07th Mar2017

ຄົ້ນຄວ້າປັບປຸງຮ່າງກົດໝາຍ ວ່າດ້ວຍກຳລັງ ປ້ອງກັນຄວາມສະຫງົບ ປະຊາຊົນລາວ ໃຫ້ແທດເໜາະ ກັບສະພາບການໃໝ່

by somchan

ຄະນະ​ກຳມະການ ຮັບຜິດຊອບ ຄົ້ນ​ຄວ້າ​ປັບປຸງ ຮ່າງ​ກົດໝາຍ ກະຊວງ ປກສ ຮ່ວມ​ກັບ​ກຳມາ​ທິການ​ກົດໝາຍ ສະພາ​ແຫ່ງ​ຊາດ ​ໄດ້​ຈັດ​ກອງ​ປະຊຸມ​ປຶກສາ​ຫາລື ຄົ້ນຄວ້າ ປັບປຸງ​ເນື້ອ​ໃນ ​ແລະ ຮ່າງ​ກົດໝາຍ ວ່າ​ດ້ວຍ​ກຳລັງ​ປ້ອງ​ກັນ​ຄວາມ​ສະຫງົບ ປະຊາຊົນ​ລາວ ​ໃນ​ວັນ​ທີ 3 ມີນາ 2017 ນີ້ ​ໂດຍ​ການ​ເຂົ້າ​ຮ່ວມ​ຂອງ ພົຈວ ປອ ສົມ​ຫວັງ ທຳ​ມະ​ສິດ ຮອງ​ລັດຖະມົນຕີ​ກະຊວງ ປກສ ຄະນະ​ຊີ້​ນຳ​ການ​ຄົ້ນຄວ້າ​ປັບປຸງ​ຮ່າງ​ກົດໝາຍ​ກະຊວງ ປກສ ​ແລະ ທ່ານ ບຸນ​ພອນ ​ເຮືອງ​ມະນີ ຮອງ​ປະທານ​ກຳມາ​ທິການ​ກົດໝາຍ ສະພາ​ແຫ່ງ​ຊາດ ພ້ອມ​ດ້ວຍ​ວິຊາ​ການ​ທີ່​ກ່ຽວຂ້ອງ​ເຂົ້າ​ຮ່ວມ.

