07th Dec2015

40ປີ ແຫ່ງການສ້າງສາ ແລະ ພັດທະນາ ສປປລາວ

by somchan

ຊາດລາວແມ່ນຊາດທີ່ມີມູນເຊື້ອສະຫງ່າອົງອາດ ແຫ່ງການຕໍ່ສູ້ຕ້ານການຮຸກຮານຂອງສັດຕູ ໂດຍສະເພາະໄລຍະແຫ່ງການຕໍ່ສູ້ກູ້ຊາດຕ້ານ ຈັກກະພັດຜູ້ຮຸກຮານ ພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ເຊິ່ງເປັນໄລຍະກະແສຟອງການປະຕິວັດລາວ ນັບມື້ກວ້າງຂວາງແລະ ໄດ້ຮັບໄຊຊະນະເລື່ອຍໆມາ ຈົນສາມາດປົດປ່ອຍປະເທດຊາດຢ່າງມີໄຊ ພ້ອມທັງສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ

IMG_7523-(cut)

ຂື້ນຢ່າງສະຫງ່າພາເຜີຍ ໃນວັນທີ 2 ທັນວາ 1975. ດັ່ງນັ້ນ, ວັນທີ 2 ທັນວາ ຈຶ່ງເປັນວັນທີ່ມີຄວາມໝາຍສຳຄັນສຳລັບທົ່ວພັກ, ທົ່ວລັດ ແລະ ທົ່ວປວງຊົນລາວ ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ຂອງຊາດລາວ, ແມ່ນວັນທີ່ປະຊາຊົນລາວໄດ້ມີອິດສະຫຼະພາບ ແລະ ເປັນເຈົ້າຂອງປະເທດຊາດຢ່າງແທ້ຈິງ; ແມ່ນວັນທີ່ປະເທດລາວມີເອກະລາດຢ່າງສົມບູນ, ມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີສະຖານະເທົ່າທຽມກັບປະເທດອື່ນໆໃນປະຊາຄົມໂລກ. ທັງເປັນວັນແຫ່ງການກ້າວເຂົ້າສູ່ຍຸກສະໄໝໃໝ່ແຫ່ງການສ້າງປະເທດລາວສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ.

IMG_7532-(cut)

