24th May2017

ກອງປະຊຸມ ເຈົ້າໜ້າທີ່ອາວຸດໂສ ອາຊຽນ ວ່າດ້ວຍ ການຕ້ານ ອາຊະຍາກຳ ຂ້າມຊາດ ຄັ້ງທີ 17 ໄດ້ໄຂຂື້ນ ຢ່າງເປັນທາງການ ທີ່ນະຄອນຫຼວງວຽງຈັນ

by somchan

ກອງ​ປະຊຸມ​ ເຈົ້າ​ໜ້າ​ທີ່​ອາວຸ​ດໂສ ອາ​ຊຽນ ວ່າ​ດ້ວຍ ​ການ​ຕ້ານ​ອາ​ຊະ​ຍາ​ກຳ ​ຂ້າມ​ຊາດ ຄັ້ງ​ທີ 17 ​ແລະ ກອງ​ປະຊຸມ​ອື່ນໆ ທີ່​ກ່ຽວຂ້ອງ ​ໄດ້​ໄຂ​ຂື້ນ​ ຢ່າງ​ເປັນ​ທາງ​ການ ​ໃນ​ວັນ​ທີ 24 ພຶດສະພາ 2017 ທີ່​ ນະຄອນຫຼວງ​ວຽງຈັນ ສປປ ລາວ.

ພາຍ​ໃຕ້​ການ​ເປັນ​ ປະທານ ​ຂອງ ພົຈວ ສີສະ​ຫວາດ ​ແກ້ວ​ມາລາ​ວົງ ຫົວໜ້າ​ ຫ້ອງ​ວ່າການ ​ກະຊວງ​ປ້ອງ​ກັນ​ຄວາມ​ສະຫງົບ, ຫົວໜ້າເຈົ້າ​ໜ້າ​ທີ່​ອາວຸ​ດໂສ ອາ​ຊຽນ ວ່າ​ດ້ວຍ ​ການ​ຕ້ານ​ອາ​ຊະ​ຍາ​ກຳ​ ຂ້າມ​ຊາດ ຄັ້ງ​ທີ 17 ​ແລະ ​ໂດຍ​ການ​ເຂົ້າ​ຮ່ວມ​ ເປັນ​ກຽດ​ຂອງ ພົຕ ສົມ​ແກ້ວ ສີ​ລາ​ວົງ ລັດຖະມົນຕີ​ ກະຊວງ​ປ້ອງ​ກັນ​ຄວາມ​ສະຫງົບ, ມີ​ບັນດາ ​ເຈົ້າ​ໜ້າ​ທີ່​ອາວຸດ​ໂສ ທີ່ຮັບ​ຜິດຊອບ ​ການ​ຕ້ານ​ອາ​ຊະ​ຍາ​ກຳ ​ຂ້າມ​ຊາດ ຈາກ 10 ປະ​ເທດ​ ອາ​ຊຽນ ຕາງໜ້າ​ກອງ​ເລຂ​າອາ​ຊຽນ ​ແລະ ​ແຂກ​ຮັບ​ເຊີນ​ເຂົ້າ​ຮ່ວມ.

​ໃນ​ວາລະ​ກອງ​ປະຊຸມ ພົຕ ສົມ​ແກ້ວ ສີ​ລາ​ວົງ ລັດຖະມົນຕີ​ ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ກ່າວ​ໄຂ​ກອງ​ປະຊຸມ ​ຢ່າງ​ເປັນ​ທາງ​ການ ເຊິ່ງທ່ານໄດ້ກ່າວວ່າ ກອງ​ປະຊຸມ​ເຈົ້າ​ໜ້າ​ທີ່​ ອາວຸ​ດໂສອາ​ຊຽນ ວ່າ​ດ້ວຍ​ການ​ຕ້ານ​ ອາ​ຊະ​ຍາ​ກຳ​ຂ້າມ​ຊາດ ​ເປັນ​ກົນ​ໄກ​ໜື່ງ ທີ່​ມີ​ປະສິດທິພາບ ​ໃນ​ການ​ຮ່ວມ​ມື​ກັນ​ ຕ້ານ​ອາ​ຊະ​ຍາ​ກຳ​ຂ້າມ​ຊາດ ​ຢູ່​ໃນ​ພາກ​ພື້ນ, ​ເຊິ່ງ​ໃນ​ແຕ່ລະ​ປີ ບັນດາ​ເຈົ້າ​ໜ້າ​ທີ່​ອາວຸດ​ໂສ ​ອາ​ຊຽນ ທີ່​ຮັບຜິດຊອບ ​ການ​ຕ້ານ​ອາ​ຊະ​ຍາ​ກຳ​ຂ້າມ​ຊາດ ​ແມ່ນ​ຈະ​ມີ​ກອງ​ປະຊຸມ ປີ​ລະ​ຄັ້ງ​ໂດຍ​ຜັດປ່ຽນ​ກັນ​ເປັນ​ເຈົ້າພາບ​ຕາມ​ລຳດັບ​ຕົວ​ອັກສອນອັງກິດ ​ເພື່ອ​ກວດກາ​ຄືນ ການ​ຮ່ວມ​ມື​ໃນ​ການ​ຕ້ານ​ອາ​ຊະ​ຍາ​ກຳ​ຂ້າມ​ຊາດ​ໃນ​ໄລຍະ​ຜ່ານ​ມາ ​ແລະ ພ້ອມ​ກັນ​ປຶກສາ​ຫາລື​ຄົ້ນຄວ້າ​ຊອກ​ຫາ​ວິທີ​ການ​ອັນ​ໃໝ່ ​ເພື່ອ​ແກ້​ໄຂ​ບັນຫາ​ອາ​ຊະ​ຍາ​ກຳ​ຂ້າມ​ຊາດ ​ເຊິ່ງປະກອບ​ມີ 10 ຂົງ​ເຂດ​ອາຂະ​ຍາ​ກຳ​ຄື: ການ​ຄ້າຂາຍ​ຢາ​ເສບ​ຕິດ, ການ​ກໍ່​ການ​ຮ້າຍ, ການ​ຄ້າ​ມະນຸດ, ການ​ລັກລອບ​ຄ້າ​ອາວຸດ, ອາ​ຊະ​ຍາ​ກຳ​ທາງ​ຄອມ​ພິວ​ເຕີ້, ການ​ໂຈລະ​ກຳ​ທາງ​ທະ​ເລ, ການ​ຟ​ອກ​ເງີ​ນ, ການ​ຄ້າຂາຍ​ສັດປ່າ ​ແລະ ​ໄມ້​ທີ່​ຫວງ​ຫ້າມ.

