10th Feb2017

ເຈົ້າໜ້າທີ່ຕຳຫຼວດ ເມືອງເງິນ ມ້າງກຸ່ມແກ້ງລັກລົດຈັກ

by somchan

​ເຈົ້າໜ້າ​ທີ່ຕຳຫຼວດ ​ເມືອງ​ເງິນ ​ແຂວງ​ໄຊ​ຍະ​ບູລີ ​ໄດ້​ລາຍ​ງານ​ໃຫ້​ຮູ້​ວ່າ ຫວ່າງ​ບໍ່​ດົນ​ມາ​ນີ້ ​ເຈົ້າ​ໜ້າ​ທີ່​ຕຳຫຼວດ ​ເມືອງ​ເງິນ ​ໄດ້​ປະຕິບັດ​ແຜນການ​ມ້າງ​ກຸ່ມ​ແກ້ງ​ທີ່​ເຄື່ອນ​ໄຫວ​ລັກ​ລົດຈັກ​ຂ​ອງປະຊາຊົນ ຢູ່​ຂອບ​ເຂດ​ແຂວງ​ໄຊ​ຍະ​ບູລີ, ບໍ່​ແກ້ວ ​ແລະ ອຸດົມ​ໄຊ ​ເຊິ່ງສ້າງ​ຄວາມ​ເສຍ​ຫາຍ​ມີ​ລົດຈັກ 27 ຄັນ.

ຜ່ານ​ການ​ມ້າງ​ລາຍ​ຄະດີ​ດັ່ງກ່າວ ​ເຈົ້າ​ໜ້າ​ທີ່​ຕຳຫຼວດ ມາ​ມາດ​ຈັບ​ຜູ້​ກະທຳ​ຜິດ​ໄດ້ 3 ຄົນ ຄື ທ້າວ ​ເຢັ່ງ​ຈີ ອາຍຸ 21 ປີ, ທ້າວ​ໄຊ​ມົ້ວ ອາຍຸ 18 ປີ ທັງ​ສອງ​ເປັນ​ປະຊາຊົນ​ຢູ່​ບ້ານ ຫ້ວຍ​ນົກ​ຂຸ້ມ ​ເມືອງ​ປາກ​ທາ ​ແຂວງ​ບໍ່​ແກ້ວ  ​ແລະ ທ້າວ​ທອງ​ເຫຼົາ ອາຍຸ 18 ປີ ປະຊາຊົນ ​ຢູ່ບ້ານຊົງ​ຈາ ​ເມືອງ​ນ້ຳ​ບາກ ​ແຂວງ​ຫຼວງ​ພະ​ບາງ ພ້ອມ​ທັງ​ເກັບ​ກູ້​ລົດຈັກ​ທີ່​ພວກ​ກ່ຽວ​ລັກ​ໄປ ຄືນ​ມາ​ໄດ້ 4 ຄັນ, ສ່ວນ​ທີ່​ຍັງ​ເຫຼືອ​ອີກ 23 ຄັນ​ນັ້ນ ປະຈຸ​ບັນ​ເຈົ້າ​ໜ້າ​ທີ່​ຕຳຫຼວດ​ພວມສຶບສວນ-​ສອບ​ສວນ ​ເກັບ​ກຳ​ຂໍ້​ມູນ​ກ່ຽວ​ກັບ​ສະຖານ​ທີ່ ທີ່​ພວກ​ກ່ຽວ​ນຳ​ລົດຈັກ​ທີ່​ລັກ​ມາ​ໄດ້​ນັ້ນ​ໄປ​ຂາຍ ​ແລະ ຊຸກ​ເຊື່ອງ​ໄວ້ ​ເພຶ່ອປະສານ​ສົມທົບ​ກັບ​ອຳນາດ​ການ​ປົກຄອງ​ທ້ອງ​ຖິ່ນ ດຳ​ເນີນ​ການ​ເກັບ​ກູ້​ຄືນ; ພ້ອມ​ກັນ​ນີ້ ​ເຈົ້າ​ໜ້າ​ທີ່​ຕຳຫຼວດ​ຍັງ​ພວມ​ສືບ​ຕໍ່​ຊອກ​ຄົ້ນ​ຕິດຕາມ​ນຳ​ຈັບ​ຕົວ ພັກ​ພວກ​ທີ່​ຮ່ວມ​ຂະ​ບວນການ​ກັບ​ພວກ​ກ່ຽວ​ອີກ​ຈຳນວນ​ໜຶ່ງ ​ເພື່ອ​ມາ​ດຳ​ເນີນ​ຄະດີ​ຕາມ​ລະບຽບ​ກົດໝາຍ.

​ເຈົ້າ​ໜ້າ​ທີ່​ຕຳຫຼວດ​ຍັງ​ໃຫ້​ຮູ້​ອີກ​ວ່າ ລົດຈັກ​ທັງ​ໝົດ 27 ຄັນ ​ແມ່ນ​ໄດ້​ຖືກ ທ້າວ​ໄຊ​ມົ້ວ, ທ້າວ​ເຢັ່ງ​ຈີ ​ແລະ ທ້າວ​ທອງ​ເຫຼົາ​ຮ່ວມ​ກັບ​ພັກ​ພວກ​ເຄື່ອນ​ໄຫວ​ລັກ​ຢູ່​ໃນ​ໄລຍະປີ 2016 ຜ່ານ​ມາ ຢູ່​ຂອບ​ເຂດ​ເມືອງ ຕົ້ນ​ເຜິ້ງ ​ແຂວງ​ບໍ່​ແກ້ວ, ​ເມືອງ​ຮຸນ ​ແຂວງ​ອຸດົມ​ໄຊ, ​ເມືອງ​ຄອບ, ​ເມືອງ​ຊຽງ​ຮ່ອນ ​ແລະ ​ເມືອງ​ເງິນ ​ແຂວງ​ໄຊ​ຍະ​ບູລີ.

Off

Comments are closed.