13th Feb2017

ລັດຖະມົນຕີກະຊວງ ປກສ ເນັ້ນໜັກ ຫຼາຍບັນຫາກ່ຽວກັບ ການຕອບສະໜອງ ດ້ານພະລາທິການ ໃຫ້ແກ່ກຳລັງ ປກສ ທົ່ວປະເທດ

by somchan

ພົຕ ສົມ​ແກ້ວ ສີ​ລາ​ວົງ ຄະນະ​ເລຂາທິການ ​ສູນ​ກາງ​ພັກ ລັດຖະມົນ​ຕີ​ ກະຊວງ ປກສ ​ໄດ້​ໃຫ້​ທິດ​ຊີ້​ນຳ ​ແລະ ​ເນັ້ນ​ໜັກ​ ໃຫ້ ​ກົມ​ໃຫ່ຍພະລາທິການ​ ປ້ອງ​ກັນ​ຄວາມ​ສະຫງົບ ​ເພີ່ມ​ທະວີ​ຄວາມ​ຮັບຜິດຊອບ ​ແລະ ​ເປັນ​ເຈົ້າ​ການ​ໃນ​ການຈັດ​ຕັ້ງ ​ປະຕິບັດ​ ທິດ​ທາງ​ແຜນການ ​ວຽກງານ​ຈຸດ​ສຸມ ​ໃນ​ປີ 2017 ດ້ວຍ​ຄວາມ​ຮັບຜິດຊອບ​ ສູງ​ຂື້ນ​ກວ່າ​ເກົ່າ ​ແນ່​ໃສ່​ເຮັດ​ ໃຫ້ການ​ເກັບ​ລາຍ​ຮັບ​ ເຂົ້າ​ງົບປະມານ ​ເພີ່ມ​ຂື້ນ,  ຮັບປະກັນ​ ການ​ປະຕິບັດ ​ແຜນ​ລາຍ​ຈ່າຍ ​ມີ​ຄວາມ​ຖືກຕ້ອງ ​ໂປ່​ງ​ໃສ ​ແລະ ສາມາດ​ຕອບ ​ສະໜອງ ​ດ້ານ​ພະລາທິການ  ​ໃຫ້​ແກ່​ກຳລັງ​ປ້ອງ​ກັນ ​ຄວາມ​ສະຫງົບ ​ທົ່ວ​ປະ​ເທດ ​ໃຫ້​ພຽງພໍ​ ໂດຍ​ພື້ນຖານ.

ການ​ໃຫ້​ທິດ​ຊີ້​ນຳ ​ແລະ ​ເນັ້ນ​ໜັກ​ຂອງ​ ທ່ານ​ລັດຖະມົນຕີ​ກະຊວງ ປກສ ​ໃນ​ໂອກາດ​ທີ່​ທ່ານ ​ໄດ້​ເຂົ້າ​ຮ່ວມ​ ກອງ​ປະ​ຊຸມ​ວຽກ​ງານ ​ພະລາທິການ​ ປ້ອງ​ກັນ​ຄວາມ​ສະຫງົບ ​ທົ່ວ​ປະ​ເທດ ​ໃນ​ວັນ​ທີ 10 ກຸມພາ 2017  ນີ້ ​ໂດຍ ​ການ​ເປັນ​ປະທານ​ຂອງ ພົຈວ ຄຳ​ໄຕ ຄຳ​ແພງ​ເພັດ ຄະນະ​ປະຈຳ​ພັກ​ກະຊວງ ຫົວໜ້າ​ກົມ​ໃຫ່ຍພະລາທິການ ປ້ອງ​ກັນ​ຄວາມ​ສະຫງົບ ​ເຊິ່ງກອງ​ປະຊຸມ​ດັ່ງກ່າວ ​ໄດ້​ສະຫຼຸບ​ຕີ​ລາຄາ ການ​ປະຕິບັດ​ວຽກງານຈຸດ​ສຸມ ດ້ານວຽກ​ງານພະລາທິການ ​ປ້ອງ​ກັນ​ຄວາມ​ສະຫງົບ ​ໃນ 1 ປີຜ່ານມາ ​ເປັນ​ຕົ້ນ​​ແມ່ນ​ການ​ປະຕິບັດ​ແຜນ​ລາຍ​ຮັບ-​ລາຍ​ຈ່າຍ, ການ​ຕອບ​ສະໜອງ​ເຄື່ອງ​ອຸປະ​ໂພ​ກ-ບໍລິ​ໂພ​ກ, ການ​ປິ່ນປົວ​ຮັກ​ສາ​ສຸຂະພາບ​ຂອງ​ກຳລັງ​ປ້ອງ​ກັນ​ຄວາມ​ສະຫງົບ, ການ​ກໍ່ສ້າງ​ພື້ນຖານ​ໂຄງ​ລ່າງ, ການ​ປັບປຸງ​ຫົວໜ່ວຍ​ທຸລະ​ກິດ​ການ​ຜະລິດ ​ແລະ ອື່ນໆ ພ້ອມ​ທັງ​ກຳນົດ 1 ​ແຜນ​ງານ 6 ​ໂຄງການ ​ເພື່ອ​ເປັນ​ທິດ​ທາງ​ແຜນການ ​ແລະ ສຸມ​ໃສ່​ປະຕິບັດ​ໃນ​ຕໍ່ໜ້າ.

