07th Mar2017

ຮອງລັດຖະມົນຕີ ກະຊວງ ປກສ ເນັ້ນຫຼາຍ ບັນຫາກ່ຽວກັບ ການປະຕິບັດ ໜ້າທີ່ ຂອງກຳລັງຕຳຫຼວດ ທົ່ວປະເທດ

by somchan

ພົຕ ກົງ​ທອງ ພົງ​ວິຈິດ ຮອງ​ລັດຖະມົນຕີ ກະຊວງ ປກສ ​ໄດ້​ໃຫ້​ທິດ​ຊີ້​ນຳ ​ແລະ ​ເນັ້ນ​ໜັກ​ຫຼາຍ​ບັນຫາ​ກ່ຽວ​ກັບ​ ວຽກງານ​ ສະກັດ​ກັ້ນ​ແກ້​ໄຂ​ ປະກົດ​ການ​ຫຍໍ້​ທໍ້​ໃນ​ສັງຄົມ ຂອງ​ເຈົ້າ​ໜ້າ​ທີ່​ຕຳຫຼວດ ​ໃນ​ໂອກາດ​ທີ່​ທ່ານ​ເຂົ້າ​ຮ່ວມກອງ​ປະຊຸມ​ສະຫຼຸບ​ວຽກ​ງານ ​ກຳລັງ​ຕຳຫຼວດ​ ທົ່ວ​ປະ​ເທດ ​ໃນ​ວັນ​ທີ 3 ມີນາ 2017 ນີ້ ​ເຊິ່ງກ່ອນ​ອື່ນ​ ທ່ານ​ຮອງ​ລັດຖະມົນຕີ​ ກະຊວງ ປກສ ​ໄດ້​ຍ້ອງຍໍ​ຊົມ​ເຊີຍ​ ກຳລັງ​ຕຳຫຼວດ​ທົ່ວ​ປະ​ເທດ ​ໃນ​ຄວາມ​ເອົາ​ໃຈ​ໃສ່ ​ແລະ ​ເປັນ​ເຈົ້າ​ການ​ສະ​ກັດ​ກັ້ນ​ແກ້​ໄຂ​ ປະກົດ​ການ​ຫຍໍ້​ ໄດ້​ເປັນ​ຢ່າງ​ດີ ​ເປັນຕົ້ນ​ແມ່ນ​ໃນ​ປີ 2016 ຜ່ານ​ມາ ກຳລັງ​ຕຳຫຼວດ​ສາມາດ​ດຳ​ເນີນ​ການ​ມ້າງ​ຄະ​ດີ​ອາຍາ ​ເຊັ່ນ: ຄາຕະກຳ, ປຸ້ນ​ຊັບ, ຊີງ​ຊັບ, ລັກ​ຊັບ, ​ແລະ ອື່ນໆ ​ໄດ້ 2,000 ກວ່າ​ລາຍ ສາມາດ​ເກັບ​ກູ້​ເຄື່ອງ​ຂອງ​ກາງຄືນ​ມາ​ໄດ້ຫຼາຍລາຍການ ພ້ອມ​ທັງ​ຈັບ​ຕົວ​ຜູ້​ກະທຳ​ຜິດ ​ດຳ​ເນີນ​ຄະດີ ​ໄດ້ 2,900 ກວ່າ​ຄົນ. ​ເຊິ່ງທຽບ​ໃສ່​ປີ 2015 ຄະດີ​ອາຍາ​ຫຼຸດ​ລົງ 70 ລາຍ, ພ້ອມ​ກັນ​ນີ້​ຍັງ​ສາມາດ​ສະກັດ​ກັ້ນ​ ແກ້​ໄຂ​ຄະດີ​ຢາ​ເສບ​ຕິດ​ໄດ້ 2,700 ກວ່າ​ລາຍ ຈັບ​ຜູ້​ກະທຳ​ຜິດ​ໄດ້ 3,000 ກວ່າ​ຄົນ, ຍຶດຢາ​ເສບ​ຕິດ​ປະ​ເພດ​ຕ່າງໆ​ລວມນ້ຳໜັກ 2,000 ກວ່າ​ກິ​ໂລກຣາມ ​ແລະ ອື່ນໆ.

