຄອບ​ຄອງ.

ຜູ້​ກະທຳ​ຜິດ​ ທີ່​ຖືກ​ສານ​ຕັດສິນ​ ລົງ​ໂທດ​ປະຫານ​ຊີວິດ​ ຄັ້ງ​ນີ້ ມີ​ທ້າວ ຊາຍ​ຄອນ ອາຍຸ 28 ປີ ປະຊາຊົນ ຢູ່​ບ້ານ ຫ້ວຍ​ຊາຍ​ໃຕ້ ​ເມືອງ​ຫ້ວຍ​ຊາຍ ​ແລະ ທ້າວ​ເພັດ​ມະນີ ອາຍຸ 28 ປີ ປະຊາຊົນ ຢູ່​ບ້ານ ​ໃຫ່ຍຕົ້ນ​ເຜິ້ງ ​ເມືອງ​ຕົ້ນ​ເຜິ້ງ ​ແຂວງ​ບໍ່​ແກ້ວ ​ເຊິ່ງ​ໄດ້​ຖືກ​ເຈົ້າ​ໜ້າ​ທີ່ ຕຳຫຼວດ ​ແຂວງ​ອຸດົມ​ໄຊ ກັກ​ຕົວ​ດຳ​ເນີນ​ຄະດີ ​ໃນ​ໄລຍະ​ເດືອນ ກໍ​ລະ​ກົດ 2014.

ຜ່ານ​ການ​ຄົ້ນຄວ້າ ພິຈາລະນາ ຕາມ​ຄຳ​ສາລະພາບ ຂອງ​ຜູ້​ກະທຳ​ຜິດ ທັງ 2 ຄົນ ​ໃນ​ສຳນວນ​ຄະດີ, ການ​ໄຕ່​ສວນ​ຂອງ​ຄະນະ​ສານ​ອາຍາ ​ແລະ ຄຳ​ຖະ​ແຫຼ​ງສັ່ງ​ຟ້ອງ ຂອງ​ອົງການ​ໄອ​ຍະ​ການ​ປະຊາຊົນ ​ແຂວງ​ອຸດົມ​ໄຊ ​ເຫັນ​ວ່າ ທ້າວ​ຊາຍ​ຄອນ ​ແລະ ທ້າວ​ເພັດ​ມະນີ ​ແມ່ນ​ມີ​ຄວາມ​ຜິດ​ແທ້ ​ໂດຍ​ມີ​ຂໍ້​ມູນ​ຫຼັກ​ຖານ​ຄົບ​ຖ້ວນ ຕາມ 4 ອົງ​ປະກອບ​ຂອງ​ການ ກະທຳ​ຜິດ ທີ່​ໄດ້​ກຳນົດ​ໄວ້ຢູ່​ໃນ​ກົດໝາຍ​ອາຍາ ​ແລະ ມີ​ຄວາມ​ຜິດ​ຕາມ ມາດຕາ 146 ຂອງ​ກົດໝາຍ​ອາຍາ ຄື ຂໍ້ 1 ວັກ 4 ຖ້າ​ບຸກຄົນ​ໃດ​ຫາກ​ຜະລິດ, ຄ້າຂາຍ ຫຼື ມີ​ໄວ້​ຄອບ​ຄອງ, ນ້ຳ​ເຂົ້າ, ສົ່ງ​ອອກ, ຂົນ​ສົ່ງ ຫຼື ນຳ​ເຮ​ໂລ​ອິນ ຜ່ານ ສປປ ລາວ ​ເກີນ​ກວ່າ ຫ້າ​ຮ້ອຍ​ກຣາມ ຈະ​ຖືກ​ລົງ​ໂທດ​ປະຫານ​ຊີວິດ ​ແລະ ຂໍ້ 2 ວັກ 4 ​ເຊິ່ງ​ໄດ້​ກຳນົດ​ໄວ້​ວ່າ ບຸກຄົນ​ໃດ​ຫາກ​ຜະລິດ, ປຸງ​ແຕ່ງ, ມີ​ໄວ້​ຄອບ​ຄອງ, ຄ້າຂາຍ, ຈຳໜ່າຍ, ນຳ​ເຂົ້າ, ສົ່ງ​ອອກ, ຂົນ​ສົ່ງ ຫຼື ນຳ​ຢາ​ບ້າ ຜ່ານ ສ ປປ ລາວ ​ເກີນ​ກວ່​າ ສາມ​ກິ​ໂລກຣາມ ຈະ​ຖືກ​ປະຫານ​ຊີວິດ.

