18th Mar2020

ກອງປະຊຸມໃຫ່ຍຄັ້ງທີ 6 ຂອງອົງຄະນະພັກວິທະຍາຄານສັນຕິບານປະຊາຊົນ

by somchan

ອົງຄະນະພັກວິທະຍາຄານສັນຕິບານປະຊາຊົນ ກະຊວງປ້ອງກັນຄວາມສະຫງົບ ໄຂກອງປະຊຸມໃຫ່ຍຄັ້ງທີ 6 ໃນຕອນເຊົ້າຂອງວັນທີ 18 ມີນາ 2020 ນີ້ ພາຍໃຕ້ການເປັນປະທານຂອງສະຫາຍ ພັອ ປອ ວັນສົມ ສີສົມບັດ ເລຂາຄະນະພັກ, ຮັກສາການຫົວໜ້າວິທະຍາຄານ ສັນຕິບານປະຊາຊົນ ແລະ ໂດຍການໃຫ້ກຽດເຂົ້າຮ່ວມ ຂອງ ພົຕ ປອ ສົມຫ້ວງ ທຳມະສິດ ຄະນະປະຈຳພັກກະຊວງ ຮອງລັດຖະມົນຕີກະຊວງປ້ອງກັນຄວາມສະຫງົບ ມີຄະນະພັກຄະນະອຳນວຍການ ຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.

ໃນວາລະດຳເນີນກອງປະຊຸມ ພັອ ປອ ວັນສົມ ສີສົມບັດ ເລຂາຄະນະພັກ ຮັກສາການຫົວໜ້າວິທະຍາຄານສັນຕິບານປະຊາຊົນ ໄດ້ມີຄຳເຫັນກ່າວໄຂກອງປະຊຸມຢ່າງເປັນທາງການ ແລະ ພ້ອມທັງຜ່ານບົດລາຍງານການເມືອງສະຫຼູບຕີລາຄາ ການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ 5 ເຊີ່ງທ່ານໄດ້ກ່າວວ່າ: ຕະຫຼອດໄລຍະ 5 ປີຜ່ານມາ ອົງຄະນະພັກວິທະຍາຄານສັນຕິບານປະຊາຊົນ ໄດ້ຖືເອົາການກໍ່ສ້າງພັກ-ພະນັກງານໃຫ້ມີຄວາມເຂັ້ມແຂງ ໜັກແໜ້ນທາງດ້ານການເມືອງ-ແນວຄິດເປັນກົກ ຕິດພັນກັບການສືກສາອົບຮົມ-ນຳພາການເມືອງແນວຄິດ ສະມາຊິກພັກ ພະນັກງານນັກຮົບ ໃຫ້ມີຄຸນທາດການເມືອງໜັກແໜ້ນ ຕັ້ງຕໍ່ບໍລິສຸດຕໍ່ພັກ-ຕໍ່ອຸດົມການປະຕິວັດ ຕໍ່ປະເທດຊາດ ແລະ ຕໍ່ປະຊາຊົນບັນດາເຜົ່າ ເປັນຕົ້ນຈັດຕັ້ງຜັນຂະຫຍາຍ ມະຕິຄຳສັ່ງຕ່າງໆຂອງພັກ ຂອງຊາດ ຂອງກຳລັງປ້ອງກັນຄວາມສະຫງົບ ວາງອອກ ວຽກງານກໍ່ສ້າງພັກ-ກໍ່ສ້າງພະນັກງານ ໄດ້ເອົາໃຈໃສ່ຊີ້ນຳ-ກໍ່ສ້າງພັກໃຫ້ປອດໃສເຂັ້ມແຂງ ໜັກແໜ້ນທາງດ້ານການເມືອງແນວຄິດ ແລະການຈັດຕັ້ງ ໂດຍປະຕິບັດຕາມ 5 ຫຼັກການ 3 ທິດນຳຂອງພັກ ຍົກສູງຄຸນທາດການເມືອງ ຄວາມຮູ້ຄວາມສາມາດໃຫ້ແກ່ຄະນະພັກແຕ່ລະຂັ້ນ ສະມາຊິກພັກແຕ່ລະສະຫາຍ ບູລະນະລະບົບການຈັດຕັ້ງພັກແຕ່ລະຂັ້ນຊັບຊ້ອນຈັດວາງບຸກຄະລາກອນເຂົ້າແຕ່ລະໜ່ວຍພັກ ຈຸພັກໃຫ້ສາມາດຊີ້ນຳພາແຕ່ລະຂົງເຂດວຽກງານມີຜົນສຳເລັດເປັນຢ່າງດີ ສາມາດຂະຫຍາຍມະຫາຊົນກ້າວໜ້າເຂົ້າພັກໄດ້ 630 ສະຫາຍ, ຍີງ 84 ສະຫາຍ ເລື່ອນສະມາຊິກພັກສຳຮອງ ຂື້ນສົມບູນໄດ້ 922 ສະຫາຍ, ຍີງ 134 ສະຫາຍ ພ້ອມນີ້ຍັງໄດ້ສົ່ງພະນັກງານ-ຄູອາຈານໄປຍົກລະດັບດ້ານວຽກງານວິຊາສະເພາະຢູ່ພາຍໃນແລະຕ່າງປະເທດໄດ້ 191 ສະຫາຍ ແລະ ອື່ນໆ.

