22nd Dec2017

ກະຊວງ ປກສ ຈັດຕັ້ງປະກາດອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ.

by somchan

ກະຊວງ ປກສ ​ໄດ້​ປະກາດ​ອະ​ໄພ​ຍະ​ໂທດ,ຫຼຸດຜ່ອນ​ໂທດ ​ແລະ ປ່ອຍ​ຕົວ​ນັກ​ໂທດ ​ໃນ​ວັນທີ 22 ທັນວາ 2017 ນີ້ ຢູ່​ທີ່​ສະ​ໂມ​ສອນ​ກະຊວງ ປກສ ​ໂດຍ​ການ​ເຂົ້າ​ຮ່ວມ​ຂອງ​ ພົຈວ ປອ ສົມ​ຫວັງ​ທຳ​ມະ​ສິດ ຮອງ​ລັດຖະມົນຕີ​ກະຊວງ ປກສ, ມີ​ຕາງໜ້າ​ຈາກ​ສານ​ປະຊາຊົນ​ສູງ​ສຸດ, ບັນດາ​ອົງການ​ຈັດ​ຕັ້ງ​ທີ່​ກ່ຽວຂ້ອງ,ອຳນາດ​ການ​ປົກຄອງ​ແກ່​ຄອບຄົວ​ນັກ​ໂທດ​ເຂົ້າ​ຮ່ວມ.

ພັອ ສົມ​ລິດ ດາວ​ຮຸ່ງສຸ​ລິ ຫົວໜ້າ​ກົມຕຳຫຼວດຄຸມ​ຂັງ-​ດັດ​ສ້າງ ກະຊວງ ປກສ ​ໄດ້​ຜ່ານ​ລັດຖະດຳລັດ​ຂອງ​ປະທານ​ປະ​ເທດ ​ວ່າ​ດ້ວຍ​ການ​ອະ​ໄພ​ຍະ​ໂທດ,ຫຼຸດຜ່ອນ​ໂທດ ​ແລະ ປ່ອຍ​ຕົວ​ນັກ​ໂທດ​ໃນ​ທົ່ວ​ປະ​ເທດ 1890 ຄົນ, ຍິງ 400 ຄົນ ​ໃນ​ນີ້​ມີ​ຄົນ​ຕ່າງປະ​ເທດ 39 ຄົນ, ຍິງ 10 ຄົນ ​ເນື່ອງ​ໃນ​ໂອກາດ​ວັນຊາດ​ທີ 2 ທັນວາ ຄົບຮອບ 42 ປີ ​ໃນ​ນີ້​ມີ​ນັກ​ໂທດ​ທີ່​ຂື້ນ​ກັບ​ຄ້າຍ​ຄຸມ​ຂັງ-​ດັດ​ສ້າງ​ຊຳ​ເຄ້, ຄ້າຍ​ຄຸມ​ຂັງ-​ດັດ​ສ້າງ​ໂພນ​ຕ້ອງ, ຄ້າຍ​ຄຸມ​ຂັງ-​ດັດ​ສ້າງ​ໂພນ​ເງີ​ນ ​ແລະ ຄ້າຍ​ຄຸມ​ຂັງ-​ດັດ​ສ້າງສາ​ຍນ້ຳ​ງື່ມ ກົມ​ຕຳຫຼວດ​ຄຸມ​ຂັງ-​ດັດ​ສ້າງ 360ຄົນ, ຍິງ 66 ຄົນ, ຄົນ​ຕ່າງປະ​ເທດ 14 ຄົນ ຍິງ 6 ຄົນ ​ໃນ​ຈຳນວນ​ນັກ​ໂທດ​ທີ່​ໄດ້​ຮັບ​ການ​ອະ​ໄພ​ຍະ​ໂທດ, ຫຼຸ​ດຜ່ອນ​ໂທດ ​ແລ​ະ ປ່ອຍ​ຕົວ​ໃນ​ຄັ້ງ​ນີ້ ຫຼາຍ​ກວ່າ​ໜູ່​ແມ່ນ ນັກ​ໂທດ​ຄະດີ​ຢາ​ເສບ​ຕິດມີ 324 ຄົນ ​ແລະ ອື່ນໆ.

ການ​ອະ​ໄພ​ຍະ​ໂທດ, ຫຼຸດຜ່ອນ​ໂທດ ​ແລະ ປ່ອຍ​ຕົວ​ນັກ​ໂທດ​ຄັ້ງ​ນີ້ ​ແມ່ນ​ປະຕິບັດ​ຕາມ​ການ​ຄົ້ນຄວ້າ,ພິຈາລະນາ ​ແລະ ການສະ​ເໜີ​ຂອງ​ອົງການ​ຈັດ​ຕັ້ງ​ທີ່​ກ່ຽວຂ້ອງ ​ໂດຍ​ອີງ​ຕາມ​ເງື່ອນ​ໄຂ ​ແລະ ຄວາມ​ກ້າວໜ້າ ຈາກ​ການ​ຝຶກ​ຝົນ​ຫຼໍ່​ຫຼອມຕົນ​ເອງ​ຂອງ​ນັກ​ໂທດ ຢ່າງ​ຖືກຕ້ອງ​ຕາມ​ແນວທາງ​ນະ​ໂຍບາຍ​ຂອງ​ພັກ,ລັດຖະທຳ​ມະນູນ ​ແລະ ກົດໝາຍ ​ເພື່ອ​ໃຫ້​ໂອກາດ​ແກ່​ຜູ້​ທີ່​ຫຼົງ​ຜິດ ​ແລະ ກິນ​ແໜງ​ແຄງ​ໃຈ​ຕໍ່​ການ​ກະທຳ​ຜິດ​ຂອງ​ຕົນ​ເອງ.

​ໃນ​ໂອກາດ​ນີ້ ພົຈວ ປອ ສົມ​ຫວັງ ທຳ​ມະ​ສິດ ຮອງລັດຖະມົນຕີ​ກະຊວງ ປກສ ຍັງ​ໄດ້​ໂອ້​ລົມ ​ແລະ ຊີ້​ທິດ​ເຍື່ອງ​ທາງ​ໃຫ້​ແກ່​ຜູ້​ທີ່​ໄດ້​ຮັບ​ການ​ອະ​ໄພ​ຍະ​ໂທດ, ຫຼຸດຜ່ອນ​ໂທດ ​ແລະ ປ່ອຍ​ຕົວ​ໃນ​ຄັ້ງ​ນີ້.