ດັ່ງ​ນັ້ນ ສານ​ປະຊາຊົນ​ຂັ້ນ​ຕົ້ນ ​ແຂວງ​ອຸດົມ​ໄຊ ຈຶ່ງ​ໄດ້​ຕັດສິນ​ລົງ​ໂທດ ​ໃຫ້​ປະຫານ​ຊີວິດ ທ້າວ ຊາຍ​ຄອນ ​ແລະ ທ້າວ ​ເພັດ​ມະນີ ພ້ອມ​ທັງ​ຮັບ​ວັດຖຸ​ຊັບ​ສິນ​ທີ່​ກ່ຽວຂ້ອງ​ກັບ​ການ​ກະທຳ​ຜິດ ​ເຂົ້າ​ເປັນ​ຂອງ​ລັດ ຄື ມີ​ເງີ​ນກີບ 5 ລ້ານ​ກີບ, ​ເງີ​ນບາດ 4.500 ບາດ ​ແລະ ລົດ​ໃຫ່ຍ 1 ຄັນ.

Off
23rd Jun2017

ເຈົ້າໜ້າທີ່ ໜ່ວຍສະເພາະກິດ ປະຈຳດ່ານ ນ້ຳເກິ່ງ ເມືອງ ຫ້ວຍຊາຍ ແຂວງ ບໍ່ແກ້ວ ກວດຄົ້ນລົດ ໂດຍສານ ປະຈຳທາງ ພົບເຫັນ ຢາບ້າ 23 ມັດ

by somchan

​ໃນ​ເວລາ ​ປະມານ 10​:00 ​ໂມງ​ເຊົ້າ ຂອງ​ວັນ​ທີ 20 ມິຖຸນາ 2017 ນີ້ ເຈົ້າ​ໜ້າ​ທີ່ ໜ່ວຍ​ສະ​ເພາະ​ກິດ ​ປະຈຳ​ດ່ານ​ ນ້ຳ​ເກິ່ງ ​ເມືອງ​ຫ້ວຍຊາຍ ​ແຂວງ​ບໍ່​ແກ້ວ ​ໄດ້​ກວດ​ຄົ້ນ​ລົດ ​ໂດຍສານ ປະຈຳ​ທາງ ​ເມືອງຕົ້ນ​ເຜິ້ງ – ຫ້ວຍ​ຊາຍ ​​ໄດ້ພົບ​ເຫັນ​ຢາ​ບ້າ ຈຳນວນ 23 ມັດ ຊຸກ​ເຊື່ອງ ​ຢູ່​ໃນ​ກະ​ເປົ່າ​ເດີນທາງ​ ຂອງ​ທ້າວ ຊໍ​ລີ ຢູ່​ເຂດ​ ບ້ານ​ດອຍ​ແດງ  ​ເມືອງ​ຕົ້ນ​ເຜິ້ງ ​ແຂວງ​ບໍ່​ແກ້ວ.