ຕະຫຼອດໄລຍະແຫ່ງການປົກປັກຮັສາ ແລະ ສ້າງສາພັດທະນາປະເທດຊາດ 40ປີ ຜ່ານມາ ກໍປາສະຈາກບໍ່ໄດ້ມີບາງໄລຍະທີ່ຕ້ອງປະເຊີນໜ້າຄວາມຫຍຸ້ງຍາກສິ່ງທ້າທາຍຫຼາຍປະການ ເປັນຕົ້ນແມ່ນໄລຍະ 10 ຕົ້ນແຫ່ງການປົກປັກຮັກສາ ແລະ ພັດທະນາປະຊາດ ເນື່ອງຈາກປັດໄຈດ້ານລະດັບຄວາມຮູ້ຂອງປະຊາຊົນຍັງບໍ່ສູງ ເຊິ່ງມີປະຊາຊົນກືກໜັງສືປະມານ 90%. ການຄຸ້ມຄອງເສດຖະກິດຍັງບໍ່ທັນເປັນລະບົບສອດຄ່ອງ, ພວກອິດທິກຳລັງປັກລະປັກ ພວກຄົນບໍ່ດີຍັງສືບຕໍ່ແຜນການທຳລາຍລະບອບໃໝ່ຂອງລາວ ແລະ ຢ່າງສະພາບການຫຼາຍຢ່າງບໍ່ອຳນວຍ, ແຕ່ຍ້ອນຄວາມຕັດສິນໃຈບຸກບືນ ແລະ ສາມັກຄີພາຍໃນບວກກັບການພົວພັນຮ່ວມມືຊ່ວຍເຫຼືອຂອງເພື່ອນມິດສາກົນ ເຮັດໃຫ້ປະເທດລາວສາມາດຜ່ານຜ່າອຸປະສັກຕ່າງໆ ພ້ອມທັງປົກປັກຮັກສາເອກະລາດອະທິປະໄຕ ແລະ ລະບອບໃຫມ່ໄວ້ໄດ້ຢ່າງໝັ້ນຄົງ. ປະເທດຊາດມີຄວາມສະຫງົບ ເປັນລະບຽບຮຽບຮ້ອຍ ແລະ ສາມາດປະຕິບັດແຜນພັດທະນາເສດຖະກິດສັງຄົມ 5ປີແຫ່ງລັດຄັ້ງທຳອິດໄດ້ໂດຍພື້ນຖານ. ໂດຍສະເພາະນັບແຕ່ປີ 1986 ເປັນຕົ້ນມາ ການຈັດຕັ້ງປະຕິບັດສອງໜ້າທີ່ຍຸດທະສາດຂອງພັກຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໄດ້ດຳເນີນພາຍໃຕ້ແນວທາງປ່ຽນແປງໃຫມ່ຮອບດ້ານຂອງພັກ  ເຮັດໃຫ້ປະເທດຊາດມີຄວາມໝັ້ນຄົງ ແລະ ພັດທະນາໃນທຸກດ້ານເຊັ່ນ: ກຳລັງປ້ອງກັນຊາດປ້ອງກັນຄວາມສະຫງົບສາມາດປົກປັກຮັກສາປະເທດຊາດ ແລະ ເຂດນ້ຳແດນດິນໄວ້ໄດ້ຢ່າງໝັ້ນຄົງ, ສາມາດປ້ອງກັນຜູ້ນຳພັກ-ລັດ ສຳນັກງານອົງການ,ກອງປະຊຸມ ແຂກ ແລະ ວັນບຸນສຳຄັນຕ່າງໆມີຄວາມປອດໄພ100% ພ້ອມດຽວກັນນີ້, ຍັງສາມາດສະກັດກັ້ນ ຕ້ານກົນອຸບາຍມ້າງເພຂອງອິດທິກຳລັງປໍລະປັກ ແລະພວກຄົນບໍ່ດີ, ສາມາດສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມ ສຳເລັດໂດຍພື້ນຖານ. ດ້ານກະສິກຳແມ່ນສາມາດຮັບປະກັນເຂົ້າກິນ ແລະ ທັນຍາຫານໄດ້ພຽງພໍ, ການຖາງປ່ານັບມື້ຫຼຸດລົງ ແລະ ປະຊາຊົນມີອາຊີບຄົງທີ່ເພີ່ມຂຶ້ນ, ດ້ານວຽກງານຄົມມະນາຄົມໄດ້ຮັບການປັບປຸງຂະຫຍາຍພໍສົມຄວນ ປະຈຸບັນໄດ້ມີເສັ້ນທາງທີ່ສາມາດເຊື່ອມຕໍ່ກັບອານຸພາກພາກພື້ນໄດ້ ກາຍເປັນເສັ້ນທາງແລວເສດຖະກິດຕາເວັນອອກ,ຕາເວັນຕົກ, ເໜືອ,ໃຕ້ ແລະ ມີເສັ້ນທາງໄປເຖິງທຸກແຂວງ ເມືອງ ບ້ານ ແລະ ກຸ່ມບ້ານ ພ້ອມທັງມີຂົວສະຫວ່າງປະເທດ 5 ແຫ່ງ. ຄ່ຽງຄູ່ກັນນີ້, ດ້ານຂົງເຂດດ້ານເສດຖະກິດ, ວັດທະນະທຳ-ສັງຄົມກໍໄດ້ຮັບການພັດທະນາດີຂຶ້ນຢ່າງຕໍ່ເນືອງເຊັ່ນ: ດ້ານການສຶກສາ ປັດຈຸບັນມີໂຮງຮຽນປະຖົມສົມບູນເກືອບ 9.000ແຫ່ງ ມີອັດຕາການເຂົ້າຮຽນ 98%, ມີໂຮງຣຽນຊັ້ນມັດທະຍົມສຶກສາ  1.400 ກວ່າແຫ່ງ ອັດຕາເຂົ້າຮຽນ 69%, ມີໂຮງຣຽນອາຊີບ: ສຶກສາ, ສູນຝຶກອົບຮົມວິຊາຊີບ, ການສຶກສາຊັ້ນສູງ ແລະ ມະຫາວິທະຍາໄລ 200ກວ່າແຫ່ງ ນອກນີ້ຍັງມີນັກສຶກສາໄປຮຽນຕໍ່ຢູ່ຕ່າງປະເທດເກືອບ 3.000ຄົນ. ດ້ານສາທາລະນະສຸກ ພັກ-ລັດຖະບານໄດ້ເອົາໃຈໃສ່ຫັນເອົາວຽກງານສາທາລະນະສຸກ ລົງສູ່ຮາກຖານປະຊາຊົນ ຖືເອົາການກັນພະຍາດ ການສົ່ງເສີມສຸຂະພາບເປັນຕົ້ນຕໍ ປັດຈຸບັນປະຊາຊົນສາມາດເຂົ້າເຖິງການບໍລິການທົ່ວປະເທດ 98%. ພັກໄດ້ນຳພາວຽກງານພັດທະນາຊົນນະບົດແລະ ແກ້ໄຂຄວາມທຸກຍາກຂອງປະຊາຊົນຕິດພັນກັບການເຮັດທົດລອງ 3ສ້າງຄື: ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ. ເຊິ່ງມີປະຊາຊົນບັນດາເຜົ່າປະກອບສ່ວນຮ່ວມຂະບວນການພັດທະນາເຖິງ 90%. ປັດຈຸບັນມີບ້ານພັດທະນາກວມ 36%, ຄວບຄົວພັດທະນາ 71%, ຍັງມີບ້ານທຸກຍາກ ປະມານ 23%, ຄອບຄົວທຸກຍາກ 8%, ແລະ ເມືອງທຸກຍາກ 20%. ດ້ານວຽກງານຍຸດຕິທຳ ປັດຈຸບັນມີກົດໝາຍປະກາດໃຊ້ແລ້ວ 100ກວ່າສະບັບ ແລະນິຕິກຳອື່ນໆ 100ກວ່າສະບັບ, ພ້ອມທັງມີການພົວພັນການທູດກັບ138 ປະເທດ, ມີການພົວພັນກັບພັກການເມືອງ 124ພັກ ແລະການພົວພັນດ້ານເສດຖະກິດ 80 ກວ່າປະເທດ. ທີ່ສຳຄັນແມ່ນກຳລັງປະກັນຊາດ-ປ້ອງກັນຄວາມສະຫງົບ ພ້ອມທັງປົກປັກຮັກສາປະເທດ, ເຂດນ້ຳແດນດິນໄດ້ຢ່າງໝັ້ນຄົງ, ປ້ອງກັນຜູ້ນຳພັກ-ລັດ, ສຳນັກງານ-ອົງການແຂກພາຍໃນ ແລະ ຕ່າງປະເທດໃຫ້ມີຄວາມປອດໄພ 100%. ໂດຍສະເພາະໃນປັດຈຸບັນກຳລັງປ້ອງກັນຄວາມສະຫງົບໄດ້ເປັນກຳລັງຕົ້ນຕໍໃນການລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ ຕາມ 4ເນື້ອໃນ 4ຄາດໝາຍຢູ່ທົ່ວປະເທດ 6.943ຄົນ ພົ້ນເດັ່ນແມ່ນການລົງກໍ່ສ້າງຮາກຖານການເມືອງຢູ່ແຂວງໄຊສົມບູນ ແລະ 9ຕົວເມືອງໃນນະຄອນຫຼວງວຽງຈັນ ເພື່ອເຮັດໜ້າທີ່ປຸກລະດົມຂົນຂວາຍປະຊາຊົນ, ນຳເອົາແນວທາງນະໂຍບາຍພັກ-ລັດ ລົງສູ່ຮາກຖານປະຊາຊົນໃຫ້ຮັບຮູ້ເຂົ້າໃຈຢ່າງກວ້າງຂວາງແລະ ຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກໃຫ້ປະກົດຜົນເປັນຈິງ. ປັດຈຸບັນມີບ້ານແບບຢ່າງດ້ານປ້ອງກັນຊາດ7.000ກວ່າບ້ານກວມ82%, ບ້ານປ້ອງກັນຄວາມສະຫງົບດີ 6.000ກວ່າບ້ານກວມ76%, ບ້ານປອດຄະດີ 5.000ກວ່າບ້ານກວມ69%, ບ້ານປອດຢ່າງເສບຕິດ 5.000ກວ່າບ້ານກວມ66% ແລະຂຶ້ນທະບຽນສຳມະໂມຄົວ 1ລ້ານກວ່າຄວາມຄອບຄົວ. ພ້ອມດຽວກັນນີ້, ຍັງສາມາດສະກັດກັ້ນຕ້ານການເຄື່ອນໄຫວ, ກົນອຸບາຍມ້າງເພຂອງອິດທິກຳລັງປໍລະປັກ ແລະພວກຄົນບໍ່ດີ ສາມາດແກ້ໄຂບັນດາຄະດີລາຍໃຫຍ່ ເວົ້າສະເພາະແມ່ນສາມາດສະກັດກັ້ນແກ້ໄຂປະກົດການຫຍໍ້ທໍ້ໃນສັງຄົມໄດ້ດີໂດຍພື້ນຖານ ເຮັດໃຫ້ປະເທດຊາດມີຄວາມສະຫງົບ, ໝັ້ນຄົງ, ປອດ ແລະ ເປັນລະບຽບຮຽບຮ້ອຍດີ ສ້າງເງື່ອນໄຂອຳນວຍໃຫ້ແກ່ການສ້າງສາພັດທະນາປະປະເທດຕະຫຼອດໄລຍະ 40ປີຜ່ານມາ.

