08th Aug2017

ຈັບພວກຄ້າຂາຍ ຢາເສບຕິດ ລາຍໃຫຍ່ໄດ້ 08 ຄົນ ພ້ອມຂອງກາງ ຫຼາຍລານຍການ

by somchan

ວັນ​ທີ 28 ກໍລະກົດ 2017 ນີ້ ​ເຈົ້າ​ໜ້າ​ທີ່​ຕຳຫຼວດ​ພະ​ແນ​ກຕ້ານ ​ແລະ ສະກັດ​ກັ້ນ​ຢາ​ເສບ​ຕິດ ກອງ​ບັນຊາ​ການ ​ປກສ ​ແຂວງ​ອຸດົມ​ໄຊ ສົມທົບ​ກັບ​ກົມ​ຕຳຫຼວດ​ຕ້ານ ​ແລະ ສະກັດ​ກັ້ນ​ຢາ​ເສບ​ຕິດ​ ກະຊວງ​ປ້ອງ​ກັນ​ຄວາມ​ສະ​ຫງົບ ມີ​ໜ່ວຍ​ສະ​ເພາະ​ກິດ​ຈາກ​ພາກສ່ວນ​ກ່ຽວ​ຂ້ອງເຂົ້າ​ຮ່ວມ​ມ້າງ​ຄະດີ​ຢາ​ເສບ​ຕິດ​ລາຍ​ໃຫຍ່ ຈຳນວນ 01 ລາຍ, ຢູ່​ເຂດ​ບ້ານ​ພູ​ຂຽວ ​ແລະ ບ້ານ​ຫຼັກ 44 ​ເມືອງ​ໄຊ​ ແຂວງ​ອຸດົມ​ໄຊ ​ເຊິ່ງສາມາດ​ກັກ​ຕົວ​ຜູ້​ຖືກ​ຫາ​ໄດ້​ທັງ​ໝົດ 08 ຄົນ ພ້ອມ​ຍຶດ​ເຄື່ອງ​ຂອງ​ກາງ​ມີ: ຢາ​ບ້າ​ຈຳ​ນວນ 1.182 ມັດ ກັບ 46 ​ເມັດ ​ເທົ່າ​ກັບ 2.364.046 ​ເມັດ, ຝິ່ນ 6,3 ກິ​ໂລກຣາມ, ກັນຊາ​ອັດ​ແຫ້ງ 01 ​ແທ່ງ ໜັກ 01 ກິ​ໂລກຣາມ, ລົດ​ໃຫຍ່ 05 ຄັນ, ລົດຈັກ 03 ຄັນ, ​ເງິນ​ກີບ 241.200.000 ກີບ, ​ເງິນ​ບາດ 5.085.300 ບາດ, ​ເງິນ​ໂດ​ລາ 49.410ໂດລາແລະເຄື່ອງອື່ນອີກຫລາຍລາຍການ.

ຜູ້​ຖືກ​ຫາ​ມີຄື: ທ້າວ ​ວື ​ແຊ​ເລົາ ອາຍຸ 38 ປີ, ທ້າວ​ ເລົາ​ທໍ່ ​ແຊ​ລີ ອາຍຸ 47 ປີ ທັງ​ສອງ​ຢູ່​ບ້ານ​ໄທ​ສາມັກຄີ ​ເມືອງ​ວຽງ​ແກ່ນ ​ແຂວງ​ຊຽງ​ລາຍ ປະ​ເທດ​ໄທ, ທ້າວ ຈົງ​ເຮີ ອາຍຸ 16 ປີ, ນາງ​ໄມ່ຮົວ ອາຍຸ 19 ປີ​ ຢູ່​ບ້ານ​ຊົງ​ຈ່າ​, ທ້າວ​ເທ້ ອາຍຸ 16 ປີ, ນາງ ​ເຮີ ອາຍຸ 16 ປີ​ ທັງ​4 ຢູ່​ບ້ານ​ຫ້ວບຍິນ ​ເມືອງ​ນ້ຳ​ບາກ ​ແຂວງ​ຫຼວງ​ພະ​ບາງ, ນາງ ຄຳ​ຮັກ ອາຍຸ 30 ປີ ຢູ່​ບ້ານ​ພູ​ຂຽວ ​ແລະ ທ້າວ ຣາລີ ອາຍຸ 50 ປີ ຢູ່​ບ້ານ​ຫຼັກ 44 ​ເມືອງ​ໄຊ ​ແຂວງອຸດົມ​ໄຊ.

​ເຈົ້າ​ໜ້າ​ທີ່​ຕຳຫຼວດ​ໄດ້​ໃຫ້​ຮູ້​ວ່າ: ພາຍຫຼັງ​ໄດ້​ຮັບ​ລາຍ​ງານ​ວ່າ​ມີ​ຄົນ​ຈຳນວນ​ໜຶ່ງ ​​ໄດ້​ມີ​ການ​ເຄື່ອນ​ໄຫວ​ຜະລິດ, ຄ້າ-ຄ້າຂາຍ​ ຢາ​ເສບ​ຕິດ​ປະ​ເພດ​ຢາ​ບ້າ​ ໂດຍ​ມີ​ການ​ຕັ້ງ​ຈຸດ​ຜະລິດ​ຂະໜາດ​ໃຫຍ່ 2 ຈຸດ​ຄື: ​ເຂດ​ບ້ານ​ພູ​ຂຽວ ​ແລະ ບ້ານ​ຫຼັກ 44 ຂຶ້ນ​ກັບ​ເມືອງ​ໄຊ ​ແຂວງ​ອຸດົມ​ໄຊ. ດັ່ງ​ນັ້ນ ​ເຈົ້າ​ໜ້າ​ທີ່​ຕຳຫຼວດ​ພະ​ແນ​ກສະກັດ​ກັ້ນ ​ແລະ​ ຕ້າ​ນຢາ​ເສບ​ຕິດ ປກສ ​ແຂວງ​ອຸດົມ​ໄຊ ສົມທົບ​ກັບ​ກົມ​ຕຳຫຼວດ​ຕ້ານ ​ແລະ ສະກັດ​ກັ້ນ​ຢາ​ເສບ​ຕິດ ກະຊວງ​ປ້ອງ​ກັນ​ຄວາມ​ສະຫງົບ ໜ່ວຍ​ສະ​ເພາະ​ກິດ​ທີ່​ກ່ຽວຂ້ອງ ​ໄດ້​ລົງ​ກວດກາ​ພົບ​ເຫັນ​ມູນ​ຄວາມ​ຈິງ ພ້ອມ​ທັງ​ວາງ​ແຜນ​ມ້າງ​ລາຍ​ຄະດີ​ດັ່ງກ່າວ​ຈົນ​ສຳ​ເລັດ.

ຕໍ່​ກັບ​ຄະດີ​ດັ່ງກ່າວ ປະຈຸ​ບັນ​ເຈົ້າ​ໜ້າ​ທີ່​ທີ່​ກ່ຽວຂ້ອງ​ກຳລັງ​ດຳ​ເນີນ​ການ​ສືບສວນ-ສອບ​ສວນ ​ເພື່ອ​ຂະຫຍາຍ​ຜົນ​ກຸ່ມ​ແກ໋ງ, ຄູ່​ຮ່ວມ​ຂະ​ບວນການ​ມາ​ດຳ​ເນີນ​ຄະດີ​ຕໍ່​ພວກ​ກ່ຽວ ຕາມ​ລະບຽບ​ກົດ​ໝາຍ​ຕໍ່​ໄປ.

 

Off

Comments are closed.