03rd Feb2017

ເຈົ້າໜ້າທີ່ຕຳຫຼວດ ລາວ-ໄທ ປືກສາຫາລື ການແກ້ໄຂຄະດີຄ້າມະນຸດ.

by somchan

ກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ກະຊວງປ້ອງກັນຄວາມສະຫງົບ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກອງບັງຄັບປາບປາມການຄ້າມະນຸດ ສຳນັກງານຕຳຫຼວດແຫ່ງຊາດ ແລະ ກົມສືບສວນຄະດີພິເສດ ລາຊະອານາຈັກໄທ ໄດ້ຈັດກອງປະຊຸມປຶກສາຫາລືກ່ຽວກັບການຮ່ວມມື ແກ້ໄຂຄະດີການຄ້າມະນຸດຂອງສອງປະເທດ. ໃນວັນທີ 31 ມັງກອນ ຫາ ວັນທີ 1 ກຸມພາ 2017 ນີ້, ຢູ່ທີ່ໂຮງແຮມແກຣນຫຼວງພະບາງ; ໂດຍມີ ພັນເອກ ປະລິນຍາເອກ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕຳຫຼວດ ຫົວໜ້າກອງເລຂາຄະນະຊີ້ນຳລະດັບຊາດຕ້ານການຄ້າມະນຸດຂອງລາວ ແລະ ພົນເອກ ທາມາຊັກ ວິຊາລາຍາ ຜູ້ປຶກສາຜູ້ບັນຊາການຕຳຫຼວດແຫ່ງຊາດໄທ ພ້ອມດ້ວຍເຈົ້າໜ້າທີ່ທັງສອງຝ່າຍເຂົ້າຮ່ວມ.

ກອງປະຊຸມຄັ້ງນີ້, ທັງສອງຝ່າຍໄດ້ຮ່ວມກັນຄົ້ນຄວ້າ, ປຶກສາຫາລືກ່ຽວກັບການຮ່ວມມື ໃນການສະກັດກັ້ນແກ້ໄຂອາຊະຍາກຳຂ້າມຊາດ ໂດຍສະເພາະແມ່ນການສະກັດກັ້ນແກ້ໄຂຂະບວນການຄ້າມະນຸດ ແລະ ການແກ້ໄຂຄະດີທີ່ຍັງຄົງຄ້າງໃນໄລຍະຜ່ານມາ ເປັນຕົ້ນແມ່ນໄດ້ຮ່ວມກັນຄັ້ນຄວ້າປຶກສາຫາລື ການພົວພັນຮ່ວມມືລະຫວ່າງເຈົ້າໜ້າທີ່ຕຳຫຼວດລາວ ແລະ ໄທ ໃນການແກ້ໄຂຄະດີຜູ້ຖືກຫາ ຊື່ ນາງມົນຕາ ເຊິ່ງເຈົ້າໜ້າທີ່ຕຳຫຼວດໄທ ໄດ້ສະເໜີຂໍໃຫ້ຜູ້ຖືກເຄາະຮ້າຍທີ່ເປັນຄົນລາວ ໄປໃຫ້ການຕໍ່ສານຢູ່ປະເທດໄທ; ນອກນີ້ ຍັງມີຄົນລາວທີ່ຕົກເປັນຜູ້ເຄາະຮ້າຍ ຖືກຂູດຮີດແຮງງານໃນເຮືອປະມົງຢູ່ໄທ, ຄະດີກ່ຽວກັບເດັກນ້ອຍ 5 ຄົນ ທີ່ຖືກຕົວະຍົວະໄປຂາຍຢູ່ແຂວງປະຈວບປະເທດໄທ ແລະ ອື່ນໆ.

ການຈັດກອງປະຊຸມພົບປະສອງຝ່າຍ ລາວ-ໄທ ໃນຄັ້ງນີ້, ເພື່ອຮ່ວມກັນຄົ້ນຄວ້າປຶກສາຫາລືບາງບັນຫາທີ່ຍັງຄົງຄ້າງ ເຮັດໃຫ້ການດຳເນີນຄະດີຊັກຊ້າແກ່ຍາວ ແລະ ໄດ້ມີການສະເໜີໃຫ້ມີການຮ່ວມມືປະສານສົມທົບ ສະໜອງຂໍ້ມູນທີ່ກ່ຽວຂ້ອງ ແລະ ຈຳເປັນ ຂອງເຈົ້າໜ້າທີ່ທັງສອງຝ່າຍ ເພື່ອເຮັດໃຫ້ການດຳເນີນຄະດີຕ່າງໆ ທີ່ຍັງຄົງຄ້າງໃຫ້ສຳເລັດໂດຍໄວ.

 

Off

Comments are closed.