16th Mar2017

ກອງປະຊຸມວຽກງານປ້ອງກັນເຄື່ອນທີ່ ທົ່ວປະເທດ

by somchan

ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ສຳ​ເລັດ​ການຈັດ​ກອງ​ປະຊຸມ​ ວຽກ​ງານ​ປ້ອງ​ກັນ​ເຄື່ອນ​ທີ່​ທົ່ວ​ປະ​ເທດ ປະຈຳ​ປີ 2016 ​ແລະ ວາງ​ທິດ​ທາງ​ແຜນການ​ ວຽກ​ງານ​ຈຸດ​ສຸມ ປະຈຳ​ປີ 2017 ​ໃນ​ລະຫວ່າງ ວັນ​ທີ 15-16 ມີນາ ນີ້ ​ໂດຍ​ການ​ເປັນ​ປະທານ​ຂອງ ພົຈວ ຈັນ​ສະ​ແຫວ​ງ ທິບ​ຄູນ​ທອງ ຄະນະ​ພັກ​ກະຊວງ​ປ້ອງ​ກັນ​ຄວາມ​ສະຫງົບ ຫົວໜ້າ​ກອງ​ບັນຊາ​ການ​ປ້ອງ​ກັນ​ເຄື່ອນ​ທີ່, ມີ​ຄະນະ​ກອງ​ບັນຊາ​ການ​ປ້ອງ​ກັນ​ເຄື່ອນ​ທີ່, ບັນດາ​ຫ້ອງ ​ແລະ ກອງພັນ​ປ້ອງ​ກັນ​ເຄື່ອນ​ທີ່​ຈາກ ປກສ ນະຄອນຫຼວງ​ວຽງ​ຈັນ ​ແລະ ປກສ ​ແຂວງ​ທົ່ວ​ປະ​ເທດ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້ ​ໄດ້​ຕີ​ລາຄາສະພາບ ​ແລະ ທົບ​ທວນຄືນ ການຈັດ​ຕັ້ງ​ປະຕິບັດ​ວຽກ​ງານ​ປ້ອງ​ກັນ​ເຄື່ອນ​ທີ່ ​ໃນ​ຂອບ​ເຂດ​ທົ່ວ​ປະ​ເທດ ​ໃນ 1​ ປີຜ່ານມາ ​ເປັນ​ຕົ້ນ​ແມ່ນ​ການ​ປະຕິບັດ​ພາລະ​ບົດບາດ ​ເປັນ​ເສນາ​ທິການ​ໃນ​ການ​ຄົ້ນຄວ້າ ວາງ​ແຜນ​ຍຸດ​ທະ​ສາດ, ຊອກ​ຮູ້​ກຳ​ແໜ້ນ​ສະພາບ​ການ, ຕ້ານ​ສະກັດ​ກັ້ນ ​ແລະ ​ແກ້​ໄຂ​ປະກົດ​ການ​ຫຍໍ້​ທໍ້​ໃນ​ສັງຄົມ ກໍ່​ຄື​ການ​ເຄື່ອນ​ໄຫວ​ຂອງ​ພວກ​ຄົນ​ບໍ່​ດີ ທີ່​ຂັດ​ຕໍ່​ແນວທາງ​ນະ​ໂຍບາຍ​ຂອງ​ພັກ, ກົດໝາຍ​ຂອງ​ລັດ, ສ້າງ​ຄວາມ​ບໍ່​ສະຫງົບ ​ແລະ ຄວາມ​ບໍ່​ເປັນ​ລະບຽບ​ຮຽບຮ້ອຍ​ໃນ​ສັງຄົມ ສະ​ແດງ​ອອກ​ໃນ 1 ປີ ຜ່ານ​ມາ ສາມາດ​ອອກ​ກວດກາ​ລາດຕະ​ເວນ ​ໃນ​ທົ່ວ​ປະ​ເທດ​ໄດ້ 2,901 ຄັ້ງ ກັກ​ຕົວ​ຜູ້​ກະທຳ​ຜິດ​ໄດ້ 291 ຄົນ, ຍຶດຢາ​ບ້ານ​ໄດ້ 78,000 ກວ່າ​ເມັດ, ປືນ 26 ກະບອກ ພ້ອມ​ລູກ​ກະສຸນ 146 ລູກ, ​ໄມ້​ທ່ອນ 10 ທ່ອນ, ກັກ​ລົດ​ໃຫ່ຍ 19 ຄັນ, ລົດຈັກ 458 ຄັນ. ນອກ​ນີ້​ຍັງ​ສາມາດ​ແກ້​ໄຂ​ກຸ່ມ​ແກ້ງ​ກວນ​ເມືອງ​ຕາມ​ເສັ້ນທາງ​ໄດ້ 243 ຄັ້ງ, ກັກ​ລົດ​ດັດ​ແປງ​ສະພາບ 255 ຄັນ ​ແລະ ອື່ນໆ.