ດັ່ງ​ນັ້ນ, ​ເຈົ້າ​ໜ້າ​ທີ່​ຕ້ານ ​ແລະ ສະກັດ​ກັ້ນ​ຢາ​ເສບ​ຕິດ ປກສ ​ແຂວງ​ບໍ່​ແກ້ວ ຈຶ່ງ​ໄດ້​ກັກ​ຕົວ​ຜູ້ກ່ຽວ​ມາ​ທຳ​ການ​ສືບ​ສວນ-​ສອບ​ສວນ ຜ່ານ​ການ​ສືບສວນ-​ສອບ​ສວນ​ໃນ​ເບື້ອງ​ຕົ້ນ ຜູ້ກ່ຽວ​ໄດ້​ຮັບ​ສາລະພາບ​ວ່າ ຢາ​ບ້າ​ຈຳນວນ​ດັ່ງກ່າວ​ແມ່ນ​ຂອງ​ຜູ້ກ່ຽວ​ແທ້ ພ້ອມ​ກັບ​ອ້າຍ​ຊື່ ທ້າວ​ລີ ຢູ່​ເມືອງ​ຊຳ​ເໜືອ ​ແຂວງ​ຫົວພັນ ​ເຊິ່ງ​ໄດ້​ຊື້​ມາ​ແຕ່​ບ້ານ ພຽງ​ງາມ ​ເມືອງ​ຕົ້ນ​ເຜິ້ງ ​ແຂວງ​ບໍ່​ແກ້ວ ຈຳນວນ 23 ມັດ ​ເທົ່າ​ກັບ 46.000 ​ເມັດ ​ໃນ​ລາຄາ ມັດ​ລະ 28.000 ບາດ ​ເພື່ອ​ຈະ​ນຳ​ໄປ​ສົ່ງ​ໃຫ້​ລູກ​ຄ້າ​ທີ່​ລໍຖ້າ​ຢູ່​ເຂດ​ເມືອງ​ຫ້ວຍ​ຊາຍ ​ແຂວງ​ບໍ່​ແກ້ວ ​ໃນ​ລາຄາ​ມັດ​ລະ 30.000 ບາດ ​ແຕ່​ຖືກ​ເຈົ້າ​ໜ້າ​ທີ່​ຕຳຫຼວດ​ກັກ​ຕົວ​ໄດ້​ກ່ອນ ສ່ວນ​ທ້າວ​ ລີ ​ແມ່ນ​ໄດ້​ເອົາ​ຕົວ​ຫຼົບ​ໜີ.

ປັດຈຸບັນ​ເຈົ້າ​ໜ້າ​ທີ່​ໄດ້​ກັກ​ຕົວ​ຜູ້ກ່ຽວ ພ້ອມ​ດ້ວຍ​ຂອງ​ກາງ ​ເພື່ອ​ທຳ​ຫານ​ສືບສວນ-ສອບ​ສວນ ຂະຫຍາຍ​ຜົນ​ຫາ​ກຸ່ມ​ແກ້ງ​ຄ້າຂາຍ​ຢາ​ເສບ​ຕິດ​ລາຍ​ນີ້ ມາ​ດຳ​ເນີນ​ຄະດີ​ຕາມ​ລະບຽບ​ກົດ​ໝາຍ​ຕໍ່​ໄປ.

Off
22nd Jun2017

ກະຊວງ ປກສ ປຶກສາ​ກຽມ​ສະ​ຫຼອງ​ ວັນ​ສາມັກຄີ​ມິດຕະພາບ ລາວ-​ຫວຽດນາມ

by admin

ກະຊວງ ປກສ ປຶກສາ​ກຽມ​ສະ​ຫຼອງ​ ວັນ​ສາມັກຄີ​ມິດຕະພາບ ລາວ-​ຫວຽດນາມ

​ໃນ​ວັນ​ທີ 20 ມິຖຸນາ 2017 ນີ້ ກະຊວງ ປກສ ​ໄດ້​ຈັດ​ກອງ​ປະຊຸມ​ປຶກສາ​ຫາລື​ກະກຽມ​ສະ​ເຫຼີ​ມສະຫຼອງ ສອງ​ວັນ​ປະຫວັດສາດ ລາວ-​ຫວຽດນາມ  ​ໂດຍ​ການ​ເປັນ​ປະທານ​ຂອງ ພົຕ ສິນ​ທະ​ວົງ ​ໄຊ​ຍະ​ກອນ ຮອງ​ລັດຖະມົນຕີ​ກະຊວງ ປກສ ທັງ​ເປັນ​ຮອງ​ຫົວໜ້າຄະນະ​ຮັບຜິດຊອບ​ຊີ້​ນຳ​ລວ​ມ ການ​ຈັດ​ກອງ​ປະຊຸມ​ຄັ້ງ​ນີ້ ຄະນະ​ບໍລິຫານ​ງານ​ພັກ ກະຊວງ ປກສ , ຄະນະ​ຮັບຜິດຊອບ ​ແລະ ບັນດາ​ອະນຸກຳມະການ ​ໄດ້​ປຶກສາ​ຫາລື ​ແລະ ປະກອບ​ຄຳ​ຄິດ​ເຫັນ ​ໃສ່​ຮ່າງ​ກິດຈະກຳ ​ເພື່ອ​ເຮັດ​ໃຫ້ການ​ສະ​ເຫຼີ​ມສະຫຼອງ​ສອງ​ວັນ​ດັ່ງກ່າວ​ເຕັມ​ໄປ​ດ້ວຍ​ເນື້ອ​ໃນ ​ແລະ ມີ​ຜົນສຳ​ເລັດ​ສູງ.

