09th Sep2016

ທ່ານ ທອງລຸນ ສີສຸລິດ ເປັນປະທານພົບປະລະຫວ່າງ ຜູ້ນຳອາຊຽນ ກັບຜູ້ຕາງໜ້າ ໄອປາ

by somchan

ໃນວັນທີ 6 ກັນຍາ 2016 ນີ້ ທ່ານ ທອງລຸນ ສີສຸລິ ນາຍົກລັດຖະມົນຕີ ແຫ່ງ ສປປ ລາວ ໃນນາມປະທານອາຊຽນ ແລະ ເປັນປະທານກອງປະຊຸມພົບປະ ລະຫວ່າງ ຜູ້ນຳອາຊຽນ ແລະ ຜູ້ຕາງໜ້າສະມັດຊາ ລັດຖະສະພາ ລະຫວ່າງຊາດອາຊຽນ (ໄອປາ) ໃນໂອກາດກອງປະຊຸມສຸດຍອດອາຊຽນ ຄັ້ງທີ 28-29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ.

ການພົບປະດັ່ງກ່າວ ແມ່ນມີຄວາມໝາຍສຳຄັນໃນການສົ່ງເສີມການພົວພັນ ແລະ ການແລກປ່ຽນຄຳຄິດເຫັນລະຫວ່າງ ຝ່າຍລັດຖະບານ ຂອງບັນດາປະເທດອາຊຽນ ແລະ ສະມັດຊາລັດຖະສະພາ ລະຫວ່າງຊາດອາຊຽນ ກ່ຽວກັບຂະບວນການສ້າງປະຊາຄົມອາຊຽນ ແລະ ວຽກທີ່ກ່ຽວຂ້ອງ ບັນດາຜູ້ນຳອາຊຽນ ໄດ້ຕີລາຄາສູງຕໍ່ບົດບາດອັນສຳຄັນຂອງໄອປາ, ໃນຖານະເປັນຕົວແທນຂອງປະຊາຊົນບັນດາປະເທດສະມາຊິກອາຊຽນ ຫຼາຍກວ່າ 620 ລ້ານຄົນ ທີ່ໄດ້ປະກອບສ່ວນເຂົ້າໃນຂະບວນການ ສ້າງປະຊາຄົມອາຊຽນ ຕະຫຼອດໄລຍະຜ່ານ ໂດຍສະເພາະແມ່ນ ການເຜີຍແຜ່ ແລະ ສົ່ງເສີມຄວາມຮັບຮູ້ກ່ຽວກັບອາຊຽນ, ສ້າງນິຕິກຳ ແລະ ໃຫ້ສັດຕະຍາບັນແກ່ນິຕິກຳຕ່າງໆຂອງອາຊຽນ.

ພ້ອມນີ້ ກອງປະຊຸມຍັງໄດ້ຊຸກຍູ້ລັດຖະສະພາ ຂອງປະເທດສະມາຊິກອາຊຽນ ສືບຕໍ່ເພີ່ມທະວີປະກອບສ່ວນ ອັນສຳຄັນຂອງຕົນ ໂດຍການຊຸກຍູ້ການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ເອກະສານທີ່ກ່ຽວຂ້ອງໃນລະດັບຊາດ ເພື່ອສົ່ງເສີມປະຊາຄົມອາຊຽນ ໃຫ້ເຂັ້ມແຂງ ແລະ ຈະເລີນກ້າວໜ້າ ແລະ ຮັບປະກັນຜົນປະໂຫຍດຂອງບັນດາປະເທດອາຊຽນ.

ຕອນທ້ານປະທານໄອປາ ໄດ້ສະແດງຄວາມຊົມເຊີຍ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ຕໍ່ຜົນສຳເລັດທີ່ຍາດມາໄດ້ ໃນການເປັນປະທານອາຊຽນ ຂອງ ສປປ ລາວ ໃນປີ 2016 ແລະ ອວຍພອນໃຫ້ກອງປະຊຸມສຸດຍອດຕ່າງໆ ທີ່ຈັດຂຶ້ນໃນໄລຍະນີ້ ໄດ້ຮັບຜົນສຳເລັດຢ່າງຈົບງາມ.

 

Off

Comments are closed.