20th Mar2020

ຊີ້ແຈງບັນຫາທີ່ສື່ສັງຄົມອອນລາຍວິພາກວິຈານ ກ່ຽວກັບທີ່ດີນໂຄງການກໍ່ສ້າງ ມະຫາວິທະຍາໄລວິທະຍາສາດສຸຂະພາບ

by somchan

ພາກສ່ວນທີ່ກ່ຽວຂ້ອງຊີ້ແຈງບັນຫາທີ່ສື່ສັງຄົມອອນລາຍວິພາກວິຈານ ກ່ຽວກັບທີ່ດີນ ໂຄງການກໍ່ສ້າງ ມະຫາວິທະຍາໄລວິທະຍາສາດສຸຂະພາບ 400 ຕຽງ ຢູ່ເຂດບ້ານຊຽງດາ ເມືອງໄຊເຊດຖາ ນະຄອນຫລວງວຽງຈັນ ດັ່ງທີ່ພວກເຮົາຮູ້ນໍາກັນແລ້ວວ່າ ສີສັງຄົມອອນລາຍຕ່າງໆ ໄດ້ພ້ອມກັນແຊຂໍ້ມູນ ແລະ ວິພາກວິຈານຕ່າງໆນາປະການວ່າ: ພັກ-ລັດ ບຸກລຸກທີ່ດິນຂອງ ປະຊາຊົນຈໍານວນຫນຶ່ງ ຢູ່ເຂດດັ່ງກ່າວ ສະນັ້ນ, ຕໍ່ກັບບັນຫານີ້ ໃນວັນທີ 19 ມີນາ 2020 ທີມງານຂ່າວສື່ມວນຊົນ ກະຊວງປ້ອງກັນຄວາມ ສະຫງົບ ຈຶ່ງໄດ້ລົງໄປເກັບກໍາຂໍ້ມູນທີ່ແທ້ຈິງ ນໍາພາກສ່ວນທີ່ກ່ຽວຂ້ອງ ໂດຍສະເພາະແມ່ນຄະນະ ຮັບຜິດຊອບໂຄງການກໍ່ສ້າງໂຮງຫມໍມະຫາວິທະຍາໄລວິທະຍາສາດສຸຂະພາບ 400 ຕຽງ ຂອງ ກະຊວງສາທາລະນະສຸກ ເພື່ອຊີ້ແຈງຄວາມເປັນຈິງກ່ຽວ ຕອນດິນດັ່ງກ່າວ ໃຫ້ກັບສັງຄົມຮັບຮູ້ ຕໍ່ບັນຫາທີ່ສືສັງຄົມອອນລາຍໄດ້ພ້ອມກັນແຊ ແລະ ວິພາກວິຈານ ທີ່ສ້າງ ຄວາມເຊື່ອມເສຍໃຫ້ແກ່ ພັກ-ລັດ, ເຊິ່ງລາຍລະອຽດ ທ່ານ ພຸດທະພອນ ໂຄດປັນຍາ ຮອງ ເຈົ້າເມືອງໄຊເສດໄດ້ຊີ້ແຈງວ່າ (ປ່ອຍສຽງ…ຮອງເຈົ້າເມືອງ 20,3,2020….) ທ່ານ ດຮ ພູທອນ ວັງກອນວິໄລ ອະທິການບໍດີມະຫາວິທະຍາໄລວິທະຍາສາດສຸຂະພາບ ກະຊວງສາທາລະນະສຸກ ໃນນາມທີ່ເປັນເຈົ້າຂອງໂຄງການກໍ່ສ້າງ ໂຮງຫມໍມະຫາວິທະຍາໄລ ວິທະຍາສາດສຸຂະພາບ 400 ຕຽງ ໄດ້ໃຫ້ຮູ້ກ່ຽວກັບການກໍ່ສ້າງ ແລະ ການຊົດເຊີຍຕໍ່ ພໍ່ ແມ່ ປະຊາຊົນ ຜູ້ທີ່ຖືກໂຄງການນີ້ ພ້ອມກັນນີ້ ທ່ານ ຄໍາປ້ອມ ພິມພິສາ ນາຍບ້ານຊຽງດາ ອະທິບາຍໃຫ້ຮູ້ກ່ຽວກັບທີດີນຕອນດັ່ງກ່າວຕື່ມອີກວ່າ:

