13th Jul2018

ກວດຄົ້ນສະຖານທີ່ພົບເຫັນຢາບ້າເກືອບ 5 ລ້ານເມັດ ພ້ອມຜູ້ຖືກຫາ 1 ຄົນ.

by somchan

ໃນວັນທີ 10 ກໍລະກົດ 2018 ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ໄດ້ສົມທົບກັບ ປກສ ກຸ່ມບ້ານ ພ້ອມອຳນາດການປົກຄອງບ້ານ ເຂົ້າກວດຄົ້ນເຮືອນເປົ້າໝາຍຕ້ອງສົງໄສ ຄ້າຂາຍຢາເສບຕິດ ທີ່ຕັ້ງຢູ່ໃນສວນຢາງພາລາ ບ້ານຫ້ວຍດິນຈີ່ ເມືອງຫ້ວຍຊາຍແຂວງບໍ່ແກ້ວ ຜ່ານການຄົ້ນເຮືອນຫຼັງດັ່ງກ່າວ ພົບເຫັນຢາບ້າເກືອບ 5 ລ້ານເມັດ ພ້ອມເຮໂລອິນ 180 ແທ່ງ ທີ່ຝັ່ງດິນໄວ້ຢູ່ໃນຄອກລົດໃຫຍ່ ພ້ອມທັງຈັບຕົວເຈົ້າຂອງເຮືອນໄປສືບສວນຂະຫຍາຍຜົນ.

ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວໃຫ້ຮູ້ວ່າ: ເຈົ້າຂອງເຮືອນຫຼັງດັ່ງກ່າວຊື່: ທ້າວເນັງຍົງທໍ່ ອາຍຸ 36 ປີ ຢູ່ບ້ານພູຂຽວ ເມືອງໄຊ ແຂວງອຸດົມໄຊ ເຊິ່ງຜູ້ກ່ຽວໄດ້ຍ້າຍຖິ່ນຖານ ໄປເຮັດສວນຢາງພາລາ ຢູ່ບ້ານຫ້ວຍດິນດິນຈີ່ ເມືອງຫ້ວຍຊາຍແຂວງບໍ່ແກ້ວ ແຕ່ບໍ່ມີເອກະສານຖືກຕ້ອງຕາມກົດໝາຍ. ເຊິ່ງຜູ້ກ່ຽວເປັນເປົ້າໝາຍຄ້າຂາຍຢາເສບຕິດລາຍໃຫຍ່ທີ່ເຈົ້າໜ້າທີ່ໄດ້ຕິດຕາມ ແລະ ໄດ້ສົງໄສຜູ້ກ່ຽວຊຸກເຊື່ອງຢາເສບຕິດໄວ້ຢູ່ໃນສວນ ພາຍຫຼັງໄດ້ສຶບຮູ້ ແລະ ມີຂໍ້ມູນຮັດກຸມວ່າ ຜູ້ກ່ຽວເອົາຢາເສບຕິດຈຳນວນຫຼາຍ ເຂົ້າມາຊຸກເຊືອງໄວ້ໃນສວນ ເພື່ອກຽມສົ່ງອອກຂາຍ. ຈຶ່ງໄດ້ປະສານຫາອົງການໄອຍະການປະຊາຊົນແຂວງບໍ່ແກ້ວ ເພື່ອອອກຄຳສັ່ງກວດຄົ້ນເຄຫະສະຖານ (ເຮືອນ) ຂອງຜູ້ກ່ຽວ.

ມາຮອດວັນທີ 10 ກໍລະກົດ 2018 ຈິ່ງໄດ້ນຳກຳລັງຕຳຫຼວດວິຊາສະເພາະ ປກສ ແຂວງ ສົມທົບກັບ ປກສ ກຸ່ມບ້ານ ແລະ ອຳນາດການປົກຄອງບ້ານຫ້ວຍດິນຈີ່ ເຂົ້າທຳການກວດຄົ້ນ ຕາມຄຳສັ່ງກວດຄົ້ນ ເຄຫະສະຖານຂອງໄອຍະການປະຊາຊົນແຂວງ. ຜ່ານການກວດຄົ້ນເຮືອນຫຼັງດັ່ງກ່າວ ໄດ້ພົບເຫັນຢາເສບຕິດປະເພດຢາບ້າ ຈຳນວນ 2.495 ມັດ ເທົ່າກັບ 4.990.000 ເມັດມີນ້ຳໜັກ 538,8 ກິໂລກຣາມ ແລະ ເຮໂລອິນ ຈຳນວນ 90 ຄູ່ເທົ່າກັບ 180 ແທ່ງ ນ້ຳໜັກ 69,5 ກິໂລກຣາມ ທີ່ຊຸກເຊືອງຢູ່ໃນຖົງຢາງ ແລ້ວຝັ່ງດິນໄວ້ໃນຄອກລົດໃຫຍ່. ດັ່ງນັ້ນ ເຈົ້າໜ້າທີ່ຈຶ່ງໄດ້ຢຶດຂອງກາງຢາເສບຕິດພ້ອມທັງກັກຕົວຜູ້ກ່ຽວໄປສອບສວນຂະຫຍາຍຜົນ.

ຜ່ານການສືບສວນ-ສອບສວນໃນເບື້ອງຕົ້ນຜູ້ກ່ຽວຮັບສາລະພາບວ່າ: ຢາເສບຕິດຈຳນວນດັ່ງກ່າວແມ່ນຂອງຜູ້ກ່ຽວແທ້ ເຊິ່ງເອົາມາຈາກຄົນສັນຊາດຈີນທີ່ມາສົ່ງໃຫ້ຢູ່ເຂດຊາຍແດນປະເທດມຽນມາ ແລ້ວເອົາໄປຊຸກເຊືອງໄວ້ກຽມເອົາໄປສົ່ງໃຫ້ຜູ້ສັ່ງຊື້ຢູ່ເຂດຊາຍແດນ ເພື່ອສົ່ງຕໍ່ປະເທດທີສາມ ແຕ່ຖືກເຈົ້າໜ້າທີ່ກວດຄົ້ນພົບເຫັນກ່ອນ. ຄະດີດັ່ງກ່າວ ກຳລັງດຳເນີນການສືບສວນ-ສອບສວນຂະຫຍາຍຜົນຫາກຸ່ມແກ້ງຄ້າຂາຍຢາເສບຕິດລາຍນີ້ ມາດຳເນີນຄະດີຕາມລະບຽບກົດໝາຍ

Off

Comments are closed.