16th May2017

ການນຳກະຊວງ ປກສ ຢ້ຽມຢາມກຳລັງ ປກສ ແຂວງອຸດົມໄຊ

by somchan

ການ​ນຳ​ຂັ້ນ​ສູງ ກະຊວງ ປກສ ນຳ​​ໂດຍ ພົຕ ສົມ​ແກ້ວ ສີ​ລາ​ວົງ ​ເລຂາ​ທິການສູນ​ກາງ​ພັກ ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ພ້ອມ​ຄະນະ​ໄດ້​ເດີນທາງ​ໄປ ພົບ​ປະ​ຢ້ຽມຢາມ ​ແລະ ຊີ້​ນຳ​ວຽກ​ງານ ກຳລັງ​ປ້ອງ​ກັນ​ຄວາມ​ສະຫງົບ ​ແຂວງ​ອຸດົມ​ໄຊ ​ໃນ​ວັນ​ທີ 11 ພຶດສະພາ 2017 ນີ້ ​ໂດຍ​ການ​ຕ້ອນຮັບ​ຂອງ ພັອ ນິລະ​ວົງ ​ເຈືອງ​ຕະວະ​ລາດ ຫົວໜ້າ​ກອງ​ບັນຊາ​ການ ປກສ ​ແຂວງ​ອຸດົມ​ໄຊ ພ້ອມ​ຄະນະ.

ພັອ ນິລະ​ວົງ ​ເຈືອງ​ຕະວະ​ລາດ ​ໄດ້​ລາຍ​ງານ​ສະພາບ​ການ​ຮອບດ້ານ ​ເປັນ​ຕົ້ນ​ແມ່ນ ການ​ຊີ້​ນຳ​ບັນຊາ​ຂອງ ຄະນະ​ພັກ​ແຕ່ລະ​ຂັ້ນ, ການ​ເຄື່ອນ​ໄຫວ​ວຽກ​ງານ​ແຕ່ລະ​ເຫຼົ່າ​ຮົບວິຊາ​ສະ​ເພາະ, ດ້ານ​ແນວ​ຄິດ​ການ​ເມືອງ, ພື້ນຖານ​ໂຄງ​ລ່າງ, ການ​ພົວພັນ​ຮ່ວມ​ມື​ກັບ​ພາຍ​ໃນ, ຕ່າງປ​ະ​ເທດ, ການ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ລວມໝູ່ ​ແລະ ບຸກຄົນ.ພ້ອມ​ກັນ​ນັ້ນ​ກໍ່​ໄດ້​ລາຍ​ງານ​ສະພາບ ປະກົດ​ການ​ຫຍໍ້​ທໍ້​ທີ່​ເກີດ​ຂື້​ນພາຍ​ໃນ​ແຂວງ ​ໄລຍະ​ຜ່ານ​ມາ ​ເປັນ​ຕົ້ນ​ແມ່ນ ບັນຫາ​ຢາ​ເສບ​ຕິດ, ການ​ຄ້າຂາຍ​ເຖື່ອນ, ປຸ້ນ​ຊັບ, ຊິງ​ຊັບ, ການ​ມີ​ອາວຸດ​ເສິກ​ໄວ້​ໃນ​ຄອບ​ຄອງ, ການ​ເຂົ້າ-​ອອກ​ເມືອງ​ຂອງ​ຄົນ​ລາວ-​ຊາວ​ຕ່າງປະ​ເທດ ທີ່​ບໍ່​ຖືກຕ້ອງ ​ແລະ ບັນຫາ​ສາສະ​ໜາ.

ພົຕ ສົມ​ແກ້ວ ສີ​ລາ​ວົງ ລັດຖະມົນຕີ ​ໄດ້​ເນັ້ນ​ໜັກ​​ໃຫ້​ຄະນະ​ພັກ-​ຄະນະ​ກອງ​ບັນຊາ​ການ ຕະຫຼອດ​ຮອດ​ນາຍ ​ແລະ ພົນຕຳຫຼວດທຸກ​ສະຫາຍ ຈົ່ງ​ເພີ່ມ​ທະວີ​ຄວາມ​ສາມັກຄີ​ໃຫ້​ໜັກ​ແໜ້ນ ​ເຂັ້ນ​ແຂງ ສືບ​ຕໍ່​ເອົາ​ໃຈ​ໃສ່​ປະຕິບັດ​ໜ້າ​ທີ່​ໃຫ້​ສຳ​ເລັດ ຕາມ​ທີ່​ໄດ້​ຮັບ​ມອບ​ໝາຍ ​ເອົາ​ໃຈ​ໃສ່​ສຶກສາ​ອົບຮົມ​ການ​ເມືອງ​ແນວ​ຄິດ, ສືບ​ຕໍ່​ຊອກ​ຮູ້​ກຳ​ແໜ້ນ, ຕ້ານ​ສະກັດ​ກັ້ນ ​ແລະ ​ແກ້​ໄຂ​ສະພາບ​ປະກົດ​ການ​ຫຍໍ້​ທໍ້​ໃນ​ສັງຄົມ​ໃຫ້​ນັບ​ມື້​ດີ​ຂື້ນ​ເປັນ​ກ້າວໆ ຫັນ​ເອົາ​ກຳລັງ​ລົງ​ກໍ່ສ້າງ​ຮາກ​ຖານ​ໃຫ້​ກວ້າງຂວາງ ​ເພື່ອ​ປຸກລະດົມ​ຂົນຂວາຍ ປະຊາຊົນ​ໃຫ້​ມີ​ສ່ວນ​ຮ່ວມ​ໃນ​ວຽກ​ງານ​ປ້ອງ​ກັນ​ຄວາມ​ສະຫງົບ ​ເປັນ​ກຳລັງ​ທີ່​ໄວ້​ເນື້ອ​ເຊື່ອ​ໃຈ​ຂອງ​ພັກ-​ລັດ ​ແລະ ປະຊາຊົນ​ລາວ​ບັນດາ​ເຜົ່າ​ຕະຫຼອດ​ໄປ.

Off

Comments are closed.