ຈາກຜົນງານດັ່ງກ່າວອົງຄະນະພັກ ວິທະຍາຄານສັນຕິບານປະຊາຊົນ ສາມາດກໍ່ສ້າງກົມກອງປອດໃສ ເຂັ້ມແຂງ ໜັກແໜ້ນ ແລະ ໄດ້ຮັບໃບຢັ້ງຢືນນາມມະຍົດ ຈາກກະຊວງປ້ອງກັນຄວາມສະຫງົບ ຫຼາຍໜ່ວຍພັກ ເປັນໜ່ວຍພັກແຂງ ແລະ ມີສະມາຊິກພັກແຂງ ມະຫາຊົນແຂງຫຼາຍຮອຍສະຫາຍ ພ້ອມນີ້ຜູ້ແທນກອງປະຊຸມຍັງໄດ້ພ້ອມກັນປະກອບຄຳເຫັນເຂົ້າໃສ່ບົດລາຍງານການເມືອງໃຫ້ມີເນື້ອໃນເລີກເຊີ່ງ ແລະ ຄົບຖ້ວນສົມບູນດ້ວຍຄວາມຮັບຜິດຊອບສູງ ແລະ ພ້ອມກັນປ່ອນບັດຄັດເລືອກເອົາຄະນະພັກວິທະຍາຄານສັນຕິບານປະຊຊາຊົນ ຊຸດໃໝ່ໄດ້ຕາມຄາດໝາຍ.

Off
18th Mar2020

ກອງປະຊຸມສະຫລຸບວຽກງານກໍ່ສ້າງຮາກຖານການເມືອງ ຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍ ຢູ່ນະຄອນຫຼວງວຽງຈັນ

by somchan

ກອງປະຊຸມສະຫລຸບຖອດຖອນບົດຮຽນວຽກງານກໍ່ສ້າງຮາກຖານການເມືອງ ຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍໄລຍະທີ 2 ປີ 2018-2019 ແລະວາງທິດທາງແຜນການວຽກງານຈຸດສຸມປີ 2020 ຢູ່ນະຄອນຫລວງວຽງຈັນ ໄດ້ຈັດ ໃນວັນທີ 18 ມີນາ 2020 ນີ້ ໂດຍການເປັນປະທານຮ່ວມຂອງ ທ່ານ ປອ ສີນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ. ພົຕ ກົງທອງ ພົງວິຈິດ ຮອງລັດຖະມົນ ຕີກະຊວງ ປກສ ຫົວຫນ້າຄະນະຊີ້ນຳລວມ ວຽກງານກໍ່ສ້າງຮາກຖານການເມືອງຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍຢູ່ ນະຄອນຫຼ%ງວຽງຈັນ ມີທ່ານ ສີບຸນ ສິດທິລີໄຊ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍບັນດາຄະນະຮັບຜິດຊອບຊີ້ນຳກໍ່ສ້າງຮາກຖານ ແລະ ພະນັກງານກໍ່ສ້າງຮາກຖານບັນດາເມືອງພາຍໃນນະຄອນຫຼວງວຽງຈັນ ເຂົ້າຮ່ວມຢ່າງພ້ອມພຽງ.