Off
22nd Dec2017

ປກສ ແຂວງຄໍາມ່ວນ ຢຶດຢາບ້າ 31.000 ກວ່າເມັດ

by somchan

 

​ໃນ​ວັນ​ທີ 16 ທັນ​ວານີ້ ເຈົ້າໜ້າທີ່ພະແນກຕຳຫຼວດ ສະກັດກັ້ນ ແລະ ຕ້ານຢາເສບຕິດ ປກສ ແຂວງຄຳມ່ວນ ໄດ້ກັກຕົວທ້າວ ວັນພິລາ ອາຍຸ 28 ປີ ຢູ່ທີ່ບ້ານ ຫາດຊຽງດີ ເມືອງໜອງບົກ ແຂວງຄຳມ່ວນ ພ້ອມ​ດ້ວຍ​ຂອງ​ກາງ​ຢາບ້າ 16 ມັດ ເທົ່າກັບ 31,928.

 

ເຈົ້າໜ້າທີ່ຕໍາຫຼວດ ວິຊາສະເພາະ ປກສ ແຂວງຄຳມ່ວນ ໃຫ້ຮູ້ວ່າ : ພາຍຫຼັງໄດ້ສືບຮູ້ວ່າ: ຈະມີ​ການລັກລອບເຄື່ອນໄຫວຂົນ-​ສົ່ງຢາບ້າ ຢູ່ເຂດໂຮງງານຊີມັງ ບ້ານ ນາຄຳ ເມືອງມະຫາໄຊ ແຂວງຄຳມ່ວນ ດັ່ງນັ້ນເຈົ້າໜ້າທີ່ວິຊາສະເພາະຈຶ່ງໄດ້ວາງແຜນການສະກັດກັ້ນ ແລະ ຕິດຕາມກວດກາເປົ້າໝາຍຢູ່ຈຸດດັ່ງກ່າວ. ມາຮອດເວລາ 11 ຂອງວັນດຽວກັນ ຈຶ່ງໄດ້ພົບເຫັນເປົ້າໝາຍກໍາລັງເອົາບ້າໃຫ້ກັນ ຈຶ່ງ ເຂົ້າຈັບກຸມ ສາມາດຈັບກຸມໄດ້ 1 ຄົນຄື : ທ້າວ ວັນພີລາ ສ່ວນຜູ້ສັ່ງຊື້ ເອົາຕົວລົບໜີໄປໄດ້.

 

 

ຜ່ານການສຶບສວນ-ສອບສວນເບື້ອງຕົນ ທ້າວ ວັນພິລາ ຮັບສາລະພາບວ່າ:ຢາບ້າຈຳນວນດັ່ງກ່າວ ບໍ່ແມ່ນຂອງຜູ້ກ່ຽວພຽງແຕ່ຮັບຈ້າງໄປສົ່ງໃຫ້ໂຊເຟີຂັບລົດຫີນກາວ ທີ່ອອກປະເທດເພື່ອບ້ານໃນຄະນະທີ່ກໍາລັງຢຶນສົ່ງ ມີເຈົ້າໜ້າທີ່ຕໍາຫຼວດເຂົ້າຈັບຕົວກ່ອນພ້ອມຂອງກາງຈໍານດັ່ງກ່າວ.   ປະຈຸບັນ ເຈົ້າໜ້າທີ່ກຳລັງດຳເນີນການສຶບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການກະທຳຜິດຄັ້ງນີ້ ມາດຳເນີນຕະດີຕາມຂັ້ນຕອນຂອງກົດໝາຍຕໍ່ໄປ.

ຂ່​າວ​ໃຫ້​ຮູ້​ຕື່ມ​ອີກ​ວ່າ: ​ໃນ​ໄລຍະ​ດຽວ​ກັນ​ນີ້

​      ເຈົ້າ​ໜ້າ​ທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງນໍ້າທາ ​ໄດ້​ຈັບ​ຕົວ​ພວກ​ລັກລອບ​ຄ້າຂາຍ​ຢາ​ເສບ​ຕິດ​ໄດ້ 2 ຄົນ ພ້ອມ​ຂອງ​ກາງ​ຢາ​ເສບ​ຕິດ 27 ມັດ ​ເທົ່າ​ກັບ 54,00 ​ເມັດ ຜູ້​ຕ້ອງ​ຫາ​ທັງ​ສອງ​ຄື: ສວນ. ທ້າວ ເຢັງປໍຢາງ ອາຍຸ 24 ປີ ປະຊາຊົນບ້ານ ມອນໃຕ້ ແລະ ທ້າວ ໃຈຢ້າງ ອາຍຸ 19 ປີ ປະຊາຊົນບ້ານ ໜອງແມງດາ ທັງສອງຢູ່ເມືອງ ໄຊ ແຂວງອຸດົມໄຊ ຕໍ່​ກັບ​ລາຍ​ຄະດີ​ດັ່ງກ່າວ​ເຈົ້າ​ໜ້າ​ທີ່​ໃຫ້​ຮູ້​ວ່າ: ໃນວັນທີ 12 ທັນວາ 2017 ນີ້ ໄດ້ຮັບຂໍ້​ມູນຈາກພົນລະເມືອງດີວ່າຈະມີກຸ່ມຄົນບໍ່ດີເຄື່ອນໄຫວຂົົນສົ່ງ ແລະ ຄ້າຂາຍຢາເສບຕິດມາຈາກແຂວງອຸດົມໄຊມາແຂວງຫຼວງນໍ້າທາ ຈາກນັ້ນທາງເຈົ້າໜ້າທີພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ຈຶ່ງໄດ້ຈັດກຳລັງລົງພິສູດແຫຼ່ງຂ່າວພ້ອມທັງຕັ້ງຈຸດກວດກາພໍຮອດເວລາປະມານ 17 ໂມງຂອງວັນດຽວກັນນັ້ນຈຶ່ງເຫັນເປົ້າໝາຍ 2 ຄົນຂັບຂີ່ລົດເກັງຮຸນ​ໃດສີຂາວ ໝາຍ​ເລກ​ທະບຽນ 0876 ມາຕາມເສັ້ນທາງ R3 ພໍມາຮອດຂອບເຂດ ບ້ານຕາຫວ່ານ ເມືອງຫຼວງນໍ້າທາ ທາງເຈົ້າໜ້າທີຈຶ່ງໄດ້ຂໍອະນຸຍາດກວດກາຈຶ່ງພົບເຫັນຂອງກາງຢາບ້າຊຸກເຊື່ອງໄວ້ໃນຖົງເປ້ຈຳນວນ 9 ແທັກ ຈາກນັ້ນທາງເຈົ້າໜ້າທີຈື່ງໄດ້ນຳຕົວພວກກ່ຽວທັງສອງມາດຳເນີນການສືບສວນ – ສອບ ຜ່ານ​ການ​ສືບສວນ-​ສອບ​ສວນ​ພວກ​ກ່ຽວ​ທັງ​ສອງ ໄດ້ຮັບສາລະພາບວ່າ: ຢາບ້າຈຳນວນ 9 ແທັກ ເທົ່າກັບ 27 ມັດເທົ່າກັບ 54.000 ເມັດແມ່ນຂອງພວກຕົນທັງສອງແທ້ໄດ້ຊື່ນຳເຖົ້າແກ່ຢູ່ແຂວງ ອຸດົມໄຊ ​ແຟັກໜື່ງ 60.000 ບາດສະກຸນເງີນໄທ ແລ້ວຈະມາຂາຍສົ່ງໃຫ້ຄູ່ຮ່ວມຂະບວນການທີ່ ແຂວງຫຼວງນໍ້າທາ.