20th Mar2020

ຖະແຫຼງຂ່າວ ກ່ຽວກັບ ມາດຕະການສະກັດກັ້ນ, ປ້ອງກັນ ແລະ ແກ້ໄຂການລະບາດຂອງພະຍາດ COVID-19 ຂອງ ລັດຖະບານ ສປປ ລາວ

by somchan

ໃນວັນທີ 19 ມີນາ 2020, ທີ່ ສະຖາບັນການຕ່າງປະເທດ, ກະຊວງການຕ່າງປະເທດ ຮ່ວມກັບ ກະຊວງສາທາລະນະສຸກ ໄດ້ຈັດພິທີຖະແຫຼງຂ່າວ ກ່ຽວກັບ ມາດຕະການສະກັດກັ້ນ, ປ້ອງກັນ ແລະ ແກ້ໄຂການລະບາດຂອງພະຍາດ COVID-19 ຂອງ ລັດຖະບານ ສປປ ລາວ ຂື້ນໂດຍການໃຫ້ກຽດເຂົ້າຮ່ວມໃນພິທີຖະແຫຼງຂ່າວຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແລະ ທ່ານ ຮສ. ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ແຫ່ງ ສປປ ລາວ, ມີບັນດາທູຕານຸທູດ ແລະ ບັນດາຜູ້ຕາງໜ້າອົງການຈັດຕັ້ງສາກົນ ປະຈໍາລາວ ພາກສ່ວນທີ່ກ່ຽວຂ້ອງແລະແຂກຖືກເຊີນເຂົ້າຮ່ວມ. ທ່ານ ສະເຫຼີມໄຊ ກົມມະສິດ ໄດ້ຊີ້ແຈງວ່າ: ກະຊວງການຕ່າງປະເທດ ແຫ່ງ ສປປ ລາວ ໄດ້ສືບຕໍ່ຕິດຕາມສະພາບການລະບາດຂອງພະຍາດອັກເສບປອດເຊື້ອຈຸລະໂລກໂຄໂຣນາສາຍພັນໃໝ່ COVID-19 ຢ່າງໃກ້ຊິດ ພາຍຫຼັງທີ່ພະຍາດດັ່ງກ່າວ ໄດ້ເລີ່ມລະບາດຢູ່ເມືອງອູຫັ້ນ, ແຂວງຫູເປີ່ຍ ຂອງ ສປ ຈີນ ນັບແຕ່ທ້າຍປີ 2019 ເປັນຕົ້ນມາ, ຊຶ່ງມາຮອດປະຈຸບັນ ສປ ຈີນ ສາມາດຄວບຄຸມການລະບາດຂອງພະຍາດດັ່ງກ່າວໄດ້ແລ້ວ. ສະພາບການລະບາດຂອງພະຍາດ COVID-19 ໄດ້ແຜ່ຂະຫຍາຍເປັນວົງກວ້າງໃນ 165 ປະເທດ ຢູ່ພາກພື້ນ ແລະ ໃນທົ່ວໂລກ ໂດຍສະເພາະ ຮ້າຍແຮງກວ່າໝູ່ແມ່ນກຸ່ມປະເທດ ເອີຣົບ (ອີຕາລີ, ສະເປນ, ຝຣັ່ງ) ແລະ ປະເທດ ອີຣານ. ມາຮອດ, ເວລາ 16:00 ໂມງ ຂອງວັນທີ 19 ມີນາ 2020 ມີຜູ້ຕິດເຊື້ອທັງໝົດ 219,345 ກໍລະນີ, ເສຍຊີວິດ 8,969 ກໍລະນີ, ປິ່ນປົວດີແລ້ວ 85,745 ກໍລະນີ. ສຳລັບ ສປປ ລາວ ແມ່ນຍັງບໍ່ທັນພົບຜູ້ຕິດເຊື້ອ COVID-19 ເທື່ອ, ແຕ່ເນື່ອງຈາກວ່າ ປະເທດລາວ ມີຊາຍແດນຕິດຈອດ ແລະ ມີການເດີນທາງເຂົ້າມາຂອງຄົນຈາກປະເທດທີ່ມີຜູ້ຕິດເຊື້ອ ເຮັດໃຫ້ ສປປ ລາວ ມີຄວາມສ່ຽງສູງ. ດັ່ງນັ້ນ, ລັດຖະບານ ໄດ້ສຸມໃສ່ບັນດາມາດຕະການເພື່ອສະກັດກັ້ນ ແລະ ປ້ອງກັນການແຜ່ລະບາດ ພ້ອມທັງມີແຜນການກະກຽມຄວາມພ້ອມໃນການຮັບມືກັບກໍລະນີ ທີ່ອາດກວດພົບຜູ້ຕິດເຊື້ອໃນຕໍ່ໜ້າ. ໃນໄລຍະຜ່ານມາ, ເລີ່ມແຕ່ເດືອນມັງກອນ 2020 ເປັນຕົ້ນມາ, ລັດຖະບານ ໄດ້ປະຕິບັດບາງມາດຕະການ ເພື່ອສະກັດກັ້ນ ແລະ ປ້ອງກັນ ແຕ່ຫົວທີ ເປັນຕົ້ນແມ່ນ: ໄດ້ແຕ່ງຕັ້ງຄະນະສະເພາະກິດເພື່ອຊີ້ນຳການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດດັ່ງກ່າວ, ໂດຍມີທ່ານຮອງນາຍົກລັດຖະມົນຕີ ສົມດີ ດວງດີ, ເປັນຫົວໜ້າຄະນະສະເພາະກິດ ເພື່ອໂຄສະນາເຜີຍແຜ່ຕໍ່ສັງຄົມ ກ່ຽວກັບ ໄພອັນຕະລາຍ ແລະ ວິທີປ້ອງກັນການຕິດເຊື້ອພະຍາດນີ້; ເຂັ້ມງວດກັ່ນກອງຜູ້ເດີນທາງເຂົ້າມາໃນລາວ; ກຽມຄວາມພ້ອມຂອງໂຮງໝໍ; ຈັດສັນງົບປະມານ ເພື່ອຮັບໃຊ້ໃຫ້ແກ່ການປ້ອງກັນ ແລະ ຄວບຄຸມພະຍາດດັ່ງກ່າວ; ອອກມາດຕະການຄຸ້ມຄອງລາຄາຜ້າປິດປາກ-ປິດດັງ, ນໍ້າຢາລ້າງມື ແລະ ອຸປະກອນການແພດ ແລະ ມອບໃຫ້ທ່ານຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ຈັດສຳມະນາປຶກສາຫາລື ກັບຂະແໜງການທີ່ກ່ຽວຂ້ອງ ແລະ ພາກທຸລະກິດ ກ່ຽວກັບຜົນກະທົບຂອງ COVID-19 ແລະ ສະເໜີມາດຕະການທາງດ້ານເສດຖະກິດ ເພື່ອຮັບມືກັບຜົນກະທົບດັ່ງກ່າວ. ໃນຕໍ່ໜ້າ ລັດຖະບານ ຈະສືບຕໍ່ປະຕິບັດມາດຕະການຜ່ານມາທີີ່ໄດ້ວາງອອກແລ້ວ ແລະ ມາດຕະການເພື່ອສະກັດກັ້ນເພີ່ມເຕີມຄື: ປິດດ່ານທ້ອງຖິ່ນ ແລະ ດ່ານປະເພນີ ໃນຂອບເຂດທົ່ວປະເທດ, ສ່ວນດ່ານສາກົນ ໃຫ້ເບິ່ງຄວາມຮັບປະກັນຮອບດ້ານ ຈຶ່ງອະນຸຍາດໃຫ້ເປີດ ໃຫ້ເຂົ້າ-ອອກ ປົກກະຕິ; ໂຈະການອອກ VISA ກັບດ່ານທຸກປະເພດ ສຳລັບທຸກປະເທດ ໃນໄລຍະເວລາ 30 ວັນ. ສຳລັບຜູ້ທີ່ໄດ້ວິຊາເຂົ້າລາວແລ້ວ ກໍຕ້ອງມີການຢັ້ງຢືນການກວດສຸຂະພາບ ແລະ ກວດປະຫວັດການເຄື່ອນໄຫວໃນໄລຍະ 14 ວັນຜ່ານມາ, ສຳລັບປະເທດ ທີ່ໄດ້ຮັບການຍົກເວັ້ນວິຊາ ເຫັນດີໃຫ້ຍົກເລີກການຍົກເວັ້ນວິຊາດັ່ງກ່າວຊົ່ວຄາວ ຈົນກວ່າຈະມີການພິຈາລະນາໃໝ່ຂອງລັດຖະບານ; ຫຼີກລ່ຽງການເດີນທາງໄປຕ່າງປະເທດ ຂອງພົນລະເມືອງລາວ ໃນໄລຍະນີ້; ຜູ້ທີ່ເດີນທາງກັບຈາກປະເທດທີ່ມີການແຜ່ລະບາດຂອງພະຍາດ ໃຫ້ປະຕິບັດການແຍກປ່ຽວຢ່າງໜ້ອຍ 14 ວັນ ເພື່ອຕິດຕາມສຸຂະພາບ; ຫຼີກລ່ຽງການໂຮມຊຸມນຸມໃຫຍ່ ແລະ ງານບຸນປະເພນີຕ່າງໆ; ປິດກິດຈະການຮ້ານບັນເທິງ, ຮ້ານຄາລາໂອເກະ ແລະ ຮ້ານນວດ, ສ່ວນກິດຈະການອື່ນໆ ແມ່ນສາມາດດໍາເນີນໄດ້ປົກກະຕິ ແຕ່ໃຫ້ມີມາດຕະການປ້ອງກັນຂັ້ນພື້ນຖານ ເປັນຕົ້ນ ແມ່ນການກວດອຸ່ນຫະພູມ ແລະ ສະໜອງນໍ້າຢາລ້າງມື; ປິດບັນດາໂຮງຮຽນ ແລະ ສະຖາບັນການສຶກສາຕ່າງໆ ໃນທົ່ວປະເທດຊົ່ວຄາວ ຈົນກວ່າຈະມີການປ່ຽນແປງ. ພ້ອມກັນນັ້ນ ກໍ່ໃຫ້ພິຈາລະນາໃຫ້ບັນດາໂຮງຮຽນ ມີແບບວິທີການຮຽນ-ການສອນ ໂດຍຜ່ານລະບົບອອນລາຍ, ໂທລະພາບ, ວິທະຍຸ, ໜັງສືພິມ ແລະ ວິທີການອື່ນໆ; ກຳນົດສະຖານທີ່ໃນການກັກບໍລິເວນ 14 ວັນ ສຳລັບຜູ້ທີ່ເດິນທາງມາຈາກປະເທດທີ່ມີຄວາມສ່ຽງ (ລວມທັງແຮງງານລາວ-ນັກສຶກສາລາວ ແລະ ປະຊາຊົນລາວ ຜູ້ທີ່ອາໄສຢູ່ຕ່າງປະເທດ) ໃຫ້ເລື່ອນການເດີນທາງກັບຄືນປະເທດ ຈົນກວ່າສະຖານະການທົ່ວໂລກຈະມີທ່າອ່ຽງທີ່ດີຂຶ້ນ. ພ້ອມດຽວກັນນີ້, ລັດຖະບານ ໄດ້ມີມາດຕະການປ້ອງກັນ ຄື: ປັບປຸງຂໍ້ມູນຂ່າວສານ ກ່ຽວກັບການລະບາດຂອງພະຍາດ Covid-19 ໃນທົ່ວໂລກ ໃຫ້ມີຄວາມຖືກຕ້ອງ ແລະ ວ່ອງໄວ ເພື່ອຊີ້ນຳການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດດັ່ງກ່າວ; ໂຄສະນາເຜີຍແຜ່ຂໍ້ມູນ ກ່ຽວກັບ ໄພອັນຕະລາຍ, ຄວາມສ່ຽງ ແລະ ວິທີປ້ອງກັນຕ່າງໆ; ປຸກລະດົມ ແລະ ສຶກສາອົບຮົມໃຫ້ທົ່ວສັງຄົມ ຫຼີກລ່ຽງການເດີນທາງໄປຕ່າງປະເທດເຂດທີ່ມີຜູ້ຕິດເຊື້ອ. ມາດຕະການປິ່ນປົວ ກໍລະນີກວດພົບຜູ້ຕິດເຊື້ອ, ລັດຖະບານໄດ້ ກຳນົດເອົາໂຮງໝໍ 103, ໂຮງໝໍມິດຕະພາບ (150 ຕຽງ), ໂຮງໝໍມະໂຫສົດ ແລະ ໂຮງໝໍໄຊເສດຖາ ເປັນສະຖານທີ່ໃນການປິ່ນປົວຜູ້ຕິດເຊື້ອ ແລະ ກໍານົດເອົາໂຮງໝໍແຂວງທຸກໆແຂວງ ໂດຍໃຫ້ແຍກຈາກເຂດການປິ່ນປົວທົ່ວໄປອອກ; ກະກຽມພະນັກງານແພດໝໍໄວ້ໃຫ້ພຽງພໍ ແລະ ປະສານຂໍການຊ່ວຍເຫຼືອຈາກຊ່ຽວຊານ ແລະ ແພດໝໍ ທີ່ມີຄວາມຊຳນານຈາກປະເທດເພື່ອນມິດ, ອົງການຈັດຕັ້ງສາກົນ ເພື່ອກຽມໄວ້ໃນກໍລະນີມີຄວາມຈໍາເປັນ; ກໍານົດຄວາມຕ້ອງການທາງດ້ານເຄື່ອງມື ແລະ ອຸປະກອນ ໂດຍສະເພາະໜ້າກາກອະນາໄມ, ນໍ້າຢາລ້າງມື, ຊຸດປ້ອງກັນຂອງແພດໝໍ ແລະ ອຸປະກອນຕ່າງໆ ທີ່ຈຳເປັນ; ກະກຽມ ຢາປົວພະຍາດ ແຮໄວ້ໃນກໍລະນີມີການຄົ້ນພົບວັກຊິນ ແລະ ຢາປິ່ນປົວໃໝ່ ທີ່ມີປະສິດທິຜົນຈາກຕ່າງປະເທດ. ພ້ອມນີ້, ລັດຖະບານ ໄດ້ມອບໃຫ້ ທ່ານຮອງນາຍົກລັດຖະມົນຕີ ສອນໄຊ ສີພັນດອນ, ລັດຖະມົນຕີກະຊວງແຜນການ ແລະ ການລົງທຶນ ເປັນຫົວໜ້າຄະນະນໍາພາການຄົ້ນຄວ້າ ປະເມີນຜົນກະທົບຂອງ COVID-19 ຕໍ່ເສດຖະກິດ. ຄຽງຄູ່ກັນນີ້, ກໍ່ໃຫ້ພ້ອມໃຈກັນປຸກລະດົມທົ່ວສັງຄົມ ບໍ່ໃຫ້ມີການແຕກຕື່ນ ແລະ ວິຕົກກັງວົນຈົນເກີນໄປ ເພື່ອຫຼີກລ່ຽງພຶດຕິກຳການກັກຕຸນສິນຄ້າເຄື່ອງອຸປະໂພກບໍລິໂພກ ແລະ ວິພາກວິຈານ ທີ່ບໍ່ຖືກກັບຄວາມເປັນຈິງ; ໃຊ້ມາດຕະການເຄັ່ງຄັດ ຕໍ່ກັບຜູ້ທີ່ສວຍໂອກາດໃນການກັກຕຸນສິນຄ້າ ເປັນຕົ້ນແມ່ນ : ໜ້າກາກອານາໄມ, ນໍ້າຢາລ້າງມື, ຢາປົວພະຍາດ, ອຸປະກອນການແພດ ແລະ ອື່ນໆ; ເພີ່ມທະວີການກວດກາ ແລະ ປະຕິບັດມາດຕະການຕໍ່ການກະທໍາທີ່ສ້າງຄວາມສັບສົນ ຫລື ສ້າງຄວາມເຂົ້າໃຈຜິດໃນຮູບແບບຕ່າງໆ ເຊັ່ນ: ການປ່ອຍຂ່າວທີ່ວ່າມີມູນຄວາມຈິງທາງສື່ສັງຄົມອອນລາຍ ແລະ ສື່ອື່ນໆ; ຊຸກຍູ້ສົ່ງເສີມການຜະລິດພາຍໃນ ໂດຍສະເພາະເຄື່ອງອຸປະໂພກ-ບໍລິໂພກ; ສືບຕໍ່ປະສານງານແລກປ່ຽນຂໍ້ມູນຂ່າວສານ ແລະ ຍາດແຍ່ງເອົາການຮ່ວມມືຊ່ວຍເຫລືອຈາກສາກົນ ໃນດ້ານທີ່ພວກເຮົາຈໍາເປັນ ແລະ ຍັງບໍ່ທັນມີຄວາມພ້ອມ; ໃຫ້ຄະນະສະເພາະກິດຕິດຕາມ ແລະ ປະເມີນຜົນບັນດາມາດຕະການຈັດຕັ້ງດັ່ງກ່າວ ເພື່ອສະເໜີພິຈາລະນາປັບປຸງ ຫລື ແກ້ໄຂໃຫ້ແທດກັບສະພາບຄວາມເປັນຈິງໃນແຕ່ລະໄລຍະ.

