07th Feb2017

ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ຕັດສິນລົງໂທດ ທ້າວ ເຢ້ ຈຳຄຸກ 5 ປີ 9 ເດືອນ ຂໍ້ຫາຄ້າຂາຍຢາເສບຕິດ.

by somchan

​ໃນ​ວັນ​ທີ 31 ມັງກອນ 2017 ສານ​ປະຊາຊົນ​ຂັ້ນ​ຕົ້ນ ​ແລະ ນະຄອນຫຼວງ​ວຽງ​ຈັນ ​ໄດ້ຕັດ​ສິນ​ລົງ​ໂທດ ທ້າວ ​ເຢ້ ອາຍຸ 28 ປີ ປະຊາຊົນ​ບ້ານ​ດົງ​ໂພນ​ແຮ່ ​ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ ຂໍ້​ຫາ​ຄ້າຂາຍ​ຢາ​ເສບ​ຕິດ ​ໂດຍ​ຕັດ​ອິດສະຫຼະພາບ 5 ປີ 9 ​ເດືອນ ​ແລະ ປັບ​​ໄໝ 25 ລ້ານ​ກີບ.

ສຳລັບ ທ້າວ ​ເຢ້ ​ແມ່ນ​ໄດ້​ຖືກ​ເຈົ້າ​ໜ້າ​ທີ່​ຕຳຫຼວດ​ຈັບ​ຕົວ ​ໃນ​ວັນ​ທີ 16 ກໍລະກົດ 2016 ຜ່ານ​ມາ ພ້ອມ​ດ້ວຍ​ຢາ​ບ້າ 212 ​ເມັດ ​ແລະ ຢາ​ໄອ 1 ຫຼອດ​ນ້ອຍ; ຜ່ານ​ການ​ສຶບສວນ-​ສອບ​ສວນ​ຂອງ​ເຈົ້າ​ໜ້າ​ທີ່​ຕຳຫຼວດ ທ້າວ ​ເຢ້ ​ໄດ້​ສາລະ ພາບ​ວ່າ ຢາ​ເສບ​ຕິດ​ຈຳນວນ​ດັ່ງກ່າວ ​ແມ່ນ​ຂອງ​ຜູ້ກ່ຽວ​ແທ້ ​ເຊິ່ງ​ໄດ້​ຊື້​ມາ​ເພື່ອ​ຈຳໜ່າຍ​ຕໍ່; ຈາກ​ນັ້ນ​ເຈົ້າ​ໜ້າ​ທີ່​ຕຳຫຼວດ ຈິ່ງ​ໄດ້​ປະກອບ​ສຳນວນ​ຄະດີ ​ແລະ ຫຼັກ​ຖານ​ສົ່ງ​ໃຫ້​ໄອ​ຍະ​ການ​ປະຊາຊົນ​ນະຄອນຫຼວງ​ວຽງ​ຈັນ ​ເພື່ອ​ຄົ້ນຄວ້າ​ພິຈາລະນາ ​ແລະ ສົ່ງ​ຟ້ອງ​ຜູ້​ກະທຳ​ຜິດ​ໃຫ້​ສານ​ຕັດສິນ​ລົງ​ໂທດ​ຕາມ ລະບຽບ​ກົດໝາຍ.

ຜ່ານ​ການ​ໄຕ່​ສວນ ​ແລະ ພິຈາລະນາ​ ຂອງ​ສານ​ປະຊາຊົນ​ຂັ້ນ​ຕົ້ນ ນະຄອນຫຼວງ​ວຽງ​ຈັນ ກ່ຽວ​ກັບ​ຂໍ້​ມູນ​ຫຼັກ​ຖານ​ການ​ກະທຳ​ຜິດ​ຂອງ ທ້າວ ​ເຢ້ ​ເຫັນ​ວ່​າຄົບ​ຖ້ວນ​ຕາມ​ອົງ​ປະກອບ​ຂອງ​ການ​ກະທຳ​ຜິດ ​ແລະ ​ເປັນ​ການ​ກະທຳ​ຜິດ ຢູ່​ໃນ ມາດຕາ 146 ຂໍ້ 2 ວັກ 1 ຕາມ​ກົດໝາຍ​ວ່າ​ດ້ວຍ ການ​ປັບປຸງ​ມາດຕາ 146 ຂອງ​ກົດໝາຍ​ອາຍາ ດັ່ງ​ນັ້ນ ສານ​ປະຊາຊົນ​ຂັ້ນ​ຕົ້ນ ນະຄອນຫຼວງ​ວຽງ​ຈັນ ຈິ່ງ​ໄດ້​ຕັດສິນ​ລົງ​ໂທດ ທ້າວ ​ເຢ້ ​ໃຫ້​ຈຳ​ຄຸກ 5 ປີ 9 ​ເດືອນ ​ແລະ ປັບ​ໄໝ 25 ລ້ານ​ກີບ.

Off

Comments are closed.