11th Mar2016

ກະຊວງ ປກສ ຈັດກອງປະຊຸມປຶກສາຫາລື ກ່ຽວກັບການປ້ອງກັນການເລືອກຕັ້ງ ສສຊ

by somchan

ອະນຸກຳມະການປ້ອງກັນບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ 8 ແລະ ສະມາຊິກສະພາຂັ້ນແຂວງ, ນະຄອນຫຼວງ ຂອງກະຊວງປ້ອງກັນຄວາມສະຫງົບ ໄດ້ຈັດກອງປະຊຸມປືກສາຫາລື ກ່ຽວກັບການກະກຽມປ້ອງກັນໃຫ້ແກ່ ການເລືອກຕັ້ງສະພາແຫ່ງຊາດຊຸດທີ 8 ໃນວັນທີ 10 ມີນາ 2016 ນີ້, ພາຍໃຕ້ການເປັນປະທານຂອງ ພົນຕີ ກົງທອງ ພົງວິຈິດ ລັດຖະມົນຕີຊ່ວຍວ່າການກະຊວງ ປກສ ທັງເປັນຫົວໜ້າອະນຸກຳມະການປ້ອງກັນການປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ 8, ມີຄະນະອະນຸກຳມະການປ້ອງກັນກົມກອງອ້ອມຂ້າງກະຊວງເຂົ້າຮ່ວມ.

ພັອ ສົມວັນ ສາຍລ້ອງພາ ຮອງຫົວໜ້າຫ້ອງວ່າການກະຊວງ ປກສ ທັງເປັນຫົວໜ້າກອງເສນາອະນຸກຳມະການປ້ອງກັນ ໄດ້ຜ່ານແຜນການປ້ອງກັນບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 8 ແລະ ສະມາຊິກສະພາປະຊາຊົນຂັ້ນແຂວງ, ນະຄອນຫຼວງ ເພື່ອຮັບປະກັນໃຫ້ແກ່ການດຳເນີນການເລືອກຕັ້ງມີຄວາມສະຫງົບ, ປອດໄພ ແລະ ເປັນລະບຽບຮຽບຮ້ອຍໃນທຸກໆດ້ານ ບັນລຸຕາມຈຸດປະສົງ ແລະ ລະດັບຄາດໝາຍ. ເຊິ່ງການເລືອກຕັ້ງຄັ້ງນີ້ມີຄວາມສຳຄັນທາງດ້ານການເມືອງ ເພາະເປັນການສືບຕໍ່ສ້າງ ແລະ ບູລະນະລະບອບປະຊາທິປະໄຕ ປະຊາຊົນ ໃຫ້ນັບມື້ເຂັ້ມແຂງ. ສະນັ້ນການເລືອກຕັ້ງເອົາສະມາຊິກສະພາ ທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນເຂົ້າຢູ່ໃນສະພາແຫ່ງຊາດ ແລະ ປະຊາຊົນຂັ້ນທ້ອງຖິ່ນ ແມ່ນໜ້າທີ່ຄວາມຮັບຜິດຊອບຂອງທົ່ວພັກ-ລັດ, ທົ່ວກຳລັງປະກອບອາວຸດ ແລະ ທົ່ວປວງຊົນທັງຊາດ. ດັ່ງນັ້ນ ຕ້ອງຮັບປະກັນໃຫ້ການດຳເນີນການປ້ອງກັນຢູ່ນະຄອນຫຼວງວຽງຈັນ ແລະ ຂອບເຂດທົ່ວປະເທດ ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ປອດໄພຮ້ອຍສ່ວນຮ້ອຍ.

ໂອກາດນີ້ ພົນຕີ ກົງທອງ ພົງວິຈິດ ລັດຖະມົນຕີຊ່ວຍວ່າການ ກະຊວງ ປກສ ທັງເປັນຫົວໜ້າອະນຸກຳມະການປ້ອງກັນ ໄດ້ເໜັ້ນໜັກໃຫ້ແຕ່ລະອະນຸກຳມະການຈົ່ງເປັນເຈົ້າການໃນການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ໃຫ້ປະກົດຜົນເປັນຈິງ, ຂົນຂວາຍປະຊາຊົນເຂົ້າຮ່ວມໃນການປ້ອງກັນຊາດ-ປ້ອງກັນຄວາມສະຫງົບຢ່າງກວ້າງຂວາງ ພ້ອມທັງມີວິທີແກ້ໄຂເປົ້າໝາຍກໍ່ຄວາມບໍ່ສະຫງົບ ຢ່າງຄ່ອງແຄ້ວທັນເວລາ ເຮັດໃຫ້ວຽກງານປ້ອງກັນຊາດ-ປ້ອງກັນຄວາມສະຫງົບ ກາຍເປັນໜ້າທີ່ ແລະ ພັນທະຂອງໝົດທຸກຄົນພາຍໃນຊາດ, ທັງອຳນວຍຄວາມສະດວກໃຫ້ຜູ້ມີສິດປ່ອນບັດເລືອກຕັ້ງໄດ້ໃຊ້ສິດຂອງຕົນ ຮັບປະກັນໄດ້ຄວາມສະຫງົບປອດໄພ.

ແລະໃນວັນດຽວກັນ ອະນຸກຳມະການປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ 8 ແລະ ສະມາຊິກສະພາປະຊາຊົນຂັ້ນແຂວງ, ນະຄອນຫຼວງ ຂອງກະຊວງປ້ອງກັນຄວາມສະຫງົບ ກໍ່ໄດ້ຈັດກອງປະຊຸມປືກສາຫາລືກ່ຽວກັບການກະກຽມຄວາມພ້ອມໃນການປ່ອນບັດບັດເລືອກຕັ້ງ. ໂດຍການເປັນປະທານຂອງພົຈວ ອາລູ ວາລີຊື່ ຫົວໜ້າກົມໃຫຍ່ການເມືອງ ປກສ ທັງເປັນຮອງອະນຸກຳມະການປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ 8 ມີບັນດາອະນຸກຳມະການແຕ່ລະໜ່ວຍເລືອກຕັ້ງເຂົ້າຮ່ວມ.

 

Off

Comments are closed.