20th Mar2020

ປກສ ແຂວງ ບໍລິຄຳໄຊ ຍຶດລົດຂົນສົ່ງຢາເສບຕິດ ພ້ອມຕ້ອງຫາ 4 ຄົນ ແລະ ຢາເສບຕິດຈຳນວນຫຼາຍ

by somchan

ໃນວັນທີ 18 ມີນາ 2020 ນີ້ ເຈົ້າໜ້າທີ່ຕຳຫຼວດ ກອງບັນຊາການ ປກສ ແຂວງບໍລິບໍໄຊ ໄດ້ສົມທົບກັບພາກສ່ວນກ່ຽວຂ້ອງລົງຕັ້ງດ່ານກວດກາລົດເປົ້າໝາຍຄ້າຂາຍຢາເສບຕິດ ຢູ່ເສັ້ນທາງເລກທີ13 ໃຕ້, ເຂດບ້ານນ້ຳງຽບ ເມືອງປາກຊັນ ແຂວງບໍລິຄຳໄຊ.

ສາມາດກັກຕົວພວກຂະບວນການຂົນສົ່ງຢາເສບຕິດໄດ້ 4 ຄົນ ຄື: ທ້າວ ຢັ້ງຢ່າງ ອາຍຸ 37 ປີ ຢູ່ບ້ານຫ້ວຍຫົງ ເມືອງໄຊທານີ ນະຄອນຫຼວງວຽງຈັນ, ທ້າວໄມຊົງ ອາຍຸ 17 ປີ ຢູ່ບ້ານໂພນຄຳ ເມືອງໄຊຈຳພອນ ແຂວງສະຫວັນນະເຂດ ນາງຕົງຊົງ ອາຍຸ 27 ປີ ຢູ່ບ້ານທົ່ງນາມີ ເມືອງປາກກະດິງ ແລະ ນາງ ມໍວ່າງ ອາຍຸ 21 ຢູ່ບ້ານໜອງປາດ ເມືອງວຽງທອງ ແຂວງບໍລິຄຳໄຊ; ພ້ອມຂອງກາງ ຢາບ້າ 240,000 , ຢາໄອສ໌ 60 ຖົງ ນ້ຳໜັກ 60 ກິໂລກຣາມ

ແລະຢຶດພາຫະນະທີ່ນຳໃຊ້ເຂົ້າໃນການເຄື່ອນໄຫວ ຈຳນວນ 2 ຄັນຄື: ຢຶດລົດກະບະ ນິສັນ ນາວາລ້າ ສີປອນເທົາ ໝາຍເລກທະບຽນ ກພ 3926 ກຳແພງນະຄອນ ແລະ ລົດກະບະວິໂວ້ ສີຂາວໝາຍເລກທະບຽນ 6868 ກຳແພງນະຄອນ.