Off
20th Dec2017

ກອງ​ປະຊຸມ​ສະຫຼຸບ​ວຽກ​ງານ​ກໍ່ສ້າງ​ຮາກ​ຖານ ​ໄລຍະ 5 ປີ ຂອງ​ກະຊວງ ປກສ ​

by somchan

ກອງ​ປະຊຸມ​ສະຫຼຸບ​ວຽກ​ງານ​ກໍ່ສ້າງ​ຮາກ​ຖານ​ ໄລຍະ 5 ປີ ຂອງ​ກະຊວງ ປກສ ​ໄດ້​ປິດ​ລົງ​ດ້ວຍ​ຜົນສຳ​ເລັດ​ອັນ​ຈົບງາມ ​ໂດຍ​ພາຍ​​ໃຕ້​ການ​ເປັນ​ປະທານ ​ຂອງ ພົຕ ສົມ​ແກ້ວ ສີ​ລາວົງ ​ເລຂາທິການ​ສູນ​ກາງ​ພັກ ລມຕ ກະຊວງ ປກສ ​ໂດຍ​ການ​ເປັນ​ກຽດ​ເຂົ້າ​ຮ່ວມ ​ຂອງ​ທ່ານ ພັນ​ຄຳ ວິພາ​ວັນ ກົມ​ການ​ເມືອງ​ສູນ​ກາງ​ພັກ ຮອງ​ປະທານ​ປະ​ເທດ​ແຫ່ງ ສປປ ລາວ ມີ​ການ​ນຳ​ຂັ້ນ​ແຂວງ, ຂັ້ນ​ເມືອງ, ຄະນະ​ນຳ​ກະຊວງ,  ບັນດາ​ກົມ​ກອງ​ບັນຊາ​ການ, ວິທະຍາຄານ,ປກສ​ແຂວງ, ປກສ ນະຄອນຫຼວງ, ຫ້ອງ​ຄຸ້ມ​ຄອງ​ສຳມະ​ໂນ​ຄົວ ​ແລະ​ ກໍ່ສ້າງ​ຮາກ​ຖານ, ປກສ​ເມືອງ​ທົ່ວ​ປະ​ເທດ, ຕະຫຼອດ​ຮອດ​ບັນດາ​ພະນັກງານ​ຮາກ​ຖານ​ເຂົ້າ​ຮ່ວມ.

​ໃນ​ວາລະ​ດຳ​ເນີນ​ກອງ​ປະຊຸມ ​ໄດ້​ສະຫຼຸບ​ຕີ​ລາຄາ​ດ້ານ​ດີ-​ດ້ານ​ອ່ອນ,ຂໍ້ຄົງຄ້າງ​ແລະ ບົດຮຽນ​ທີ່​ຖອດ​ຖອນ​ໄດ້​ໃນ​ວຽກ​ງານ​ກໍ່ສ້າງ​ຮາກ​ຖານ​ການ​ເມືອງ ພັດທະນາ​ຊົນນະບົດ​ຮອບດ້ານ​ໃນ​ໄລຍະ 5 ປີຜ່ານມາ, ນອກ​ນີ້​ຜູ້​ເຂົ້າ​ຮ່ວມ​ກອງ​ປະຊຸມ​ກໍ່​ໄດ້ພ້ອມ​ກັນ​ຂື້ນ​ມີ​ຄຳ​ເຫັນ​ແລ​ກປ່ຽນ​ຕໍ່​ກອງ​ປະຊຸມ,​ເຮັດ​ໃຫ້​ກອງ​ປະຊຸມ​ມີ​ບັນຍາກ​າດຟົດ​ຟື້ນ​ເຕັມ​ໄປ​ດ້ວຍ​ເນື້ອ​ໃນ, ຍົກ​ໃຫ້​​ເຫັນ​ໃນ​ແຕ່​ລະ​ດ້ານ​ຂອງ​ຄວາມ​ເປັນ​ຈິງ ​ແລະ ມີ​ຄວາມ​ຮັບຜິດຊອບ​ສູງ ​ເຊິ່ງຈະ​ເປັນ​ບົດຮຽນ​ໃຫ້​ແກ່​ກະຊວງ ປກສ ນຳ​ໄປ​ປັບປຸງ,ມີ​ມາດ​ຕະການ​​​ໃໝ່​ ເພື່ອປັບປຸງ​ຮາກ​ຖານ​ເພື່ອ​ໃຫ້​ມີ​ປະສິດທິ​ຜົນ​ດີ​ຂື້ນ​ກວ່າ​ເກົ່າ.

