21st Mar2017

ເຈົ້າໜ້າທີ່ຕຳຫຼວດ ແຂວງບໍລິຄຳໄຊ ກັກຕົວ 2 ຜົວເມຍ ພ້ອມເຮໂລອິນ 3 ແທ່ງ ແລະ ເງີນປອມ 60.000 ໂດລາ

by somchan

ໃນ​ວັນ​ທີ 14 ມີນາ 2017 ນີ້ ​ເຈົ້າ​ໜ້າ​ທີ່​ຕຳຫຼວດ ​ແຂວງ​ບໍລິ​ຄຳ​ໄຊ ​ໄດ້​ກັກ​ຕົວ ທ້າວ ຜາຍ ອາຍຸ 49 ປີ ​ແລະ ນາງ ​ແສງ ອາຍຸ 50 ປີ ປະຊາຊົນ​ ບ້ານຈອມ​ທອງ ​ເມືອງ​ຄຳ ​ແຂວງ​ຊຽງ​ຂວາງ (ທັງ​ສອງ​ເປັນ​ຜົວ​ເມຍ​ກັນ) ພ້ອມ​ເຮ​ໂລ​ອິນ 3 ​ແທ່ງ, ຢາ​ບ້າ 2.000 ​ເມັດ, ​ເງີ​ນ​ໂດ​ລາ​ປອມ 60.000 ​ໂດ​ລາ, ປື​ນ 1 ກະບອກ ​ແລະ ​ເງີ​ນ 560.000 ກີບ.

ຜ່ານ​ການ​ສືບສວນ-​ສອບ​ສວນ ຂອງ​ເຈົ້າ​ໜ້າ​ທີ່​ຕຳຫຼວດ ທ້າວ ຜາຍ ( ຜູ້​ເປັນ​ຜົວ) ​ໄດ້​ໃຫ້ການ​ວ່າ ​ໃນ​ວັນ​ທີ 10 ມີນາ 2017 ຕົນ​ເອງ​ພ້ອມ​ດ້ວຍ​ເມຍ ​ໄດ້​ຂີ່​ລົດ​ກະບະ​ຍີ່​ຫໍ້​ແດ​ຮັນ ສີຂາວ ໝາຍ​ເລກ​ທະບຽນ ບຂ 5029 ກຳ​ແພງ​ນະຄອນ ມາ​ແຕ່​ແຂວງ​ຊຽງ​ຂວາງ ​ເພື່ອ​ໄປ​ຊື້​ຢາ​ເສບ​ຕິດ​ນຳ​ພວກ​ຮ່ວມ​ຂະ​ບວນການ ຢູ່​ເຂດ​ບ້ານ​ທ່າກົກ​ໄຮ ​ເມືອງ​ປາກງື່ມ ນະຄອນຫຼວງ​ວຽງຈັນ; ຮອດ​ວັນ​ທີ 14 ມີນາ 2017 ຈິ່ງ​ໄດ້​ໄປ​ສົ່ງ​ເມຍ​ຢູ່​ເຮືອນ​ພີ່ນ້ອງ ຢູ່​ບ້ານ​ນາ​ແຄນ ​ເມືອງ​ທ່າ​ພະ​ບາດ ​ແຂວງ​ບໍລິ​ຄຳ​ໄຊ ຈາກ​ນັ້ນ​ຈິ່ງ​ໄດ້​ໄປ​ຕົກລົງ​ຊື້​ຂາຍ ​ແລະ ກຳນົດ​ຈຸດ​ຮັບ-​ສົ່ງ ຢາ​ເສບ​ຕິດ ຮອດ​ຕອນ​ແລງ​ຂອງ​ວັນ​ດຽວ​ກັນ ກໍ່​ໄດ້​ໄປ​ຮັບ​ເອົາ​ຢາ​ເສບ​ຕິດ ຢູ່​ຈຸດ​ນັດ​ພົບ​​ເຂ​ດ ບ້ານ​ຊຽງ​ແລ ​ເມືອງ​ປາກງື່ມ ​ແລ້ວ​ກໍ່​ໄປ​ຮັບ​ເອົາ​ເມ​ຍຢູ່​ເຮືອນ​ພີ່ນ້ອງ ​ເພື່ອ​ເດີນທາງ​ກັບ​ເມືອ​ແຂວງ​ຊຽງ​ຂວາງ ພໍ​ຮອດ​ເສັ້ນທາງ​ເຂດ ບ້ານ​ຜາ​ໂປງ ​ເມືອງ​ທ່າ​ພະ​ບາດ ​ແຂວງ​ບໍລິ​ຄຳ​ໄຊ ​ໄດ້​ຖືກ​ເຈົ້າ​ໜ້າ​ທີ່​ຕຳຫຼວດ​ກັກ​ຕົວ​ດຳ​ເນີນ​ຄະດີ.

ສ່ວນ ນາງ ​ແສງ (ຜູ້​ເປັນ​ເມຍ) ​ແມ່ນ​ຍັງ​ໃຫ້ການ​ປະຕິ​ເສດ​ວ່າ​ບໍ່​ໄດ້​ຮູ້​ເຫັນ ຫຼື ກ່ຽວຂ້ອງ​ກັບ​ການ​ຊື້​ຂາຍ​ຢາ​ເສບ​ຕິດ ຂອງ​ທ້າວ ຜາຍ ( ຜູ້​ເປັນ​ຜົວ​) ​ແຕ່ຢ່າງ​ໃດ.

ປັດຈຸບັນ ​ເຈົ້າ​ໜ້າ​ທີ່​ຕຳຫຼວດ ພວມ​ດຳ​ເນີນ​ການ​ສືບສວນ-​ສອບ​ສວນ ​ເພື່ອຂະຫຍາຍ​ຜົນ ສະຫຼຸບ​ສຳ​ເນົາ​ຄະດີ ສົ່ງ​ໄອ​ຍະ​ການ ​ເພື່ອ​ສົ່ງ​ຟ້ອງ​ໃຫ້​ສານ​ຕັດສິນ​ລົງ​ໂທດ​ຜູ້​ກະທະ​ຜິດ​ຕາມ​ລະບຽບ​ກົດໝາຍ.

Off

Comments are closed.