ພົຈວ ອາ​ລູ ວາລີ​ຊື ຫົວໜ້າ​ກົມ​ໃຫ່ຍການ​ເມືອງ ປກສ ທັງ​ເປັນ​ຮອງ​ຫົວໜ້າ​ອະນຸກຳມະການ​ເນື້ອ​ໃນ ​ໄດ້​ຂື້ນ​ຜ່ານ​ຂໍ້ຕົກລົງວ່າ​ດ້ວຍ​ການ​ແຕ່ງ​ຕັ້ງ​ຄະນະ​ຮັບຜິດຊອບ​ຊີ້​ນຳ​ລວມ ​ແລະ ບັນດາ​ອະນຸ​ກຳມະການ ​ເພື່ອ​ກະກຽມ​ສະ​ເຫຼີ​ມ ສະຫຼອງວັນ​ສ້າງ​ຕັ້ງ​ສາຍ​ພົວພັນ​ການ​ທູດ​ລາວ-​ຫວຽດນາມ ຄົບຮອບ 55 ປີ ( 5 ກັນຍາ 1962- 5 ກັນຍາ 2017 ) ​ແລະ ວັນ​​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື​ ລາວ-​ຫວຽດນາມ ຄົບຮອບ 40 ປີ ( 18 ກໍລະກົດ 1977 – 18 ກໍລະກົດ 2017 ) ລັດຖະມົນຕີ​ກະຊວງ ປກສ ຕົກລົງ​ແຕ່ງ​ຕັ້ງ​ຄະນະ​ຮັບຜິດຊອບ​ຊີ້​ນຳ​ລວມ, ອະນຸ​ກຳມະການ​ເນື້ອ​ໃນ, ອະນຸ​ກຳມະການຂະ​ບວນການ, ອະນຸ​ກຳມະການປ້ອງ​ກັນ, ອະນຸ​ກຳມະການພິທີການ, ອະນຸ​ກຳມະການ​ເສດຖະກິດ ​ເພື່ອ​ໃຫ້​ແຕ່ລະອະນຸ​ກຳມະການ ສ້າງ​ແຜນການ​ເຄື່ອນ​ໄຫວ​ໃຫ້​ລະອຽດ, ​ແບ່ງງານ​ກັນຢ່າງ​ຈະ​ແຈ້ງ ​ແລະ ​ແຕ່ງ​ຕັ້ງ​ໜ່ວຍ​ງານ​ຊ່ວຍ​ວຽກ​ຂອງ​ຕົນ​ຕາມ​ຄວາມ​ເໜາະ​ສົມ ພ້ອມ​ກັນ​ນຳພາ​ຈັດ​ຕັ້ງ​ປະຕິບັດ​ຢ່າງ​ຖືກຕ້ອງ ​ແລະ ​ເຂັ້ມ​ງວດ.

