05th May2017

ສ ສ ຊ ລົງຄະແນນ ຮັບຮອງເອົາ ຮ່າງກົດໝາຍ ວ່າດ້ວຍ ສິລະປະ ການສະແດງ ດ້ວຍຄະແນນ ສູງສ່ວນຫຼາຍ

by somchan

ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ່3 ຂອງ​ສະພາ​​ແຫ່ງຊາດ ຊຸດ​ທີ່ 8 ​ໃນ​ວັນ​ທີ 4 ພຶດສະພາ 2017 ​ໂດຍ​ການ​ເປັນ​ປະ​ທານ​ຂອງ ທ່ານ ສົມ​ພັນ ​ແພງ​ມະນີ ຮອງ​ປະທານ​ສະພາ​ແຫ່ງ​ຊາດ, ບັນດາ​ສະມາຊິກ​ສະພາ​ແຫ່ງ​ຊາດ ​ໄດ້​ຮັບ​ຟັງ​ການ​ນຳ​ສະ​ເໜີ ພ້ອມ​ທັງ​ໄດ້​ຄົ້ນຄວ້າ, ປະກອບ​ຄຳ​ເຫນ, ພິຈາລະນາ ​ແລະ ລົງ​ຄະ​ແນນ​ສຽງ ​ເຫັນ​ດີ​ຮັບຮອງ​ເອົາ​ຮ່າງ​ກົດໝາຍ ທີ່​ສ້າງ​ຂື້ນ​ໃໝ່ ຄື ກົດໝາຍ​ວ່າ​ດ້ວຍ ສິລະ​ປະການ​ສະ​ແດງ ດ້ວຍ​ຄະ​ແນນ​ສຽງ 107 ສຽງ ຈາກ​ສະມາຊິກ​ສະພາ​ແຫ່ງ​ຊາດ​ທັງ​ໝົດ 117 ທ່ານ.

ສຈ ປອ ບໍ່​ແສງ​ຄຳ ວົງ​ດາລາ ລັດຖະມົນຕີ​ກະຊວງ​ຖະ​ແຫຼ​ງຂ່າວ ວັດທະນະທຳ ​ແລະ ທ່ອງ​ທ່ຽວ ​ໄດ້​ນຳ​ສະ​ເໜີ ຮ່າງ​ກົດໝາຍ ວ່າ​ດ້ວຍ ສິລະ​ປະການ​ສະ​ແດງ ຕໍ່​ກອງ​ປະຊຸມ ສະ​ໄໝ​ສາມັນ​ເທື່ອ​ທີ່ 3 ຂອງ​ສະພາ​ແຫ່ງ​ຊາດ​ຊຸດ​ທີ່ 8 ​ເຊິ່ງທ່ານ​ໄດ້​ໃຫ້​ຮູ້​ວ່າ ຮ່າງ​ກົດໝາຍ​ວ່າ​ດ້ວຍ​ສິລະ​ປະການ​ສະ​ແດງ ​ແມ່ນ​ກົດໝາຍ​ສ້າງ​ຂື້ນ​ໃໝ່ ປະກອບ​ມີ 9 ພາກ 11 ໝາດ ​ແລະ 74 ມາດຕາ; ​ເມື່ອ​ຮ່າງ​ກົດໝາຍ​ສະບັບ​ນີ້ ຖືກ​ຮັບຮອງ​ເອົາ ຈະ​ເປັນ​ເຄື່ອງມື​ທີ່​ສຳຄັນ ​ໃນ​ຂະ​ແໜງ​ການ​ທີ່​ກ່ຽວຂ້ອງ ​ແລະ ​ເປັນ​ເອກະ​ພາບ​ກັນ​ໃນ​ທົ່ວ​ປະ​ເທດ ກ່ຽວ​ກັບ​ການ​ຄຸ້ມ​ຄອງ, ການ​ເຄື່ອນ​ໄຫວ​ວຽກ​ງານ​ສິລະ​ປະການ​ສະ​ແດງ ຕາມ​ທິດ​ສາມ​ສ້າງ ທີ່​ພັກ​ໄດ້​ວາງ​ໄວ້, ​ເປັນ​ບ່ອນ​ອີງ​ໃຫ້​ແກ່​ນັກ​ປະດິດ​ຄິດ​ແຕ່ງ, ນັກສະ​ແດງ, ຜູ້​ປະກອບ​ກິດຈະການ​ທາງ​ດ້ານ​ສິລະ​ປະການ​ສະ​ແດງ, ພ້ອມ​ທັງ​ເປັນ​ການ​ປຸກລະດົມ ຂະ​ບວນການ​ຂອງ​ມະຫາຊົນ​ໃນ​ທົ່ວ​ສັງຄົມ ​ໃຫ້​ມີ​ສິດສະ​ເໜີ​ພາບ ​ແລະ ມີ​ສ່ວນ​ຮ່ວມ​ຢ່າງ​ກວ້າງຂວາງ ​ເຂົ້າ​ໃນ​ການ​ຄົ້ນຄວ້າ, ຟື້ນ​ຟູ, ອະນຸລັກ, ພັດທະນາ ​ແລະ ​ເຜີຍ​ແຜ່​ວຽກ​ງານ ວັດທະນະທຳ ສິລະ​ປະການ​ສະ​ແດງ. ນອກ​ນີ້​ຍັງ​ເປັນ​ການ​ສະກັດ​ກັ້ນ ປະກົດ​ການ​ຫຍໍ້​ທໍ້ ​ໃນ​ຂະ​ແໜງ​ການ​ສິລະ​ປະການ​ສະ​ແດງ, ​ເປັນ​ບ່ອນ​ອີງ​ໃຫ້​ແກ່​ການ​ຮ່ວມ​ມື ​ແລກປ່ຽນ​ສິລະ​ປະວັດ​ທະນະ​ທຳ ກັບ​ບັນດາ​ປະ​ເທດ​ໃນ​ພາກ​ພື້ນ ​ແລະ ສາກົນ.

Off

Comments are closed.