​ເຊິ່ງ​ໃນ​ໂອກາດ​ນີ້ ທ່ານ​ລັດຖະມົນຕີ​ກະຊວງ ປກສ ​ໄດ້​ໃຫ້​ທິດ​ຊີ້​ນຳ ​ແລະ ​ເນັ້ນ​ໜັກ​ໃຫ້​ຄະນະ​ພັກ-​ຄະນະ​ນຳ ກົມ​ໃຫ່ຍ, ຄະນະ​ກົມ-​ກອງ​ອ້ອມ​ຂ້າງ​ກົມ​ໃຫ່ຍພະລາທິການ ​ແລະ ບັນດາ ປກສ ​ແຂວງ​ທົ່ວ​ປະ​ເທດ ​ເອົາ​ໃຈ​ໃສ່​ປະຕິບັດ ພາລະ​ບົດບາດ, ສິດ, ໜ້າ​ທີ່ ດ້ວຍ​ຄວາມ​ຮັບຜິດຊອບ​ສູງ ມີ​ຄວາມ​ຖືກຕ້ອງ​ຕາມ​ແນວທາງ​ນະ​ໂຍບາຍ​ຂອງ​ພັກ, ກົດໝາຍ​ຂອງ​ລັດ ​ແລະ ສາມາດ​ຕອບ​ສະໜອງ ດ້ານ​ພະລາທິການ​ໃຫ້​ແກ່​ບັນດາ​ເຫຼົ່າ​ຮົບ​ວິຊາ​ສະ​ເພາະ​ ໃຫ້​ທັນ​ເວລາ ​ແລະ ພຽງພໍ​ໂດຍ​ພຶ້ນຖານ ​ເປັນ​ຕົ້ນ​ແມ່ນ​ສຸມ​ໃສ່​ປະສານ​ສົມທົບ​ກັບ​ ບັນດາ​ກົມ​ກອງ​ໃນ​ການ​ເກັບ​ລາຍ​ຮັບ​ວິຊາ​ການ ​ແລະ ຄ່າ​ທຳນຽມ, ການ​ປັບປຸງ​ບັນດາ​ຫົວໜ່ວຍ​ທຸລະ​ກິດ ການ​ຜະລິດ​ເພຶ່ອສ້າງ​ລາຍ​ຮັບ​ເພີ່ມ ​ແລະ ​ເກັບ​ລາຍ​ຮັບ​​ເຂົ້າງົບປະມານ​ໃຫ້​ບັນລຸ​ຕາມ​ໂຕ​ເລກ​ຄາດໝາຍ, ​ເອົາ​ໃຈ​ໃສ່​ຄົ້ນຄວ້າ ​ແລະ ປະຕິບັດ​ແຜນການ ຕອບ​ສະ​ໜອງ​ເຄື່ອງ​ອຸປະ​ໂພ​ກ-ບໍລິ​ໂພ​ກ ​ໂດຍ​ສະ​ເພາະ​ພາຫະນະ, ອຸປະກອນ​ເຕັກ​ນິກທັນ​ສະ​ໄໝ ​ໃຫ້​ແກ່​ບັນດາ​ກົມ​ກອງ, ​ເຫຼົ່າ​ຮົບ​ວິຊາ​ສະ​ເພາະ​ໃຫ້​ພຽງພໍ ​ແກ່​ການ​ປະຕິບັດ​ໜ້າ​ທີ່, ພ້ອມ​ທັງ​ເອົາ​ໃຈ​ໃສ່​ກ່ຽວ​ກັບ​ການ​ປິ່ນປົວ​ຮັກສາ​ສຸຂະພາບ​ຂອງ​ນາຍ ​ແລະ ພົນ​ຕຳຫຼວດ ​ໃຫ້​ມີ​ສຸຂະພາບ​ແຂງ​ແຮງ ສາມາດ​ເຄື່ອນ​ໄຫວ​ປະຕິບັດ​ໜ້າ​ທີ່​ປ້ອງ​ກັນ​ຄວາມ​ສະຫງົບ ຮັກສາ​ຄວາມ​ເປັນ​ລະບຽບ​ຮຽບຮ້ອຍ​ໃນ​ສັງຄົມ​ໄດ້​ປົກກະຕິ ​ແລະ ອື່ນໆ.

Off

Comments are closed.