29th May2017

ສຳເລັດ ກອງປະຊຸມ ເຈົ້າໜ້າທີ່ ອາວຸດໂສ ອາຊຽນ ວ່າດ້ວຍ ອາຊະຍາກຳ ຂ້າມຊາດ ຄັ້ງທີ 17 ແລະ ກອງປະຊຸມ ອື່ນທີ່ກ່ຽວຂ້ອງ

by somchan

ກະຊວງ​ປ້ອງ​ກັນ​ຄວາມ​ສະຫງົບ ​ແຫ່ງ ສປປ ລາວ ສຳ​ເລັດ​ການ ​ເປັນ​ເຈົ້າພາບ ຈັດ​ກອງ​ປະຊຸມ ​ເຈົ້າ​ໜ້າ​ທີ່​ອາວຸດ​ໂສ​ ອາ​ຊຽນ ວ່າ​ດ້ວຍ​ ອາ​ຊະ​ຍາ​ກຳ​ ຂ້າມ​ຊາດ ຄັ້ງ​ທີ 17 ​ແລະ ກອງ​ປະຊຸມ​ ອື່ນໆ​ທີ່​ກ່ຽວຂ້ອງ ​ໃນ​ວັນ​ທີ 27 ພຶດສະພາ 2017 ທີ່​ນະຄອນຫຼວງ​ວຽງ​ຈັນ ​ໂດຍ​ການ​ເປັນ ​ປະທານ ຂອງ​ພົຈວ ສີສະ​ຫວາດ ​ແກ້ວ​ມາລາ​ວົງ ຫົວໜ້າ​ ຫ້ອງ​ວ່າການ ກະຊວງ ປກສ ລາວ ຫົວໜ້າ ເຈົ້າ​ໜ້າ​ທີ່​ອາວຸ​ດໂສ ອາ​ຊຽນ ວ່າ​ດ້ວຍ ​ການ​ຕ້ານ​ອາ​ຊະ​ຍາ​ກຳ ​ຂ້າມ​ຊາດ ຄັ້ງ​ທີ 17 ມີ​ບັນດາ​ຜູ້​ແທນ​ ຈາກ​ປະ​ເທດ​ ສະມາຊິກ​ ອາ​ຊຽນ, ຕາງໜ້າ​ ກອງ​ເລຂາ​ອາ​ຊຽນ ​ແລະ ບັນດາ​ ປະ​ເທດ​ຈາກ ​ປະ​ເທດ​ຄູ່​ເຈລະຈາ​ເຂົ້າ​ຮ່ວມ.

ທ່ານ ​ພົຈວ ສີສະ​ຫວາດ ​ແກ້ວ​ມາລາ​ວົງ ​ໄດ້​ກ່າວ​ວ່າ ກອງ​ປະຊຸມ​ດັ່ງກ່າວ ​ໄດ້​ທົບ​ທວນຄືນ​ຜົນ​ການຈັດ​ຕັ້ງ ປະຕິບັດ​ບັນດາ​ແຜນການ, ​ໂຄງການ ​ແລະ ຂໍ້​ຕົກລົງ​ຕ່າງໆ ຂອງ​ກອງ​ປະຊຸມ​ຄັ້ງ​ທີ່​ຜ່ານ​ມາ ​ແລະ ປຶກສາ​ຫາລື​ກ່ຽວ​ກັບ ທິດ​ທາງ​ແຜນການ​ຮ່ວມ​ມື​ຕໍ່ໜ້າ ​ເພື່ອ​ຕ້ານ​ອາ​ຊະ​ຍາ​ກຳ​ຂ້າມ​ຊາດ ​ເຊິ່ງປະກອບ​ມີ 10 ຂົງ​ເຂດ​ອາ​ຊະ​ຍາ​ກຳ ຄື: ການ​ຄ້າຂາຍ​ຢາ​ເສບ​ຕິດ, ການ​ກໍ່​ການ​ຮ້າຍ, ການ​ຄ້າ​ມະນຸດ, ການ​ລັກລອບ​ຄ້າ​ອາວຸດ, ອາ​ຊະ​ຍາ​ກຳ​ທາງ​ດ້ານ​ເສດຖະກິດ, ການ​ປອມ​ແປງ​ເອກະສານ ​ແລະ ການ​ເຂົ້າ​ເມືອງ​ຜິດ​ກົດໝາຍ, ອາ​ຊະ​ຍາ​ກຳ​ທາງ​ຄອມ​ພີ​ວ​ເຕີ, ການ​ໂຈລະ​ກຳ​ທາງ​ທະ​ເລ, ການ​ຟອກ​ເງີ​ນ, ການ​ຄ້າຂາຍ​ສັດປ່າ ​ແລະ ​ໄມ້​ທີ່​ຫວງ​ຫ້າມ.