​ໂອກາດ​ດຽວ​ກັນ ພົຈວ ຈັນ​ສະ​ແຫວ​ງ ທິບ​ຄູນ​ທອງ ຄະນະ​ພັກ​ກະຊວງ​ປ້ອງ​ກັນ​ຄວາມ​ສະຫງົບ ຫົວໜ້າ​ກອງ​ບັນຊາ​ການ​ປ້ອງ​ກັນ​ເຄື່ອນ​ທີ່ ຍັງ​ໄດ້​ເນັ້ນ​ໜັກ​ໃຫ້​ຄະນະ​ພັກ-​ຄະນະ​ບັນຊາ ບັນດາ​ຫ້ອງ​ອ້ອມ​ຂ້າງ​ກອງ​ບັນຊາ​ການ​ປ້ອງ​ກັນ ​ເຄື່ອນ​ທີ່ ​ແລະ ບັນດາ​ກອງພັນ​ປ້ອງ​ກັນ​ເຄື່ອນ​ທີ່ ທີ່​ຂື້ນ​ກັບ ປກສ ນະຄອນຫຼວງ​ວຽງ​ຈັນ ​ແລະ ປກສ ​ແຂວງ​ທົ່ວ​ປະ​ເທດ ​ໃຫ້​ເປັນ​ເຈົ້າ​ການ​ນຳ​ເອົາ​ແຜນການ​ວຽກ​ງານ​ຈຸດ​ສຸມ​ປ້ອງ​ກັນ​ເຄື່ອນ​ທີ່ ​ໄປ​ຜັນ​ຂະຫຍາຍ​ເປັນ​ແຜນການລະອຽດ​ຂອງ​ຕົນ ​ເພື່ອ​ນຳພາ​ພະນັກງານ-​ນັກຮົບ ກຳລັງ​ປ້ອງ​ກັນ​ເຄື່ອນ​ທີ່ ຈັດ​ຕັ້ງ​ປະຕິບັດ ​ໃຫ້​ມີ​ຜົນສຳ​ເລັດ ​ເປັນ​ຕົ້ນ​ແມ່ນ​ການ​ບຳລຸງ-​ກໍ່ສ້າງ​ກຳລັງ​ຕາມ​ຫຼັກສູດ​ວິຊາ​ສະ​ເພາະ ພ້ອມ​ທັງ​ສຸມ​ໃສ່​ປົກ​ປັກ​ຮັກສາ​ຄວາມ​ສະຫງົບ ຄວາມ​ເປັນ​ລະບຽບ​ຮຽບຮ້ອຍ ​ໃນ​ສັງຄົມ ​ເຊັ່ນ: ການ​ສະກັດ​ກັ້ນ​ແກ້​ໄຂ​ກຸ່ມ​ແກ້ງ​ກວນ​ເມືອງ, ນັກ​ເລງ​ອັນ​ຕະພານ, ການ​ດັດ​​​​ແປງ​ສະພາບ​ເຕັກນິກ​ລົດ; ນອກ​ນີ້​ຍັງ​ຕ້ອງ​ໄດ້​ເອົາ​ໃຈ​ໃສ່​ນຳພາ​ປະຈຳການ​ກຽມພ້ອມ​ສູ້ຮົບຕະຫຼອດ 24 ຊົ່ວ​ໂມງ, ​ແລະ ນຳພາ​ອອກ​ກວດກາ ສະພາບ​ເປັນ​ປົກກະຕິ ​ເພື່ອ​ໃຫ້​ສາມາດ​ແກ້​ໄຂ​ສະພາບ​ໄດ້​ຢ່າງ​ວ່ອງ​ໄວ​ທັນ​ການ.

 

 

Off

Comments are closed.