ບັນດາຜົນງານຜົນສຳເລັດທີ່ສ້າງສາມາດສ້າງໄດ້ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດໄລຍະ 40ປີຜ່ານມານັ້ນ ເນື່ອງຈາກປະເທດຊາດພວກເຮົາມີແນວທາງອັນສະຫຼາດສ່ອງໃສ ແລະ ຖືກຕ້ອງຂອງພັກ-ລັດ, ກຳລັງປ້ອງກັນຊາດປ້ອງກັນຊາດ-ປ້ອງກັນຄວາມສະຫງົບ ພະນັກງານ-ລັດຖະກອນ ແລະ ປະຊາຊົນບັນດາເຜົ່າ ມີຄວາມຕື່ນຕື່ນຕົວສາມັກຄີປອງດອງກັນຢ່າງພ້ອມພຽງ ສະເໝີຕົ້ນສະໝີປາຍຕະຫຼອດມາ ເຊິ່ງມັນແມ່ນຄວາມປິຕິຍິນດີ ແລະ ຄວາມເອກອ້າງທະນົງໃຈທີ່ສຸດຂອງປວງຊົນລາວທັງຊາດ ພ້ອມທັງເປັນບົດຮຽນອັນລ້ຳຄ່າໃຫ້ແກ່ເຍົາວະຊົນຮຸ່ນຫຼັງໄດ້ສຶກສາຮ່ຳຮຽນ ແລະ ແບບຢ່າງໃນການປົກປັກຮັກສາພັດທະນາປະເທດຊາດຕໍ່ໆໄປ. ເຖິງຢ່າງໃດກໍຕາມ, ເພື່ອຮັບປະກັນໃຫ້ປະເທດຊາດສືບຕໍ່ສະຫງົບໝັ້ນຄົງ ແລະ ພັດທະນາສີວິໄລຂຶ້ນເລື່ອຍໆນັ້ນ ບັນດາອົງການຈັດຕັ້ງ ອຳນາດການປົກຄອງ ແລະ ປະຊາຊົນບັນດາເຜົ່າຕ້ອງໄດ້ເປັນເຈົ້າການເຊີດຊູນ້ຳໃຈຮັກຊາດ, ເອກກະລາດ ເປັນເຈົ້າຕົນເອງ, ມີຄວາມສາມັກຄີເປັນປືກແຜນ ແລະ ສືບຕໍ່ເສີມຂະຫຍາຍມູນເຊື້ອການປົກປັກຮັກສາປະເທດຊາດໃຫ້ເປັນຂະບວນຟົດຟືນເຂັ້ມແຂງເພື່ອສ້າງ ສປປລາວໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ ຍຸດຕິທຳ ສີວິໄລ ພ້ອມທັງບັນລຸເປົ້າໝາຍ ສະຫັດສະວັດດ້ານການພັດທະນາເຮັດໃຫ້ປະເທດຊາດຫຼຸດພົ້ນອອກຈາກຄວາມດ້ອຍພັດທະນາໃນປີ 2020 ແລະ ສືບຕໍ່ກ້າວສູ່ຈຸດໝາຍສັງຄົມນິຍົມ.

Off

Comments are closed.