ພ້ອມ​ດຽວ​ກັນ​ນີ້​ກອງ​ປະຊຸມ​ຍັງ​ໄດ້ ປະດັບ​ຫຼຽນ​ໄຊ​ແຮງ​ງານ,ຫຼຽນ​ກາ​ແຮງ​ງານ ​ແລະ ​ໃບ​ຍ້ອງຍໍ ​ໃຫ້​ພະນັກງານ​-ນັກຮົບ ຜູ້​ທີ່​ມີ​ຜົນງານ​ດີ​ເດັ່ນ​ໃນ​ການ​ປະກອບ​ໃນ​ວຽກງານ​ກໍ່ສ້າງ​ຮາກ​ຖານ ພັດທະນາ​ຊົນນະບົດ​ຮອບດ້ານ ​ໃນ​ໄລຍະ 5 ປີ ຜ່ານ​ມາ.ພ້ອມ​ດຽວ​ກັນ​ນີ້​ໃນ​ກອງ​ປະຊຸມ​ຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ທ່ານ ພັນ​ຄຳ ວິພາ​ວັນ ກົມ​ການ​ເມືອງ​ສູນ​ກາງ​ພັກ ຮອງ​ປະທານ​ປະ​ເທດ​ແຫ່ງ ສປປ ລາວ ​ເຊິ່ງທ່ານ​ໄດ້​ເນັ້ນ​ໜັກ​ໃຫ້​ກຳລັງ​ປ້ອງ​ກັນ​ຄວາມ​ສະຫງົບ ຕັ້ງໜ້າ​ປະຕິບັດ​ໜ້າ​ທີ່​ວຽກ​ງານ ຂອງ​ຕົນ​ດ້ວຍ​ຄວາມ​ຮັບຜິດຊອບ​ສູງ ​ເພື່ອ​ເຮັດ​ໃຫ້​ປະ​ເທດ​ຊາດ​ມີ​ຄວາມ​ສະຖຽນ​ລະ​ພາບ,ມີ​ຄວາມ​ສະຫງົບ​ ໂດຍ​ສະ​ເພາະ ກຳລັງ​ທີ່​ລົງ​ກໍ່ສ້າງຮາກ​ຖານ ຈະ​ຕ້ອງ​ໄດ້​ສຸມ​ໃສ​ໃນ​ການ​ພັດທະນາ​ຂັ້ນ​ຮາກ​ຖານ, ກວດກາ​ຕິດຕາມ​ກຳ​ແໜ້ນ​ພົນລະ​ເມືອງ, ສຸມ​ໃສ່​ແກ້​ໄຂ​ບັນຫາ​ປະກົດ​ການ​ຫຍໍ້​ທໍ້, ບັນຫາ​ຢາ​ເສບ​ຕິດ, ​ແກ້​ໄຂ​ບັນຫາ​ການ​ຄ້າ​ມະນຸດ, ການ​ລັກລອບ​ຂຸດ​ຄົ້ນ​ຊັບພະຍາກອນ​ທຳ​ມະ​ຊາດ, ສຸມ​ໃສ່​ສ້າງ​ບ້ານ​ໃຫ້​ກາຍ​ເປັນ​ບ້ານ​ປ້ອງ​ກັນ​ຄວາມ​ສະຫງົບ​ດີ, ສ້າງ​ຄອບຄົວ,ສ້າງ​ບ້ານ​ໃຫ້​ມີ​ຄວາມ​ໜັກ​ແໜ້ນ.

​ໂດຍ​ລວມ​ແລ້ວ​ການ​ຫັນ​ກຳລັງ​ລົງ​ກໍ່ສ້າງ​ຮາກ​ຖານ​ແມ່ນ​ແນ່​ໃສ່​ການຈັດ​ຕັ້ງ​ປະຕິບັດ​ແຜນການ​ໂຄງການ​ພັດທະນາ​ຂອງ​ລັດຖະບານ ກໍ່​ຄື​ຂອງ​ແຂວງ,​ເມືອງ​ໃຫ້​ປະກົດ​ຜົນ​ເປັນ​ຈິງ,ພ້ອມ​ກັນ​ສ້າງ​ພະນັກງານ​ວິຊາ​ການ​ຂອງ​ແຂວງ,​ເມືອງ ​ແລະ ພະນັກງານ​ຂອງ​ບ້ານ​ໃຫ້​ກາຍ​ເປັນ​ຈິງນັກ​ພັດທະນາ​ບ້ານ​ຊ່ອງ ຈຶ່ງ​ຈະ​ບັນລຸ​ໄດ້​ຕາມ​ຄາດໝາຍ​ທີ່​ວາງ​ໄວ້ ​ແລະ ​ເຮັດ​ໃຫ້​ແຕ່ລະ​ຈຸດ​ສຸມ​ມີ​ການ​ຫັນປ່ຽນ​ໃນ​ແຕ່​ລະ​ດ້ານ.

ພ້ອມນີ້ ກອງປະຊຸມຍັງໄດ້ມອບຫຼຽນໄຊແຮງງານຊັ້ນ I,II,III ຫຼຽນກາແຮງງານ ແລະ ໃບຍ້ອງຍໍໃຫ້ແກ່ພະນັກງານ-ນັກຮົບຂອງກຳລັງປ້ອງກັນຄວາມສະຫງົບ ຜູ້ທີ່ມີຜົນງານຄຸນງາມຄວາມດີປະກອບສ່ວນທາງດ້ານເຫື່ອແຮງ ສະຕິປັນຍາ ໃນການຊີ້ນຳ-ນຳພາ ແລະ ກວດກາຕິດຕາມວຽກງານປປ້ອງກັນຄວາມສະຫງົບ ເພື່ອແກ້ໄຊປະກົດການຫຍໍ້ທໍ້ຕ່າງໆ ເຮັດໃຫ້ສັງຄົມມີຄວາມສະຫງົບປອດໄພ ໂດຍສະເພາະແມ່ນໄດ້ປະກອບສ່ວນໃນການປະຕິບັດໜ້າທີ່ວຽກງານ 3 ສ້າງຂອງກະຊວງປ້ອງກັນຄວາມສະຫງົບ ຄັ້ງທີ III ໄລຍະ 5 ປີ ( 2011-2016) ເຊິ່ງຜົນງານດັ່ງກ່າວໄດ້ເປັນການປະກອບສ່ວນທີ່ສຳຄັນ ໃນການປົກປັກຮັກສາ ແລະ ສ້າງສາປະເທດຊາດ. ໃນນີ້ ໄດ້ປະດັບຫຼຽນໄຊແຮງງານຊັ້ນ I: 5 ສະຫາຍ, ຊັ້ນ II: 76 ສະຫາຍ, 19 ກົມກອງ, ຊັ້ນ III: 192 ສະຫາຍ, 8 ກົມກອງ, ​ຫຼຽນກາແຮງງານ 179 ສະຫາຍ, ໃບຍ້ອງຍໍຂັ້ນລັດຖະບານ 89 ສະຫາຍ, ໃບຍ້ອງຍໍຂັ້ນກະຊວງ 49 ສະຫາຍ ແລະ ໃບຍ້ອງຍໍຂັ້ນກົມໃຫຍ່ການເມືອງ 12 ສະຫາຍ.