​ໃນ​ກອງ​ປະຊຸມ ຍັງ​ໄດ້​ພ້ອມ​ກັນ​ປຶກສາ​ຫາ​ລື ກັບປະ​ເທດ​ຄູ່​ເຈລະຈາ ​ເພື່ອ​ພ້ອມ​ກັນ​ສັງ​ເກດ​ຕີ​ລາຄາ​ໝາກຜົນ​ຂອງ​ການ​ຮ່ວມ​ມື​ນຳ​ກັນ​ໃນ​ໄລຍະ​ຜ່ານ​ມາ ​ແລະ ປຶກສາ​ຫາລື ຫາ​ທິດ​ທາງ​ການ​ຮ່ວມ​ມື​ກັນ​ໃນ​ຕໍ່ໜ້າ ​ເປັນ​ຕົ້ນ​ແມ່ນ​ການ​ແລກປ່ຽນ​ຄວາມ​ຄິດ​ເຫັນ​ກ່ຽວ​ກັບ​ການ​ສະກັດ​ກັ້ນ, ​ແກ້​ໄຂ​ອາ​ຊະ​ຍາ​ກຳ​ຂ້າມ​ຊາດ ​ແລະ ການ​ກໍ່​ການ​ຮ້າ​ຍຕະຫຼອດ​ເຖິງ​ການ​ສ້າງ​ຂີດ​ຄວາມ​ສາມາດ​ໃຫ້​ແກ່​ເຈົ້າ​ໜ້າ​ທີ່ ຂອງ​ບັນດາ​ປະ​ເທ​ດສະມາຊິກ​ອາ​ຊຽນ ​ໃນ​ການ​ແກ້​ໄຂ​ບັນຫາ​ດັ່ງກ່າວ​ໃຫ້​ຫຼຸດ​ໜ້ອຍ​ຖອຍ​ລົງ.

ພ້ອມ​ກັນ​ນີ້ ກອງ​ປະຊຸມ​ແມ່ນ​ເວທີ​ແຫ່ງ​ຄວາມສາ​ມັກ​ຄີ ມິດຕະພາບ ​ແລະ ມີ​ການ​ປຶກສາ​ຫາລື​ຢ່າງ​ກົງ​ໄປ​ກົງ​ມາ ກັບປະ​ເທດ​ຄູ່​ເຈລະຈາ ​ໃນ​ການ​ຊອກ​ຫາ​ວິທີ​ການ​ຕ້ານ ອາ​ຊະ​ຍາ​ກຳ​ຂ້າມ​ຊາດ​ໃຫ້​ມີ​ປະສິດທິພາບ ​ແລະ ມີ​ປະສິດທິ​ຜົນ​ສູງ​ຂື້ນ​ກວ່າ​ເກົ່າ ​ເພື່ອ​ແນ່​ໃສ່​​ເຮັດ​ໃຫ້ບັນດາປະ​ເທດ​ຕ່າງໆ ມີ​ຄວາມ​ສະຫງົບ ​ແລະ ​ເປັນ​ລະບຽບ​ຮຽບຮ້ອຍ, ​ເສດຖະກິດ ​ໄດ້​ຮັບ​ການ​ພັດທະນາ​ໃຫ້​ດີ​ຂື້ນ​ຢ່າງ​ຕໍ່​ເນື່ອງ, ປະຊາຊົນ​ຢູ່ດີ​ມີ​ຄວາມ​ຜາ​ສຸກ ແລະ ຈະເລີນກ້າວໜ້າຢ່າງບໍ່ຢຸດຢັ້ງ. ກອງປະຊຸມຄັ້ງນີ້ ແມ່ນຈະໄດ້ດຳເນີນເປັນເວລາ 2 ວັນ.

 

Off

Comments are closed.