19th Jan2016

ສະຫາຍເລຂາທິການໃຫຍ່ ຕີລາຄາຜົນການປະຕິບັດມະຕິ 9 ຂອງພັກ

by somchan

ໃນວາລະດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກປະຊາຊົນ ປະຕິວັດລາວ ວັນທີ 18 ມັງກອນ 2016 ສະຫາຍ ຈູມມະລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໄດ້ສະເໜີບົດລາຍງານການເມືອງ ຕໍ່ກອງປະຊຸມ, ໃນນັ້ນ ໄດ້ຕີລາຄາຜົນ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 9 ຂອງພັກ ໃນໄລຍະ 5 ປີຜ່ານມາ (2011-2015) ເຖິງແມ່ນວ່າປະເທດເຮົາຈະປະສົບກັບສິ່ງທ້າທາຍຫຼາຍປະການປານໃດກໍຕາມ ແຕ່ພາຍໃຕ້ການນຳພາຂອງພັກນັ້ນ ພວກເຮົາສາມາດຍາດໄດ້ຜົນສຳເລັດທີ່ສຳຄັນ, ເປັນພຶ້ນຖານຫຼາຍປະການ, ເຮັດໃຫ້ປະເທດເຮົາມີການຫັນປ່ຽນໃນທຸກດ້ານຢ່າງເດັ່ນຊັດ, ໄປຕາມທິດທາງ ແລະ ຈຸດໝາຍທີ່ວາງໄວ້.

ສະຫາຍ ຈູມມະລີ ໄຊຍະສອນ ໄດ້ຕີລາຄາວ່າ: ຜົນສຳເລັດອັນສຳຄັນ ແລະ ເປັນພື້ນຖານກວ່າໝູ່ແມ່ນ ຄວາມເປັນເອກະລາດ ອຳນາດອະທິປະໄຕ ແລະຜືນແຜ່ນດິນອັນຄົບຖ້ວນຂອງປະເທດຊາດ ໄດ້ຮັບການປົກປັກຮັກສາໄວ້ໄດ້ຢ່າງໝັ້ນຄົງ, ລະບອບປະຊາທິປະໄຕປະຊາຊົນ ມີສະຖຽນລະພາບອັນໜັກແໜ້ນ, ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ; ສ່ວນຜົນສຳເລັດອັນພົ້ນເດັ່ນທີ່ເປັນໜ້າພາກພູມໃຈແມ່ນເສດຖະກິດແຫ່ງຊາດ ໄດ້ຂະຫຍາຍຕົວດ້ວຍຈັງຫວະໄວ ຕໍ່ເນື່ອງ ແລະ ແລະ ດຳເນີໄປຢ່າງຖືກທິດ ໃນທ່າມກາງທີ່ເສດຖະກິດໂລກຫົດຖອຍ, ຈັງຫວະການເຕີບໂຕບັນລຸຕາມຈຸດໝາຍທີ່ວາງໄວ້ສະເລ່ຍ 5 ປີ ບັນລຸໄດ້ 7,9%, ລວມຍອດມູນຄ່າຜະລິດຕະພັນພາຍໃນປີ 2014-2015 ປະມານ 102.320 ຕື້ກີບ (12,8 ຕື້ໂກລາ), ສະເລ່ຍຕໍ່ຫົວຄົນບັນລຸ 15,8 ລ້ານກີບ (1.970 ໂດລາ). ບັນຫາສຳຄັນ ແມ່ນພວກເຮົາສາມາດບັນລຸໃນການແກ້ໄຂຄວາມທຸກຍາກຂຊອງປະຊາຊົນ ເຮັດໃຫ້ລາຍໄດ້ຕົວຈິງຂອງປະຊາຊົນເພີ່ມຂຶ້ນ; ຂົງເຂດວັດທະນະທຳສັງຄົມ ໄດ້ຮັບການຂະຫຍາຍຕົວທາງດ້ານປະລິມານ ແລະ ຄຸນນະພາບ ອັນພົ້ນເດັ່ນແມ່ນໄດ້ມີຜົນສຳເລັດເປັນສ່ວນໃຫຍ່ ແລະ ມີການຫັນປ່ຽນຢ່າງຈະແຈ້ງ ໃນການປະຕິບັດເປົ້າໝາຍສະຫັດສະວັດດ້ານການພັດທະນາ; ລະບອບການເມືອງ ລະບອບປະຊາທິປະໄຕ ປະຊາຊົນ ໄດ້ຮັບການປັບປຸງບູລະນະ ໃຫ້ມີຄວາມໜັກແໜ້ນເຂັ້ມແຂງ.

ໄປພ້ອມໆກັນນີ້, ພັກເຮົາໄດ້ເປັນເຈົ້າການຊີ້ນຳການເຄື່ອນໄຫວ ວຽກງານການຕ່າງປະເທດຢ່າງຕັ້ງໜ້າ ອັນໄດ້ປະກອບສ່ວນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືການເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາຢູ່ພາກພື້ນ ແລະ ໃນໂລກ, ຖານະບົດບາດ ແລະ ອິດທິພົນຂອງ ສປປລາວ ໄດ້ຮັບການເຊີດຊູສູງເດັ່ນຂຶ້ນກວ່າເກົ່າໃນເວລາພາກພື້ນ ແລະ ສາກົນ; ພັກເຮົາໄດ້ສືບຕໍ່ປັບປຸງຕົນເອງທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນນຳພາ, ໄດ້ເປັນເຈົ້າການວາງແຜນແນວທາງການເມືອງຢ່າງຖືກຕ້ອງ, ວາງແນວທາງການຈັດຕັ້ງປະຕິບັດຢ່າງສອດຄ່ອງ, ພັກເຮົາເປັນກຳລັງການເມືອງທີ່ເຂັ້ມແຂງ ນຳພາທົ່ວສັງຄົມ ສືບຕໍ່ປະຕິດບັດໜ້າທີ່ຍຸດທະສາດຕາມແນວທາງປ່ຽນແປງໃຫມ່ຮອບດ້ານ ແລະ ມີຫຼັກການ ໂດຍໄດ້ຮັບຜົນສຳເລັດອັນເປັນພື້ນຖານຫຼາຍປະການ.

Off

Comments are closed.