ຜ່ານການສືບສວນ-ສອບສວນຂອງເຈົ້າໜ້າທີ່ ພວກກ່ຽວທັງ 4 ໄດ້ຮັບສາລະພາບວ່າ: ຢາເສບຕິດຈຳນວນດັ່ງກ່າວ ແມ່ນເປັນຂອງພວກກ່ຽວແທ້ ຊື່ງໄດ້ຮ່ວມກັນຂົນສົ່ງຢາເສບຕິດ. ປະຈຸບັນເຈົ້າໜ້າທີ່ພວມດຳເນີນຄະດີຕາມລະບຽບກົດໝາຍ.

20th Mar2020

ລມຕ ກະຊວງ ປກສ ຕ້ອນຮັບການເຂົ້າຢ້ຽມຂ່ຳນັບ ເອກອັກຄະລັດຖະທູດ ແຫ່ງ ສະຫະລັດອາເມລິກາ

by somchan

ໃນວັນທີ 20 ມີນາ 2020ນີ້ ພົທ ວິໄລຫລ້າ ຄຳຟອງ ລັດຖະມົນຕີກະຊວງປ້ອງກັນ ຄວາມສະຫງົບ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ປີເຕີ້ ເຮມ້ອນ ເອກອັກຄະລັດຖະທູດ ແຫ່ງ ສະຫະລັດອາເມລິກາ ພ້ອມຄະນະເນື່ອງໃນໂອກາດມາດຳລົງ ຕຳແຫນ່ງ ເປັນເອກອັກຄະລັດຖະທູດຄົນ ໄຫມ່ປະຈຳລາວ ໂອກາດນີ້ທ່ານ ລັດຖະມົນຕີກະຊວງປ້ອງກັນຄວາມສະຫງົບ ກໍ່ໃດ້ກ່າວຕ້ອນຮັບແລະສະແດງຄວາມຍີນດີຕໍ່ທ່ານ ປີເຕີ້ ເຮມ້ອນ ພ້ອມຄະນະໂດຍການມາດຳລົງຕໍາແໜ່ງໃນຄັ້ງນີ້ແມ່ນເປັນຄັ້ງ ທີ 3 ເຊີ່ງເປັນການປະກອບສ່ວນໃນການເສີມຂະຫຍາຍການຮ່ວມມືລະຫວ່າງພັກ-ລັດຖະບານ ແລະ ປະຊາຊົນສອງປະເທດໃນບາງຂົງເຂດວຽກງານໃຫ້ເຕີບໃຫ່ຍຂະຫຍາຍຕົວ ພ້ອມທັງອວຍພອນໄຊໃຫ້ທ່ານຈົ່ງມີສຸຂະພາບແຂງແຮງ ປະສົບຜົນສຳເລັດໃນການປະຕິບັດຫນ້າທີ່ການທູດຢູ່ ສປປລາວ ແລະ ຈະ ໃຫ້ຄວາມຮ່ວມມືຊ່ວຍເຫລືອແລະອຳນວຍຄວາມສະດວກໃນທຸກດ້ານ ໃຫ້ແກ່ທ່ານທູູດຄົນໄຫມ່ໃນການປະຕິບັດຫນ້າທີ່ຢູ່ລາວໃຫ້ມີຄວາມປອດໄພຮອບດ້ານ.