ພັທ ສຸກພະຈັນ ບຸດດາຄຳ ຮອງຫົວໜ້າກອງບັນຊາການ ປກສ ນະຄອນຫລວງວຽງຈັນ ຫົວຫນ້າກອງເສນາກໍ່ສ້າງຮາກຖານ ນະຄອນຫລວງວຽງຈັນ ໄດ້ລາຍງານການປະຕິບັດວຽກງານກໍ່ສ້າງຮາກຖານການເມືອງ 2 ປີ ຜ່ານມາ ເປັນຕົ້ນວຽກງານຄຸ້ມຄອງສຳມະໂນຄົວຕິດພັນກັບການຈັດລະບຽບສັງຄົມ ເຊິ່ງໃນໄລຍະຜ່ານມາໄດ້ຈັດຕັ້ງໂຄສະນາສຶກສາອົບຮົມໃຫ້ອຳນາດການປົກຄອງບ້ານ ແລະ ພໍ່ແມ່ປະຊາຊົນຊັ້ນຄົນຕ່າງໆຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ ຕິດພັນກັບການເຜີຍແຜ່ລະບຽບການຂື້ນທະບຽນສຳມະໂນຄົວ, ຄຸ້ມຄອງການເໜັງຕີງຂອງພົນລະເມືອງ, ທົ່ວນະຄອນຫຼວງວຽງຈັນ ມີ 59 ກຸ່ມບ້ານ, 481 ບ້ານ, 12.405 ໜ່ວຍ, 166.333 ຫຼັງຄາເຮືອນ, 156.236 ຄອບຄົວ, ພົນລະເມືອງລາວທັງໝົດ 828.294 ຄົນ, ຍີງ 413.725 ຄົນ, ຕ່າງດ້າວ 3.589 ຄົນ, ຍິງ 1.529 ຄົນ, ໄດ້ຂື້ນສຳມະໂນຄົວ 153.046 ຄອບຄົວ ມີ 785.697 ຄົນ, ຍີງ 391.962 ຄົນ, ບໍ່ທັນຂື້ນສຳມະໂນຄົວ 3.280 ຄອບຄົວ ມີ 42.597 ຄົນ, ຍິງ 21.763 ຄົນ, 2 ປີ ຜ່ານມາໄດ້ສຸມໃສ່ເກັບກຳ, ກວດກາ, ແກ້ໄຂຂຶ້ນທະບຽນສຳມະໂນຄົວ ແລະ ອອກບັດປະຈຳຕົວໃຫ້ພົນລະເມືອງລາວ ແລະ ຊາວຕ່າງດ້າວຢູ່ນະຄອນຫຼວງວຽງຈັນທັງໝົດ 6 ຕົວເມືອງ 30 ກຸ່ມບ້ານ ສຳເລັດ 224 ບ້ານ ມີ 7.439 ໜ່ວຍ, 86.003 ຫຼັງຄາເຮືອນ 18.273 ຄອບຄົວ ພົນລະເມືອງ 98.691 ຄົນ, ຍີງ 53.601 ຄົນ, ຄົນພັກເຊົາຊົ່ວຄາວ 120.177 ຄົນ ຍີງ 100 ຄົນ, ຄົນເພີ່ມ 13.858 ຄົນ ຍີງ 6.832 ຄົນ, ເກີດໃໝ່ 10.602 ຄົນ ຍີງ 4.996 ຄົນ, ຍົກຍ້າຍມາ 3.256 ຍີງ 1.836 ຄົນ,ຄົນຫຼຸດ 4.379 ຄົນ ຍິງ 2.169 ຄົນ ຍົກຍ້າຍໄປ 3.413 ຄົນ ຍີງ 1.685, ໄດ້ເອົາໃສ່ຄຸ້ມຄອງ, ກວດກາ, ແກ້ໄຂຄົນຕ່າງປະເທດລະເມີດລະບຽບກົດໝາຍຂອງ ສປປລາວ ຈຳນວນ 2.552 ຄົນ ຍີງ 889 ຄົນ ມີ 18 ສັນຊາດ, ສຸມໃສ່ວຽກງານຈັດສັນຄວາມບໍ່ເປັນລະບຽບຮຽບຮ້ອຍຕາມເສັ້ນທາງຫຼວງທີ່ມີການສັນຈອນແອອັດໃນ ຊົ່ວໂມງຮີບດ່ວນຕາມ 6 ໜ້າວຽກຈຸດສຸມ, ຈັດວາງກຳລັງລົງປະຈຳພື້ນທີ່ຕົວຈີງເພື່ອຈັດລະບຽບຕາມເສັ້ນທາງ, ຈັດສັນການຈອດລົດຊະຊາຍ, ຈັບຄວາມໄວກວດທາດເຫຼົ້າສາມາດພົບກໍລະນີການລະເມີດກົດຈະລາຈອນ 27.754 ຄົນ, ດຳເນີນມາດຕະການສຶກສາອົບຮົມຜູ້ຮູ້ເທົ່າບໍ່ເຖີງການ 9.790 ຄົນ, ກັກທະບຽນລົດ, ໃບຂັບຂີ່ ແລະ ເອກະສານອື່ນໆ 12.973 ໃບ, ກັກລົດ 852 ຄັນ, ໃນນັ້ນມີລົດດັດແປງສະພາບເຕັກນິກລົດ 162 ຄັນ ແລະ ບໍ່ຕິດປ້າຍທະບຽນ 108 ຄັນ, ການແກ້ໄຂບັນຫາຢາເສບຕິດ ສາມາດມ້າງໄດ້ທັງໝົດ 3.184 ກໍລະນີ, ກັກຕົວ 4.907 ຄົນ ຍີງ 487 ຄົນ. ໃນນີ້, ກໍລະນີການຊື້-ຂາຍຢາເສບຕິດ 1.894 ກໍລະນີ ກັກຕົວ 2.648 ຄົນ, ຂົນສົ່ງ-ມີຢາເສບຕິດໄວ້ຄອບຄອງ 397 ກໍລະນີ ກັກຕົວ 615 ຄົນ, ເລີກຮື້ກຸ່ມມົ້ວສຸມເສບຢາເສບຕິດໄດ້ 893 ກໍລະນີ ກັກັກຕົວ 1.644 ຄົນ, ຢຶດຂອງກາງຢາບ້າ 8.968.354 ເມັດ, ຢາຝີ່ນ 3 ກິໂລ,ເຮໂລອິນ 43 ແທ່ງ, ຢາໄອ 859 ກິໂລ, ໂຄເຄນ 2 ຖົງ, ກັນຊາແຫ້ງ 559 ກິໂລ ແລະ ອື່ນໆ.

