17th Feb2017

ລາວ – ຫວຽດນາມ ທົບທວນຄືນ ການປະຕິບັດສັນຍາ ຮ່ວມມືວຽກງານ ປ້ອງກັນຄວາມສະຫງົບ ໃນປີຜ່ານມາ

by somchan

ການ​ພົວພັນ​ຕ່າງປະ​ເທດ ກະຊວງ​ປ້ອງ​ກັນ​ຄວາມ​ສະຫງົບ ​ແລະ ກົມ​ພົວພັນ​ຕ່າງປະ​ເທດ ກະຊວງ​ຕຳຫຼວດ ສສ ຫວຽດນາມ ​ໄດ້​ຈັດ​ກອງ​ປະຊຸມ​ສະຫຼຸບ​ຕີ​ລາຄາ ທົບ​ທວນຄືນ​ການ​ຈັດ​ຕັ້ງ​ປະຕິບັດ ​ສັນຍາ​ຮ່ວມ​ມື​ວຽກ​ງານ ​ປ້ອງ​ກັນ​ຄວາມ​ສະຫງົບ ການ​ຮັກສາ​ຄວາມ​ເປັນ​ລະບຽບ​ຮຽບຮ້ອຍ​ ຂອງ​ສັງຄົມ ລະຫວ່າງ 2 ກະຊວງ ​ໃນ​ປີ 2016 ຜ່ານ​ມາ ​ໃນ​ວັນ​ທີ 14 ກຸມພາ 2017 ນີ້ ​ໂດຍ​ເປັນ​ກຽດ​ເຂົ້າ​ຮ່ວມ​ຂອງ ພັອ ອານຸ​ເດດ ຄູນ​ຄຳ ຮອງ​ຫົວໜ້າ​ຫ້ອງ​ວ່າການ​ກະຊວງ ຫົວໜ້າ​ກົມ​ພົວພັນ​ຕ່າງປະ​ເທດ ກະຊວງ ປກສ ລາວ ​ແລະ ພົຈວ ​ເຈິ່ນວັນ​ເຕິ​ດ ຫົວໜ້າ​ກົມ​ພົວພັນ​ຕ່າງປະ​ເທດ ກະຊວງ​ຕຳຫຼວດ ຫວຽດນາມ ພ້ອມ​ດ້ວຍ​ຄະນະ​ຜູ້​ແທນ​ທັງ​ສອງ​ຝ່າຍ​ເຂົ້າ​ຮ່ວມ.

ພັອ ອານຸ​ເດດ ຄູນ​ຄຳ ​ໄດ້​ລາຍ​ງານ​ໃຫ້​ຮູ້​ວ່າ ​ໃນ​ປີຜ່ານມາ​ ກະຊວງ ປກສ ລາວ ​ແລະ ກະຊວງ​ຕຳຫຼວດ ຫວຽດນາມ ​ໄດ້​ປະສານ​ສົມທົບ, ​ແລກປ່ຽນ​ຂໍ້​ມູນ​ຂ່າວສານ ທາງ​ດ້ານ​ວຽກ​ງານ​ປ້ອງ​ກັນ​ຄວາມ​ສະຫງົບ ການ​ຊ່ວຍ​ເຫຼືອ ​ແລະ ອື່ນໆ ​ເພື່ອ​ເປັນ​ການຈັດ​ຕັ້ງ​ຜັນ​ຂະຫຍາຍ ​ສັນຍາ​ຮ່ວມ​ມື​ວຽກ​ງານ ​ປ້ອງ​ກັນ​ຄວາມ​ສະຫງົບ ຮັກສາ​ຄວາມ​ເປັນ​ລະບຽບ​ຮຽບຮ້ອຍ​ໃນ​ສັງຄົມ ກໍ່​ຄື​ການ​ຮ່ວມ​ມື​ສະກັດ​ກັ້ນ ຕ້ານ​ອາ​ຊະ​ຍາ​ກຳ ດ້ານ​ຕ່າງໆ ລະຫວ່າງ​ບັນດາ​ກົມ​ກອງ ວິຊາ​ສະ​ເພາະ ຂອງ​ສອງ​ກະຊວງ ບັນດາ ປກສ ​ແຂວງ ທີ່​ມີ​ຊາຍ​ແດນ​ຕິດ​ຈອດ​ກັນ ​ແລະ ບັນດາ​​ແຂວງ​ແຮກສ່ຽວ; ອັນ​ທີ່​ພົ່ນ​ເດັ່ນ​ແມ່ນ ສາມາດ​ຮັບປະກັນ​ເຮັດ​ໃຫ້​ສອງ​ປະ​ເທດ​ມີ​ຄວາມ​ສະຫງົບ, ປອດ​ໄພ 100 % ​ເຊິ່ງ​ເປັນ​ການ​ປະກອບສ່ວນ​ທີ່ ສຳຄັນ​ເຂົ້າ​ໃນ​ການ​ເສີມ​ຂະຫຍາຍ, ​ເພີ່ມ​ພູນ​ຄູນ​ສ້າງສາ​ຍພົວພັນ​ມິດຕະພາບ ​ແລະ ການ​ຮ່ວມ​ມື​ພິ​ເສດ​ຮອບດ້ານ ລະຫວ່າງ 2 ພັກ, 2 ລັດ ​ແລະ ປະຊາຊົນ 2 ຊາດ ລາວ-​ຫວຽດນາມ, ຫວຽດນາມ-​ລາວ ​ໃຫ້​ຈະ​ເລີ​ນງອກ​ງາມ​ຍິ່ງໆຂື້ນ; ພ້ອມ​ທັງ​ເປັນ​ການ​ປະກອບສ່ວນ​ສ້າງ​ສະພາບ​ແວດ​ລ້ອມ ​ແຫ່ງ​ຄວາມ​ສະຫງົບ, ປອດ​ໄພ ​ແລະ ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ ​ເພື່ອ​ອຳນວຍ​ໃຫ້​ແກ່​ການ​ພັດທະນາ​ເສດຖະກິດ-​ສັງຄົມ ຂອງ 2 ປະ​ເທດ ​ໄດ້​ດຳ​ເນີນ​ຢ່າງ​ຕໍ່​ເນື່ອງ.

​ໃນ​ກອງ​ປະຊຸມ​ຍັງ​ໄດ້​ແລກປ່ຽນ​ບົດຮຽນ, ຄຳ​ຄິດ​ເຫັນ​ຢ່າງ​ກົງ​ໄປ​ກົງ​ມາ ກ່ຽວ​ກັບ​ບັນດາ​ໜ້າ​ວຽກ​ສຳຄັນ ທີ່ 2 ກະຊວງ ​ຈະ​ໄດ້​ສືບ​ຕໍ່​ເພີ່ມ​ທະວີ​​ຮ່ວມ​ມື ຈັດ​ຕັ້ງ​ປະຕິບັດ​ໃນ​ປີ 2017 ​ເປັນ​ຕົ້ນ​ແມ່ນ ການ​ຮ່ວມ​ມື​ດ້ານ​ວຽກ​ງານ ​ປ້ອງ​ກັນ​ຄວາມ​ສະຫງົບ ທາງ​ດ້ານ​ການ​ເມືອງ, ການ​ຄຸ້ມ​ຄອງ​ຮັບປະກັນ​ຄວາມ​ປອດ​ໄພ ​ໃຫ້​ແກ່​ພົນລະ​ເມືອງ ທັງ​ສອງ​ປະ​ເທດ, ການ​ກວດກາ ຄອບ​ຄຸມ​ຢາ​ເສບ​ຕິດ ​ແລະ ອື່ນໆ.

Off

Comments are closed.