06th Jun2016

ລມຕ ຕ້ອນຮັບເອກອັກຄະລັດຖະທູດສິງກະໂປ

by somchan

ພົນຕີ ສົມແກ້ວ ສີລາວົງ ລັດຖະມົນຕີກະຊວງ ປ້ອງກັນຄວາມສະຫງົບ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງທ່ານ ໂດມີນິກ ໂກະ ( Dominic Goh) ເອກອັກຄະລັດຖະທູດ ສິງກະໂປ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມຄະນະ ວັນທີ 23 ພຶດສະພາ 2016 ທີ່ຫ້ອງຮັບແຂກກະຊວງປ້ອງກັນຄວາມສະຫງົບ.
ໃນໂອກາດ ທ່ານເອກອັກຄະລັດຖະທູດ ສິງກະໂປ ປະຈຳ ສປປ ລາວ ໄດ້ເຂົ້າຢືນຈົດໝາຍເຊີນ ຈາກທ່ານຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງປະເທດສິງກະໂປ ເຖິງທ່ານລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປລາວ ເພື່ອເຂົ້າຮ່ວມກອງປະຊຸມ Asia-Pacific And Japan 2016 ຫຼືກອງປະຊຸມຕ້ານອາຊະຍາກຳຂໍ້ມູນຂ່າວສານທາງດ້ານຄອມພິວເຕີ ທີ່ປະເທດສິງກະໂປເປັນເຈົ້າພາບ ຈັດຂຶ້ນໃນລະຫວ່າງວັນທີ 20-20 ກໍລະກົດ 2016 ນີ້.
ພ້ອມດ້ວຍກັນນີ້, ທ່ານລັດຖະມົນຕີກະຊວງປ້ອງກັນຄວາມສະຫົງບແຫ່ງ ສປປລາວ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເຂົ້າຢ້ຽມຂ່ຳນັບ ແລະ ສົ່ງຈົດໝາຍເຊີນ ເຂົ້າຮ່ວມກອງປະຊຸມອັນມີຄວາມໝາຍ ຄວາມສຳຄັນ ຂອງສອງປະເທດ ກໍຄືສອງກະຊວງປ້ອງກັນຄວາມສະຫງົບລາວ ແລະ ສິງກະໂປ. ທີ່ທ່ານເອກອັກຄະລັດຖະທູດສິງກະໂປ ປະຈຳ ສປປລາວ ໄດ້ເປັນຂົ້ວຕໍ່ປະສານງານທີ່ສຳຄັນ ຊຶ່ງເປັນການປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບການພົວພັນຮ່ວມມືອັນດີງາມທີ່ມີມາແຕ່ດົນນານມານັ້ນ ລະຫວ່າງສອງພັກ-ສອງລັດ-ສອງກຳລັງປ້ອງກັນຄວາມສະຫງົບ ແລະ ປະຊາຊົນສອງຊາດລາວ-ສິງກະໂປ ໃຫ້ນັບມື້ກ້າວໜ້າຂະຫຍາຍຕົວຢ່າງບໍ່ຢຸດຢັ້ງ.
ພ້ອມນີ້, ທ່ານລັດຖະມົນຕີກະຊວງປ້ອງກັນຄວາມສະຫງົບລາວ ຍັງໄດ້ສະແດງຄວາມຂອບໃຈທີ່ພັກ-ລັດຖະບານສິງກະໂປ ທີ່ໄດ້ໃຫ້ການຊຸກຍູ້ຊ່ວຍເຫຼືອ ໃນການສ້າງບຸກຄະລາກອນທາງດ້ານວຽກງານວິຊາສະເພາະໃຫ້ແກ່ ສປປລາວ ເວົ້າລວມ ເວົ້າສະເພາະ ກໍຄືກຳລັງປ້ອງກັນຄວາມສະຫງົບ ທີ່ເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປລາວ.
ໂອກາດດຽວກັນນີ້, ທ່ານ ໂດມີນິກ ໂກສ ເອກອັກຄະລັດຖະທູດສິງກະໂປປະຈຳ ສປປລາວ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງລັດຖະມົນຕີກະຊວງປ້ອງກັນຄວາມສະຫງົບລາວໃນຄັ້ງນີ້ ພ້ອມທັງໄດ້ສະແດງຄວາມຢືນຢັນສາຍສຳພັນມິດຕະພາບ ການພົວພັນຮ່ວມມື ສະຫວ່າງສອງປະເທດ, ກໍຄືສອງກຳລັງປ້ອງກັນຄວາມສະຫງົບລາວ ແລະ ສິງກະໂປ ສືບຕໍ່ເພີ່ມພູນຄູນສ້າງໃຫ້ມີປະສິດທິຜົນ.

Off

Comments are closed.