ໂອກາດນີ້ ຍັງໄດ້ມີການຍ້ອງຍໍໃຫ້ກັບພະນັກງານທີ່ມີຜົນງານທີ່ມີຜົນງານດີເດັ່ນໃນການປະຕິບັດໜ້າທີ່ ໂດຍໄດ້ຮັບຫລຽນໄຊແຮງານຊັ້ນ 229ສະຫາຍ. ຊັ້ນ 3 283 ສະຫາຍ ມອບໂດຍ ທ່ານ ປອ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ຫຼຽນກາແຮງງານ 213ສະຫາຍ. ໃບຍ້ອງຍໍລັດຖະບານ111ສະຫາຍ ແລະ ໃບຍ້ອງຍໍລັດຖະມົນຕີກະຊວງ ປກສ 111 ສະຫາຍ, ເປັນກຽດມອບໂດຍທ່ານ ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປ້ອງກັນຄວາມສະຫງົບ ຫົວໜ້າຄະນະຊີ້ນຳລວມວຽກງານກໍ່ສ້າງຮາກຖານການເມືອງຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍຢູ່ ນະຄອນຫຼວງວຽງຈັນ.

Off
18th Mar2020

ການລະບາດຂອງພະຍາດອັກເສບປອດ ຈາກເຊື້ອຈຸລະໂຣກ ສາຍພັນໃຫມ່ COVID-19

by somchan

ທ່ານ ຣັດຕະນະໄຊ ເພັດສຸວັນ ຫົວຫນ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງກ່ຽວກັບສະພາບການແພ່ລະບາດ ພະຍາດອັກເສບປອດ ທີ່ເກີດຈາກເຊື້ອຈຸລະໂຣກສາຍພັນ ໃຫມ່ COVID-19.

