16th Feb2017

ເກີດເຫດ ຜິດຖຽງກັນ ແລ້ວເຮັດໃຫ້ ມີຜູ້ເສຍຊີວິດ

by somchan

ເຈົ້າໜ້າທີ່ຕຳຫຼວດ ພະແນກສືບສວນ-ສອບສວນ ປກສ ນະຄອນຫຼວງວຽງຈັນ ໄດ້ລາຍງານໃຫ້ຮູ້ວ່າ ເວລາ ປະມານ 1 ໂມງ ຂອງວັນທີ 15 ກຸມພາ 2017 ນີ້ ໄດ້ເກີດເຫດໄວລຸ້ນຜິດຖຽງກັນ ແລ້ວໃຊ້ປືນຍິງປະທະກັນ ຢູ່ຮ້ານບັນເທີງດາວຄຳ ເຂດບ້ານນາຄຳ ເມືອງສີໂຄດຕະບອງ ນະຄອນຫຼວງວຽງຈັນ ເຮັດໃຫ້ມີຜູ້ເສຍຊີວິດ 1 ຄົນ ຄື ທ້າວຕົ້ນ ອາຍຸ 27 ປີ ຢູ່ບ້ານທົ່ງຂັນຄຳ ເມືອງຈັນທະບູລີ ນະຄອນຫຼວງວຽງຈັນ ແລະ ມີຜູ້ໄດ້ຮັບບາດເຈັບ 3 ຄົນ.

ສ່ວນສາເຫດຂອງການເກີດເຫດໃນຄັ້ງນີ້ ເຈົ້າໜ້າທີ່ໄດ້ໃຫ້ຮູ້ອີກວ່າ ກ່ອນເກີດເຫດຍິງປະທະກັນ ກຸ່ມໄວລຸ້ນ 2 ກຸ່ມ ຄື ກຸ່ມຂອງທ້າວຕົ້ນ ( ຜູ້ເສຍຊີວິດ ) ແລະ ກຸ່ມຂອງທ້າວລ້ຽງ ບ້ານສີສະຫວາດ ເມືອງຈັນທະບູລີ ທີ່ເຂົ້າມາທ່ຽວ ຢູ່ໃນຮ້ານບັນເທີງ ດາວຄຳ ໄດ້ມີການຜິດຖຽງກັນ ແຕ່ພະນັກງານທີ່ເຮັດໜ້າທີ່ປ້ອງກັນຢູ່ພາຍໃນ ຮ້ານບັນເທີງ ໄດ້ຫ້າມ ພວກກ່ຽວ ຫຼັງຈາກນັ້ນພວກ່ຽວກໍ່ໄດ້ໄປເອົາປືນຢູ່ລົດ ແລ້ວກັບມາຮອດປະຕູເຂົ້າ-ອອກ ຮ້ານບັນເທີງ ກໍ່ເກີດການຍິງ ປະທະກັນ ຈິ່ງເຮັດໃຫ້ມີຜູ້ເສຍຊີວິດ ແລະ ບາດເຈັບ ສ່ວນພວກກໍ່ເຫດຈຳນວນໜຶ່ງກໍ່ໄດ້ຫຼົບໜີ.

ປັດຈຸບັນ ເຈົ້າໜ້າທີ່ຕຳຫຼວດ ພະແນກສືບສວນ-ສອບສວນ ປກສ ນະຄອນຫຼວງວຽງຈັນ ພວມຕິດຕາມນຳຈັບ ຕົວ ພວກກໍ່ເຫດທີ່ຫຼົບໜີ ແລະ ດຳເນີນການສືບສວນ-ສອບສວນ ຫາສາເຫດຂອງການເກີດເຫດຄັ້ງນີ້.

Off

Comments are closed.