​ເ​ພື່ອຕອບ​ສະໜອງ​ກັບ ຄວາມ​ຮຽກຮ້ອງ​ຕ້ອງການ, ຄວາມ​ເຕີບ​ໃຫ່ຍຂະຫຍາຍຕົວ​ຂອງ​ວຽກ​ງານ ​ແລະ ກຳລັງ​ປ້ອງ​ກັນ​ຄວາມ​ສະຫງົບ ​ໃນ​ໄລຍະ​ໃໝ່ ຄະນະ​ຮັບຜິດຊອບ​ຄົ້ນຄວ້າ​ປັບປຸງ​ຮ່າງ​ກົດໝາຍ ກະຊວງ ປກສ ຈຶ່ງ​ໄດ້​ຄົ້ນຄວ້າ​ປັບປຸງ​ທາງ​ດ້ານ​ເນື້ອ​ໃນ ​ແລະ ຮ່າງ​ກົດໝາຍ ວ່າ​ດ້ວຍ​ກຳລັງ​ປ້ອງ​ກັນ​ຄວາມ​ສະຫງົບ ປະຊາຊົນ​ລາວ ສະບັບ​ປີ 2007 ​ເພື່ອ​ໃຫ້​ມີ​ເນື້ອ​ໃນ​ຄົບ​ຖ້ວນ, ການ​ທັດ​ຮັດ ​ແລະ ສອດຄ່ອງ​ກັບ​ສະພາບ​ຄວາມ​ເປັນ​ຈິງ, ​ເຊິ່ງການ​ຄົ້ນຄວ້າ​ປັບປຸງ​ໃນ​ເທື່ອ​ນີ້ ​ແມ່ນ​ໄດ້​ມີ​ການ​ແລກປ່ຽນ​ຄຳ​ເຫັນ​ຢ່າງ​ກົງ​ໄປ​ກົງ​ມາ ກ່ຽວ​ກັບ​ການ​ໃຊ້​ຊັບ​ພາສາ ​ແລະ ​ເນື້ອ​ໃນ​ຢູ່​ໃນ 6 ມາດຕາ ທີ່​ສ້າງ​ໃໝ່ ​ເຊັ່ນ: ມາດຕາ 8 ທີ່​ໄດ້​ກຳນົດ​ກ່ຽວ​ກັບ​ການ​ປົກ​ປ້ອງ​ກຳລັງ​ປ້ອງ​ກັນ​ຄວາມ​ສະຫງົບ, ມາດຕາ 9 ຂອບ​ເຂດ​ການ​ນຳ​ໃຊ້ ມາດຕາ 33 ການ​ທຽບ​ຊັ້ນ​ຕຳ​ແໜ່​ງຂອງ​ນາຍ​ຕຳຫຼວດ, ມາດຕາ 38 ຂໍ້​ຫ້າມ​ທົ່ວ​ໄປ, ມາດຕາ 47 ​ເນື້ອ​ໃນ​ກວດກາ ​ແລະ ມາດຕາ 48 ຮູບ​ການ​ກວດກາ; ສຳລັບ​ຮ່າງ​ກົດໝາຍ ວ່າ​ດ້ວຍ​ກຳລັງ​ປ້ອງ​ກັນ​ຄວາມ​ສະຫງົບ ປະຊາຊົນ​ລາວ ສະບັບ​ປັບປຸງ ​ແມ່ນ​ປະກອບ​ມີ IX ພາກ VI ໜວດ ​ແລະ 55 ມາດຕາ ທີ່​ໄດ້​ກຳນົດ​ຫຼັກການ, ລະບຽບ​ການ, ມາດ​ຕະການ​ກ່ຽວ​ກັບ​ການຈັດ​ຕັ້ງ ການ​ເຄື່ອນ​ໄຫວ, ການ​ຄຸ້ມ​ຄອງ, ກວດກາ​ຂອງ​ວຽກ​ງານ ​ແລະ ກຳລັງ​ປ້ອງ​ກັນ​ຄວາມ​ສະຫງົບ; ​ເຊິ່ງຄາດໝາຍ​ແມ່ນ​ຈະ​ນຳ​ສະ​ເໜີ​ຜ່ານ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ່ 3 ຂອງ​ສະພາບ​ແຫ່ງ​ຊາດ ຊຸດ​ທີ່ VIII ທີ່​ຈະ​ຈັດ​ຂື້ນ​ໃນ​ໄລຍະ​ເດືອນ ​ເມສາ 2017 ນີ້ ​ເພື່ອ​ຄົ້ນຄວ້າ, ພິຈາລະນາ​ຮັບຮອງ​ເອົາ.

ຮ່າງ​ກົດໝາຍ ສະບັບ​ດັ່ງກ່າວ​ນີ້ ນອກຈາກ​ຈະ​ມີ​ການ​ປັບປຸງ ​ໃຫ້​ແທດ​ເໜາະ​ກັບ​ສະພາບ​ຄວາມ​ເປັນ​ຈິງ​ແລ້ວ ຍັງ​ຈະ​ເປັນ​ບ່ອນ​ອີງ​ທີ່​ສຳຄັນ​ໃຫ້​ແກ່​ກຳລັງ​ປ້ອງ​ກັນ​ຄວາມ​ສະຫງົບ ​ໃນ​ການ​ປະຕິບັດ​ໜ້າ​ທີ່, ສິດ, ພັນທະ ​ແລະ ຄວາມ​ຮັບຜິດຊອບ​ຕາມ​ກົດໝາຍ.

Off

Comments are closed.