18th Nov2016

ສຳເລັດກອງປະຊຸມບັນດາເຈົ້າຄອງ ນະຄອນຫຼວງອາຊຽນຄັ້ງທີ IV ປີ 2016

by somchan

ກອງປະຊຸມບັນດາເຈົ້າຄອງນະຄອນຫຼວງອາຊຽນ ຄັ້ງທີ IV ປີ 2016 ໄດ້ຈັດຂຶ້ນໃນວັນທີ 15 ພະຈິກ 2016 ນີ້ ແລະ ອັດລົງໃນວັນດຽວກັນ ໂດຍພາຍໃຕ້ການເປັນປະທານຂອງ ປອ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ມີບັນດາເຈົ້າຄອງນະຄອນຫຼວງ ຈາກບັນດາປະເທດສະມາຊິກອາຊຽນ ເຂົ້າຮ່ວມ.

ໃນວາລະດຳເນີນ ກອງປະຊຸມບັນດາເຈົ້າຄອງນະຄອນຫຼວງອາຊຽນ ຄັ້ງທີ IV ນີ້ ເຈົ້າໜ້າທີ່ອາວຸດໂສໄດ້ເລືອກເອົາຄຳຂວັນ ແລະ ຫົວຂໍ້ ກວມລວມທີ່ວ່າ: ພັນທະ ແລະ ໜ້າທີ່ຂອງນະຄອນຫຼວງ ອາຊຽນ ໃນພາລະກິດເຊື່ອມໂຍງປະຊາຄົມອາຊຽນ ປະກອບມີ 4 ຫົວຂໍ້ຄື: ຫົວຂໍ້ການສ້າງນະຄອນຫຼວງໜ້າຢູ່ ນໍາສະເໜີໂດຍ ນະຄອນຫຼວງວຽນຈັນ, ຫົວຂໍ້ ຮັບປະກັນຄວາມປອດໄພ ສາທາລະນະ ຂອງນະຄອນຫຼວງອາຊຽນ ສະເໜີໂດຍ ນະຄອນຫຼວງຮ່າໂນຍ, ຫົວຂໍ້  ຮັກສາ ແລະ ສົ່ງເສີມມໍລະດົກທາງວັດທະນະທຳ ແລະ ການເພີ່ມທະວີແລກປ່ຽນການທ່ອງທ່ຽວ ສະເໜີໂດຍນະຄອນຫຼວງພະນົມເປັນ ແລະ ຫົວຂໍ້ການຮ່ວມມືດ້ານແຮງງານ ແລະ ການຊ່ວຍເຫຼືອຍົກລະດັບສີມືແຮງງານ ລະຫວ່າງນະຄອນຫຼວງທີ່ຈະເລີນແລ້ວ ແລະ ນະຄອນຫຼວງບໍ່ທັນຈະເລີນ ສະເໜີໂດຍ ນະຄອນຫຼວງບາງກອກ.

ໃນວາລະກອງປະຊຸມ ບັນດາຄະນະຜູ້ແທນ ທີ່ເຂົ້າຮ່ວມກອງປະຊຸມ ໄດ້ພ້ອມກັນປະກອບຄຳຄິດເຫັນ ໃສ່ແຕ່ລະຫົວຂໍ້ ພ້ອມທັງຄັດເລືອກເອົາເຈົ້າພາບຈັດ ກອງປະຊຸມບັນດາເຈົ້າຄອງນະຄອນຫຼວງອາຊຽນ ຄັງທີ V ປີ 2017 ໂດຍແມ່ນເຈົ້າຄອງແຫ່ງມະຫານະຄອນ ມານິລາ ຈະເປັນເຈົ້າພາບໃນປີຕໍ່ໄປ ພ້ອມທັງຜ່ານ ແລະ ຮັບຮອງເອົາຖະແຫຼ່ງການນະຄອນຫຼວງວຽງຈັນ.

ຈາກນັ້ນ ປອ ສິນລະວົງ ຄຸດໄພທູນ ໄດ້ກ່າວປິດກອງປະຊຸມຢ່າງເປັນທາງການ ເຊິ່ງທ່ານໄດ້ກ່າວວ່າ: ໂດຍລວມແລ້ວ ການປຶກສາຫາລື ການແລກປ່ຽນປະສົບການ ແລະ ການສະໜອງຂໍ້ມູນ ຕາມຫົວຂໍ້ສ້າງນະຄອນຫຼວງໜ້າຢູ່, ການຮັບປະກັນຄວາມປອດໄພ ສາທາລະນະ, ການສົ່ງເສີມມໍລະດົກ ວັດທະນະທຳ, ການທ່ອງທ່ຽວ ແລະ ການຮ່ວມມືດ້ານແຮງງານ ທີ່ຍົກຂຶ້ນມາ ແມ່ນສອດແສງເຖິງພັນທະ ໜ້າທີ່ຂອງທຸກໆນະຄອນຫຼວງ ໃນການເຊື່ອມໂຍງຂອງອາຊຽນໃນອະນາຄົດ ເຊິ່ງການເຊື່ອມໂຍງປະຊາຄົມອາຊຽນ ແມ່ນຄວາມຮຽກຮ້ອງຕ້ອງການ ບໍ່ພຽງແຕ່ພາກລັດຖະບານ ຫາກຍັງແມ່ນປະຊາຊົນມີດ້ວຍ ເພື່ອຜັນຂະຫຍາຍຖະແຫຼ່ງການຕ່າງໆ ຂອງກອງປະຊຸມສຸດຍອດອາຊຽນ ໃນຫຼາຍຄັ້ງຜ່ານມາ. ໂດຍສະເພາະໃນຄັ້ງທີ 28-29 ຜ່ານມາ ທີ່ນະຄອນຫຼວງວຽງຈັນນັ້ນໃຫ້ເປັນຈິງ ເຫັນວ່າຊຸມຊົນທີ່ໃຫຍ່ກ່າວໝູ່ ແລະ ຊຸມຊົນທີ່ອາໄສຢູ່ໃກ້ທີ່ສຸດກັບລັດຖະບານ ນັ້ນແມ່ນຊາວເມືອງຫຼວງ ສະນັ້ນ ຍິ່ງເຫັນແຈ້ງຄວາມຮັບຜິດຊອບທາງດ້ານການເມືອງ ແລະ ພັນທະໜ້າທີ່ຂອງຕົນ ໃນພາລະກິດເຊື່ອມໂຍງອາຊຽນ ເຊິ່ງພັນທະໜ້າທີ່ສຳຄັນ ບໍ່ພຽງແຕ່ສ້າງນະຄອນ ໃຫ້ເປັນຄອນທີ່ມີຄວາມຍືນຍົງ ຫາກຍັງຕ້ອງເປັນນະຄອນໜ້າຢູ່ ທັງຮັບປະກັນຄວາມປອດໄພ ສາທາລະນະ ແລະ ບໍ່ພຽງແຕ່ເປັນນະຄອນຂອງຊາດຕົນເອງເທົ່ານັ້ນ ຫາກຍັງເປັນນະຄອນທີ່ມີລັກສະນະສາກົນ ແລະ ມີຄວາມສີວິໄລອີກດ້ວຍ.

Off

Comments are closed.