08th Dec2015

ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VII.

by somchan

ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VII ໄດ້ໄຂຂຶ້ນຢ່າງເປັນທາງການໃນວັນທີ 7 ທັນວາ 2015ນີ້ ພາຍໃຕ້ການເປັນປະທານຂອງທ່ານນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ. ເປັນກຽດເຂົ້າຮ່ວມມີ ພະນະທ່ານ ຈູມມະລີ ໄຊຍະສອນ ເລຂາທິການໃຫ່ຍ ຄະນະບໍລິຫານສູນກາງພັກ ປະທານປະເທດ, ບັນດາຜູ້ນຳ, ອາດີດການນຳຂັ້ນສູງ, ລັດຖະມົນຕີວ່າການ, ຊ່ວຍວ່າການ, ຕາງໜ້າອົງການຈັດຕັ້ງພັກ, ອົງການແນວລາວສ້າງຊາດ ແລະ ສະມາຊິກສະພາແຫ່ງຊາດເຂົ້າຮ່ວມ.

ທ່ານນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ໄດ້ກ່າວໄຂກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VII ຢ່າງເປັນທາງການ ເຊິ່ງທ່ານໄດ້ກ່າວວ່າ: ກອງປະຊຸມຊຸດນີ້ຈະໄດ້ສຸມໃສ່ພິຈາລະນາ ແລະຮັບຮອງເອົາລັດຖະທຳມະນູນສະບັບປັບປຸງ ເຊິ່ງເປັນກົດໝາຍພຶ້ນຖານຂອງ ສປປລາວ, ພິຈາລະນາເອົາກົດໝາຍ 11ສະບັບ, ໃນນີ້ກົດໝາຍສ້າງໃໝ່ 4ສະບັບຄື: ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການຕ້ານການຄ້າມະນຸດ, ກົດໝາຍວ່າດ້ວຍການປ້ອງກັນຊາດ ແລະ ກົດໝາຍວ່າດ້ວຍພະນັກງານລັດຖະກອນ, ກົດໝາຍສະບັບປັບປຸງ 7ສະບັບຄື: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະສະມາຊິກສະພາປະຊາຊົນຂັ້ນແຂວງ, ກົດໝາຍວ່າດ້ວຍການປົກຄອງທ້ອງຖິ່ນ, ກົດໝາຍວ່າດ້ວຍລັດຖະບານ, ກົດໝາຍວ່າດ້ວຍງົບປະມານແຫ່ງຊາດ, ກົດໝາຍວ່າດ້ວຍສວຍສາອາກອນ ແລະ ກົດໝາຍວ່າດ້ວຍການລົງທຶນຂອງລັດ. ພ້ອມນີ້, ກອງປະຊຸມຍັງຈະໄດ້ຮັບຮອງເອົາບົດລາຍງານຜົນການກວດສອບສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2013-2014, ພິຈາລະນາຮັບຮອງເອົາບົດສະຫຼຸບການເຄື່ອນໄຫວວຽກງານໄລຍະ 5ປີ ຂອງສະພາແຫ່ງຊາດຊຸດທີ VII ແລະ ປະກອບຄຳເຫັນຕໍ່ຮ່າງວິໄສທັດຮອດປີ 2030, ຍຸດທະສາດຮອດປີ 2025 ແລະ ທິດທາງແຜນການ 5ປີຂອງສະພາແຫ່ງຊາດຊຸດທີ VII (ປີ 2016-2020).

ພ້ອມນີ້, ບັນດາກະຊວງ, ອົງການຈັດຕັ້ງຈະໄດ້ຕອບຂໍ້ຊັກຖາມຂອງສະມາຊິກສະພາແຫ່ງຊາດ, ຂໍ້ຂ້ອງໃຈຂອງປະຊາຊົນຈາກສາຍດ່ວນ ເພື່ອສ້າງຄວາມຮັບຮູ້ເຂົ້າໃຈຕໍ່ກັບຫາງສຽງວິພາກວິຈານຕ່າງໆໃນສັງຄົມ. ເຊິ່ງກອງປະຊຸມສະໄໝສາມັນເທື່ອທີ 10ຂອງສະພາແຫ່ງຊາດຊຸດທີ VII ແມ່ນຈະດຳເນີນແຕ່ວັນທີ 7ຫາວັນທີ25 ທັນວາ 2015ຈິ່ງຈະສຳເລັດ.

 

Off

Comments are closed.