20th Feb2017

ຮອງລັດຖະມົນຕີກະຊວງ ປກສ ລາວ ແລະ ກະຊວງຕຳຫຼວດ ຫວຽດນາມ ຫາລືການ ຮ່ວມມືເພຶ່ອຮັບມືກັນ ໄພຄຸກຄາມຕໍ່ ຄວາມສະຫງົບສຸກຂອງຊາດ

by somchan

​ໃນ​ວັນ​ທີ 15 ກຸມພາ 2017 ພົຕ ສິນ​ທະ​ວົງ ​ໄຊ​ຍະ​ກອນ ຮອງ​ລັດຖະມົນຕີ ​ກະຊວງ​ປ້ອງ​ກັນ​ຄວາມ​ສະຫງົບ ສປປ ລາວ ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບ ​ແລະ ປຶກສາ​ຫາລື​ກ່ຽວ​ກັບ ​ການຈັດ​ຕັ້ງ​ປະຕິບັດ​ແຜນການ​ ຮ່ວມ​ມື​ວຽກ ງານ​ປ້ອງ​ກັນ​ຄວາມ​ສະຫງົບ ຂອງ​ຄະນະ​ຜູ້​ແທນ ​ກະຊວງ​ຕຳ​ຫຼວດ ສສ ຫວຽດນາມ ​ເຊິ່ງນຳ​ໂດຍ ພົທ ຫງວຽນ ວັນ​ແທ້ງ ຮອງ​ລັດ​ຖະມົນຕີ​ ກະຊວງ​ຕຳຫຼວດ​ ຫວຽດນາມ ​ໃນ​ໂອກາດ​ເດີນທາງ​ມາ​ຢ້ຽມຢາມ​ ສັນທະ​ວະ​ໄມຕີ ​ແລະ ​ເຂົ້າ​ຮ່ວມ​ກອງ​ປະຊຸມ ສະຫຼຸບ​ການຈັດ​ຕັ້ງ​ປະຕິບັດ ສັນຍາ​ຮ່ວມ​ມື ລະຫວ່າງ 2 ກະຊວງ ປະຈຳ​ປີ 2016 ​ແລະ ​ເຊັນ​ສັນຍາ​ຮ່ວມ​ມື​ ຂົງ​ເຂດ​ວຽກ​ງານ​ປ້ອງ​ກັນ​ຄວາມ​ສະຫງົບ ​ປະຈຳ​ປີ 2017 ​ໃນ​ລະຫວ່າງ ວັນ​ທີ 13-16 ກຸມພາ 2017.

ການ​ພົບ​ປະ ປຶກສາ​ຫາລື ລະຫວ່າງ​ທ່ານ​ຮອງ​ລັດຖະມົນຕີ ກະຊວງ ປກສ ລາວ ​ແລະ ທ່ານ​ຮອງ​ລັດຖະມົນຕີ​ກະຊວງ​ຕຳຫຼວດ​ຫວຽດນາມ ​ໃນ​ຄັ້ງ​ນີ້​ຕ່າງ​ກໍ່​ໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ ​ແລະ ຕີ​ລາຄາ​ສູງ ຕໍ່​ກັບ​ຜົນສຳ​ເລັດ​ການ ຈັດ​ຕັ້ງ​ປະຕິບັດ​ແຜນການ​ຮ່ວມ​ມື ທາງ​ດ້ານ​ວຽກ​ງານ​ປ້ອງ​ກັນ​ຄວາມ​ສະຫງົບ ລະຫວ່າງ​ບັນດາ​ກົມ​ກອງ​ວິຊາ​ສະ​ເພາະ, ບັນດາ​ແຂວງ​ທີ່​ມີ​ຊາຍ​ແດນ​ຕິດ​ຈອດ​ກັນ ​ແລະ ບັນດາ​ແຂວງ​ແຮກສ່ຽວ​ຂອງ​ທັງ​ສອງ​ປະ​ເທດ ​ໃນ​ປີ 2016 ຜ່ານ​ມາ ອັນ​ທີ່​ພົ້ນ​ເດັ່ນ​ແມ່ນ​ສາມາດ​ຮັບປະກັນ​ເຮັດ​ໃຫ້ ທັງ​ສອງ​ປະ​ເທດ​ມີ​ຄວາມ​ສະຫງົບ​ທາງ​ດ້ານ​ການ​ເມືອງ 100% ​ເຊິ່ງສະ​ແດງ​ເຖິງ ຄວາມ​ເອົາ​ໃຈ​ໃສ່, ​ເປັນ​ເຈົ້າ​ການ, ຄວາມ​ສາມັກຄີ​ອັນ​ແໜ້ນ​ແຟ້ນ ​ແລະ ຄວາມ​ເປັນ​ເອກະ​ພາບ​ຂອງ​ການ​ຮ່ວມ​ມື​ລະຫວ່າງ 2 ກະຊວງ.