 

Off
18th Dec2017

ກະຊວງປ້ອງກັນຄວາມສະຫງົບຈັດກອງປະຊຸມ ສະຫຼຸບວຽກງານກໍ່ສ້າງຮາກຖານ ໄລຍະ 5 ປີ

by somchan

ກະຊວງ​ປ້ອງ​ກັນ​ຄວາມ​ສະຫງົບ ຈັດ​ກອງ​ປະຊຸມ​ສະຫຼຸບ​ວຽກ​ງານ​ກໍ່​ສ້າງ​ຮາກ​ຖານ ​ໄລຍະ 5 ປີ ​ໃນ​ວັນ​ທີ 18 ທັນວານີ້ ​ໂດຍ​ການ​ເປັນ​ປະທານ​ຂອງ​ທ່ານ ພົຕ ສົມ​ແກ້ວ ສີ​ລາ​ວົງ ​ເລຂາທິການ​ສູນ​ກາງ​ພັກ ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ມີ​ເຈົ້າ​ແຂວງ,ຮອງ​ເຈົ້າ​ແຂວງ,​ເຈົ້າ​ເມືອງ,ຮອງ​ເຈົ້າ​ເມືອງ, ບັນດາ​ຄະນະ​ນຳ​ກະຊວງ, ບັນດາ​ກົມ​ກອງ​ບັນຊາ​ການ,ວິທະຍາຄານ, ປກສ​ແຂວງ, ປກສ ນະຄອນຫຼວງ ​ແລະ ປກສ ​ເມືອງ​ໃນ​ທົ່ວ​ປະ​ເທດ​ເຂົ້າ​ຮ່ວມ.

​ໃນ​ວາລະ​ດຳ​ເນີນ​ກອງ​ປະຊຸມ ພົຕ ສົມ​ແກ້ວ ສີ​ລາ​ວົງ​ ໄດ້ກ່າວ​ໄຂ​ກອງ​ປະຊຸມ​ຢ່າງ​ເປັນ​ທາງ​ການ ​ເຊິ່ງທ່ານ​ໄດ້​ຍົກ​ໃຫ້​ເຫັນ​ການຈັດຕັ້ງປະຕິບັດ​ວຽກ​ງານ​ກໍ່ສ້າງ​ຮາກ​ຖານ​ການ​ເມືອງ​ຂອງ​ກະຊວງ​ປ້ອງ​ກັນ​ຄວາມ​ສະຫງົບ​ໃນ​ໄລຍະ 5 ປີ ຄັ້ງ​ທີ່ 1 ຄື​ແຕ່​ປີ 2011-2016 ​ເຊິ່ງ​ໃນ 5 ປີ ຜ່ານ​ມາ​ວຽກ​ງານ​ກໍ່ສ້າງ​ຮາກ​ຖານ​ໄດ້​ຂະຫຍາຍຕົວ​ຢ່າງ​ເປັນ​ລະບົບ​ຕໍ່​ເນື່ອງ, ​ໂດຍ​ປະຕິບັດ​ຕາມ​ມະຕິ​ 09, ມະຕິ 03 ຂອງ​ກົມ​ການ​ເມືອງ​ສູນ​ກາງ​ພັກ, ຄຳ​ສັ່ງ​ແນະນຳ​ຂອງ​ຄະນະ​ພັກ​ກະຊວງ ປກສ ຕາມ 4 ​ເນື້ອ​ໃນ 4 ຄາດໝາຍ ​ແລະ ວາງ​ອອກ​ໃນ​ແຕ່ລະ​​ໄລຍະ ບຸກທະລຸ​ວຽກ​ງານ​ຈຸດ​ສຸມ​ອື່ນໆ ​ໄດ້​ປະກົດ​ຜົນ​ເປັນ​ຈິງ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ເລືອກ​ເຟັ້ນຂອງ​ພະນັກງານ​ຢູ່​ບັນດາ​ກົມ​ກອງ​ໃນ​ທົ່ວ​ກຳລັງ​ປ້ອງ​ກັນ​ຄວາມ​ສະຫງົບ ລົງ​ປະຈຳ​ຢູ່​ທ້ອງ​ຖິ່ນ​ໃນ​ທົ່ວ​ປະ​ເທດ ​ໂດຍ​ປະຕິບັດ​ຕາມ​ແນວທາງ​ນະ​ໂຍບາຍ​ຂອງ​ພັກ-​ລັດ ກໍ​ຄື​ແນວທາງ ປກຊ-ປກສ ທົ່ວ​ປວງ​ຊົນ​ຮອບດ້ານ​ຂອງ​ພັກ​ໃນ​ໄລຍະ​ໃຫ່ມ ​ແລະ ຊີ້​ນຳ-​ນຳພາ ພະນັກ​ງານ​ກໍ່ສ້າງ​ຮາກ​ຖານທີ່​ປະຈຳ​ຢູ່​ຈຸດ​ສຸມ​ບັນດາ​ແຂວງ ຮ່ວມ​ມື​ກັບ​ອຳນາດ​ການ​ປົກຄອງ​ບ້ານ ​ແລະ ກຸ່ມ​ບ້ານ ຈັດ​ຕັ້ງ​ສຶກສາ​ອົບຮົມ​ປະຊາຊົນ ​ເຮັດ​ໃຫ້​ມີ​ຄວາມ​ຕື່ນ​ຕົວ ​ເຄົາລົບ​ກົດໝາຍ, ຈິງ​ໃຈ​ໃຫ້​ຂໍ້​ມູນກ້າວ​ໄປ​ເຖິງ​ການ​ເລິກ​ຮື້​ເປົ້າ​ໝາຍ​ຄ້າຂາຍ​ຢາ​ເສບ​ຕິດ, ​ເປົ້າ​ໝາຍ​ຄ້າຂາຍ​ເຖື່ອນ, ​ເປົ້າ​ໝາຍ​ກໍ່​ຄວາມ​ບໍ່​ສະຫງົບ​ທາງ​ດ້ານ​ການ​ເມືອງ ​ແລະ ອື່ນໆ.