​ແຕ່​ເ​ຖິງຢ່າງ​ໃດ​ກໍ່ຕາມ ອີງ​ໃສ່​ຄວາມ​ຮຽກຮ້ອງ​ຕ້ອງການ​ ຂອງ​ໜ້າ​ທີ່​ວຽກ​ງານ ​ໃນ​ປະຈຸ​ບັນ​ນີ້ ທ່ານ​ຮອງ​ລັດຖະມົນ​ຕີ ກະຊວງ ປກສ ຍັງ​ໄດ້​ໃຫ້​ທິດ​ຊີ້​ນຳ ​ແລະ ​ເນັ້ນໜັກ​ໃຫ້​ກຳລັງ​ຕຳຫຼວດທົ່ວ​ປະ​ເທດ ຕ້ອງ​ໄດ້​ພັດທະນາ ຕົນ​ເອງ​ທາງ​ດ້ານ ຄວາມ​ຮູ້​ຄວາມ​ສາມາດ,​ແບບ​ແຜນ​ວິທີ​ເຮັດ​ວຽກ ​ແລະ ຮູ້ໜູນ​ໃຊ້​ວິທະຍາສາດ​ເຕັກນິກ​ທີ່​ທັນ​ສະ​ໄໝ​ເຂົ້າ​ໃນ​ວຽກງານ​ວິຊາ​ສະ​ເພາະ ​ເປັນ​ຕົ້ນ​ແມ່ນ ​ການ​ຕິດຕາມ​ເກັບ​ກຳ​ສະພາບ​ ການ​ເຄື່ອນ​ໄຫວ​ຂອງ​ເປົ້ນໝາຍ ກະທຳ​ຜິດ​ທາງ​ອາຍາ ຫຼື ອາ​ຊະ​ຍາ​ກຳ​ເຊັ່ນ: ປຸ້ນ​ຊັບ, ຊິງ​ຊັບ, ລັກ​ຊັບ, ຢາ​ເສບ​ຕິດ ​ແລະ ອື່ນໆ ​ເພື່ອ​ດຳ​ເນີນ​ການ​ສະກັດ​ກັ້ນ​ແກ້ໄຂຢ່າງ​ທັນ​ການ ຕາມ​ຫຼັກການ​ວິຊາ​ສະ​ເພາະ, ​ເອົາ​ໃຈ​ໃສ່​ດຳ​ເນີນ​ຄະດີ​ໃຫ້​ຖືກຕ້ອງ​ຕາມ​ຂັ້ນ​ຕອນ, ຖືກຕ້ອງ​ຕາມ​ກົດໝາຍ, ຍຸຕິ​ທຳ ​ແລະ ປົກ​ປັກ​ຮັກສາ​ວັດຖຸ​ຂອງ​ກາງ​ບໍ່​ໃຫ້​ຕົກ​ເຮ່ຍ​ເສຍ​ຫາຍ, ນອກ​ນີ້​ຍັງ​ຕ້ອງໄດ້​ເປັນ​ເຈົ້າ​ການສະກັດ​ກັ້ນ​ແກ້​ໄຂ​ ບັນຫາ​ອາ​ຊະ​ຍາ​ກຳ ​ທາງ​ລະບົບ​ຄອມ​ພີ​ວ​ເຕີ​​ ​ສະ​ເພາະ​ການ​ ໂຄສະນາ​ໃສ່​ຮ້າຍ​ປ້າຍ​ສີກາ​ນນຳພາ​ຂອງ​ພັກ-ລັດ ​ແລະ ຄວາມ​ພະຍາຍາມ​ມ້າງ​ເພ່ ຄວາມ​ສາມັກຄີ ຂອງ​ພວກ​ຄົນ​ບໍ່​ດີ ຜ່ານ​ທາງ​ສື່​ສັງຄົມ​ອອນ​ລາຍ, ພ້ອມ​ທັງ​ເອົາ​ໃຈ​ໃສ່​ວຽກງານຫຼຸດຜ່ອນ​ອຸປະຕິ​ເຫດ, ສະກັດ​ກັ້ນຕ້ານ​ອັກຄີ​ໄພ ​ແລະ ອື່ນໆ ​ເພື່ອ​ຮັບປະກັນ​ເຮັດ​ໃຫ້​ສັງຄົມ​ມີ​ຄວາມ​ສະຫງົບ ​ແລະ ​ເປັນ​ລະບຽບ​ຮຽບຮ້ອຍ.

Off

Comments are closed.