20th Mar2020

ກະຊວງ ປກສ ປະກາດການແຕ່ງຕັ້ງ ຮອງຫົວໜ້າກົມໃຫຍ່ການເມືອງ ກະຊວງ ປກສ

by somchan

ກະຊວງປ້ອງກັນຄວາມສະຫງົບ ຈັດພິທີປະກາດການແຕ່ງຕັ້ງ ຮອງຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໃນວັນທີ່ 19 ມີນາ 2020 ເປັນກຽດເຂົ້າຮ່ວມໂດຍ ພົຕ ປອ ສົມຫວັງ ທໍາມະສິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ມີບັນດາຄະນະພັກກະຊວງ, ຄະນະປະຈໍາພັກກົມໃຫຍ່, ຫົວໜ້າກົມກອງອ້ອມຂ້າງກະຊວງ, ພ້ອມດ້ວຍພະນັກງານການນຳກົມກອງອ້ອມຂ້າງກົມໃຫຍ່ການເມືອງ ກະຊວງປ້ອງກັນຄວາມສະຫງົບເຂົ້າຮ່ວມ. ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ຜ່ານຂໍ້ຕົກ ຂອງກະຊວງ ປກສ, ວ່າດ້ວຍການແຕ່ງຕັ້ງນາຍຕໍາຫຼວດ ທີ່ຂຶ້ນກັບກົມໃຫຍ່ການເມືອງ ກະຊວງປ້ອງກັນຄວາມ ໃນນີ້ ທ່ານລັດຖະມົນຕີກະຊວງປ້ອງກັນຄວາມສະຫງົບ ຕົກລົງ ແຕ່ງຕັ້ງ ທ່ານ ພົຈວ ຄໍາສາຍ ຈັນທະວົງ ເປັນຮອງຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ສ່ວນຫົວໜ້າ ແລະ ຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ. ທັງນີ້ກໍເພື່ອເປັນການປັບປຸງກົງຈັກການຈັດຕັ້ງ ຂອງກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໃຫ້ປອດໃສ, ເຂັ້ມແຂງ, ໜັກແໝ້ນ ແລະ ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ໂອກາດດຽວກັນ ພົຕ ປອ ສົມຫວັງ ທໍາມະສິດ ກໍໄດ້ໂອ້ລົມເນັນໜັກໃຫ້ຄະນະພັກ,ຄະນະບັນຊາ ຂອງກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໂດຍສະເພາະກໍແມ່ນຜູ້ທີ່ໄດ້ຮັບຕໍາແໜ່ງໃໝ ໃຫ້ເອົາໃຈໃສກໍ່ສ້າງພັກ, ກໍ່ສ້າງພະນັກງານພາຍໃນກົມໃຫຍ່ການເມືອງ ກະຊວງປ້ອງກັນຄວາມສະຫົງບ ມີຄວາມໜັກແໜ້ນ ທາງດ້ານການເມືອງ,ເຕີບໃຫຍ່ຂະຫຍາຍຕົວເຂັ້ມແຂງ ດ້ານວຽກງານວິຊາສະເພາະ ເຮັດໃຫ້ກໍາລັງປ້ອງກັນຄວາມສະຫງົບມີປະສິພາບດີຂຶ້ນກວ່າເກົ່າ.

20th Mar2020

ກັກຜູ້ຖືກຫາໄດ້ 4 ຄົນພ້ອມຂອງກາງຢ້າບ້າ ສິບພັນກ່ວາເມັດ

by somchan

ຫວ່າງບໍ່ດົນມານີ້ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງຈຳປາສັກ ໄດ້ຮ່ວມກັບອຳນາດການປົກຄອງບ້ານ ຄີລີ ເມືອງຊະນະສົມບູນ ແຂວງຈຳປາສັກ ໄດ້ມ້າງກຸ່ມຄ້າຂາຍຢາເສບຕິດ ຢູ່ເຂດບ້ານ ຄີລີ ສາມາດກັກຕົວຜູ້ຖືກຫາໄດ້ 4 ຄົນ ພ້ອມຢາບ້າ ສິບພັນກ່ວາເມັດ ລາຍລະອຽດນັກຂ່າວ ປກສ ແຂວງຈຳປາສັກລາຍງານ