ນອກ​ນີ້​ກະຊວງ ປກສ ຍັງ​ໄດ້​ເອົາ​ໃຈ​ໃສ່​ຢ່າງ​ຕັ້ງໜ້າ​ໃນ​ການຈັດ​ຕັ້ງ​ຜົນ​ຂະຫຍາຍ​ແນວທາງ ປກຊ-ປກສ ​ໂດຍ​ສົມທົບ​ກັບ​ບັນດາ​ຂະ​ແໜງ​ການ​ທີ່​ກ່ຽວຂ້ອງ ນັບ​ແຕ່​ສູນ​ກາງ​ລົງ​ຮອດ​ທ້ອງ​ຖິ່ນ ​ເຮັດ​ໜ້າ​ທີ່​ປ້ອງ​ກັນ​ຄວາມ​ສະຫງົບ, ​ເພື່ອ​ອຳ​ນວຍຄວາມ​ສະດວກ​​ໃຫ້​ແກ່​ການ​ພັດທະນາ​ເສດຖະກິດ-​ສັງຄົມ ​ໂດຍ​ສະ​ເພາະ​ສຸມ​ໃສ່​ວຽກ​ງານ​ຄຸ້ມ​ຄອງ​ພົນລະ​ເມືອງ ​ໄດ້​ລົງ​ກວດກາ​ເກັບ​ກຳ​ສະຖິຕິ​ພົນລະ​ເມືອງ, ກວດກາ​ຄົນ​ຍົກຍ້າຍ​ຖິ່ນ​ຖານ​ພູມລຳ​ເນົາ​ວຽກ​ງານ​ຄຸ້ມ​ຄອງ​ອາ​ຊູບ, ພາຫະນະ​ພິ​ເສດ,ວຽກງານ​ປັບປຸງ, ປກສກຸ່ມ​ແລະປກສບ້ານ, ວຽກ​ງານ​ກວດກາ​ເກັບ​ກຳ​ຂື້ນ​ທະບຽບບ້ານ​ເປົ້າ​ໝາຍ,ວຽກ​ງານ​ສ້າງ​ບົດ​ບັນທຶກ​ສັນຍາ​ຄອບຄົວ ​ແລະ ບ້ານປ້ອງ​ກັນ​ຄວາມ​ສະຫງົບ, ວຽກ​ງານ​ສ້າງ​ຄອບຄົວ​ບ້ານ​ປ້ອງ​ກັນ​ຄວາມ​ສະຫງົບ​ດີ, ວຽກ​ງານ​ດ້ານ​ສະກັດ​ກັ້ນ ​ແລະ ​ແກ້​ໄຂ​ປະກົດ​ການ​ຫຍໍ້​ທໍ້, ວຽກ​ງານ​ປັບປຸງ​ລະບົບ​ການ​ປົກຄອງ​ຢູ່​ຮາກ​ຖານ.

​ໃນ​ນີ້​ວາລະ​ດຳ​ເນີນ​ກອງ​ປະຊຸມ​ບັນດາ​ເຈົ້າ​ແຂວງ, ​ເຈົ້າ​ເມືອງ ອຳນາດ​ການ​ປົກຄອງ, ຍັງ​ໄດ້​ປະກອບ​ຄຳ​ຄິດ​ເຫັນ​ກ່ຽວ​ກັບ​ວຽກ​ງານ​ກໍ່ສ້າງ​ຮາກ​ຖານ ​ໃນ​ຂົງ​ເຂດ​ຄວາມ​ຮັບຜິດຊອບ. ສ່ວນ​ວາລະ​ດຳ​ເນີນ​ກອງ​ປະຊຸມ​ຄັ້ງ​ນີ້ ​ແມ່ນ​ຈະ​ດຳ​ເນີນ​ເປັນ​ເວລາ 2 ວັນ ຄື ວັນ​ທີ 18-19 ທັນວາ ຈິ່ງ​ສຳ​ເລັດ.

Off
15th Dec2017

ປກສ ແຂວງສະຫວັນນະເຂດຈັບຜູ້ຄ້າຂາຍ ຢາເສບຕິດພ້ອມດ້ວຍຂອງກາງຢາບ້າ 38 ມັດ

by somchan

​ເຈົ້າ​ໜ້າ​ທີ່​ຕຳຫຼວດ​ສະກັດ​ກັ້ນ ​ແລະ ຕ້ານ​ຢາ​ເສບ​ຕິດ ປກສ ​ແຂວງ​ສະຫວັນ​ນະ​ເຂດ  ​ໄດ້​ໃຫ້​ຮູ້​ວ່າ: ​ໃນ​ວັນ​ທີ 10 ທັນວາ 2017 ທາງ​ເຈົ້າ​ໜ້າ​ ໄດ້​ຮັບ​ຂໍ້​ມູນ​ຈາກ​ພົນລະ​ເມື​ອງດີ ວ່າ​ຈະ​ມີ​ການ​ລັກລອບ​ຊື້​ຂາຍ​ຢາ​ເສບ​ຕິດ ​ຢູ່​​ເຂດ​ເມືອງ ອຸທຸມພອນ ​ແຂວງ​ສະຫວັນ​ນະ​ເຂດ ດັ່ງ​ນັ້ນ​ຈຶ່ງ​ໄດ້​ຈັດ​ຕັ້ງ​ພະນັກງານ​ວິຊາ​ສະ​ເພາະ​ລົງ​ພິສູດ​ແຫຼ່ງຂ່າວ ​ແລະ ​ເກັບ​ກຳ​ຂໍ້​ມູນ ​ເຫັນ​ວ່າ​ມີ​ຂໍ້​ມູນ​​ແທ້​ຈິງ ມື້​ຕໍ່​ມາ​ວັນ​ທີ 11 ທັນວາ 2017 ​ເຈົ້າ​ໜ້າ​ທີ່ ​ຈຶ່ງ​ວາງ​ແຜນ ມ້າງ​ລາຍ​ຄະດີ ສາມາດ​ຈັບ​ຜູ້​ຖືກ​ຫາ​ໄດ້​ທັງ​ໝົດ 8 ຄົນ.ພ້ອມ​ຂອງ​ກາງ​ທັງ​ໝົດ ຢາ​ບ້າ 76.155 ​ເມັດ, ລົດ​ໃຫ່ຍ 3 ຄັນ, ລົດຈັກ 1 ຄັນ, ​ໂທລະສັບ 10 ໜ່ວຍ ​ແລະ ປືນ k 59 1 ກະບອກ ພ້ອມ​ລູກ​ກະ​ສູນ. ຜູ້​ຕ້ອງ​ຫາ​ທັງ 8 ຄົນ​ມີ​ຄື: ທ້າວ​​ເຂັມພອນ ອາຍຸ 45 ປີ ປະຊາຊົນ​ບ້ານ ​ໂພນ​ສະອາດ, ທ້າວ ​ໄຊ​ປັນຍາ ອາຍຸ 41 ປີ ປະຊາຊົນ​ບ້ານ​ດົງ​ດຳ​ດວນ, ທ້າວ ບົວ​ແກ້ວ ອາຍຸ 50 ປີ ປະຊາຊົນ​ບ້ານ ດອນ​ເຊັງ, ທ້າວ​ ຜາ​ສຸກ ອາຍຸ 18 ປີ ປະຊາຊົນ​ບ້ານ​ສອນ​ໄຊ, ນາງ ສຸພາ​ລັກ ອາຍຸ 19 ປີ ປະຊາຊົນ​ບ້ານ​​ໂພນ​ສະຫວ່າງ​ໃຕ້ ທັງ 5 ຄົນ​ຢູ່​ເມືອງ ​ໄກສອນ​ພົມວິຫານ, ທ້າວ ​ສົມ​ໄຊ​ສີ ອາຍຸ 27 ປີ ປະຊາຊົນ​ຢູ່​ບ້ານ ປາກ​ຊ່ອງ, ທ້າວ ສັນຕິ​ສຸກ ອາຍຸ 29 ປີ ປະຊາຊົນ​ບ້ານ​ນວນ​ວິ​ໄລ, ທ້າວ ຕູ່​ລີ້ ອາຍຸ 31 ປະຊາຊົນ​ບ້ານ ຫຼັກ​ເມືອງ ທັງ 3 ຢູ່​ເມືອງ​ສອງ​ຄອນ ​ແຂວງ​ສະຫວັນ​ນະ​ເຂດ.