ໃນວັນທີ 16 ມີນາ 2020 ນີ້ ທີ່ກະຊວງສາທາລະນະສຸກວ່າ: ສະພາບການປັດຈຸບັນກ່ຽວກັບ ການລະບາດຂອງພະຍາດອັກເສບປອດ ຈາກເຊື້ອຈຸລະໂຣກ ສາຍພັນໃຫມ່ COVID-19 ມີ ໃນຫຼາຍປະເທດໄດ້ຂະຫຍາຍ ເປັນວົງກວ້າງ ມາຮອດເວລາ 24:00 ໂມງ ຂອງ ວັນທີ 15 ມີນາ 2020, ທົ່ວ ໂລກມີ ທັງຫມົດ 154 ປະເທດ, ກໍລະນີ ຢັ້ງຢືນຜູ້ຕິດເຊື້ອ 169.261 ກໍລະນີ, ເສຍຊິວິດ 6.499 ແລະ ປິ່ນປົວຫາຍດີ 76.618.

ສໍາລັບ ສປປ ລາວ ແມ່ນມີກໍລະນີສົງໄສ ທັງຫມົດ 79 ກໍລະນີ. ໃນນັ້ນ 73 ກໍລະນີ ກວດບໍ່ພົບເຊື້ອພະຍາດ, ຍັງລໍຖ້າຜົນກວດ 6 ກໍລະນີ ຕາມການຕິດຕາມຈະເຫັນວ່າໂຕເລກໃນ ສປ ຈີນ ຫຼຸດລົງຫຼາຍ ແລະ ເກືອບບໍ່ມີລາຍງານກໍລະນີໃໝ່ກົງກັນຂ້າມກັບບັນດາ ປະເທດໃນທົ່ວ ໂລກ ໂດຍສະເພາະໃນຂົງເຂດ ເອີຣົບ ໂຕເລກລາຍງານກໍລະນີ ແລະ ເສຍຊີວິດເພີ່ມຫຼາຍຂຶ້ນ ທຸກມື້ ໂດຍສະເພາະປະເທດ ອີຕາລີ, ອີຣານ, ຝຣັ່ງ, ສະເປນ ແລະ ສ.ເກົາຫຼີ, ເຖິງວ່າ ສປປ ລາວ ເຮົາຍັງບໍ່ມີກໍລະນີລາຍງານແຕ່ບັນດາປະເທດເພື່ອນບ້ານ ເຫັນວ່າໂຕເລກລາຍ ງານເພີ່ມຂຶ້ນ.

ສຳລັບ ສປປ ລາວ ຍັງມີການເດີນທາງເຂົ້າ-ອອກ ຍັງມີການເຂົ້າ-ອອກປະເທດໃນແຕ່ລະວັນ ສະນັ້ນ ສປປ ລາວ ເຮົາແມ່ນມີ ຄວາມສ່ຽງສູງ ທີ່ຈະມີກໍລະນີຕິດເຊື້ອພະຍາດດັ່ງກ່າວເຂົ້າມາ ເພື່ອປ້ອງກັນບໍ່ໃຫ້ມີກໍລະນີນໍາເຂົ້າທາງຄະນະຮັບຜິດຊອບໄດ້ສືບຕໍ່ ກວດອຸນຫະພູມຄົນ ເຂົ້າ-ອອກ ທີ່ເດີນທາງມາແຕ່ຕ່າງປະເທດ ການກວດກາ ອຸນຫະພູມແມ່ນ ເພື່ອຊອກຫາຄົນທີ່ເປັນໄຂ້ເພາະ ອາການໄຂ້ແມ່ນຫນຶ່ງໃນອາການຂອງພະຍາດ COVID-19. ວິທີການກັ່ນກອງ ເພື່ອຊອກຫາຜູ້ທີ່ຕິດເຊື້ອ ແມ່ນປະຕິບັດຕາມການແນະນໍາຂອງອົງການອານາໄມໂລກ ແລະ ທຸກປະເທດໃນທົ່ວໂລກ ກໍ່ໄດ້ໃຊ້ວິທີການດຽວກັນກັບທີ່ ສປປ ລາວ ເຮົາປະຕິບັດ.