ກອງ​ປະຊຸມ​ໃນ​ຄັ້ງ​ນີ້​ປະກອບ​ມີ 17 ກອງ​ປະຊຸມ​ຍ່ອຍ ​ແລະ ​ແຕ່​ລະ​ກອງ​ປະຊຸມ​ແມ່ນ​ໄດ້​ດຳ​ເນີນ​ໄປ​ຕາມ​ລາວະການ ​ໄດ້​ຮັບຮອງ​ເອົາ​ແຜນ​ວຽກ, ​ໂຄງການ ​ແລະ ວິທີ​ການຈັດຕັ້ງ​ປະຕິບັດ ການ​ຕ້ານ​ອາ​ຊະ​ຍາ​ກຳ​ຂ້າມ​ຊາດ​ໃນ​ປີ​ຕໍ່​ໄປ, ​ໄດ້​ປຶກສາ​ຫາລື​ເປັນ​ເອກະ​ພາບ​ຫຼາຍ​ບັນຫາ ​ເພື່ອ​ກະກຽມ​ໃຫ້​ແກ່​ກອງ​ປະຊຸມ​ລັດຖະມົນຕີ​ອາ​ຊຽນ ວ່າ​ດ້ວຍ​ອາ​ຊະ​ຍາ​ກຳ​ຂ້າມ​ຊາດ ຄັ້ງ​ທີ 11 ທີ່​ຈະ​ຈັດ​ຂື້ນ​ຢູ່​ປະ​ເທດ​ຟິລິບ​ປິນ ​ໃນ​ເດືອນ ກັນຍາ 2017 ນີ້.

ນອກ​ນີ້, ກອງປະຊຸມ​ເຈົ້າ​ໜ້າ​ທີ່ອາວຸດ​ໂສ​ອາ​ຊຽນ ວ່າ​ດ້ວຍ​ອາ​ຊະ​ຍາ​ກຳ​ຂ້າມ​ຊາດ ຄັ້ງ​ທີ 17 ​ແລະ ກອງ​ປະຊຸມ​ອື່ນໆ​ກ່ຽວຂ້ອງ ຍັງ​ເປັນ​ການ​ປະກອບສ່ວນ​ສ້າງ​ຄວາມ​ເຂົ້າ​ໃຈ ​ແລະ ຄວາມ​ໄວ້​ເນື້ອ​ເຊື້ອ​ໃຈ​ເຊິ່ງກັນ ​ແລະ ກັນ​ຫຼາຍ​ຂື້ນ ລະຫວ່າງ​ບັນດາ​ປະ​ເທດ​ສະມາຊິກ​ອາ​ຊຽນດ້ວຍ​ກັນ ​ແລະ ລະຫວ່າງ​ອາ​ຊຽນກັບ​ບັນດາ​ປະ​ເທດ​ຄູ່​ເຈລະ​ຈາ ​ເພື່ອ​ຮັບປະກັນ​ຄວາມ​ສະຫງົບ-​ປອດ​ໄພ ​ແລະ ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັ​ງຄົມ ​ແນ່​ໃສ່​ສ້າງ​ເງື່ອນ​ໄຂ​ອຳນວຍ​ຄວາມ​ສະດວກ​ໃຫ້​ແກ່​ການ​ພັດທະນາ​ເສດຖະກິດ-​ສັງຄົມ​ ​ແລະ ຍົກ​ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ນັບ​ມື້​ນັບ​ສູງ​ຂື້ນ.

ຄຽງ​ຄູ່​ກັບ​ຜົນສຳ​ເລັດ​ທາ​ງດ້ານພິທີການ, ທາງ​ດ້ານ​ວຽກ​ງານ​ປ້ອງ​ກັນ​ຄວາມ​ສະຫງົບ, ປອດ​ໄພ ​ແລະ ຄວາມ​ເປັນ​ລະບຽບ​ຮຽບຮ້ອຍ​ຕາມ​ສະຖານ​ທີ່​ພັກ, ການ​ເຄື່ອນ​ໄຫວ, ການ​ເດີນ​ທາງ​ຂອງ​ບັນດາ​ຜູ້​ແທນ ​ແລະ ສະຖານ​ທີ່​ຈັດ​ກອງ​ປະຊຸມ ​ເຈົ້າ​ໜ້າ​ທີ່​ປ້ອງ​ກັນ​ຄວາມ​ສະຫງົບ ທີ່​ປະຈຳ​ຢູ່​ຈຸດ​ຕ່າງໆ ​ແມ່ນ​ປະຕິບັດ​ໜ້າ​ທີ່​ຂອງ​ຕົນ ດ້ວຍ​ຄວາມ​ຮັບຜິດ ຊອບ​ສູງ ສາມາດ​ຮັບປະກັ​ນຄວາມ​ສະຫງົບ​ປອດ​ໄພ​ໄດ້ 100%

Off

Comments are closed.