28th Sep2017

ຮອງນາຍົກລັດຖະມົນຕີຕ້ອນຮັບຄະນະຜູ້ ແທນກະຊວງມະຫາດໄທແຫ່ງ ຣາຊະອານາຈັກໄທ

by somchan

ໃນວັນທີ 27 ກັນຍາ 2017 ນີ້ ປອ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ພົນເອກ ອານຸພົງ ເຜົ່າຈິນດາ ລັດຖະມົນຕີ ວ່າການກະຊວງມະຫາດໄທແຫ່ງຣາຊະອານາຈັກໄທ ພ້ອມຄະນະໃນໂອກາດທີ່ເດີນທາງມາຮ່ວມ ກອງປະຊຸມຄະນະເຈົ້າແຂວງ ແລະ ຜູ້ວ່າ ຣາຊະການຈັງຫວັດຊາຍແດນ ລາວ-ໄທ ຄັ້ງທີ 10 ທີ່ນະຄອນຫຼວງວຽງຈັນ.

ໂອກາດນີ້ ປອ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປລາວ ໄດ້ສະແດງຄວາມຕ້ອນຮັບດ້ວຍໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີຕໍ່ກັນ ພ້ອມທັງຕີລາຄາສູງຕໍ່ການເຂົ້າຮ່ວມກອງປະຊຸມໃນຄັ້ງນີ້ ເປັນການຢືນຢັນເຈຕະນາລົມຂອງລັດຖະບານສອງປະເທດ ທີ່ສະໜັບສະໜູນການພົວພັນຮ່ວມມື ລາວ-ໄທ ໃຫ້ແໜ້ນແຟ້ນ ແລະ ຂະຫຍາຍການຮ່ວມມືໃຫ້ກວ້າງຂວາງໃນຫລາຍດ້ານ, ລວມທັງດ້ານຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ. ບັນຫາສຳຄັນແມ່ນການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນແຂວງ-ຈັງຫວັດ ເພື່ອເສີມຂະຫຍາຍຄວາມເຂົ້າໃຈອັນດີ ລະຫວ່າງປະຊາຊົນທັງສອງປະເທດໃຫ້ດີຂຶ້ນຢ່າງຕໍ່ເນື່ອງ.

 

Off

Comments are closed.