04th Dec2015

ປະກາດເລື່ອນຊັ້ນຂັ້ນພົນຕີໃຫ້ ພະນັກງານການນຳຂັ້ນສູງຂອງ ກຳລັງ ປກສ

by somchan

ກະຊວງ ປກສ ໄດ້ປະກາດເລື່ອນຊັ້ນຂັ້ນພົນຕີໃຫ້ພະນັກງານ ການນຳຂັ້ນສູງຂອງກຳລັງປ້ອງກັນຄວາມສະຫງົບ ໃນວັນທີ 1 ທັນວາ 2015 ນີ້ ໂດຍການເຂົ້າຮ່ວມຂອງທ່ານ ບຸນຍັງ ວໍລະຈິດ ຮອງປະທານປະເທດ ມີລັດຖະມົນຕີວ່າການ, ຊ່ວຍວ່າການ, ກົມໃຫຍ່, ພະນັກງານນຳພາ-ບັນຊາແລະແຂກຖືກເຊີນເຂົ້າຮ່ວມ.

ໂອກາດນີ້ ທ່ານທອງຈົນ ຄົງພູມຄຳ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານດຳລັດຂອງປະທານປະເທດແຫ່ງ ສປປລາວ ວ່າດ້ວຍການເລື່ອນຊັ້ນ ຈາກພົນຈັດຕະວາຂຶ້ນເປັນພົນຕີ ໃຫ້ແກ່ ທ່ານ ສົມແກ້ວ ສີລາວົງ  ລັດຖະມົນຕີວ່າການກະຊວງປ້ອງກັນຄວາມສະຫງົບ, ທ່ານສິນທະວົງ ໄຊຍະກອນ ແລະ ທ່ານກົງທອງ ພົງວິຈິດ ລັດຖະມົນຕີຊ່ວຍວ່າການກະຊວງປ້ອງກັນຄວາມສະຫງົບ.

ໂອກາດດຽວກັນນີ້ ທ່ານບຸນຍັງ ວໍລະຈິດ ໄດ້ກ່າວວ່າ: ການເລື່ອນຊັ້ນຂັ້ນພົນຕີໃຫ້ພະນັກງານການນຳຂັ້ນສູງຂອງກຳລັງປ້ອງກັນຄວາມສະຫງົບໃນຄັ້ງນີ້ ເປັນການປະຕິບັດນະໂຍບາຍຂອງພັກ-ລັດ ຕໍ່ກຳລັງປ້ອງກັນຄວາມສະຫງົບທັງເປັນການຍ້ອງຍໍຜູ້ທີ່ມີຜົນງານ ແລະ ຄຸນງານຄວາມດີ ກໍ່ຄືການປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົງ ພ້ອມທັງເປັນການສະແດງເຖິງຄວາມໄວເນື້ອເຊື້ອໃຈຂອງພັກ-ລັດຕໍ່ກຳລັງປ້ອງກັນຄວາມສະຫງົບ. ເອົາໃຈໃສ່ຊີ້ນຳ-ນຳພາກຳລັງປ້ອງກັນຄວາມສະຫງົບໃຫ້ນັບມື້ເຕີບໃຫ້ເຂັ້ມແຂງຮອບດ້ານເຮັດໃຫ້ສຳເລັດໜ້າທີ່ການເມືອງທີ່ໄດ້ຮັບມອບໝາຍ.

ໃນໄລຍະດຽວກັນນີ້ກົມຄົ້ນຄ້ວາວິທະຍາສາດ-ປະຫວັດສາດ ກະຊວງປ້ອງກັນຄວາມສະຫງົບ, ປກສ ແຂວງຈຳປາສັກ, ປກສ ແຂວຊຽງຂວາງ ແລະ ກອງບັນຊາການ ປກສ ແຂວງອຸດົມໄຊ ກໍ່ໄດ້ປະກາດການເລື່ອນຊັ້ນໃຫ້ພະນັກງານ-ນັກຮົບເຊັ່ນດຽວກັນ.

Off

Comments are closed.