ພ້ອມ​ກັນ​ນີ້ ທ່ານ​ຮອງ​ລັດຖະມົນຕີ​ທັງ​ 2 ກະຊວງ ຍັງ​ໄດ້​ເຫັນ​ດີ​ເປັນ​ເອກະ​ພາບ​ກັນ ​ໃນ​ຫຼາຍ​ບັນຫາ​ທີ່ 2 ກະຊວງ ຈະ​ຕ້ອງ​ໄດ້​ສືບ​ຕໍ່​ເພີ່ມ​ທະວີ ຮ່ວມ​ມື​ຈັດ​ຕັ້ງ​ປະຕິບັດ ​ໃນ​ປີ 2017 ນີ້ ​ເພຶ່ອພ້ອມ​ກັນ​ຕໍ່ສູ້ ​ແລະ ຮັບ​ມືກັບ​ການ ປ່ຽນ​ແປງ​ຂອງ​ສະພາບ​ສາກົນ ​ແລະ ພາກ​ພື້ນ​ທີ່​ນັບ​ມື​ສັບສົນ ​ແລະ ສົ່ງ​ຜົນ​ກະທົບ​ຕໍ່​ການປ້ອງ​ກັນ​ຄວາມ​ສະຫງົບ ການ ຮັກສາ​ຄວາມ​ເປັນ​ລະບຽບ​ຮຽບຮ້ອຍ​ທາງ​ສັງຄົມ​ຂອງ 2 ປະ​ເທດ ​ໂດຍ​ສະ​ເພາະ ​ບັນຫາອາ​ຊະ​ຍາ​ກຳ​ຂ້າມ​ຊາດ ທີ່​ເປັນ​ບັນຫາ​ກົ​ເໜ່ວງ​ຖ່ວງ​ດຶງ​ການ​ພັດທະນາ​ເສດຖະກິດ​-ສັງຄົມ​ຂອງ​ຊາດ ​ແລະ ຄວາມ​ປອດ​ໄພ ຂອງ​ປະຊາຊົນ.​ດັ່ງ​ນັ້ນ​ທັງ​ສອງ​ກະຊວງ​ຈະ​ຕ້ອງ​ໄດ້​​ເພີ່ມ​ທະວີ​ການ​ຮ່ວມ​ມື ກ່ຽວ​ກັບ​ການ​ປະສານ​ສົມທົບ​ແລກປ່ຽນ​ຂໍ້​ມູນ ຂ່າວສານ​ລະຫວ່າງ​ອົງການ​ຜູ້ຕາງໜ້າ, ກົມ​ພົວພັນ​ຕ່າງປະ​ເທດ ​ແລະ ກົມ​ວິຊາ​ສະ​ເພາະ​ຂອງ​ສອງ​ກະຊວງ, ຕະຫຼອດ​ເຖິງ​ບັນດາ​ແຂວງ​ທີ່​ມີ​ຊາຍ​​ແດນ​ຕິດ​ຈອດ ​ແຂວງ​ແຮກສ່ຽວ ​ແລະ ອື່ນໆ.​ແນ່​ໃສ່​ເພຶ່ອຮັບປະກັນ​ເຮັດ​ໃຫ້​ສອງ​ປະ​ເທດ​ລາວ-​ຫວຽດນາມ ມີ​ຄວາມ​ສະຫງົບ​ທາງ​ດ້ານ​ການ​ເມືອງ 100% ມີ​ຄວາມ​ປອດ​ໄພ ​ແລະ ມີ​ຄວາມ​ເປັນ​ລະບຽບ​ຮຽບຮ້ອຍດີ.

Off

Comments are closed.