Off
21st Jun2017

ຕຳຫຼວດ ປກສ ເມືອງ ສີສັດຕະນາກ ຈັບກຸມ ຜູ້ຄ້າຂາຍ ຢາເສບຕິດ ຂອງກາງໄດ້ 9,200 ເມັດ

by somchan

ໃນວັນທີ 8 ມິຖຸນາ 2017 ເຈົ້າໜ້າທີ່ ປກສ ກອງບັນຊາການ ເມືອງສີສັດຕະນາກ ນະຄອນຫຼວງວຽງຈັນ ໄດ້ລົງ ແກ້ໄຂ ເປົ້າໝາຍ ຄ້າຂາຍ ຢາເສບຕິດ ຢູ່ບ້ານ ຈັນສະຫວ່າງ ເມືອງສີໂຄດຕະບອງ ນະຄອນຫຼວງວຽງຈັນ ສາມາດຈັບຜູ້ຕ້ອງຫາໄດ້ 1 ຄົນ ຄ ທ້າວ ສຸດໃຈ ອາຍຸ 28 ປີ ຢູ່ບ້ານຈັນສະຫວ່າງ ເມືອງສີໂຄດຕະບອງ ຜ່ານການສອບສວນຂອງເຈົ້າໜ້າທີ່ ທ້າວ ສຸດໃຈ ໄດ້ໃຫ້ການ ຊັກທອດຫາຜູ້ຮ່ວມຂະບວນການ 3 ຄົນ.

ດັ່ງນັ້ນເຈົ້າໜ້າທີ່ຕຳຫຼວດ ຈຶ່ງໄດ້ນຳກຳລັງລົງຈັບຕົວພວກກ່ຽວມາດຳເນີນຄະດີ ຕາມລະບຽບກົດໝາຍ ເຊິ່ງທີ່ຮ່ວມຂະບວນການທັງ 3 ຄົນ ມີ ທ້າວ ອາໂນສັກ ອາຍຸ 45 ປີ ຢູ່ບ້ານໜອງດ້ວງໃຕ້ ເມືອງສີໂຄດຕະບອງ ພ້ອມຂອງກາງຢາບ້າ 7 ຖົງ ມີ 1.400 ເມັດ, ທ້າວ ຄຳສຸກ ອາຍຸ 22 ປີ ແລະ ທ້າວ ສຸບັນດິດ ອາຍຸ 33 ປີ ທັງສອງຢູ່ບ້ານທ່າພະລານໄຊ ເມືອງສີສັດຕະນາກ ພ້ອມຂອງກາງຢາບ້າ 7.800 ເມັດ ລວມທັງໝົດ 9.200 ເມັດ.
ຜ່ານການສືບສວນ-ສອບສວນ ຜູ້ຕ້ອງຫາທັງ 4 ຄົນ ໄດ້ຮັບສາລະພາບວ່າ ຂອງກາງຢາບ້າ 9.200 ເມັດ ແມ່ນຂອງຜູ້ກ່ຽວແທ້ ເຊິ່ງໄດ້ມີການພົວພັນຄ້າຂາຍຢາເສບຕິດນຳກັນມາ ແຕ່ຕົ້ນເດືອນມິຖຸນາ 2017 ແຕ່ສຸດທ້າຍມາຮອດວັນທີ 8 ມິຖຸນາ 2017 ຖືກເຈົ້າໜ້າທີ່ຈັບໄດ້.

Off
21st Jun2017

ເລຂາທິການໃຫ່ຍ ຊີ້ນຳຄະນະພັກ ກະຊວງ ປກສ ສ້າງກຳລັງ ໃຫ້ໜັກແໜ້ນ ເຂັ້ມແຂງ ຮອບດ້ານ

by somchan

ອົງຄະນະພັກກະຊວງ ປ້ອງກັນຄວາມສະຫງົບ ໄດ້ຈັດຕັ້ງເປີດບັ້ນດຳເນີນ ຊີວິດການເມືອງ ປັບປຸງປົວແປງພັກ ທົ່ວອົງຄະນະພັກກະຊວງ ປ້ອງກັນຄວາມສະຫງົບ ປະຈຳປີ 2017 ໃນວັນທີ 5 ມິຖຸນາ 2017 ນີ້ ໂດຍການໃຫ້ກຽດເຂົ້າຮ່ວມ ຂອງສະຫາຍ ບຸນຍັງ ວໍລະຈິດ ເລຂາທິການໃຫ່ຍ, ຄະນະບໍລິຫານງານສູນກາງພັກ ປະທານປະເທດ ແຫ່ງສປປ ລາວ ມີຄະນະພັກກະຊວງ, ກົມໃຫ່ຍ, ກົມກອງອ້ອມຂ້າງກະຊວງ, ກອງບັນຊາການ ປກສ ແຂວງທົ່ວປະເທດ ແລະ ແຂກຖືກເຊີນເຂົ້າຮ່ວມ.

