07th Sep2016

ພິທີໄຂກອງປະຊຸມສຸດຍອດອາຊຽນຄັ້ງທີ 28-29 ຢ່າງເປັນການ

by somchan

ກອງປະຊຸມສຸດຍອດອາຊຽນຄັ້ງທີ 28-29 ທີ່ ສປປ ລາວ ເປັນເຈົ້າພາບ ໄດ້ຈັດຢ່າງເປັນທາງການ ໃນຕອນບ່າຍຂອງວັນທີ 6 ກັນຍາ 3016 ນີ້ ຢູ່ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງ ພະນະທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ, ພ້ອມດ້ວຍຫົວໜ້າປະມຸກລັດ-ຫົວໜ້າລັດຖະບານ, ບັນດາລັດຖະມົນຕີ, ເຈົ້າເຈົ້າທີ່ອາວຸໂສ ຈາກບັນດາປະເທດສະມາຊິກອາຊຽນ ແລະ ເລຂາທິການອາຊຽນເຂົ້າຮ່ວມ.

ໃນໂອກາດທີ່ ພະນະທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ກ່າວໄຂກອງປະຊຸມສຸດຍອດອາຊຽນຄັ້ງທີ 28-29 ທ່ານໄດ້ຍົກໃຫ້ເຫັນຫຼາຍບັນຫາທີ່ສຳຄັນເປັນຕົ້ນແມ່ນ ຜົນສຳເລັດຂອງການສ້າງປະຊາຄົມອາຊຽນໃນໄລຍະຜ່ານມາ ພ້ອມດ້ວຍແຜນງານບູລິມະສິດທີ່ຈະຕ້ອງໄດ້ເພີ່ມທະວີຈັດຕັ້ງປະຕິບັດໃນຕໍ່ໜ້າ. ເຊິ່ງເນື້ອໃນບາງຕອນທ່ານໄດ້ກ່າວວ່າ:

ຂ້າພະເຈົ້າຕາງໜ້າ ສປປ ລາວ ແລະ ປະຊາຊົນລາວບັນດາເຜົ່າ ໃນນາມສ່ວນຕົວ ຂໍສະແດງຄວາມຕ້ອນຮັບອັນອົບອຸ່ນ ມາຍັງບັນດາປະມຸກລັດ, ເລຂາທິການໃຫຍ່ອາຊຽນ ແລະ ບັນດາຜູ້ແທນ ສູ່ນະຄອນຫຼວງວຽງຈັນ ເພື່ອເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 28-29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ.

ສປປ ລາວ ຮູ້ສຶກເປັນກຽດຢ່າງສູງ ແລະ ພາກພູມໃຈຢ່າງຍິ່ງ ທີ່ໄດ້ຮັບກຽດເປັນປະທານອາຊຽນຄັ້ງທີ 2, ພາຍໃຕ້ຄຳຂວັນ “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ” ຂ້າພະເຈົ້າ, ເຊື້ອໝັ້ນ: ກອງປະຊຸມສຸດຍອດອາຊຽນ ຄັ້ງທີ 28-29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ຄັ້ງນີ້ ຈະໄດ້ປຶກສາຫາລືກັນຢ່າງກົງໄປກົງມາ, ຮອບດ້ານ ແລະ ສ້າງສັນ ກ່ຽວກັບການຈັດຕັ້ງວິໄສທັດປະຊາຄົມອາຊຽນ 2025 ແລະ ການເສີມຂະຫຍາຍການຮ່ວມມືກັບພາຍນອກ ໂດຍຜ່ານບັນດາກົນໄກທີ່ອາຊຽນລິເລີ່ມ ແລະ ອາຊຽນເປັນແກ່ນກາງ ກໍຄືການແລກປ່ຽນຄຳຄິດຄຳເຫັນ ກ່ຽວກັບບັນຫາພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ ແນໃສ່ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ ກໍຄືການປະກອບປະສ່ວນເຂົ້າໃນພາລະກິດລວມ ແຫ່ງການປົກປັກຮັກສາ ແລະ ສົ່ງເສີມສັນຕີພາບ ເສລີພາບ ແລະ ການຮ່ວມ ເພື່ອພັດທະນາໃນພາກພື້ນ ແລະ ໃນໂລກ.

ແລະ ອີກເທື່ອໜຶ່ງ ຂ້າພະເຈົ້າ, ຕາງໜ້າ ສປປລາວ ແລະ ປະຊາຊົນລາວບັນດາເຜົ່າ ຂໍສະແດງຄວາມຂອບໃຈຢ່າງສຸດໃຈ ຕໍ່ທຸກປະເທດ ການຈັດຕັ້ງພາກພື້ນ ແລະ ສາກົນ ທີ່ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນການເປັນເຈົ້າພາບອາຊຽນໃນປີ 2016 ນີ້ ໂດຍສະເພາະແມ່ນການເປັນເຈົ້າພາບ ແລະ ປະທານກອງປະຊຸມສຸດຍອດອາຊຽນຄັ້ງທີ 28-29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງໃນຄັ້ງນີ້.

 

Off

Comments are closed.