04th Jul2017

ກອງປະຊຸມ ຮ່ວມມື ຮັກສາ ຄວາມສະຫງົບ ລະຫວ່າງ ລາວ-ຫວຽດນາມ

by somchan

ກອງ​ປະຊຸມ​ຮ່ວມ​ມື ຮັກສາ​ຄວາມ​ສະຫງົບ ລາວ-​ຫວຽດນາມ ​ຄັ້ງ​ທີ່ 8 ​ໄດ້​ຈັດ​ຂື້ນ​ໃນ​ວັນ​ທີ 30 ມິຖຸນາ 2017 ທີ່​ໂຮງ​ແຮມ ຄາວ​ພຣາຊາ ນະຄອນຫຼວງ​ວຽງ​ຈັນ ​ໂດຍ​ການ​ເປັນ​ປະທານ​ຂອງ ທ່ານ ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ ​ກະຊວງ​ປ້ອງ​ກັນ​ຄວາມ​ສະຫງົບລາວ ​ແລ​ະ ພົທ ບຸ່ຍ ວັນນາ​ມ ຮອງ​ລັດຖະມົນຕີ ກະຊວງ​ຕຳຫຼວດ ສສ ຫວຽດນາມ ມີ​ຫົວໜ້າ​ກົມ​ໃຫ່ຍສັນຕິ​ບາ​ນ ກະຊວງ​ປ້ອງ​ກັນ​ຄວາມ​ສະຫງົບ​ລາວ ​ແລະ ກະຊວງ​ຕຳຫຼວດ ສສ ຫວຽດນາມ ພ້ອມ​ດ້ວຍ​ພະນັກງານ​ທີ່​ກ່ຽວຂ້ອງ ທັງ​ສອງ​ຝ່າຍ​ເຂົ້າ​ຮ່ວມ.

ພົຕ ກົງ​ທອງ ພົງ​ວິຈິດ ກ່າວ​ວ່າ:​ກອງ​ປະຊຸມ​ໃນ​ຄັ້ງ​ນີ້ ຈະ​ໄດ້​ພ້ອມ​ກັນ​ຕີ​ລາຄາ ຖອດ​ຖອນ​ບົດຮຽນ ທີ່​ໄດ້​ຮ່ວມ​ມື​ກັນ ​ໃນ​ໄລຍະ​ຜ່ານ​ມາ ດ້ານ​ວຽກ​ງານ​ຮັກສາ​ຄວາມ​ສະຫງົບ ຂອງ​ສອງ​ປະ​ເທດ​ລາວ-​ຫວຽດນາມ ​ເວົ້າ​ສະ​ເພາະ​ກໍ່​ແມ່ນ​ກະຊວງ​ປ້ອງ​ກັນ​ຄວາມ​ສະຫງົບ​ລາວ ​ແລະ ກະຊວງ​ຕຳຫຼວດ ສສ ຫວຽດນາມ ​ເປັນ​ຕົ້ນ​ກໍ່​ແມ່ນ​ວຽກ​ງານ​ວິຊາ​ສະ​ເພາະ​ລະຫວ່າງ ກົມ​ໃຫ່ຍສັນຕິ​ບານ ກະຊວງ​ປ້ອງ​ກັນ​ຄວາມ​ສະຫງົບ​ລາວ ​ແລະ ກົມ​ໃຫ່ຍ ປກສ ກະຊວງ​ຕຳຫຼວດ ສສ ຫວຽດນາມ ​ໃນ​ໄລຍະ 1 ປີ ຜ່ານ​ມາ ​ເພື່ອ​ພ້ອມ​ກັນ​ຕີ​ລາຄາ​ຄືນ​ເຖິງ​ຜົນງານ, ຈຸດ​ຄົງ​ຄ້າງ ທີ່​ຈະ​ໄດ້​ແກ້​ໄຂ​ຮ່ວມ​ກັນ​ໃນ​ຕໍ່ໜ້າ.

ກອງ​ປະຊຸມ​ໃນ​ຄັ້ງ​ນີ້ ທັງ​ສອງ​ຝ່າຍ​ຍັງ​ໄດ້​ເຊັນ​ບົດ​ບັນທຶກ ກອງ​ປະຊຸມ​ຮ່ວມ​ມື ຮັກສາ​ຄວາມ​ສະຫງົບ ລະຫວລາວ-​ຫວຽດນາມ ຄັ້ງ​ທີ່ 8 ຕາງໜ້າ​ຝ່າຍ​ລາວ ​ໂດຍ​ແມ່ນ ທ່ານ ພົຈວ ບຸນ​ມີ ​ແສງ​ຄຳ​ຢອງ ຫົວໜ້າ​ກົມ​ໃຫ່ຍສັນຕິ​ບານ ກະຊວງ​ປ້ອງ​ກັນ​ຄວາມ​ສະຫງົບ ​ແລະ ຝ່າຍ​ຫວຽດນາມ ​ໂດຍ​ແມ່ນ​ທ່ານ ພົຕ ຫງວຽນ ຈີ່ ​ແທ໋ງ ຫົວໜ້າ​ກົມ​ໃຫ່ຍ ປກສ ກະຊວງ​ຕຳຫຼວດ ສສ ຫວຽດນາມ ​ເພື່ອ​ຈະ​ໄດ້​ຮ່ວມ​ກັນ​ສືບ​ຕໍ່ ປະຕິບັດ​ວຽກ​ງານ​ຮັກສາ​ຄວາມ​ສະຫງົບ​ຮ່ວມ​ກັນ​ໃນ​ຕໍ່ໜ້າ.