ພົຕ ສົມແກ້ວ ສີລາວົງ ເລຂາທິການສູນກາງພັກ, ເລຂາອົງຄະນະພັກ, ລັດຖະມົນຕີກະຊວງ ປ້ອງກັນຄວາມສະຫງົບ ໄດ້ໄຂເປີດບັ້ນດຳເນີນຊີວິດ ການເມືອງ ປັບປຸງປົວແປງພັກ ທົ່ວກຳລັງ ປ້ອງກັນຄວາມສະຫງົບ ປະຈຳປີ 2017 ຢ່າງເປັນທາງການ ເຊິງສະຫາຍໄດ້ກ່າວວ່າ ການເປີດບັ້ນດຳເນີນຊີວິດການເມືອງ ປັບປຸງປົວແປງພັກ ໃນກຳລັງ ປ້ອງກັນຄວາມສະຫງົບ ຄັ້ງນີ້ ກໍ່ເພື່ອສະຫຼຸບ-ຕີລາຄາ ໝາກຜົນໃນການຜັນຂະຫຍາຍ ຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ່ 10 ຂອງພັກ ແລະ ມະຕິກອງປະຊຸມໃຫ່ຍຄັ້ງທີ່ 4 ຂອງອົງຄະນະພັກ ກະຊວງປ້ອງກັນຄວາມສະຫງົບ, ບັນຫາສຳຄັນແມ່ນການສ້າງບາດກ້າວບຸກທະລຸ ເຮັດໃຫ້ກຳລັງປ້ອງກັນຄວາມສະຫງົບ ມີການຫັນປ່ຽນທີ່ແຂງແຮງ ທາງດ້ານຈິນຕະນາການ ແບບແຜນນຳພາ-ດ້ານການຈັດຕັ້ງພັກ-ພະນັກງານ ແລະ ດ້ານກົນໄກການຊີ້ນຳ-ບັນຊາ ໃນກຳລັງປ້ອງກັນຄວາມສະຫງົບສາມາດຮັບມືກັບສິ່ງທ້າທາຍ, ທົດສອບອັນໜັກໝ່ວງຕ່າງໆ ທີ່ປະເຊີນໜ້າໃນປະຈຸບັນ ແລະ ປະຕິບັດຢ່າງເຖິງຖອງ ທັງນີ້ກໍ່ເພື່ອສ້າງ ແລະ ຍົກລະດັບຄວາມສາມາດນຳພາຂອງພັກ, ຄວາມເປັນແບບຢ່າງນຳໜ້າຂອງຄະນະພັກແຕ່ລະຂັ້ນ ແລະ ສະມາຊິກພັກ ໂດຍຕິດພັນກັບການກວດກາຄືນຄວາມຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ ເປັນຕົ້ນແມ່ນມະຕິ 10 ສ້າງໃຫ້ມີການຫັນປ່ຽນຕົວຈິງ ທາງດ້ານແນວຄິດ, ຄຸນສົມບັດ, ແບບແຜນການນຳພາ ແລະ ວິທີເຮັດວຽກ, ຄວາມຮັບຜິດຊອບການເມືອງຂອງຄະນະພັກ ແຕ່ລະຂັ້ນ ແລະ ຂອງສະມາຊິກພັກ, ຍົກລະດັບການຄົ້ນຄວ້າກຳແໜ້ນແນວທາງ, ກຳແໜ້ນວຽກງານກໍ່ສ້າງພັກ ການຕິຊົມຕົນເອງ,ຕິຊົມກັນພາຍໃນພັກ ແລະ ຄວາມເປັນແບບຢ່າງເຮັດແທ້ທຳຈິງ,ນ້ຳໃຈເສຍສະຫຼະ ເພື່ອຊາດ ເພື່ອປະຊາຊົນ ຂອງຄະນະພັກ ແລະ ສະມາຊິກພັກ ເພື່ອສ້າງຄວາມເປັນເອກະພາບ ແລະ ຄວາມຕັດສິນໃຈສູງຂອງທົ່ວພັກ ໃນການກຳນົດທິດທາງມາດຕະການ ແກ້ໄຂບັນຫາຕົວຈິງແຕ່ເທີງລົງລຸ່ມໃຫ້ມີປະສິດທິຜົນສູງ ບັ້ນດຳເນີນຊີວິດການເມືອງໃນຄັ້ງນີ້ ແມ່ນຈະດຳເນີນໄປເປັນເວລາ 7 ວັນ ຈຶ່ງສຳເລັດ.

