24th Jun2016

ພິທີຈູດທຳລາຍຢາເສບ ຕ້ອນຮັບວັນສາກົນຕ້ານ ຢາເສບຕິດ ຄົບຮອບ 29 ປີ

by somchan

ໃນວັນທີ 25 ມິຖຸນາ 2016 ນີ້ ກະຊວງປ້ອງກັນຄວາມສະຫງົບ ຮ່ວມກັບຄະນະກຳມະການແຫ່ງຊາດ ເພື່ອກວດກາ-ຄວບຄຸມຢາເສບຢາເສບຕິດ ນະຄອນຫຼວງວຽງຈັນ ໄດ້ຈັດພິທີຈູດທຳລາຍຢາເສບຕິດ ຢູ່ທີ່ເດີນທາດຫຼວງ ເນື່ອງໃນໂອກາດວັນສາກົນຕ້ານຢາເສບຕິດ ຄົບຮອບ 29 ປີ ໂດຍການເຂົ້າຮ່ວມຂອງທ່ານທອງລຸນ ສີສຸລິດ ນາຍົກລັດຖະມົນຕີແຫ່ງ ສປປລາວ, ມີພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ, ມີການນຳພັກ-ລັດ ມີບັນດາຕາງໜ້າອົງການສະຫະປະຊາຊາດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ພົນຕີ ສົມແກ້ວ ສີລາວົງ ລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຜ່ານບົດສະຫຼຸບລາຍງານສະພາບການຈັດຕັ້ງປະຕິບັດວຽກງານຮອບດ້ານ ກ່ຽວກັບການກວດກາ ແລະ ຄວບຄຸມຢາເສບຕິດ ຢູ່ ສປປລາວ ໃນໄລຍະ 1ປີ ຜ່ານມາ.

ເຊິ່ງຄະນະພັກ-ຄະນະນຳກະຊວງປ້ອງກັນຄວາມສະຫງົບ ໄດ້ເອົາໃຈໃສ່ສຶກສາອົບຮົມ, ໂຄສະນາເຜີຍແຜ່ດ້ວຍຮູບການຕ່າງໆ ເພື່ອປູກຈິດສຳນຶກໃຫ້ຄົນໃນສັງຄົມໄດ້ຮັບຮູ້ແລະ ເຂົ້າໃຈລະບຽບກົດໝາຍ ແລະ ເຫັນໄດ້ເຖິງຜົນຮ້າຍຂອງຢາເສບຕິດ ປຸກລະດົມໃຫ້ປະຊາຊົນບັນດາເຜົ່າ ເຂົ້າຮ່ວມໃນຂະບວນການສະກັດກັ້ນ ແລະ ແກ້ໄຂບັນຫາຢາເສບຕິດ ໄດ້ຈຳນວນຫຼວງຫຼາຍ ເພື່ອປະກອບສ່ວນເຂົ້າໃນການຈັດຕັ້ງປະຕິບັດວຽກງານ 3 ສ້າງ ຕິດພັນກັບການສ້າງບ້ານເປັນຫົວໜ່ວຍພັດທະນາ ແລະ ເອົາໃຈໃສ່ຢ່າງຕັ້ງໜ້າໃນການສ້າງບ້ານປອດຢາເສບຕິດ ຊຶ່ງມາຮອດປະຈຸບັນນີ້ທົ່ວປະເທດ ມີບ້ານປອດຢາເສບຕິດເອົາ 67% ຂອງບ້ານທັງໝົດ, ມີໂຮງຮຽນປອດຢາເສບຕິດກວມເອົາ 69% ຂອງໂຮງຮຽນທັງໝົດ.

ຄ່ຽງຄູ່ກັນນີ້ເຈົ້າໜ້າທີ່ຕຳຫຼວດຍັງໄດ້ຮ່ວມມືກັບພາກສ່ວນທີ່ກ່ຽວຂ້ອງຂັ້ນຕ່າງໆປະຕິບັດໜ້າທີ່ຂອງຕົນ ດ້ວຍຄວາມຮັບຜິດຊອບສູງ ຊຶ່ງສະແດງອອກ: ສາມາດມ້າງຄະດີໄດ້ທັງໝົດໃນທົ່ວປະເທດ ໄດ້ 2 ພັນກວ່າເລື່ອງ, ຈັບກຸມຜູ້ຕ້ອງຫາໄດ້ 2 ພັນກວ່າຄົນ, ຍິງ 5 ຮ້ອຍກວ່າຄົນ ຄົນຕ່າງປະເທດ 77 ຄົນ. ຢຶດຢາບ້າ 5.671.731ເມັດ, ກັນຊາແຫ້ງ 3.673 ກິໂລ, ເຮໂຣອິນ 81.32 ກິໂລ, ຢາໄອສ 72,53 ກິໂລ, ຝິ່ນດິບ 14,89 ກິໂລ, ສານສະກັດຈາກຕົ້ນໄມ້ເພື່ອຜະລິດຢາເສບຕິດ 2.880ລິດ, ແປ້ງຝຸ່ນເພື່ອປະສົມຜະລິດຢາເສບຕິດ 747,3 ກິໂລ.

ສ່ວນຢາເສບຕິດທີ່ນຳມາຈູດທຳລາຍໃນຄັ້ງນີ້ ປະກອບມີຢາບ້າ 4.348.611 ເມັດ ກັນຊາແຫ້ງ 883 ກິໂລ, ຢາໄອສ 1,92 ກິໂລກຣາມ, ເຮໂຣອິນ 34,8 ກິໂລກຣາມ, ແປ້ງຝຸ່ນເພື່ອປະສົມຜະລິດຢາເສບຕິດ 105,8 ກິໂລກຣາມ.

Off

Comments are closed.