07th Sep2016

ລາວ-ຍີ່ປຸ່ນ ສືບຕໍ່ເພີ່ມທະວີການເປັນຄູ່ຮ່ວມຍຸດທະສາດ

by somchan

ໃນວັນທີ 6 ກັນຍາ 2016 ນີ້ ທີ່ສຳນັກງານນາຍົກລັດຖະມົນຕີ ໄດ້ມີພິທີຕ້ອນຮັບຢ່າງເປັນທາງການ ແລະ ພົບປະສອງຝ່າຍ ລະຫວ່າງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ຊິນໂຊ ອາເບະ ນາຍົກລັດຖະມົນຕີ ແຫ່ງ ຍີ່ປຸ່ນ, ໃນໂອກາດທີ່ ທ່ານນາຍົກລັດຖະມົນຕີຍີ່ປຸ່ນ ພ້ອມຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນວັນທີ 6-8 ກັນຍາ 2016 ນີ້ ຕາມການເຊີນຂອງທ່ານນາຍົກລັດຖະມົນຕີແຫ່ງ ສປປ ລາວ ເຊິ່ງໄດ້ພົບປະສອງຝ່າຍ ໄດ້ແລກປ່ຽນຄຳຄິດຄຳເຫັນ ແລະ ປຶກສາຫາລື ດ້ວຍບັນຍາກາດສະໜິດສະໜົມເຂົ້າອົກເຂົ້າໃຈ ແລະ ກົງໄປກົງມາ ກ່ຽວກັບການຮ່ວມມືຂອງສອງປະເທດ, ປຶກສາຫາລືກ່ຽວກັບການເປັນຄູ່ຮ່ວມມືຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ, ສອງຝ່າຍໄດ້ຕີລາຄາສູງຕໍ່ກັບການເປັນຄູ່ຮ່ວມມືຍຸດທະສາດ ທີ່ນັບມື້ຂະຫຍາຍຕົວ ເຫັນໄດ້ຈາກການຮ່ວມມືໃນຫຼາຍຂົງເຂດໄດ້ຮັບຜົນສຳເລັດດີ ໂດຍສະເພາະ ຕົວເລກທາງດ້ານການຄ້າ, ການລົງທຶນ ແລະ ການທ່ອງທ່ຽວຂອງຍີ່ປຸ່ນ ມີຈຳນວນເພີ່ມຂຶ້ນຢ່າງຕໍ່ເນື່ອງ, ເຫັນດີຮັບຮອງເອົາແຜນການຮ່ວມມືດ້ານການພັດທະນາ ລະຫວ່າງ ສປປ ລາວ ແລະ ຍີ່ປຸ່ນ ເພື່ອແນໃສ່ພັດທະນາປະເທດລາວ ແບບຍືນຍົງຄຽງຄູ່ກັບການພັດທະນາເສດຖະກິດ-ສັງຄົມ 5 ປີຄັ້ງທີ 8 ຂອງ ສປປ ລາວ, ສອງຝ່າຍຍິນດີທີ່ຈະສືບຕໍ່ປຶກສາຫາລື ແລະ ຊຸກຍູ້ການຮ່ວມມື ດ້ານເສດຖະກິດ , ການຄ້າ, ການລົງທຶນ, ການສຶກສາ ແລະ ວັດທະນະທຳ ລວມໄປເຖິງບັນຫາຕ່າງໆ ທີ່ຢູ່ພາຍໃຕ້ການຮ່ວມມືນຳກັນ ແລະ ຕີລາຄາສູງຕໍ່ຜົນສຳເລັດຂອງກອງປະຊຸມລັດຖະມົນຕີການຕ່າງປະເທດອາຊຽນ ໃນກົດລະກົດ 2016 ຜ່ານມາ. ນອກຈາກນີ້, ສອງຝ່າຍຍັງໄດ້ແລກປ່ຽນຄຳເຫັນ ຕໍ່ສະພາບການພາກພື້ນ ແລະ ສາກົນ  ທີ່ສອງຝ່າຍມີຄວາມສົນໃຈ.

ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສະແດງຄວາມຂອບໃຈຕໍ່ການຊ່ວຍເຫຼືອທາງການ ເພື່ອການພັດທະນາ (ODA) ຂອງລັດຖະບານຍີ່ປຸ່ນໃນໄລຍະຜ່ານມາ ໂດຍສະເພາະ ລັດຖະບານຍີ່ປຸ່ນໄດ້ຕົກລົງເຫັນດີ ໃຫ້ການຊ່ວຍເຫຼືອລ້ານອກໂຄງການ ສົກປີ 2016 ແກ່ ສປປ ລາວ ມູນຄ່າ 500 ລ້ານເຢັນ ເພື່ອດຸ່ນດ່ຽງງົບປະມານແຫ່ງຊາດ, ສະແດງຄວາມຄວາມຂອບໃຈຕໍ່ລັດຖະບານຍີ່ປຸ່ນ ທີ່ໄດ້ປະກອບສ່ວນຊ່ວຍເຫຼືອໃນດ້ານຕ່າງໆ ໃນການເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 28, 29 ແລະ ກອງປະຊຸມທີ່ກ່ຽວຂ້ອງອື່ນໆຕື່ມອີກ.

Off

Comments are closed.