Off
19th Jun2017

ເຈົ້າໜ້າທີ່ ປກສ ແຂວງ ອຸດົມໄຊ ມ້າງລາຍ ຄະດີ ຄ້າຂາຍຢາ ເສບຕິດ ພ້ອມດ້ວຍ ຂອງກາງ ຢາບ້າ 78 ມັດ ແລະ ເຮໂລອິນ 30 ແທ່ງ

by somchan

ໃນວັນທີ 1 ມິຖຸນາ 2017 ນີ້ ເຈົ້າໜ້າທີ່ ພະແນກຕຳຫຼວດ ສະກັດກັ້ນ ແລະ ຕ້ານຢາເສບຕິດ ປກສ ແຂວງອຸດົມໄຊ ໄດ້ມ້າງກຸ່ມແກ້ງ ຄ້າຂາຍ ຢາເສບຕິດ ຢູ່ຫ້ອງເຊົ່າ ແຫ່ງໜື່ງ ຢູ່ບ້ານ ໜອງແມງດາ ເມືອງໄຊ ແຂວງອຸດົມໄຊ ຢຶດຢາເສບຕິດ ປະເພດ ເຮໂລອິນ ຈຳນວນ 30 ແທ່ງ ນ້ຳໜັກ 11,5 ກິໂລກະລາມ ຢາບ້າຈຳນວນ 78 ມັດ ແລະ 48 ເມັດ ນ້ຳໜັກ 19 ກິໂລກະລາມ ລົດກະບະ ອີຊຸຊຸກິ ດີແມັກ 1 ຄັນ ແລະ ເງີນກີບ 35,000,000 ກີບ ແລະ ໂທລະສັບມືຖື 2 ໜ່ວຍ.ສາມາດຈັບຜູ້ຕ້ອງຫາໄດ້ 2 ຄົນ ຄື ທ້າວ ຫວາເມັງ ອາຍຸ 33 ປີ ຢູ່ບ້ານ ສວນຢາ ເມືອງ ແລະ ແຂວງຫຼວງນ້ຳທາ ແລະ ທ້າວ ຮືຈີຢາງ ອາຍຸ 29 ປີ ຢູ່ບ້ານໄຊອຸດົມ ແຂວງບໍ່ແກ້ວ.
ຜ່ານການສອບສວນຂອງເຈົ້າໜ້າທີ່ຕຳຫຼວດ ທັງສອງຮັບສາລະພາບວ່າ ເຮໂລອິນ ແລະ ຢາບ້າ ແມ່ນຂອງພວກກ່ຽວແທ້ ເຊິ່ງຢາຈຳນວນດັ່ງກ່າວແມ່ນ ໄດ້ຮັບຈາກເຄືອຄ່າຍກຽມສົ່ງໄປຂາຍຕໍ່ ແຕ່ສຸດທ້າຍຖືກເຈົ້າໜ້າທີ່ຈັບໄດ້ກ່ອນ.
ຕໍ່ລາຍຄະດີດັ່ງກ່າວ ເຈົ້າໜ້າທີ່ແມ່ນພວມເລັງສືບສວນ-ສອບສວນ ຂະຫຍາຍຜົນຫາຂະບວນການ ຄ້າຂາຍຢາເສບຕິດຕໍ່ໄປ

Off