ຜ່ານ​ການ​ສືບສວນ-​ສອບ​ສວນ​ຂອງ​ເຈົ້າ​ໜ້າ​ທີ່ ພວກ​ກ່ຽວ​ທັງ 8 ຄົນ ຮັບ​ສາລະພາບ​ວ່າ ຂອງ​ກາງ​ຈຳນວນ​ດັ່ງກ່າວ​ແມ່ນ​ຂອງ​ຜູ້ກ່ຽວ​ແທ້ ດັ່ງ​ນັ້ນ​ເຈົ້າ​ໜ້າ​ທີ່​ຈຶ່ງ​ໄດ້​ລອບ​ລວມຫຼັກ​ຖານ​ເພື່ອ​ສົ່ງ​ໄອ​ຍະ​ການ​ສົ່ງ​ຟ້ອງ​ສານ​ຕັດສິນ​ຄະດີ​ລົງ​ໂທດ​ຕາມ​ລະບຽບ​ກົດໝາຍ.

Off
14th Dec2017

ຮອງລັດຖະມົນຕີກະຊວງປ້ອງກັນຄວາມ ສະຫງົບໄດ້ລົງຊີ້ນຳວຽກງານວິຊາສະເພາະ ຢູ່ແຂວງຊຽງຂວາງ

by somchan

ພົຕ ສິນ​ທະ​ວົງ ​ໄຊ​ຍະ​ກອນ ຮອງ​ລັດຖະມົນຕີ ກະຊວງ​ປ້ອງ​ກັນ​ຄວາມ​ສະຫງົບ ພ້ອມ​ຄະນະ ​ໄດ້​ເຄື່ອນ​ໄຫວ​ຊີ້​ນຳ​ວຽກ​ງານ​ວິຊາ​ສະ​ເພາະ ​ຢູ່​ກອງ​ບັນ​ຊາການ ປກສ ​ແຂວງ​ຊຽງ​ຂວາງ ​ໃນ​ວັນ​ທີ 12 ທັນວາ 2017 ນີ້ ​ໂດຍ​ການ​ຕ້ອນຮັບ​ຂອງ ພັອ ບຸນ​ລົດ ຄຳ​ແພງ​ພັນ ຫົວໜ້າ​ກອງບັນຊາ​ການ ປກສ ​ແຂວງ ພ້ອມ​ດ້ວຍ​ພະນັກງານ-​ນັກຮົບ​ເຂົ້າ​ຮ່ວມ.

ພັອ ບຸນ​ລົດ ຄຳ​ແພງ​ພັນ ​ໄດ້​ລາຍ​ງານ​ສະພາບ​ການ ​ແລະ ການຈັດ​ຕັ້ງ​ປະຕິບັດ​ວຽກ​ງານ ​ປ້ອງ​ກັນ​ຄວາມ​ສະຫງົບ ການ​ຮັກສາ​ຄວາມ​ເປັນ​ລະບຽບ​ ຮຽບຮ້ອຍ​ໃນ​ສັງຄົມ ​ໂດຍ​ສະ​ເພາະ ​ແມ່ນ​ການ​ສະກັດ​ກັ້ນ ​ແກ້​ໄຂ​ປະກົດ​ການ​ຫຍໍ້​ທໍ້​ໃນ​ໄລຍະ​ໜຶ່ງ​ປີຜ່ານມາ ມີ​ຄະດີ​ເກີດ​ຂື້ນ​ທັງ​ໝົດ 391ລາຍ, ກັກ​ຕົວ​ຜູ້​ກະທຳ​ຜິດ​ໄດ້ 119ຄົນ,  ຍິງ 20 ຄົນ,  ຜົນ​ເສຍ​ຫາຍ​ທັງ​ໝົດ​ປະມານ 11 ຕື້​ກວ່າ​ກີບ,  ​ເກັບ​ກູ້​ຄືນ​ໄດ້ ລົດຈັກ 42 ຄັນ,  ລົດ​ໃຫ່ຍ 1 ຄັນ ​ແລະ ວັດຖຸ​ມີຄ່າ​ອື່ນໆ​ອີກ​ຈຳນວນ​ໜຶ່ງ ລວມມູນ​ຄ່າ​ທັງ​ໝົດ 500 ລ້ານ​ກວ່າ​ກີບ.

