28th Sep2017

ຜົນສຳເລັດຂອງກອງປະຊຸມຄະນະເຈົ້າແຂວງ ແລະ ຜູ້ວ່າຣາຊະການຈັງຫວັດຊາຍແດນ ລາວ-ໄທ ຄັ້ງທີ 10

by somchan

ກອງປະຊຸມຄະນະເຈົ້າແຂວງ ແລະ ຜູ້ວ່າຣາຊະການ ຈັງຫວັດຊາຍແດນລາວ-ໄທ ຄັ້ງທີ 10 ໄດ້ອັດລົງ ດ້ວຍຜົນສຳເລັດອັນຈົບງາມ. ໃນວັນທີ 28 ກັຍາ 2017 ນີ້ ພາຍຫຼັງດຳເນີນມາເປັນເວລາ 3 ວັນ, ທີ່ໂຮງແຮມລາວພຣາຊາ ນະຄອນຫຼວງ ວຽງຈັນ. ພາຍໃຕ້ການເປັນປະທານຮ່ວມ ຂອງທ່ານ ພົນຕີ ສົມແກ້ວ ສີລາວົົງ ລັດຖະມົນຕີກະຊວງປ້ອງກັນ ຄວາມສະຫງົບ ແຫ່ງ ສປປລາວ ແລະ ທ່ານ ພົນເອກ ອານຸພົງ ເຜົ່າຈິນດາ ລັດຖະມົນຕີວ່າການກະຊວງ ມະຫາດໄທແຫ່ງຣາຊະອານາຈັກໄທ. ມີເອກອັກຄະລັດຊະທູດວິສາມັນຜູ້ມີອຳນາດເຕັມ ແຫ່ງຣາຊະອານາຈັກໄທປະຈຳ ສປປລາວ, ເອກອັກຄະລັດຊະທູດວິສາມັນຜູ້ມີອຳນາດເຕັມ ແຫ່ງ ສປປລາວ ປະຈຳຣາຊະອານາຈັກໄທ ແລະ ຄະນະຜູ້ແທນທັງສອງຝ່າຍເຂົ້າຮ່ວມ.

ພົຕ ສົມແກ້ວສີລາວົງ ລັດຖະມົນຕີກະຊວງປ້ອງກັນຄວາມສະຫງົບໄດ້ກ່າວວ່າ: ກອງປະຊຸມໃນຄັ້ງນີ້ ໄດ້ສຳເລັດຜົນຕາມຈຸດປະສົງລະດັບຄາດໝາຍ. ເຊິ່ງເປັນການປະກອບສ່ວນອັນສຳຄັນເຂົ້າໃນການເພີ່ມທະວີ ການພົວພັນຮ່ວມມື ແລະ ສ້າງຄວາມເຂົ້າໃຈລະຫວ່າງສອງຝ່າຍ ໂດຍສະເພາະແມ່ນບັນດາແຂວງ- ຈັງຫວັດທີ່ມີຊາຍແດນຕິດຈອດກັນໃຫ້ດີຂຶ້ນອີກບາດກ້າວໜຶ່ງ ເຊິ່ງໃນກອງປະຊຸມ, ທັງສອງຝ່າຍໄດ້ເຫັນດີເປັນເອກກະພາບຮັບຮອງເອົາການຮ່ວມມືກັນດ້ານຕ່າງໆ ເປັນຕົ້ນແມ່ນການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ ການຮ່ວມມືໃນການປົກປັກຮັກສາເສັ້ນຊາຍແດນ ການຮ່ວມມືອຳນວຍຄວາມສະດວກ ແລະ ຄວາມປອດໄພ ໃນການເຂົ້າ-ອອກເມືອງຕາມຈຸດຜ່ານແດນ, ການຍົກລະດັບດ່ານຜ່ານແດນເພີ່ມເຕີ່ມ, ການຮ່ວມມືໃນການປ້ອງກັນ ແລະ ປາມປາບຢາເສບຕິດຕາມຊາຍແດນ ລາວ-ໄທ ການຮ່ວມມືໃນການຄຸ້ມຄອງດຳເນີນກິດຈະການຕ່າງໆຕາມແມ່ນ້ຳຂອງ ແລະ ນ້ຳເຫືອງ ການຮ່ວມມືໃນກໍລະນີບຸກຄົນຂອງແຕ່ລະຝ່າຍຖືກຈັບກຸມຄຸມຂັງ, ການແກ້ໄຂບັນຫາບຸກຄົນສອງສັນຊາດ, ການຮ່ວມມືດ້ານແຮງງານ, ການຮ່ວມມືດ້ານຕ້ານການຄ້າມະນຸດ, ດ້ານເສດຖະກິດລະຫວ່າງແຂວງ ແລະ ຈັງຫວັດ, ການແລກປ່ຽນຄະນະຜູ້ແທນລະຫວ່າງກະຊວງປ້ອງກັນຄວາມສະຫງົບແຫ່ງ ສປປລາວ ແລະ ກະຊວງມະຫາດໄທ ແຫ່ງຣາຊະອານາຈັກໄທ ແລະ ການຮ່ວມມືດ້ານຕ່າງໆ.

ໂອກາດນີ້, ຄະນະຜູ້ແທນທັງສອງຝ່າຍ ໄດ້ລົງນາມຮັບຮອງເອົາບົດບັນທຶກກອງປະຊຸມຄະນະເຈົ້າແຂວງ ແລະ ຜູ້ວ່າຣາຊະການຈັງຫວັດຊາຍແດນ ລາວ-ໄທ ຄັ້ງທີ 10. ຝ່າຍລາວໂດຍ ພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ, ຝ່າຍໄທໂດຍ ພົນເອກ ອານຸພົງ ເຜົ່າຈິນດາ ລັດຖະມົນຕີກະຊວງມະຫາດໄທ.

 

Off

Comments are closed.