Off
18th Mar2020

ຊ່າວໜຸ່ມ ກະຊວງປ້ອງກັນຄວາມສະຫງົບ ວາງກະຕ່າດອກໄມ້ ໜ້າຮູບປັ້ນປະທານ ໄກສອນ ພົມວິຫານ

by somchan

ພົຕ ວັນທອງ ກອງມະນີ ຄະນະປະຈຳພັກກະຊວງ ຫົວໜ້າກົມໃຫ່ຍການເມືອງປ້ອງກັນຄວາມສະຫງົບ ໄດ້ນຳພາຄະນະບໍລິຫານງານຊ່າວໜຸ່ມ ກະຊວງປ້ອງກັນຄວາມສະຫງົບ ເຂົ້າວາງກະຕ່າດອກໄມ້ ຢູ່ຕໍ່ໜ້າຮູບປັ້ນປະທານ ໄກສອນ ພົມວິຫານ.

ໃນວັນທີ 17 ມີນາ 2020 ນີ້ ເນື່ອງໃນໂອກາດກະກຽມເປີດກອງປະຊຸມໃຫ່ຍຄັ້ງທີ V ຂອງຄະນະບໍລິຫານງານຊາວໜຸ່ມ ກະຊວງ ປກສ ເພື່ອເປັນການສະແດງຄວາມຄົບລົບຮັກ ກະຕັນຍູຮູ້ບຸນຄຸນ ແລະ ລະນືກເຖີງຜົນງານ ຂອງປະທານ ໄກສອນ ພົມວິຫານ ວິລະບູລຸດຂອງຊາດລາວ ຜູ້ດີເດັ່ນແລະຄົບລົບຮັກຂອງປ່ວງຊົນລາວທັງຊາດ ຜູ້ທີໄດ້ອຸທິດຊີວິດຂອງຕົນຕະຫຼອດມາ ເພື່ອພາລະກິດຕໍ່ສູ້ປົດປ່ອຍຊາດ ປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອສືບຕໍ່ປົກປັກຮັກສາມູນເຊື້ອດັ່ງກ່າວ ຄະນະບໍລິຫານງານຊາວໜຸ່ມກະຊວງ ປກສ ໃນນາມຊາວໜຸ່ມຜູ້ສຶບທອດພາລະກິດປະຕິວັດ ເປັນຜູ້ສຶບທອດແກນສານ ແລະ ເປັນແຂນຂວາຂອງພັກ ເປັນກະດູກສັນຫຼັງຂອງປະເທດຊາດ ເປັນຜູ້ສຶບທອດມູນເຊື້ອຂອງພັກ ປະຕິຍານວ່າຈະຝືກຝົນຫຼໍ່ຫຼອມຕົນເອງ ທາງດ້ານຄວາມຮູ້ຄວາມສາມາດ ແລະ ຄຸນສົມບັດສີນທຳປະຕິວັດ ດັ່ງຄຳເວົ້າທີວ່າ ບ່ອນໃດຢາກຊ່າວໜຸ່ມເຮົາບຸກ ບ່ອນໃດທຸກຊາວໜຸ່ມເຮົາຜ່ານຜ່າ ບ່ອນໃດຊາດຕ້ອງການຊາວໜຸ່ມອາສາ.

ເພື່ອປົກປັກຮັກສາ ແລະ ເສີມຂະຫຍາຍມູນເຊື້ອ ຜົນງານຂອງຜູ້ນຳການປະຕິວັດ, ນັກຮົບປະຕິວັດ ແລະ ປະຊາຊົນບັນດາເຜົ່າ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ສຳລັບກອງປະຊຸມໃຫ່ຍຄັ້ງທີ V ຂອງຄະນະບໍລິຫານງານຊາວໜຸ່ມ ກະຊວງ ປກສ ທີ່ຈະຈັດຂື້ນໃນມໍ່ໆນີ ກໍ່ແມ່ນອີກເທດສະການສຳຄັນໜື່ງ ເຊີ່ງຈະໄດ້ຜ່ານຮ່າງສາຍງານເມືອງ, ຮ່າງທິດທາງແຜນການ ໃນການກໍ່ສ້າງປັບປຸງຖັນແຖວຊາວໜຸ່ມ ໃນກຳລັງ ປກສ ໃນຕໍ່ໜ້າພ້ອມທັງປ່ອນບັດຂັດເລືອກເອົາຄະນະບໍລິຫານງານ ຊາວໜຸ່ມກະຊວງ ປກສ ຊຸດໃໝ່ ເພື່ອສືບຕໍ່ນຳພາວຽກງານຊາວໜຸ່ມຂອງ ກະຊວງ ປກສ ໃນຊຸມປີຕໍ່ໜ້າ.

Off