Off
04th Jul2017

ເຈົ້າໜ້າທີ່ ຕຳຫຼວດ ກົມຕຳຫຼວດ ສະກັດກັ້ນ ແລະ ຕ້ານ ຢາເສບຕິດ ຍຶດຢາບ້າ ໄດ້ ຈຳນວນ 27 ມັດ, ນ້ຳໜັກ 6.8 ກິໂລກຣາມ

by somchan

ວັນ​ທີ 1 ກໍລະກົດ 2017 ​ເຈົ້າ​ໜ້າ​ທີ່ ກົມ​ຕຳຫຼວດ ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ກົມ​ໃຫ່ຍ ຕຳຫຼວດ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ມ້າງ​ຄະດີຄ້າ​-ຂາຍ​ຢາ​ເສບ​ຕິດ ຢູ່​ບ້ານ​ພັກ ​ແຫ່ງ​ໜື່ງ ​ເຂດ​ບ້ານ ​ໜອງ​ພະຍາ ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ ສາມາດ ຈັບ​ຜູ້​ຕ້ອງ​ຫາ​ໄດ້ 4 ຄົນ ພ້ອມ​ດ້ວຍ​ຍຶດຂອງ​ກາງ​ຢາ​ເສບ​ຕິດ ປະ​ເພດ​ຢາ​ບ້າ 27 ມັດ, ນ້ຳໜັກ 6.8 ກິ​ໂລກຣາມ, ​ໂທລະສັບ​ມື​ຖື 6 ໜ່ວຍ, ​ເງີ​ນຈຳນວນ​ໜຶ່ງ ​ແລະ ລົດ​ໃຫ່ຍ 1 ຄັນ​, ຜູ້​ຖືກ​ຫາ​ໄດ້ 04 ຄົນ, ທ້າວ ​ໄມ​ແອ່ນ ອາຍຸ 27 ປີ ປະຊາ​ຊົນ​ຢູ່​ບ້ານ ຊຽງ​ກົກ​ໃໝ່ ​ເມືອງ​ລອງ ​ແຂວງ​ຫຼວງ​ນ້ຳ​ທາ, ທ້າວ ​ໄມ​ຫຼ້າ ອາຍຸ 30 ປີ ປະຊາຊົນ ​ຢູ່​ບ້ານ ຊຽງ​ລາ​ບ ​ເມືອງ​ທ່າ​ຂີ້​ເຫຼັກ ​ແຂວງ ຊຽງ​ຕຸ​ງ ປະ​ເທດ​ມຽນມາ, ນາງ ທຳ​ມາ ອາຍຸ 43 ປີ ກຳມະກອນ ຢູ່​ບ້ານ​ໜອງ​ທາ ​ເມືອງ​ຈັນທະ​ບູລີ ນະຄອນຫຼວງ​ວຽງ​ຈັນ, ນາງ ອ່ອນ ອາຍຸ 28 ປີ ປະຊາຊົນ ​ຢູ່​ບ້ານ ຊຽງ​ລາ​ບ ​ເມືອງ​ທ່າ​ຂີ້​ເຫຼັກ ​ແຂວງ ຊຽງ​ຕຸ​ງ ປະ​ເທດ​ມຽນມາ.

ຜ່ານ​ການ​ສືບສວນ – ສອບ​ສວນ ​ຂອງ​ເຈົ້າ​ໜ້າ​ທີ່ ພວກ​ກ່ຽວ​ໄດ້​ໃຫ້ການ​ຮັບ​ສາລະພາບ​ວ່າ: ຢາ​ບ້າ​ຈຳນວນ 27 ມັດ, ນ້ຳໜັກ 6.8 ກິ​ໂລກຣາມ, ​ທີ່ເຈົ້າ​ໜ້າ​ທີ່​ຍຶດ​ໄດ້ ​ແມ່ນ​ຂອງ​ພວກ​ກ່ຽວ​ແທ້, ຊຶ່ງ​ພວກ​ກ່ຽວ​ໄດ້​ຊື້​ມາ​ຈາກ (ຊາຍ​ບໍ່​ຮູ້​ຊື່ ທີ່ຢູ່) ​ແລ້ວ​ຈະ​ນຳ​ມາ​ໃຫ້​​ເຖົ້າ​ແກ່​ບໍ່​ຮູ້​ຊື່ຢູ່​ທີ່​ຈຸດ​ນັດໝາຍກັນ, ​ແຕ່​ບໍ່​ທັນ​ໄດ້​ຂາຍ​​ເທື່ອ​ກໍ່​ຖືກ​ເຈົ້າ​ໜ້າ​ທີ່​ຈັບ​ຕົວ​ມາ​ດຳ​ເນີນ​ຄະດີ​ຕາມ​ລະບຽບ​ກົດໝາຍ, ປະຈຸ​ບັນ​ພວກ​ກ່ຽວ​ຍັງ​ຢູ່​ໃນ​ຂັ້ນ​ຕອນ​ການ​ສືບສວນ-​ສອບ​ສວນ ຂະຫຍາຍ​ຜົນ​ຫາ​ເຄືອ​ຂ່າຍ, ກຸ່ມ​ແກ້ງ ຜູ້​ເປັນ​ຫົວ​ໂປ່​ງ​ໂຕ​ການ ​ເພື່ອ​ຈັບ​ຕົ​ວມາ​ດຳ​ເນີນ​ຄະດີ​ຕາມ​ຂັ້ນ​ຕອນ​ຂອງ​ກົດໝາຍ.

Off