​ໂອກາດ​ດຽວ​ກັນ​ນີ້ ທ່ານ ສິນ​ທະ​ວົງ ​ໄຊ​ຍະ​ກອນ ຍັງ​ໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ໃນ​ການ​ເຄື່ອນ​ໄຫວ​ປະຕິບັດ​ໜ້າ​ທີ່​ວຽກ​ງານ​ວິຊາ​ສະ​ເພາະ​ໃນ​ໄລຍະ​ຜ່ານ​ມາ ພ້ອມ​ທັງ​ໃຫ້​ທິດ​ຊີ້​ນຳ ​ແລະ ​ເນັ້ນ​ໜັກ​ໃຫ້​ສືບ​ຕໍ່​ເອົາ​ໃຈ​ໃສ່​ວຽກ​ງານ​ສຶກສາ​ອົບຮົມ​ການ​ເມືອງ​ແນວ​ຄິດ ​ເຝິກ​ຝົນ​ຫຼໍ່​ຫຼອມ​ທັງ​ດ້ານ​ຄຸນ​ທາດ​ການ​ເມືອງ, ຄຸນສົມບັດ, ສິນ​ທຳ​ປະຕິວັດ​ການ​ເອົາ​ໃຈ​ໃສ່​ປັບປຸງ​ກໍ່ສ້າງ​ກົມ​ກອງ​ໃຫ້​ເຕີບ​ໃຫ່ຍ​ເຂັ້ມ​ແຂງ​ກໍ່ສ້າງ​ກຳລັງ​ໃຫ້​ມີ​ຄວາມ​ຮູ້​ຄວາມ​ສາມາດ​ເຂັ້ມ​ແຂງ​ທາງ​ດ້ານ​ວຽກງານ​ວິຊາ​ສະ​ເພາະ ພ້ອມ​ທັງ​ເປັນ​ເຈົ້າ​ການ​ໃນ​ການ​ສະກັດ​ກັ້ນ​ແກ້​ໄຂ​ປະກົດ​ການ​ຫຍໍ້​ທໍ້​ໃນ​ສັງຄົມ ທັງ​ນີ້​ເພື່ອ​ເປັນ​ການ​ກະກຽມ​ຄວາມ​ພ້ອມ​ຮອບດ້ານ​ໃຫ້​ແກ່​ການ​ປ້ອງ​ກັນ​ງານ​ມະຫາ​ກຳ​ກິລາ​ແຫ່ງ​ຊາດ​ທີ່​ແຂວງ​ຂຽງ​ຂວາງ​ເປັນ​ເຈົ້າພາບ​ໃນ​ປີ 2018 ຮັບປະກັນ​ໃຫ້​ທົ່ວ​ແຂວງ​ຊຽງ​ຂວາງ​ມີ​ຄວາມ​ສະຫງົບ ​ແລະ ປອດ​ໄພ100%

Off
06th Dec2017

ເຫດການໄຟໄວ້ ເວີເທດ ເຊັນເຕີ ເສຍຫາຍ 30 ກວ່າລ້ານກີບ

by somchan

 ໃນວັນທີ 5 ທັນວາ 2017 ນີ້ ພັນໂທ ຈັນທະບູນ ມະນີວົງ ຫົວໜ້າພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ປກສ ນະຄອນຫຼວງວຽງຈັນ ໄດ້ຖະແຫຼ່ງຂ່າວກ່ຽວກັບເຫດການໄຟໄໝ້ຕຶກ ເວີເທດເຊັນເຕີ ທີ່ນະຄອນຫຼວງວຽງຈັນ ໃນວັນທີ 3 ທັນວາ ຜ່ານມາວ່າ: ຕຶກອາຄານດັ່ງກ່າວເປັນຕຶກທີ່ ກຳລັງກໍ່ສ້າງໃຫມ່ຍັງບໍ່ທັນສຳເລັດເຊິ່ງເປັນໜຶ່ງໃນ ໂຄງການສຳປະທານໂດຍນາຍທຶນຈີນເພື່ອສ້າງເປັນ ສູນການຄ້າຂະໜາດໃຫຍ່ໃຈກາງນະຄອນຫຼວງວຽງຈັນ (more…)

Off
06th Dec2017

ໄຟໄໝ້ກຸດຕິວັດ ເສຍຫາຍ 215 ລ້ານກີບ

by somchan

  ຕາມການລາຍງານຂອງເຈົ້າໜ້າທີ່ພະແນກ ສະກັດກັ້ນ ແລະ ຕ້ານອັກຄີໄພ ປກສ ແຂວງຈຳປາສັກໃຫ້ຮູ້ວ່າ: ໃນວັນທີ 1 ທັນວາ 2017 ນີ້ ໄດ້ເກີດເຫດໄຟໄໝ້ກຸດຕິວັດ ຢູ່ບ້ານຂະເໜົາ ເມືອງໂຂງ ແຂວງຈຳປາສັກ, ເຊິ່ງເປັນກຸດຕິໄມ້ 2 ຊັ້ນ ໄຟໄດ້ໄໝ້ຈົນໝົດຫຼັງ, ໃນກຸດຕິວັດມີພະແກ້ວ 30 ອົງ, ເຄື່ອງກອງບຸນ, ເງິນສົດ 15 ລ້ານກີບ, ຄຳແທ່ງ 2 ບາດ ລວມມູນຄ່າ 215 ລ້ານກີບ, ຜ່ານການກວດກາຂອງເຈົ້າໜ້າທີ່ ສາເຫດຂອງໄຟໄໝ້ຄັ້ງນີ້ແມ່ນຍ້ອນໄຟຟ້າລັດວົງຈອນ.

 

 

Off
05th Dec2017

ລັດຖະມົນຕີກະຊວງ ປກສ ຕ້ອນຮັບຄະນະ ຜູ້ແທນຂັ້ນສູງກະຊວງຕຳຫຼວດຫວຽດນາມ

by somchan

ໃນວັນທີ 4 ທັນວາ 2017 ຄະນະຜູ້ແທນຂັ້ນສູງ ກະຊວງຕຳຫຼວດ ສສ ຫວຽດນາມ ນຳໂດຍ ພົນໂທ ເລກຸຍເວືອງ ຮອງລັດຖະມົນຕີກະຊວງຕຳຫຼວດ ຫວຽດນາມ ໄດ້ເຂົ້າພົບປະຢ້ຽມຢາມ ພົຕ ສົມແກ້ວ ສີລາວົງ ລັດຖະມົນກະຊວງ ປກສ ລາວ ພ້ອມຄະນະ ເພື່ອລາຍງານສະພາບ ການເຄື່ອນໄຫວຢ້ຽມຢາມ ແລະ ເຮັດວຽກຮ່ວມ ກັບກະຊວງ ປກສ ລາວ ລະຫວ່າງວັນທີ 3-8 ທັນວາ 2017. (more…)

Off
05th Dec2017

ລັດຖະມົນຕີ ກະຊວງ ປກສ ເຂົ້າອວຍພອນ ປະທານປະເທດແຫ່ງ ສປປ ລາວ

by somchan

ພົນຕີ ສີແກ້ວ ສີລາວົງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະພັກ-ຄະນະນຳກະຊວງ ໄດ້ເຂົ້າອວຍພອນສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ໃນວັນທີ 2 ທັນວາ 2017 ນີ້ ເນື່ອງໃນໂອກາດສະເຫຼີມສະຫຼອງວັນຊາດທີ 2 ທັນວາ ຄົບຮອບ 42 ປີ. (more…)

Off